ໃນວັນທີ 18 ມັງກອນ 2024 ທີ່ຫ້ອງປະຊຸມສະພາປະຊາຊົນແຂວງຄໍາມ່ວນ ໄດ້ສໍາເລັດກອງປະຊຸມບັ້ນດໍາເນີນການໜ່ວຍພັກປອດໃສ, ເຂັ້ມແຂງ, ໜັກແໜ້ນ ປະຈໍາປີ 2023 ໂດຍການເປັນປະທານຂອງສະຫາຍ ຄໍາສຸກ ວັນທະວົງສາ ເລຂາໜ່ວຍພັກສະພາປະຊາຊົນແຂວງຄໍາມ່ວນ ໂດຍເປັນກຽດເຂົ້າຮ່ວມຂອງສະຫາຍ ບຸນມີ ພິມມະສອນ ຮອງເລຂາພັກແຂວງ ປະທານສະພາປະຊາຊົນແຂວງຄໍາມ່ວນ, ສະຫາຍ ນາງ ບັງອອນ ໄຊຍະສິດ ກຳມະການປະຈໍາພັກແຂວງ ຮອງປະທານສະພາປະຊາຊົນແຂວງ, ສະຫາຍ ບົວພັນ ແສງຈັນ ກຳມະການພັກແຂວງ ຮອງປະທານສະພາປະຊາຊົນແຂວງ, ມີບັນດາທ່ານ ຄະນະຈັດຕັ້ງແຂວງ, ຄະນະກວດກາພັກ-ລັດແຂວງ, ຄະນະໜ່ວຍພັກ, ສະມາຊິກພັກ ເຂົ້າຮ່ວມທັງໝົດ 38 ສະຫາຍ, 13 ຍິງ ສະຫາຍ.

ວາລະດໍາເນີນກອງປະຊຸມໄດ້ຮັບຟັງການຜ່ານໃບສໍາຫຼວດ, ຕີລາຄາການຊີ້ນໍາ-ນຳພາຂອງຄະນະພັກ, ສະມາຊິກພັກ,  ພ້ອມທັງປະກອບຄຳເຫັນ, ຕີລາຄາຄຸນນະພາບ, ແບ່ງປະເພດຕົນເອງ ແລະ ສະມາຊິກພັກພາຍໃນໜ່ວຍ ຕາມ 5 ມາດຖານ ທີ່ກຳນົດໃນໃບສຳຫຼວດຂອງບຸກຄົນ ຕໍ່ການປະຕິບັດໜ້າທີ່ການເມືອງຄື: ດ້ານການເມືອງ-ແນວຄິດ, ດ້ານສະຕິການຈັດຕັ້ງ ແລະ ລະບຽບວິໄນພາຍໃນພັກ, ດ້ານແບບແຜນການນຳພາ ແລະ ວິທີເຮັດວຽກ, ດ້ານຄວາມຮັບຜິດຊອບຕໍ່ໜ້າທີ່ການເມືອງ ແລະ ໄປພ້ອມກັບການສຳຫຼວດ, ຕີລາຄາຈັດປະເພດຂອງສະມາຊິກພັກ, ຄະນະພັກ ແລະ ໜ່ວຍພັກ ຫຼັງຈາກນັ້ນຄະນະໜ່ວຍພັກກໍ່ຜ່ານຮ່າງບົດສະຫຼຸບກໍ່ສ້າງໜ່ວຍພັກປອດໃສ,ເຂັ້ມແຂງ,ໜັກແໜ້ນ ປະຈຳປີ 2023 ແລະ ທິດທາງແຜນການຄາດໝາຍສູ່ຊົນປີ 2024.

ໃນຕອນທ້າຍກອງປະຊຸມ ສະຫາຍ ບຸນມີ ພິມມະສອນ ຮອງເລຂາພັກແຂວງ ຍັງມີຄໍາເຫັນໂອ້ລົມ ແລະ ໃຫ້ທິດຊີ້ນໍາສະມາຊິກພັກທຸກສະຫາຍໃຫ້ເອົາໃຈໃສ່ໃນວຽກງານຊີວິດການເມືອງ, ວິຊາສະເພາະ, ແກ້ໄຂຈຸດອ່ອນຂອງຕົນເອງ ແລະ ໝູ່ຄະນະສ່ອງແສງເພື່ອສົ່ງເສີມ ແລະ ແກ້ໄຂໃຫ້ມີບາດກ້າວໃໝ່ໃຫ້ດີກວ່າເກົ່າ, ເອົາໃຈໃສ່ຈັດຕັ້ງປະຕິບັດວຽກງານ, ຜັນຂະຫຍາຍມະຕິຕ່າງໆ ທີ່ໄດ້ຮັບມອບໝາຍໃຫ້ສຳເລັດເພື່ອຮັກສາໃຫ້ໄດ້ໜ່ວຍພັກປອດໃສ, ເຂັ້ມແຂງ, ໜັກແໜ້ນ.

ໂດຍ: ເອື້ອ ມະໂນສິງ