ເພື່ອຈັດຕັ້ງຜັນຂະຫຍາຍເອກະສານແຈ້ງການແນະນໍາ ຂອງສະຫະພັນແມ່ຍິງແຂວງສາລະວັນ ສະບັບເລກທີ 57/ສຍຂ.ສວ ລົງວັນທີ 12 ຕຸລາ 2023 ກ່ຽວກັບ ການກະກຽມ ແລະ ດໍາເນີນກອງປະຊຸມໃຫຍ່ຂອງສະຫະພັນແມ່ຍິງແຕ່ລະຂັ້ນ; ໃນວັນທີ 18 ມີຖຸນາ 2024 ທີ່ຜ່ານມາ, ສະຫະພັນແມ່ຍິງຮາກຖານສະພາປະຊາຊົນແຂວງສາລະວັນ ໄດ້ຈັດກອງປະຊຸມ ເຜີຍແຜ່ເຊື່ອມຊຶມເອກະສານ ກະກຽມກອງປະຊຸມໃຫຍ່ ຄັ້ງທີ IV ຂອງຕົນ ຂຶ້ນຢູ່ທີ່ຫ້ອງປະຊຸມສະພາປະຊາຊົນແຂວງ ຕິດພັນກັບການປ່ອນບັດທາບທາມເປີດກວ້າງ ຄັດເລືອກເອົາບຸກຄະລາກອນ ຮອບທີ I; ໂດຍການເປັນປະທານຂອງສະຫາຍ ນາງ ສູນໄຖ ໄຊຍະແສງ ກໍາມະການພັກແຂວງ ຮອງປະທານສະພາປະຊາຊົນແຂວງ, ເຂົ້າຮ່ວມມີ ປະທານ-ຮອງປະທານ ສະຫະພັນແມ່ຍິງຮາກຖານສະພາປະຊາຊົນແຂວງ, ບັນດາສະຫາຍສະມາຊິກແມ່ຍິງຮາກຖານເຂົ້າຮ່ວມໃນຄັ້ງນີ້;

 
ກອງປະຊຸມໄດ້ຮັບຟັງການສະເໜີຜ່ານ ເອກະສານ 3 ສະບັບຄື: 1.ແຜນການກະກຽມ ແລະ ດໍາເນີນງານ ກອງປະຊຸມໃຫຍ່ ຄັ້ງທີ IV ສະຫະພັນແມ່ຍິງຮາກຖານສະພາປະຊາຊົນແຂວງ; 2.ມະຕິຂອງຄະນະພັກຮາກຖານສະພາປະຊາຊົນແຂວງ ວ່າດ້ວຍການແຕ່ງຕັ້ງ ຄະນະຊີ້ນໍາລວມ ແລະ ອະນຸກໍາມະການຊ່ວຍວຽກ ເພື່ອກະກຽມດໍາເນີນເປີດກອງປະຊຸມໃຫຍ່ ຄັ້ງທີ IV ສະຫະພັນແມ່ຍິງຮາກຖານສະພາປະຊາຊົນແຂວງ; 3.ບົດລາຍງານການເມືອງ ຕໍ່ກອງປະຊຸມໃຫຍ່ ຄັ້ງທີ IV ຂອງສະຫະພັນແມ່ຍິງຮາກຖານສະພາປະຊາຊົນແຂວງ; ພ້ອມດຽວກັນ ບັນດາສະຫາຍສະມາຊິກແມ່ຍິງຮາກຖານ ໄດ້ປະກອບສ່ວນແລກປ່ຽນປະກອບຄໍາຄິດຄໍາເຫັນເຂົ້າໃສ່ຮ່າງຂອງບົດລາຍການດັ່ງກ່າວ ເພື່ອເຮັດໃຫ້ມີເນື້ອໃນຄົບຖ້ວນ, ຖືກຕ້ອງ ແລະ ສອດຄ່ອງກັບແຜນວຽກ ຂອງມະຕິກອງປະຊຸມໃຫຍ່ ຄັ້ງທີ III ໃນໄລຍະ 5 ປີຜ່ານມາ (2018-2023); ຈາກນັ້ນ, ໃນທີ່ປະຊຸມກໍ່ຮັບຟັງການສະເໜີເອກະສານ ມາດຕະຖານຂອງຜູ້ສະໝັກເຂົ້າໂຄງປະກອບ, ລຸກຄະລາກອນ ຄະນະປະທານສະຫະພັນແມ່ຍິງຮາກຖານ ຂອງສະພາປະຊາຊົນແຂວງ ມີ 2 ມາດຕະຖານ ຄື: ມາດຕະຖານລວມ ແລະ ມາດຕະຖານສະເພາະ ທີ່ໄດ້ກໍານົດໄວ້ມະຕິຂອງກົມການເມືອງ ສູນກາງພັກ ສະບັບເລກທີ 03/ກມສພ, ລົງວັນທີ 3 ມັງກອນ 2018;

ວາລະຂອງກອງປະຊຸມຕໍ່ມາ ບັນດາສະຫາຍສະມາຊິກແມ່ຍິງຮາກຖານ ສະພາປະຊາຊົນແຂວງ ໄດ້ໃຊ້ສິດປະຊາທິປະໄຕປ່ອນບັດທາບທາມເປີດກວ້າງ ເພື່ອຄັດເລືອກເອົາບຸກຄະລາກອນ ຮອບທີ I ເພື່ອປະກອບເຂົ້າໃສ່ໂຄງປະກອບ, ລຸກຄະລາກອນ ແລະ ຄະນະປະທານສະຫະພັນແມ່ຍິງຮາກຖານ ຂອງສະພາປະຊາຊົນແຂວງ;

ພາບ-ຂ່າວ: ດີລໍາພົນ ພົມມະຈັນ