ໂດຍປະຕິບັດຕາມພາລະບົດບາດ, ສິດ ແລະ ໜ້າທີ່ ຕາມທີ່ໄດ້ກຳນົດໄວ້ໃນກົດໝາຍວ່າດ້ວຍສະພາແຫ່ງຊາດ (ສພຊ) ແລະ ສະພາປະຊາຊົນຂັ້ນແຂວງ (ສພຂ) ໃນນາມເປັນຕົວແທນແຫ່ງສິດ ແລະ ຜົນປະໂຫຍດຂອງປະຊາຊົນລາວບັນດາເຜົ່າໃນທົ່ວແຂວງ ແລະ ເຮັດໃຫ້ພະນັກງານ-ລັດຖະກອນ, ທະຫານ, ຕຳຫລວດ, ຜູ້ມີສິດເລືອກຕັ້ງໄດ້ຮັບຮູ້ແລະ ເຂົ້າໃຈຕໍ່ແນວທາງນະໂຍບາຍຂອງພັກ, ລະບຽບກົດໝາຍຂອງລັດ, ແຜນພັດທະນາເສດຖະກິດ-ສັງຄົມຂອງຊາດ, ຂອງແຂວງ.
ໃນຕອນເຊົ້າວັນທີ 04 ຕຸລາ 2023 ຢູ່ທີ່ສະໂມສອນແຂວງ ໄດ້ຈັດພິທີເຜີຍແຜ່ຜົນສໍາເລັດກອງປະຊຸມສະໄໝສາມັນເທື່ອທີ 5 ຂອງສະພາແຫ່ງຊາດ ຊຸດທີ IX ແລະ ສະພາປະຊາຊົນແຂວງ ຊຸດທີ II ໃຫ້ກັບພະນັກງານນໍາພາພະນັກງານຫຼັກແຫຼ່ງ ຂົງເຂດວັດທະນະທໍາ-ສັງຄົມ ໃຫ້ກຽດເປັນຄະນະປະທານຂອງ ທ່ານ ໃສຄໍາ ທອງລັດ ກຳມະການພັກແຂວງ ຮອງປະທານສະພາປະຊາຊົນແຂວງ, ນາງຂັນທອງ ພັນທະຈັກ ສະມາຊິກສະພາແຫ່ງຊາດ ປະຈໍາເຂດເລືອກຕັ້ງທີ 11 , ປະທານຄະນະກຳມະການວັດທະນະທໍາສັງຄົມ ແລະ ບັນດາເຜົ່າ, ທ່ານ ນາງ ຄໍາເພັດ ດວງມະນີ ສະມາຊິກສະພາປະຊາຊົນແຂວງ, ປະທານກວດກາພັກ-ລັດເມືອງ.
ກອງປະຊຸມ ສະໄໝສາມັນເທື່ອທີ 5 ຂອງສະພາແຫ່ງຊາດ ຊຸດທີ IX ແລະ ສະພາປະຊາຊົນແຂວງ ບໍລິຄໍາໄຊ,ຊຸດທີ II, ແມ່ນເຫດການ ການເມືອງທີ່ສໍາຄັນທາງປະຫວັດສາດຂອງພັກເຮົາ, ເປັນກອງປະຊຸມສືບຕໍ່ຢຶດໝັ້ນ ແລະ ເພີ່ມເຕີມເສີມຂະຫຍາຍແນວທາງປ່ຽນແປງໃໝ່ຮອບດ້ານທີ່ມີຫຼັກການຂອງພັກເຂົ້າສູ່ລວງເລິກ ແລະ ກໍານົດທັດສະນະແຫ່ງການສ້າງການຫັນປ່ຽນຢ່າງແຂງແຮງຕໍ່ການນໍາພາ-ຊີ້ນໍາປົກປັກຮັກສາ ແລະ ສ້າງສາພັດທະນາປະເທດຊາດໃຫ້ຈະ ເລີນຮຸ່ງເຮືອງກ້າວຂຶ້ນສູ່ຈຸດໝາຍສັງຄົມນິຍົມ ຕາມທີ່ພັກ-ລັດເຮົາວາງໄວ້; ການຈັດຕັ້ງເຊື່ອມຊຶມຜົນສໍາເລັດກອງປະຊຸມໃນຄັ້ງນີ້ ກໍເພື່ອແນໃສ່ເຮັດໃຫ້ພະນັກງານນໍາພາຫຼັກແຫຼ່ງ – ນໍາພາຄຸ້ມຄອງແຕ່ລະຂັ້ນ ພາຍໃນແຂວງ ໄດ້ຮັບຮູ້ ເຂົ້າໃຈຢ່າງເລິກເຊິ່ງ ແລະ ກໍາແໜ້ນເນື້ອໃນ ມະຕິຄໍາສັ່ງ ແລະ ວຽກງານຈຸດສຸມໃນດ້ານຕ່າງໆ ທີ່ຕ້ອງເອົາໃຈໃສ່ນໍາພາ-ຊີ້ນໍາຢູ່ໃນແຕ່ລະຂົງເຂດວຽກງານຕາມຄວາມຮັບຜິດຊອບ, ຕິດພັນກັບການເສີມຂະຫຍາຍຄວາມເປັນເຈົ້າການໃນການນໍາພາ-ຊີ້ນໍາຈັດຕັ້ງປະຕິບັດໃຫ້ເປັນແຜນງານ, ເປັນໂຄງການ ແລະ ກິດຈະກໍາລະອຽດໃນແຕ່ລະຂະແໜງການ ທ້ອງຖິ່ນຮາກຖານ ເພື່ອຈັດຕັ້ງປະຕິບັດໃຫ້ເກີດດອກອອກຜົນຕົວຈິງ, ສ້າງໄດ້ຜົນສໍາເລັດໃໝ່ໃນພາລະກິດປົກປັກຮັກສາ ແລະ ສ້າງສາພັດທະນາປະເທດຊາດ.
ນອກຈາກນີ້ ກໍ່ເພື່ອເຮັດໃຫ້ບັນດາຜູ້ເຂົ້້າຮ່ວມ ເຊື່ອມຊຶມ ໄດ້ພ້ອມກັນປະກອບຄໍາຄິດເຫັນ – ສົນທະນາແລກ ປ່ຽນ, ບັນຫາຕ່າງໆ ຕໍ່ກັບ ສສຊ – ສສຂ ເພື່ອນໍາເອົາ ເຫດ ແລະ ຜົນໃນການຈັດຕັ້ງປະຕິບັດວຽກງານດັ່ງກ່າວ ນໍາໄປສົມທົບກັບຂະແໜງການ, ເມືອງ, ແຂວງ ແລະ ພາກສ່ວນທີ່ກ່ຽວຂ້ອງ ເພື່ອຄົ້ນຄ້ວາພິຈາລະນາ ປັບປຸງ – ແກ້ໄຂຕາມຂັ້ນຕອນ ແລະ ລະບຽບການວາງອອກ. ເພຶ່ອແນ່ໃສ່ເຮັດໃຫ້ການຈັດຕັ້ງປະຕິບັດວຽກງານໃນຕໍ່ໜ້າມີຄວາມໜັກແໜ້ນເຂັມແຂງ, ຖືກຕ້ອງ ສອດຄ່ອງຕາມສະພາບຄວາມເປັນຈີງ ແລະ ຫັນເຂົ້າສູ້ລະບຽບກົດໝາຍເທື່ອລະກ້າວ.
ຂ່າວ: ໂສລະຢ໋າ; ພາບ: ບຸນນໍາ