(ສພຊ) – ກອງປະຊຸມສະຫຼຸບຕີລາຄາການຈັດຕັ້ງປະຕິບັດວຽກງານໄລຍະຜ່ານມາ ຂອງໜ່ວຍແມ່ຍິງກົມກວດ ກາ ໄດ້ຈັດຂຶ້ນໃນຕອນບ່າຍວັນທີ 5 ກັນຍາຜ່ານມາ ພາຍໃຕ້ການເປັນປະທານຮ່ວມຂອງສະຫາຍ ນາງ ຫວັນໄຊ ຈັນ ທະລາ ເລຂາໜ່ວຍພັກກົມກວດກາ, ສະຫາຍ ນາງ ອຸດນາລີ ໄຊຍະສັກ ຄະນະບໍລິຫານງານສະຫະພັນແມ່ຍິງສະພາແຫ່ງຊາດ ແລະ ສະຫາຍ ນາງ ໜູຮັກ ດວງດີ ຮອງຫົວໜ້າໜ່ວຍແມ່ຍິງກົມກວດກາ ໂດຍມີບັນດາສະຫາຍຄະນະໜ່ວຍແມ່ຍິງທີ່ຂຶ້ນກັບຄະນະເລຂາທິການສະພາແຫ່ງຊາດ, ຕາງໜ້າອົງການຈັດຕັ້ງມະຫາຊົນພາຍໃນກົມກວດກາ ເຂົ້າຮ່ວມ.
ກອງປະຊຸມໄດ້ພິຈາລະນາ ແລະ ຮັບຮອງເອົາບົດສະຫຼຸບການເຄື່ອນໄຫວວຽກງານໄລຍະຜ່ານມາ (2018-2024) ແລະ ທິດທາງແຜນການ 5 ປີຕໍ່ໜ້າ ຂອງໜ່ວຍແມ່ຍິງກົມກວດກາ; ຜ່ານຂໍ້ຕົກລົງຮັບຮອງເອົາການແຕ່ງຕັ້ງຄະ ນະໜ່ວຍແມ່ຍິງກົມກວດກາຄື: ສະຫາຍ ນາງ ພັດສະດາກອນ ພົມມະຈັນ ເປັນຫົວໜ້າ, ສະຫາຍ ນາງ ໜູຮັກ ດວງດີ ເປັນຮອງຫົວໜ້າ. ນອກຈາກນັ້ນ, ກອງປະຊຸມຮຽກຮ້ອງມາຍັງຄະນະໜ່ວຍ ແລະ ສະມາຊິກພາຍໃນໜ່ວຍ ເອົາໃຈໃສ່ເຕົ້າໂຮມຄວາມສາມັກຄີ, ເຂົ້າຮ່ວມຂະບວນການຂອງອົງການຈັດຕັ້ງມະຫາຊົນຢ່າງຕັ້ງໜ້າ; ຕັ້ງໜ້າປະຕິບັດຂໍ້ແຂ່ງຂັນ 3 ດີ ຂອງແມ່ຍິງລາວ ໂດຍຕິດພັນກັບຂໍ້ແຂ່ງຂັນ “ຮັກຊາດ ແລະ ພັດທະນາ” ເຊິ່ງເປັນພື້ນຖານປັດໄຈສໍາຄັນເພື່ອເຮັດໃຫ້ໜ່ວຍແມ່ຍິງກົມກວດກາ ສາມາດຍາດໄດ້ຜົນງານດີເດັ່ນຂຶ້ນກວ່າເກົ່າ.
ຕອນທ້າຍຂອງກອງປະຊຸມ, ໄດ້ຮັບຟັງການໂອ້ລົມຈາກສະຫາຍ ນາງ ຫວັນໄຊ ຈັນທະລາ ເພື່ອເປັນທິດຊີ້ນຳຕໍ່ຄະນະໜ່ວຍແມ່ຍິງກົມກວດກາ ໃນການນໍາພາສະມາຊິກແມ່ຍິງພາຍໃນໜ່ວຍ ເຄື່ອນໄຫວຕາມພາລະບົດບາດ, ໜ້າທີ່ການເມືອງທີ່ໄດ້ຮັບມອບໝາຍ ໃນການຈັດຕັ້ງປະຕິບັດທິດທາງໜ້າທີ່ວຽກງານຈຸດສຸມໃນ 5 ປີຕໍ່ໜ້າ ໃຫ້ປະສົບຜົນສໍາເລັດຕາມລະດັບຄາດໝາຍທີ່ວາງໄວ້.
(ນາງ ໄຊໂສພາພອນ ມິ່ງມຸງຄຸນ)