ໃນໄລຍະດໍາເນີນກອງປະຊຸມສະໄໝສາມັນເທື່ອທີ 2 ຂອງສະພາແຫ່ງຊາດ (ສພຊ) ຊຸດທີ IX, ທ່ານ ຈະເລີນ ເຍຍປາວເຮີ ປະທານກໍາມາທິການກົດໝາຍ (ກກໝ) ທັງເປັນຮອງປະທານ ສພຊ ໄດ້ໃຫ້ສໍາພາດໃນວັນທີ 5 ພະຈິກຜ່ານມາ ກ່ຽວກັບການຈັດຕັ້ງປະຕິບັດວຽກງານໃນໄລຍະ 1 ປີຜ່ານມາ ວ່າ: ກໍາມາທິການກົດໝາຍ ແມ່ນກົງຈັກໜຶ່ງ ຂອງສະພາແຫ່ງຊາດ ເຊິ່ງໄດ້ຖືກຮັບຮອງໃນກອງປະຊຸມຄັ້ງປະຖົມມະລືກ ຂອງສະພາແຫ່ງຊາດ ປະກອບດ້ວຍ ສະມາຊິກສະພາແຫ່ງຊາດທີ່ເປັນກໍາມະການສັງກັດ ຈໍານວນ 25 ທ່ານ ຍິງ 6 ທ່ານ ແລະ ມີ 2 ກົມ ທີ່ເປັນເສນາທິການດ້ານວິຊາສະເພາະ ຄື: ກົມກົດໝາຍ ແລະ ກົມຕິດຕາມກວດກາ, ໂຄສະນາ ແລະ ຕີຄວາມໝາຍກົດໝາຍ.

1. ການປະຕິບັດພາລະບົດບາດ ຂອງກໍາມາທິການ
2. ການເປັນເສນາທິການໃນການປະຕິບັດພາລະບົດບາດດ້ານນິຕິບັນຍັດ

ກ. ວຽກງານສ້າງ ແລະ ປັບປຸງກົດໝາຍ

ກກໝ ໃນນາມເປັນເສນາທິການໃຫ້ແກ່ຄະນະປະຈຳສະພາແຫ່ງຊາດ ກໍຄື ສພຊ ກ່ຽວກັບວຽກງານສ້າງ ແລະ ປັບປຸງກົດໝາຍ ໃນໜຶ່ງປີຜ່ານມາ ໄດ້ຈັດຕັ້ງປະຕິບັດໜ້າທີ່ຂອງຕົນ ດ້ວຍຄວາມຮັບຜິດຊອບສູງ ເປັນໃຈກາງປະສານສົມທົບກັບບັນດາກຳມາທິການຂອງ ສພຊ ແລະ ພາກສ່ວນທີ່ກ່ຽວຂ້ອງ ໃນການກຳນົດແຜນການສ້າງ ແລະ ປັບປຸງກົດໝາຍ ປະຈໍາ 5 ປີ ຂອງ ສພຊ ຊຸດທີ IX (2021-2025) ມີທັງໝົດ 96 ສະບັບ, ໃນນັ້ນ, ມີກົດໝາຍສ້າງໃໝ່ 38 ສະບັບ ແລະ ກົດໝາຍປັບປຸງ 58 ສະບັບ; ແຜນການສ້າງ ແລະ ປັບປຸງກົດໝາຍ ປະຈຳປີ 2021 ທັງໝົດຈໍານວນ 13 ສະບັບ ທີ່ຈະນຳເຂົ້າພິຈາລະນາ, ຮັບຮອງເອົາໃນກອງປະຊຸມສະໄໝສາມັນເທື່ອທີ 2 ຂອງ ສພຊ ຊຸດທີ IX ເຊິ່ງຜ່ານການຈັດຕັ້ງປະຕິບັດຕົວຈິງສາມາດນຳເຂົ້າພິຈາລະນາຮັບຮອງເອົາໃນກອງປະຊຸມສະໄໝສາມັນເທື່ອທີ 2 ຈຳນວນ 11 ສະບັບ ເທົ່າກັບ 84,61% ເຊິ່ງບໍ່ໄດ້ຕາມແຜນການ 2 ສະບັບຄື: ກົດໝາຍວ່າດ້ວຍການແກ້ໄຂຄຳຮ້ອງທຸກ (ສະບັບປັບປຸງ) ແລະ ກົດໝາຍວ່າດ້ວຍການກວດກາລັດ (ສະບັບປັບປຸງ) ເຊິ່ງມີລາຍຊື່ກົດໝາຍ ດັ່ງນີ້:

• ກົດໝາຍສ້າງໃໝ່ 4 ສະບັບ: ຮ່າງກົດໝາຍວ່າດ້ວຍຍານພາຫະນະທາງບົກ; ຮ່າງກົດໝາຍວ່າດ້ວຍຊາຍແດນແຫ່ງຊາດ; ຮ່າງກົດໝາຍວ່າດ້ວຍເຕັກໂນໂລຊີລະດັບສູງ ແລະ ຮ່າງກົດໝາຍວ່າດ້ວຍການສຳຫລວດວັດແທກ ແລະ ສ້າງແຜນທີ່.
• ກົດໝາຍປັບປຸງ 7 ສະບັບ: ຮ່າງກົດໝາຍວ່າດ້ວຍລັດຖະບານ; ຮ່າງກົດໝາຍວ່າດ້ວຍການປັບປຸງບາງມາດຕາຂອງກົດໝາຍວ່າດ້ວຍງົບປະມານແຫ່ງລັດ; ຮ່າງກົດໝາຍວ່າດ້ວຍການສ້າງນິຕິກຳ; ຮ່າງກົດໝາຍວ່າດ້ວຍການປະຕິບັດຄຳຕັດສິນຂອງສານ; ຮ່າງກົດໝາຍວ່າດ້ວຍການຄວບຄຸມຢາສູບ; ຮ່າງກົດໝາຍວ່າດ້ວຍການໂທລະຄົມມະນາຄົມ ແລະ ຮ່າງກົດໝາຍວ່າດ້ວຍມໍຣະດົກແຫ່ງຊາດ.
• ໄດ້ຄົ້ນຄວ້າສ້າງ ແລະ ປັບປຸງກົດໝາຍ ຈໍານວນ 2 ສະບັບ ທີ່ນໍາເຂົ້າພິຈາລະນາຮັບຮອງເອົາໃນກອງປະຊຸມສະ ໄໝວິສາມັນເທື່ອທີ 1 ຂອງສະພາແຫ່ງຊາດ ຊຸດທີ IX ຄື: ກົດໝາຍວ່າດ້ວຍການປັບປຸງບາງມາດຕາຂອງກົດໝາຍວ່າດ້ວຍຢາເສບຕິດ ແລະ ກົດໝາຍວ່າດ້ວຍການປັບປຸງບາງມາດຕາຂອງກົດໝາຍກ່ຽວກັບສ່ວຍສາອາກອນ.

ສຳລັບສະມາຊິກສະພາແຫ່ງຊາດ ທີ່ສັງກັດ ກກໝ ກໍໄດ້ເຂົ້າຮ່ວມກອງປະຊຸມທາບທາມຮ່າງກົດໝາຍ ຢູ່ທ້ອງຖິ່ນຕົນ ແລະ ຄົ້ນຄວ້າປະກອບຄຳຄິດຄຳເຫັນໃນກອງປະຊຸມສະໄໝວິສາມັນເທື່ອທີ 1 ແລະ ກອງປະຊຸມສະໄໝສາມັນເທື່ອທີ 2 ຂອງ ສພຊ ຊຸດທີ IX ຢ່າງມີຄວາມຮັບຜິດຊອບສູງ.

ນອກຈາກວຽກງານສ້າງ ແລະ ປັບປຸງກົດໝາຍແລ້ວ ກກໝ ຍັງໄດ້ຄົ້ນຄວ້າປະກອບຄຳເຫັນຕໍ່ການພິຈາລະນາການໃຫ້ສັດຕະຍາບັນແກ່ສົນທິສັນຍາວ່າດ້ວຍຄວາມປອດໄພ ແລະ ສຸຂະພາບແຮງງານ ສະບັບເລກທີ 155 ແລະ ສົນທິສັນຍາວ່າດ້ວຍຂອບແຜນການສົ່ງເສີມຄວາມປອດໄພ ແລະ ສຸຂະພາບແຮງງານ ສະບັບເລກທີ 187; ປະກອບຄຳເຫັນໃສ່ ຮ່າງມະຕິຂອງຄະນະປະຈຳສະພາແຫ່ງຊາດວ່າດ້ວຍການມອບສິດໃຫ້ກະຊວງການເງິນລົງນາມ ແລະ ເຫັນດີຍົກເວັ້ນການປະຕິບັດບາງມາດຕາຂອງກົດໝາຍທີ່ກ່ຽວຂ້ອງກັບສັນຍາເພີ່ມເຕີມສັນຍາສຳປະທານ 2021 (Side Agreement) ແລະ ສັນຍາໂອນສິດ (Assignment Agreement) ຂອງໂຄງການໄຟຟ້າພະລັງງານນ້ຳໄຊຍະບູລີ; ຮ່າງມະຕິຂອງຄະນະປະຈຳສະພາແຫ່ງຊາດວ່າດ້ວຍການຮັບຮອງ ແລະ ຍົກເວັ້ນການປະຕິບັດບາງມາດຕາຂອງກົດໝາຍ ທີ່ກ່ຽວຂ້ອງກັບໂຄງການເຂື່ອນໄຟຟ້າພະລັງງານນ້ຳຫລວງພະບາງ; ຄົ້ນຄວ້າເນື້ອໃນຂົງເຂດນິຕິບັນຍັດ ແລະ ຕຸລາການ (ສ້າງລະບົບກົດໝາຍໃຫ້ນັບມື້ອຸດົມສົມບູນ); ຄົ້ນຄວ້າສ້າງຮ່າງມະຕິຂອງຄະນະປະຈຳສະພາແຫ່ງຊາດວ່າດ້ວຍການຈັດ ຕັ້ງ ແລະ ການເຄື່ອນໄຫວຂອງກຳມາທິການກົດໝາຍ ແລະ ຊີ້ນຳການຄົ້ນຄວ້າສ້າງຮ່າງຂໍ້ຕົກລົງຂອງຄະນະເລຂາທິການສະພາແຫ່ງຊາດວ່າດ້ວຍການຈັດຕັ້ງ ແລະ ການເຄື່ອນໄຫວຂອງກົມທີ່ເປັນເສນາທິການ.

ຂ. ວຽກງານໂຄສະນາເຜີຍແຜ່ ລັດຖະທໍາມະນູນ ແລະ ກົດໝາຍ

ກກໝ ໄດ້ສົມທົບກັບພາກສ່ວນຕ່າງໆທີ່ກ່ຽວຂ້ອງ ເພື່ອກະກຽມ ແລະ ຈັດຕັ້ງສະເຫລີມສະຫລອງວັນລັດຖະທໍາມະນູນແຫ່ງຊາດ ຄົບຮອບ 30 ປີ ເຊິ່ງປະກອບມີບັນດາເອກະສານ ດັ່ງນີ້: ມະຕິຂອງກົມການເມືອງສູນກາງພັກວ່າດ້ວຍການແຕ່ງຕັ້ງຄະນະຮັບຜິດຊອບ, ຄຳສັ່ງແນະນໍາຂອງຄະນະເລຂາທິການສູນກາງພັກ, ມະຕິຂອງຄະນະປະຈຳສະພາແຫ່ງຊາດວ່າດ້ວຍການແຕ່ງຕັ້ງອະນຸກຳມະການ ແລະ ກອງເລຂາ, ຄຳແນະນໍາຂອງຄະນະປະຈຳສະພາແຫ່ງຊາດ, ແຜນແບ່ງວຽກພາຍໃນຄະນະຮັບຜິດຊອບ, ແຜນການກະກຽມ ແລະ ດຳເນີນງານ, ແຜນດຳເນີນງານລະອຽດ, ບົດສູນທອນພົດຂອງ​ເລຂາທິການ​ໃຫຍ່, ປະທານ​ປະ​ເທດ ແຫ່ງ ສປປລາວ, ບົດປາໄສກ່າວໄຂງານໂຮມຊຸມນຸມຂອງ​ປະທານ​ສະພາ​ແຫ່ງ​ຊາດ, ບົດຄວາມຊົມເຊີຍວັນລັດຖະທໍາມະນູນແຫ່ງຊາດ ຄົບຮອບ 30 ປີ, ບົດນຳແນວຄິດຊີ້ນຳປະທານໄກສອນພົມວິຫານ ກ່ຽວກັບການສ້າງລັດຖະທໍາມະນູນ ແຫ່ງ ສປປລາວ, ເອກະສານ​ປາຖະກະຖາ, ເອກະສານຖາມ-ຕອບ ກ່ຽວກັບລັດຖະທໍາມະນູນ ແຫ່ງ ສປປລາວ, ການເຕີບໃຫຍ່ຂະຫຍາຍຕົວຂອງສະພາແຫ່ງຊາດ ພາຍໃຕ້ລັດຖະທຳມະນູນ ແຫ່ງ ສປປລາວ.

ການກະກຽມ ງານໂຮມຊຸມນຸມໄດ້ດໍາເນີນຢ່າງມີຜົນສໍາເລັດຕາມລະດັບຄາດໝາຍ ໂດຍສະເພາະອັນພົ້ນເດັ່ນແມ່ນບົດສູນທອນພົດຂອງສະຫາຍ ເລຂາທິການໃຫຍ່, ປະທານປະເທດ ໄດ້ດຶງດູດຄວາມສົນໃຈທົ່ວພັກ, ທົ່ວລັດ, ກໍາລັງປະກອບອາວຸດ ແລະ ທົ່ວປວງຊົນ, ການເຂົ້າຮ່ວມຂອງບັນດາສະຫາຍກົມການເມືອງ, ຄະນະເລຂາທິການສູນກາງພັກ ແລະ ການນໍາຂັ້ນສູງ ລວມທັງພະນັກງານບໍານານຂັ້ນສູງ ໄດ້ເຮັດໃຫ້ບັນຍາກາດຂອງງານໂຮມຊຸມນຸມ ມີຄວາມຄຶກຄື້ນ ແລະ ເລິກເຊິ່ງ ການຖ່າຍທອດສົດ ຜ່ານສື່ຕ່າງໆ ໄດ້ຮັບຄວາມສົນໃຈໃນທົ່ວສັງຄົມ ເຊິ່ງໄດ້ສັງລວມເກັບກໍາຂໍ້ມູນມີ 33 ພາກສ່ວນ ຢູ່ສູນກາງ 15.168 ຄົນ, ນະຄອນຫລວງ ແລະ 17 ແຂວງຢູ່ທ້ອງຖິ່ນ 1.278.347 ຄົນ ຕິດຕາມຮັບຊົມ ແລະ ຮັບຟັງການຈັດປາຖະກະຖາ ສະເຫລີມສະຫລອງວັນລັດຖະທໍາມະນູນແຫ່ງຊາດ ຄົບຮອບ 30 ປີ ຢູ່ສູນກາງມີ 27ພາກສ່ວນ 3.262 ຄົນ ຍິງ 672 ຄົນ ແລະ ຢູ່ທ້ອງຖິ່ນ 16 ແຂວງ ມີ 11.703 ຄົນ.

ນອກຈາກນັ້ນ, ປະທານ ກກໝ ຍັງໄດ້ຮັບເຊີນໄປປາຖະກະຖາ ຢູ່ບັນດາກະຊວງ, ອົງການ ເພື່ອເລົ່າມູນເຊື້ອປະຫວັດສາດ ແລະ ຫວນຄືນເຖິງເຫດການປະຫວັດສາດ ໃນການສ້າງລັດຖະທຳມະນູນ ແລະ ກົດໝາຍຂອງ ສປປລາວ, ພ້ອມທັງໂຄສະນາເຜີຍແຜ່ລັດຖະທຳມະນູນ ແລະ ກົດໝາຍ ໄປພ້ອມໆກັນ ຈຳນວນ 10 ຄັ້ງ.

ກໍາມະການທີ່ສັງກັດ ກກໝ ຢູ່ແຕ່ລະເຂດເລືອກຕັ້ງ ໄດ້ເປັນເຈົ້າການລົງພົບປະຜູ້ມີສິດເລືອກຕັ້ງ ເພື່ອເຜີຍແຜ່ຜົນສໍາເລັດ ກອງປະຊຸມຄັ້ງປະຖົມມະລືກ ແລະ ກອງປະຊຸມສະໄໝວິສາມັນ ເທື່ອທີ 1 ຂອງ ສພຊ ຊຸດທີ IX ແລະ ກອງປະຊຸມຄັ້ງປະຖົມມະລືກ ຊຸດທີ II ຂອງສະພາປະຊາຊົນຂັ້ນແຂວງ ໂດຍຕິດພັນກັບການໂຄສະນາເຜີຍແຜ່ກົດໝາຍ ຈຳນວນ 28 ຄັ້ງ, ລວມມີ 262 ຈຸດ ມີຜູ້ເຂົ້າຮ່ວມທັງໝົດ 30.017 ຄົນ ຍິງ 12.352 ຄົນ.

ຄ. ວຽກງານຕີຄວາມໝາຍ, ອະທິບາຍກົດໝາຍ ແລະ ສັງລວມ

ກກໝ ໄດ້ຄົ້ນຄວ້າການສະເໜີໃຫ້ຕີຄວາມໝາຍ ແລະ ຈັດຕັ້ງປະຕິບັດເນື້ອໃນມາດຕາ 120 ວັກທີ 1 ຂອງກົດໝາຍວ່າດ້ວຍທີ່ດິນ ແລະ ມາດຕາ 42 ຂອງກົດໝາຍວ່າດ້ວຍການສົ່ງເສີມການລົງທຶນ ແລະ ມາດຕາ 12 ວັກ 3 ຂອງກົດໝາຍວ່າດ້ວຍຄອບຄົວ.

ໄດ້ຄົ້ນຄວ້າປັບປຸງມະຕິຂອງຄະນະປະຈໍາສະພາແຫ່ງຊາດ ສະບັບເລກທີ 0133/ຄປຈ, ລົງວັນທີ 4 ທັນວາ 2013  ວ່າດ້ວຍການຕີຄວາມໝາຍກົດໝາຍ.

2. ການເປັນເສນາທິການໃນການປະຕິບັດພາລະບົດບາດຕົກລົງບັນຫາສໍາຄັນພື້ນຖານຂອງປະເທດຊາດ

ກກໝ ກໍຄືກຳມະການສັງກັດໄດ້ປະຕິບັດໜ້າທີ່ການເມືອງຂອງຕົນ ຕາມທີ່ໄດ້ກຳນົດໄວ້ໃນລັດຖະທຳມະນູນ ແລະ ກົດໝາຍ ໂດຍເຂົ້າຮ່ວມກອງປະຊຸມຄັ້ງປະຖົມມະລືກ, ກອງປະຊຸມສະໄໝວິສາມັນເທື່ອທີ 1 ແລະ ກອງປະຊຸມສະໄໝສາມັນເທື່ອທີ 2 ຂອງ ສພຊ ຊຸດທີ IX ໂດຍປະຕິບັດສິດ ແລະ ໜ້າທີ່ ຕາມທີ່ໄດ້ກຳນົດໄວ້ໃນລັດຖະທຳມະນູນ ແລະ ກົດໝາຍ ດ້ວຍຄວາມຮັບຜິດຊອບສູງ ໃນການຄົ້ນຄວ້າ, ພິຈາລະນາ ແລະ ລົງຄະແນນສຽງຮັບຮອງເອົາບັນຫາສຳຄັນພື້ນຖານຂອງປະເທດຊາດ ເປັນຕົ້ນເລືອກຕັ້ງປະທານສະພາແຫ່ງຊາດ, ເລືອກຕັ້ງປະທານປະເທດ ແລະ ຮອງປະທານປະເທດ ແຫ່ງ ສປປລາວ, ເລືອກຕັ້ງນາຍົກລັດຖະມົນຕີ ແຫ່ງ ສປປລາວ, ເລືອກຕັ້ງປະທານສານປະຊາຊົນສູງສຸດ, ເລືອກຕັ້ງຫົວໜ້າອົງການໄອຍະການປະຊາຊົນສູງສຸດ, ເລືອກຕັ້ງປະທານອົງການກວດສອບແຫ່ງລັດ, ເລືອກຕັ້ງປະທານອົງການກວດກາແຫ່ງລັດ, ພິຈາລະນາຮັບຮອງເອົາກົງຈັກ ແລະ ບຸກຄະລາກອນຂອງສະພາແຫ່ງຊາດ, ພິຈາລະນາຮັບຮອງເອົາກົງຈັກລັດຖະບານ ແລະ ສະມາຊິກລັດຖະບານ, ພິຈາລະນາຮັບຮອງເອົາການຈັດຕັ້ງປະຕິບັດແຜນພັດທະນາເສດຖະກິດສັງຄົມ ແຫ່ງຊາດ 5 ປີ ຄັ້ງທີ VIII (2016-2020) ແລະ ທິດທາງແຜນການ 5 ປີ ຄັ້ງທີ IX (2021-2025), ພິຈາລະນາຮັບຮອງເອົາການຈັດຕັ້ງປະຕິບັດແຜນງົບປະມານແຫ່ງລັດ 5 ປີ ຄັ້ງທີ VIII (2016-2020) ແລະ ທິດທາງແຜນງົບປະມານແຫ່ງລັດ 5 ປີ ຄັ້ງທີ IX (2021-2025), ພິຈາລະນາຮັບຮອງເອົາບົດລາຍງານການເຄື່ອນໄຫວວຽກງານ 5 ປີ (2016-2020) ແລະ ທິດທາງການເຄື່ອນໄຫວວຽກງານ 5 ປີ (2020-2025) ຂອງສານປະຊາຊົນສູງສຸດ, ພິຈາລະນາຮັບຮອງເອົາບົດລາຍງານການເຄື່ອນໄຫວວຽກງານ 5 ປີ (2016-2020) ແລະ ທິດທາງການເຄື່ອນໄຫວວຽກງານ 5 ປີ (2020-2025) ຂອງອົງການໄອຍະການປະຊາຊົນສູງສຸດ, ພິຈາລະນາຮັບຮອງເອົາບົດລາຍງານການເຄື່ອນໄຫວວຽກງານ 5 ປີ (2016-2020) ແລະ ທິດທາງການເຄື່ອນໄຫວວຽກງານ 5 ປີ (2020-2025) ຂອງອົງການກວດສອບແຫ່ງລັດ, ພິຈາລະນາຮັບຮອງເອົາບົດລາຍງານການເຄື່ອນໄຫວວຽກງານ 5 ປີ (2016-2020) ແລະ ທິດທາງການເຄື່ອນໄຫວວຽກງານ 5 ປີ (2020-2025) ຂອງອົງການກວດກາແຫ່ງລັດ ແລະ ພິຈາລະນາຮັບຮອງເອົາທິດທາງແຜນການເຄື່ອນໄຫວວຽກງານ 5 ປີ (2021-2025) ຂອງ ສພຊ ຊຸດທີ IX, ບົດລາຍງານຂອງລັດຖະບານ ກ່ຽວກັບການແກ້ໄຂຄວາມຫຍຸ້ງຍາກທາງດ້ານເສດຖະກິດການເງິນ, ບົດລາຍງານກ່ຽວກັບການແກ້ໄຂບັນຫາຢາເສບຕິດ ແລະ ບົດລາຍງານກ່ຽວກັບສະພາບການແຜ່ລະບາດຂອງພະຍາດໂຄວິດ-19 ແລະ ມາດຕະການແກ້ໄຂຜົນກະທົບຈາກການແຜ່ລະບາດຂອງພະຍາດດັ່ງກ່າວ.

ນອກຈາກນັ້ນ, ຄະນະນຳ ກກໝ ແລະ ສະມາຊິກສະພາແຫ່ງຊາດ ທີ່ສັງກັດ ກກໝ ຍັງໄດ້ເຂົ້າຮ່ວມກອງປະຊຸມຄັ້ງປະຖົມມະລືກຂອງສະພາປະຊາຊົນຂັ້ນແຂວງ ຊຸດທີ II ໂດຍໄດ້ປະຕິບັດສິດ ແລະ ໜ້າທີ່ ຂອງສະມາສິດສະພາແຫ່ງຊາດ ຢ່າງຄົບຖ້ວນ ໃນການຄົ້ນຄວ້າ, ພິຈາລະນາ ແລະ ລົງຄະແນນສຽງຮັບຮອງເອົາບັນຫາສຳຄັນຕ່າງໆ ທີ່ນຳມາພິຈາລະນາ ແລະ ຮັບຮອງເອົາໃນກອງປະຊຸມ ຕາມພາລະບົດບາດ, ສິດ ແລະ ໜ້າທີ່ ທີ່ກຳນົດໄວ້ໃນລັດຖະທຳມະນູນ ແລະ ກົດໝາຍ.

3. ການເປັນເສນາທິການໃນການປະຕິບັດພາລະບົດບາດຕິດຕາມກວດກາ

ກກໝ ໄດ້ປະຕິບັດຕາມ ມາດຕາ 34 ຂອງກົດໝາຍວ່າດ້ວຍການຕິດຕາມກວດກາຂອງສະພາແຫ່ງຊາດ ແລະ ສະພາປະຊາຊົນຂັ້ນແຂວງ ຕິດຕາມເປົ້າ ໃນການປະຕິບັດ ມະຕິຮັບຮອງເອົາແຜນການຕິດຕາມກວດກາກ່ຽວກັບການອອກນິຕິກໍາໃຕ້ກົດໝາຍ ສະບັບເລກທີ 018/ສພຊ, ລົງວັນທີ 28 ພະຈິກ 2016 ໃນນັ້ນ ຮັບຮອງເອົາ 516 ມາດຕາຂອງກົດໝາຍທີ່ໃຫ້ອອກລະບຽບການຕ່າງຫາກ ເຊິ່ງມາຮອດປັດຈຸບັນ ກກໝ ໄດ້ຕິດຕາມຊຸກຍູ້ບັນດາກະຊວງ, ອົງການເຮັດສໍາເລັດແລ້ວ 468 ມາດຕາ ຍັງຄ້າງ 48 ມາດຕາ.

ຕິດຕາມກວດກາບັນດາກົດໝາຍ ທີ່ກອງປະຊຸມສະໄໝສາມັນເທື່ອທີ 2 ຫາ 10 ຂອງ ສພຊ ຊຸດທີ VIII ໄດ້ຮັບຮອງເອົາ ເຊິ່ງມີກົດໝາຍຈໍານວນ 68 ສະບັບ ໃນນັ້ນ, ມີ 258 ມາດຕາ ທີ່ກຳນົດໃຫ້ອອກເປັນລະບຽບການຕ່າງຫາກ ເຊິ່ງໄດ້ອອກແລ້ວ 30 ມາດຕາ ແລະ ຍັງເຫລືອ 228 ມາດຕາ.

ໄດ້ສໍາເລັດການສັງລວມການອອກນິຕິກໍາຂັ້ນທ້ອງຖິ່ນ ປະຈໍາປີ 2020 ຕາມການລາຍງານຂອງສະພາປະຊາຊົນຂັ້ນແຂວງ ແລະ ໄດ້ສ້າງແຜນການຕິດຕາມກວດກາຂອງ ກກໝ ປະຈຳປີ 2022.

ກຳມະການສັງກັດ ກກໝ ໄດ້ປະສານສົມທົບກັບຄະນະກຳມະການຍຸຕິທຳ, ປກຊ-ປກສ ຂອງສະພາປະຊາຊົນຂັ້ນແຂວງ, ພະແນກການທີ່ກ່ຽວຂ້ອງ ແລະ ເມືອງ ໄດ້ເອົາໃຈໃສ່ຕິດຕາມກວດກາ ແລະ ຊຸກຍູ້ການປະຕິບັດລັດຖະທຳມະນູນ, ກົດໝາຍ ແລະ ນິຕິກຳໃຕ້ກົດໝາຍ ໄດ້ 7 ຄັ້ງ.

ນອກຈາກນີ້ ກກໝ ໄດ້ເອົາໃຈໃສ່ຊີ້ນໍາການຜັນຂະຫຍາຍແນວທາງຕ່າງປະເທດຂອງພັກ, ແຜນການຂອງສະພາແຫ່ງຊາດ ມາເປັນແຜນການເຄື່ອນໄຫວວຽກງານການຕ່າງປະເທດຂອງ ກກໝ ຜ່ານຮູບການຕ່າງໆ ຕາມພາລະບົດບາດຂອງຕົນ ເຊິ່ງໜຶ່ງປີຜ່ານມາ ສາມາດເຄື່ອນໄຫວວຽກງານຕ່າງປະເທດໄດ້ 10 ຄັ້ງ ເຊັ່ນ:  ຕ້ອນຮັບການເຂົ້າຢ້ຽມຂ່ຳນັບ 2 ຄັ້ງ ຂອງທ່ານ ປີເຕີ ເຮມ໋ອນ ເອກອັກຄະລັດຖະທູດ ສ. ອາເມລິກາ ປະຈຳ ສປປລາວ; ທ່ານ ປາໂປຣ ອັງໂຕນີໂອ ໂຣດີເກສ ວິດານ ເອກອັກຄະລັດຖະທູດ ສ. ກູບາ ປະຈຳ ສປປລາວ; ເຂົ້າຮ່ວມກອງປະຊຸມລະດັບຕ່າງໆ ແລະ ກອງປະຊຸມຮູບແບບທາງໄກ 8 ຄັ້ງ.

1. ສາເຫດທີ່ພາໃຫ້ມີຜົນສໍາເລັດ, ດ້ານຄົງຄ້າງ ແລະ ສາເຫດທີ່ພາໃຫ້ມີດ້ານອ່ອນ
2. ສາເຫດທີ່ພາໃຫ້ມີຜົນສໍາເລັດ

ກກໝ ໄດ້ຮັບການຊີ້ນຳຢ່າງໃກ້ຊິດຈາກຄະນະປະຈຳສະພາແຫ່ງຊາດ ແລະ ເອົາໃຈໃສ່ຊີ້ນຳ ກົມທີ່ເປັນເສນາທິການ ແລະ ຂະແໜງການທີ່ເປັນເສນາທິການໃນການຈັດຕັ້ງປະຕິບັດໜ້າທີ່ວຽກງານສຳເລັດຕາມແຜນການທີ່ວາງໄວ້.

ກກໝ ໄດ້ເອົາໃຈໃສ່ຊີ້ນໍາຢ່າງໃກ້ຊິດດ້ານການເມືອງ-ແນວຄິດ, ໄດ້ແບ່ງງານ, ແບ່ງຄວາມຮັບຜິດຊອບພາຍໃນຄະນະນໍາ ແລະ ພະນັກງານ-ລັດຖະກອນ ທີ່ເປັນເສນາທິການຢ່າງຈະແຈ້ງ ພ້ອມທັງຕິດຕາມກວດກາການປະຕິບັດໜ້າທີ່ວຽກງານຢ່າງເປັນປົກກະຕິ.

ກຳມະການສັງກັດ ກກໝ ກໍຄືເສນາທິການຊ່ວຍວຽກ ທີ່ປະຈຳຢູ່ແຕ່ລະເຂດເລືອກຕັ້ງ ກໍໄດ້ເອົາໃຈໃສ່ ແລະ ມີຄວາມຮັບຜິດຊອບສູງ ຕໍ່ການປະຕິບັດໜ້າທີ່ວຽກງານທີ່ຕົນຮັບຜິດຊອບ.

2. ຕີລາຄາດ້ານຄົງຄ້າງ

ຄຽງຄູ່ກັບດ້ານດີ ທີ່ກ່າວມາຂ້າງເທິງນັ້ນ ກໍຍັງປາສະຈາກບໍ່ໄດ້ດ້ານຄົງຄ້າງ ດັ່ງນີ້:

• ການຕິດຕາມກວດກາ ການປະຕິບັດລັດຖະທຳມະນູນ, ກົດໝາຍ ແລະ ການອອກນິຕິກຳໃຕ້ກົດໝາຍ ຍັງບໍ່ສາມາດຈັດຕັ້ງປະຕິບັດໄດ້ ຕາມແຜນການ;
• ການໂຄສະນາເຜີຍແຜ່ກົດໝາຍ ຍັງປະຕິບັດບໍ່ໄດ້ຕາມແຜນການທີ່ກໍານົດ;
• ກົດໝາຍທີ່ໄດ້ພິຈາລະນາຮັບຮອງໃນກອງປະຊຸມສະໄໝວິສາມັນເທື່ອທີ 1 ແລະ ກອງປະຊຸມສະໄໝສາມັນເທື່ອທີ 2 ຂອງ ສພຊ ຊຸດທີ IX ຍັງມີລັກສະນະຟ້າວຟັ່ງແລ່ນນໍາເວລາ, ບໍ່ທັນຮັບປະກັນຄຸນນະພາບເທົ່າທີ່ຄວນ.

2. ສາເຫດທີ່ພາໃຫ້ມີດ້ານຄົງຄ້າງ

ຍ້ອນສະພາບການແຜ່ລະບາດຂອງພະຍາດໂຄວິດ-19 ເປັນວົງກ້ວາງ ຢູ່ພາຍໃນປະເທດ ເຊິ່ງເຮັດໃຫ້ສົ່ງຜົນກະທົບຕໍ່ການຈັດຕັ້ງປະຕິບັດໜ້າທີ່ວຽກງານ ກກໝ ບໍ່ສາມາດບັນລຸໄດ້ຕາມແຜນການທີ່ໄດ້ກຳນົດໄວ້; ການປະສານສົມທົບ ແລະ ຄວາມເປັນເຈົ້າການຂອງພາກສ່ວນກ່ຽວຂ້ອງ ໃນການຮຽບຮຽງຄືນບັນດາກົດໝາຍທີ່ໄດ້ຮັບຮອງໃນກອງປະຊຸມສະໄໝວິສາມັນເທື່ອທີ 1 ຂອງ ສພຊ ຊຸດທີ IX ຕາມການປະກອບຄຳເຫັນຂອງຜູ້ແທນນັ້ນ ມີຄວາມຊັກຊ້າ.

3. ບົດຮຽນທີ່ຖອດຖອນໄດ້

ຜ່ານການຈັດຕັ້ງການປະຕິບັດໜ້າທີ່ວຽກງານໃນໜຶ່ງປີຜ່ານມາ ສາມາດຖອດຖອນບົດຮຽນໄດ້ ດັ່ງນີ້:

1. ມີການສຶກສາອົບຮົມດ້ານການເມືອງ-ແນວຄິດຢ່າງເປັນປົກກະຕິ ໂດຍຖືເອົາກອງປະຊຸມປະຈຳເດືອນຂອງບັນດາກົມທີ່ເປັນເສນາທິການ ແລະ ຖືເອົາກອງປະຊຸມປະຈຳເດືອນຂອງຄະນະນຳ ກກໝ ແລະ ກອງປະຊຸມຄົບຄະນະກຳມາທິການ ເພື່ອສຳຫລວດກວດກາ ຕຳນິສົ່ງຂ່າວເຊິ່ງກັນ ແລະ ກັນ ເພື່ອສ້າງຄວາມກ້າວໜ້າ, ຍົກລະດັບ ກຳແໜ້ນແນວທາງນະໂຍບາຍຂອງພັກ-ລັດຢ່າງເລິກເຊິ່ງ ເພື່ອຈັດຕັ້ງຜັນຂະຫຍາຍເຂົ້າໃນໜ້າທີ່ວຽກງານຕົວຈິງ;
2. ມີການປະສານສົມທົບກັບກຳມາທິການອື່ນ ແລະ ພາກສ່ວນທີ່ກ່ຽວຂ້ອງ ເພື່ອປະຕິບັດໜ້າທີ່ວຽກງານໃຫ້ບັນລຸຕາມແຜນການ;
3. ມີການຕິດຕາມກວດກາ ແລະ ຊຸກຍູ້ການປະຕິບັດໜ້າທີ່ວຽກງານຂອງພະນັກງານ, ລັດຖະກອນເປັນປົກ ກະຕິ;
4. ຮູ້ເສີມຂະຫຍາຍ ຄວາມຮູ້, ສະຕິປັນຍາ ແລະ ຫົວຄິດປະດິດສ້າງຂອງພະນັກງານ, ສະມາຊິກພັກ ແລະ ລັດຖະກອນພາຍໃນກໍາມາທິການ ສົມທົບກັບການຍາດແຍ່ງ ແລະ ຮູ້ນໍາໃຊ້ຜູ້ທີ່ມີຄວາມຮູ້, ຄວາມສາມາດ ແລະ ປະ ສົບການທາງນອກທີ່ກ່ຽວຂ້ອງກັບການປະຕິບັດພາລະບົດບາດ ແລະ ໜ້າທີ່ວຽກງານຂອງ ກກໝ;
5. ເພີ່ມທະວີການແລກປ່ຽນບົດຮຽນ ແລະ ຖອດຖອນບົດຮຽນ ທີ່ຕິດພັນກັບວຽກງານຂອງ ກກໝ ກໍຄືຂອງສະພາແຫ່ງຊາດ ຢູ່ພາຍໃນ ແລະ ຕ່າງປະເທດ.

III. ທິດທາງແຜນການເຄື່ອນໄຫວວຽກງານໃນຕໍ່ໜ້າທີ່ກໍາມາທິການກົດໝາຍ ຕ້ອງໄດ້ສຸມໃສ່ ປະຈໍາປີ 2022

1. ດ້ານການເມືອງ-ແນວຄິດ

• ຈັດຕັ້ງເຊື່ອມຊຶມມະຕິກອງປະຊຸມໃຫຍ່ຄັ້ງທີ XI ຂອງພັກ, ມະຕິຄະນະບໍລິຫານງານສູນກາງພັກ ແລະ ກົມການເມືອງສູນກາງພັກ ສະໄໝທີ XI, ມະຕິກອງປະຊຸມໃຫຍ່ຄັ້ງທີ 4 ຂອງອົງຄະນະພັກສະພາແຫ່ງຊາດ ແລະ ກົດລະບຽບຂອງພັກສະໄໝທີ XI ແລະ ເອກະສານສໍາຄັນອື່ນຂອງພັກ ແລະ ລັດ;
• ເພີ່ມທະວີການນໍາພາວຽກງານແນວຄິດ ແນໃສ່ຮັບປະກັນຄວາມສາມັກຄີເປັນເອກະພາບຢູ່ພາຍໃນ ກກໝ ແລະ ຮັບປະກັນການປະຕິບັດໜ້າທີ່ວຽກງານໃຫ້ມີປະສິດທິພາບ ແລະ ປະສິດທິຜົນ.

2. ການເປັນເສນາທິການໃນການປະຕິບັດທັງ 3 ພາລະບົດບາດ ຂອງສະພາແຫ່ງຊາດ
   • ການປະຕິບັດພາລະບົດບາດ ດ້ານນິຕິບັນຍັດ

ກ. ວຽກງານສ້າງ ແລະ ປັບປຸງກົດໝາຍ

ເອົາໃຈໃສ່ປະສານສົມທົບກັບພາກສ່ວນກ່ຽວຂ້ອງຈັດຕັ້ງປະຕິບັດວຽກງານສ້າງ ແລະ ປັບປຸງກົດໝາຍ, ນິຕິກໍາໃຕ້ກົດໝາຍ ໃຫ້ມີປະສິດທິພາບ, ປະສິດທິຜົນ, ຮັບປະກັນຫລັກວິຊາການ, ລັກສະນະວິທະຍາສາດ, ລັກສະນະຊາດ, ເປັນລະບົບຄົບຊຸດ, ຮັດກຸມ, ກົມກຽວ ສາມາດຈັດຕັ້ງປະຕິບັດໄດ້ ເປັນຕົ້ນ:

– ປັບປຸງກົນໄກການຜ່ານຮ່າງກົດໝາຍໃນກອງປະຊຸມສະພາແຫ່ງຊາດ, ການຄົ້ນຄວ້າກົດໝາຍ, ການກວດກາ, ການຮຽບຮຽງ, ການທາບທາມຄວາມເຫັນຕໍ່ຮ່າງ ໃຫ້ສອດຄ່ອງກັບສະພາບຕົວຈິງ;

– ການປັບປຸງ ແລະ ຮຽບຮຽງຄືນກົດໝາຍຈໍານວນ 11 ສະບັບ ທີ່ຜ່ານການພິຈາລະນາຮັບຮອງເອົາໃນກອງປະຊຸມສະໄໝສາມັນເທື່ອທີ 2 ຂອງ ສພຊ ຊຸດທີ IX ຕາມການປະກອບຄຳເຫັນຂອງສະມາຊິກສະພາແຫ່ງຊາດ;

– ປະສານສົມທົບກັບພາກສ່ວນທີ່ກ່ຽວຂ້ອງ ເພື່ອປັບປຸງແຜນການສ້າງ ແລະ ປັບປຸງກົດໝາຍ ຂອງຄະນະປະຈຳສະພາແຫ່ງຊາດ ປະຈຳປີ 2022;

– ປະສານສົມທົບກັບພາກສ່ວນກ່ຽວຂ້ອງຈັດຕັ້ງປະຕິບັດແຜນການສ້າງ ແລະ ປັບປຸງກົດໝາຍ ທີ່ຈະນໍາເຂົ້າພິຈາລະນາ, ຮັບຮອງໃນກອງປະຊຸມສະໄໝສາມັນເທື່ອທີ 3 ແລະ ເທື່ອທີ 4 ຂອງ ສພຊ ຊຸດທີ IX ໃຫ້ບັນລຸຕາມຄາດໝາຍ (29 ສະບັບ).

ຂ. ວຽກງານໂຄສະນາ ເຜີຍແຜ່ ລັດຖະທໍາມະນູນ ແລະ ກົດໝາຍ

– ສົມທົບກັບກໍາມາທິການທີ່ກ່ຽວຂ້ອງ ເພີ່ມທະວີການໂຄສະນາສຶກສາອົບຮົມ ໃຫ້ພົນລະເມືອງຮັບຮູ້, ເຊື່ອມຊຶມ ແລະ ກໍາແໜ້ນກ່ຽວກັບລັດຖະທໍາມະນູນ ແລະ ກົດໝາຍຕ່າງໆ ຕາມທີ່ກໍານົດໄວ້ໃນມາດຕາ 6 ຂອງລັດຖະທໍາມະນູນ ແຫ່ງ ສປປລາວ ດ້ວຍຫລາຍຮູບການ, ຫລາຍລະດັບທີ່ເໝາະສົມ, ສ້າງເງື່ອນໄຂໃຫ້ເຂົາເຈົ້າສາມາດເຂົ້າເຖິງກົດໝາຍ ຮູ້ປົກປ້ອງສິດຜົນປະໂຫຍດອັນຊອບທໍາ ແລະ ປະຕິບັດພັນທະຂອງຕົນຢ່າງຖືກຕ້ອງ, ຮູ້ດໍາລົງຊີວິດ ແລະ ເຮັດວຽກງານຕາມກົດໝາຍ.

– ເອົາໃຈໃສ່ຊຸກຍູ້ການສະຫລຸບ ແລະ ຕີລາຄາການປະຕິບັດລັດຖະທໍາມະນູນ ແລະ ກົດໝາຍ ໃນໄລຍະ 30 ປີຜ່ານມາ ແລະ ກຳນົດທິດທາງ ໃນການປະຕິບັດໃນຕໍ່ໜ້າ ຕາມຂອບເຂດຄວາມຮັບຜິດຊອບຂອງກະຊວງ, ອົງການຂັ້ນສູນກາງ, ອົງການປົກຄອງທ້ອງຖິ່ນ ແລະ ສະພາປະຊາຊົນແຂວງ, ນະຄອນຫລວງວຽງຈັນ ຕາມຄຳແນະນໍາຂອງຄະນະປະຈໍາສະພາແຫ່ງຊາດ ວ່າດ້ວຍການສະເຫລີມສະຫລອງວັນລັດຖະທໍາມະນູນແຫ່ງຊາດ ຄົບຮອບ 30 ປີ (15 ສິງຫາ 1991-15 ສິງຫາ 2021) ສະບັບເລກທີ 08/ຄປຈ, ລົງວັນທີ 14 ກໍລະກົດ 2021 ໂດຍຕິດພັນກັບການສະຫລຸບ ແລະ ຕີລາຄາການປະຕິບັດມະຕິຂອງຄະນະບໍລິຫານງານສູນກາງພັກ ວ່າດ້ວຍການຍົກສູງປະສິດທິພາບ ການຄຸ້ມຄອງລັດ, ຄຸ້ມຄອງສັງຄົມດ້ວຍກົດໝາຍ ສະບັບເລກທີ 037/ຄບສພ, ລົງວັນທີ 18 ມິຖຸນາ 2018 ແລະ ມະຕິຂອງກົມການເມືອງສູນກາງພັກວ່າດ້ວຍການຍົກສູງຄຸນນະພາບ ການດຳເນີນຄະດີຕາມຂະບວນຍຸຕິທຳ ສະບັບເລກທີ 112/ກມສພ, ລົງວັນທີ 2 ມິຖຸນາ 2020;

– ຄົ້ນຄວ້າຂຽນບົດຄວາມ ກ່ຽວກັບບາງມາດຕາຂອງກົດໝາຍ ແລະ ບາງບົດຮຽນຂອງຕ່າງປະເທດ ໃຫ້ໄດ້ 10 ບົດ ເພື່ອປະກອບສ່ວນລົງໃນໜ້າໜັງສືພິມຜູ້ແທນປະຊາຊົນ.

ຄ. ວຽກງານຕີຄວາມໝາຍ, ອະທິບາຍກົດໝາຍ ແລະ ສັງລວມ

ຄົ້ນຄວ້າ ການຕີຄວາມໝາຍ ແລະ ອະທິບາຍກົດໝາຍ ຕາມການສະເໜີຂອງພາກສ່ວນຕ່າງໆ ຫລື ໂດຍໜ້າທີ່ ຕາມທີ່ໄດ້ກຳນົດໄວ້ໃນມະຕິຂອງຄະນະປະຈໍາສະພາແຫ່ງຊາດວ່າດ້ວຍການຕີຄວາມໝາຍກົດໝາຍ ສະບັບ ເລກທີ 0133/ຄປຈ, ລົງວັນທີ 4 ທັນວາ 2013.

• ການຕົກລົງບັນຫາສໍາຄັນພື້ນຖານຂອງປະເທດຊາດ

ສະມາຊິກສະພາແຫ່ງຊາດ ທີ່​ເປັນ​ກໍາມະການສັງກັດ ແລະ ຄະນະນຳຂອງ ກກໝ ສືບຕໍ່ປະຕິບັດໜ້າທີ່ວຽກງານໃນການຄົ້ນຄວ້າ, ປະກອບຄໍາເຫັນ ແລະ ຕົກລົງບັນຫາສໍາຄັນພື້ນຖານຂອງປະເທດຊາດ ຕາມພາລະບົດບາດຂອງຕົນ ໃຫ້ສໍາເລັດຕາມຄາດໝາຍ, ແຜນການທີ່ວາງໄວ້ ເປັນຕົ້ນ ການເຂົ້າຮ່ວມກອງປະຊຸມສະໄໝສາມັນເທື່ອທີ 3 ແລະ ເທື່ອທີ 4 ຂອງ ສພຊ ຊຸດທີ IX, ກອງປະຊຸມຄະນະປະຈໍາສະພາແຫ່ງຊາດ ແລະ ກອງປະຊຸມສຳຄັນອື່ນ.

2.3. ການປະຕິບັດພາລະບົດບາດ ຕິດຕາມກວດກາ

– ຕິດຕາມ, ຊຸກຍູ້ ບັນດາກະຊວງ, ອົງການ ໃນການຜັນຂະຫຍາຍມາດຕາຂອງກົດໝາຍ ທີ່ກໍານົດໃຫ້ອອກລະບຽບການຕ່າງຫາກ ທີ່ຍັງຄ້າງມາຈາກຊຸດທີ VIII  ຈໍານວນ 276 ມາດຕາ;

– ສ້າງເອກະສານກົນໄກ, ສ້າງຄູ່ມື ຫລື ສ້າງແຜນການຕິດຕາມກວດກາ ເພື່ອສະດວກໃນການຈັດຕັ້ງປະຕິບັດ ຢູ່ສູນກາງ ແລະ ທ້ອງຖິ່ນຢ່າງມີປະສິດທິຜົນ;

– ຈັດຕັ້ງປະຕິບັດແຜນຕິດຕາມກວດກາ ຂອງ ກກໝ ປີ 2022 ເຊິ່ງໄດ້ກໍານົດ ມີ 3 ໂຄງການ ແລະ 12 ກິດຈະກໍາ;

– ຕິດຕາມ ຊຸກຍູ້ ບັນດາກະຊວງ, ອົງການ ໃນການປະຕິບັດສອງວາລະແຫ່ງຊາດ ກ່ຽວກັບການແກ້ໄຂບັນຫາຢາເສບຕິດ ແລະ ການແກ້ໄຂຄວາມຫຍຸ້ງຍາກທາງດ້ານເສດຖະກິດ-ການເງິນ  ແລະ ບັນດາມະຕິຕ່າງໆ ທີ່ກອງປະຊຸມຄັ້ງປະຖົມມະລືກ ໄດ້ພິຈາລະນາຮັບຮອງ ເອົາຕາມພາລະບົດບາດຂອງຕົນ.

ນອກຈາກນັ້ນ ຈະໄດ້ສືບຕໍ່ສ້າງຄວາມເຂັ້ມແຂງ ເປັນຕົ້ນ ຈັດກອງປະຊຸມສໍາມະນາ, ຍົກລະດັບຄວາມຮູ້, ຄວາມສາມາດທາງດ້ານວິຊາສະເພາະຄື: ວຽກງານສ້າງ ແລະ ປັບປຸງກົດໝາຍ; ວຽກງານໂຄສະນາ ເຜີຍແຜ່ ລັດຖະທໍາມະນູນ ແລະ ກົດໝາຍ, ວຽກງານຕິດຕາມກວດກາການປະຕິບັດລັດຖະທຳມະນູນ, ກົດໝາຍ ແລະ ການອອກນິຕິກໍາໃຕ້ກົດ   ໝາຍ; ວຽກງານຕີຄວາມໝາຍ,  ອະທິບາຍກົດໝາຍ ແລະ ສັງລວມ ວຽກງານອື່ນທີ່ມີຄວາມຈໍາເປັນ ໃຫ້ໄດ້ 4 ຄັ້ງ ແລະ ສືບຕໍໍ່ເຄື່ອນໄຫວວຽກງານການຕ່າງປະເທດ ຕາມພາລະບົດບາດ, ສິດ ແລະ ໜ້າທີ່ຂອງຕົນ ຫລື ຕາມການມອບ  ໝາຍ ຂອງຄະນະປະຈໍາສະພາແຫ່ງຊາດ ໃນການພົວພັນ, ຮ່ວມມື ແລະ ແລກປ່ຽນຖອດຖອນບົດຮຽນກັບບັນດາ ປະເທດເພື່ອນມິດຍຸດທະສາດ, ພາກພື້ນ ແລະ ສາກົນ ໃນຂົງເຂດວຽກງານກົດໝາຍ.

ຮຽບຮຽງໂດຍ: ສ.ສາຍນໍ້າທາ