(ສພຊ) – ກອງປະຊຸມກວດກາເນື້ອໃນຮອບດ້ານແຜ່ນພັບຂອງສະພາແຫ່ງຊາດ (ສພຊ) ແລະ ສະພາປະຊາຊົນຂັ້ນແຂວງ (ສພຂ) ແລະ ຄູ່ມືເລືອກຕັ້ງສະມາຊິກສະພາແຫ່ງຊາດ ແລະ ສະພາປະຊາຊົນຂັ້ນແຂວງ ໄດ້ຈັດຂຶ້ນໃນວັນທີ 25-26 ທັນວາ 2024 ທີ່ເມືອງວັງວຽງ ແຂວງວຽງຈັນ ໂດຍການເປັນປະທານຂອງທ່ານ ສຸບັນ ສະວະບຸດ ກຳມະການຄະນະປະຈຳສະພາແຫ່ງຊາດ, ປະທານກໍາມາທິການວຽກງານສະມາຊິກສະພາແຫ່ງຊາດ (ກວສຊ), ເຂົ້າຮ່ວມມີບັນດາທ່ານຮອງປະທານ ກວສຊ, ຮອງຫົວໜ້າສະຖາບັນຄົ້ນຄວ້ານິຕິກຳ ພ້ອມດ້ວຍຄະນະກົມ, ຄະນະພະແນກ ແລະ ພະ ນັກງານຈຳນວນໜຶ່ງພາຍໃນ ສພຊ.

ທ່ານ ສຸບັນ ສະວະບຸດ ກ່າວວ່າ: ຈຸດປະສົງຂອງກອງປະຊຸມ ແມ່ນເພື່ອຄວາມເປັນເອກະພາບໃນການກວດກາເນື້ອໃນຮອບດ້ານກ່ຽວກັບການ ສ້າງແຜ່ນພັບສະພາແຫ່ງຊາດ, ສະພາປະຊາຊົນຂັ້ນແຂວງ ແລະ ຄູ່ມືການເລືອກຕັ້ງສະມາຊິກສະພາແຫ່ງຊາດ ແລະ ສະພາປະຊາຊົນຂັ້ນແຂວງ ບັນລຸຜົນສຳເລັດຕາມແຜນການ; ເປັນການສືບຕໍ່ຄົ້ນຄວ້າສ້າງແຜ່ນພັບ ແລະ ປັບປຸງເນື້ອໃນໃຫ້ມີຄວາມສອດຄ່ອງກັບສະພາບຄວາມເປັນຈິງ ແລະ ກົດໝາຍທີ່ກຳນົດ; ສ້າງປຶ້ມຄູ່ມືການເລືອກຕັ້ງ ເພື່ອເປັນຂໍ້ມູນໃຫ້ແກ່ຄະນະກຳມະການເລືອກຕັ້ງແຕ່ລະຂັ້ນ ແລະ ພາກສ່ວນທີ່ກ່ຽວຂ້ອງ ຮັບຮູ້, ເຂົ້າໃຈຕໍ່ກັບຂັ້ນຕອນ ແລະ ບາດກ້າວການກະ ກຽມໃຫ້ແກ່ການເລືອກຕັ້ງສະມາຊິກສະພາ ແຫ່ງຊາດ ແລະ ສະພາປະຊາຊົນຂັ້ນແຂວງຢ່າງຖືກຕ້ອງ.

ຜູ້ເຂົ້າຮ່ວມກອງປະຊຸມໄດ້ຮັບຟັງບົດສະເໜີກ່ຽວກັບເນື້ອໃນແຜ່ນພັບຂອງສະພາແຫ່ງຊາດ ແລະ ສະພາປະຊາຊົນຂັ້ນແຂວງ, ຄູ່ມືການເລືອກຕັ້ງສະມາຊິກສະພາແຫ່ງຊາດ ແລະ ສະພາປະຊາ ຊົນຂັ້ນແຂວງ; ຈາກນັ້ນ, ກໍສົນທະນາແລກປ່ຽນຄວາມຄິດເຫັນເຊິ່ງກັນແລະກັນ ເພື່ອເຮັດໃຫ້ເນື້ອໃນມີຄວາມຊັດເຈນ ແລະ ຈະນຳໄປປັບປຸງໃຫ້ສຳເລັດຕາມແຜນການທີ່ວາງໄວ້.

ຄາດຄະເນຜົນໄດ້ຮັບພາຍຫຼັງແຜ່ນພັບ ແລະ ຄູ່ມືດັ່ງກ່າວ ຖືກຮັບຮອງຈາກຄະນະປະຈຳສະພາແຫ່ງຊາດ ຈະເຮັດໃຫ້ພາລະບົດບາດ, ສິດ ແລະ ໜ້າທີ່ ຂອງສະພາແຫ່ງຊາດ ແລະ ສະພາປະຊາຊົນຂັ້ນແຂວງ ໄດ້ຮັບການເຜີຍແຜ່ອອກສູ່ສັງຄົມຢ່າງກວ້າງຂວາງ ເປັນຕົ້ນ: 1) ເຮັດໃຫ້ຖັນແຖວສະມາຊິກພັກ, ພະນັກງານ, ລັດຖະກອນ, ທະຫານ, ຕຳຫຼວດ ແລະ ປະຊາຊົນລາວບັນດາເຜົ່າ ໄດ້ຮັບຮູ້, ເຊື່ອມຊຶມ ແລະ ເຂົ້າໃຈກ່ຽວກັບທີ່ຕັ້ງ, ພາລະບົດບາດ, ສິດ ແລະ ໜ້າທີ່ ຂອງ ສພຊ, ສພຂ; 2) ເປັນຄູ່ມືໃຫ້ບັນດາອົງການປົກຄອງແຕ່ ລະຂັ້ນໃນການກະກຽມ ແລະ ຮັບໃຊ້ການເລືອກຕັ້ງສະມາຊິກສະພາ ໃຫ້ຖືກຕ້ອງ, ສອດຄ່ອງກັບກົດໝາຍ.

ວັນທີ 27 ທັນວາ, ກຳມາທິການວຽກງານສະມາຊິກສະພາແຫ່ງຊາດ ໄດ້ສືບຕໍ່ຈັດກອງປະຊຸມເຝິກອົບຮົມວຽກງານເສນາທິການໃຫ້ແກ່ພະນັກງານ-ລັດຖະກອນຂອງຕົນ ເຊິ່ງໄດ້ຮັບຟັງການຕີລາຄາການປະຕິບັດພາລະບົດບາດ ໃນ 4 ພະແນກຂອງ ກວສຊ.

ກອງປະຊຸມຄັ້ງນີ້ ໄດ້ຮັບການສະໜັບສະໜູນຊ່ວຍເຫຼືອທາງດ້ານງົບປະມານຈາກໂຄງການສ້າງຄວາມເຂັ້ມແຂງໃຫ້ແກ່ສະພາແຫ່ງຊາດ ແລະ ສະ ພາປະຊາຊົນຂັ້ນແຂວງ ຫຼື ສະເຕັບສ໌ (STEPs) ໂດຍຜ່ານກອງເລຂາຄຸ້ມຄອງແຫຼ່ງທຶນຊ່ວຍເຫຼືອລ້າໃຫ້ແກ່ສະພາແຫ່ງຊາດ ສົມທົບກັບງົບປະມານຂອງຄະນະເລຂາທິການສະພາແຫ່ງຊາດ.

(ອານຸສອນ ພູມມີທອນ)