ເພື່ອປະຕິບັດຕາມພາລະບົດບາດ, ສິດ ແລະ ໜ້າທີ່ໃນການເປັນຕົວແທນແຫ່ງສິດຜົນປະໂຫຍດອັນຊອບທຳຂອງປະຊາຊົນບັນດາເຜົ່າ ໃຫ້ສຳເລັດຕາມລະດັບຄາດໝາຍ ໃນລະຫວ່າງວັນທີ 14-15 ມັງກອນ 2025 ສະພາແຫ່ງຊາດປະປະຈໍາເຂດເລືອກຕັ້ງທີ່ 3, ສະພາປະຊາຊົນແຂວງຫລວງນ້ຳທາ (ສພຂ) ໂດຍທ່ານ ພົຈວ ປອ ວັນທອນ ສຸລິສັກ, ທ່ານ ກົງເພັດ ແກ້ວບົວພາ ຮອງປະທານສະພາປະຊາຊົນແຂວງ ພ້ອມດ້ວຍສະມາຊິກສະພາປະຊາຊົນແຂວງ ປະຈຳເຂດເລືອກຕັ້ງເມືອງ, ໄດ້ເຜີຍແຜ່ເນື້ອໃນຜົນສໍາເລັດຂອງກອງປະຊຸມສະໄໝສາມັນເທື່ອທີ 8 ຂອງສະພາແຫ່ງຊາດຊຸດທີ IX ແລະ ສະໄໝສາມັນເທື່ອທີ 8 ຂອງສະພາປະຊາຊົນແຂວງຫຼວງນໍ້າທາ ຊຸດທີ II ຢູ່ທີ່ສະໂມສອນເມືອງນາແລ ແລະ ບ້ານ ຜາວີ ເຂົ້າຮ່ວມຮັບຟັງມີ ຄະນະນໍາຂອງເມືອງ, ພະນັກງານຫລັກແຫລ່ງ, ຄະນະພັກຮາກຖານກຸ່ມບ້ານ, ອຳນາດການປົກຄອງບ້ານ ພ້ອມດ້ວຍປະຊາຊົນ ເຂົ້້າຮ່ວມ 140 ຄົນ, ຍິງ 80 ຄົນ.
ເພື່ອນຳເອົາເນື້ອໃນຈິດໃຈຜົນສຳເລັດຂອງກອງປະຊຸມສະໄໝສາມັນເທື່ອທີ 8 ຂອງສະພາແຫ່ງຊາດຊຸດທີ IX ແລະ ສະໄໝສາມັນເທື່ອທີ 8 ຂອງສະພາປະຊາຊົນແຂວງຫຼວງນໍ້າທາ ຊຸດທີII ເຜີຍແຜ່ໃຫ້ສອງກໍາລັງພາຍໃນແຂວງ ໄດ້ຮັບຮູ້ເຊື່ອມຊຶມ ໃນພິທີທ່ານ ພົຈວ ປອ ວັນທອນ ສຸລິສັກ ໄດ້ເຜີຍແຜ່ເນື້ອໃນຜົນສຳເລັດຂອງກອງປະຊຸມສະໄໝສາມັນເທື່ອທີ 8 ຂອງສະພາແຫ່ງຊາດຊຸດທີ IX ກອງປະຊຸມໄດ້ພິຈາລະນາ, ຮັບຮອງເອົາວຽກງານສຳຄັນຂອງຊາດຄື: ພິຈາລະນາ, ຮັບຮອງການຈັດຕັ້ງການປະຕິບັດ ແຜນພັດທະນາເສດຖະກິດ-ສັງຄົມ ແຫ່ງຊາດ ປະຈຳປີ 2024, ຮັບຮອງການຈັດຕັ້ງປະຕິບັດແຜນງົບປະມານແຫ່ງລັດ ປະຈຳປີ 2024, ຮັບຮອງຜົນການກວດສອບ ບົດສະຫຼຸບຂາດຕິດການຈັດຕັ້ງພະຕິບັດແຜນງົບປະມານແຫ່ງລັດ ປະຈຳປີ 2023 ຕາມການລາຍງານຂອງອົງການກວດສອບແຫ່ງລັດ ແລະ ພິຈາລະນາ, ຮັບຮອງຜົນການກວດສອບ ບົດສະຫຼຸບຂາດຕົວການຈັດຕັ້ງພະຕິບັດແຜນງົບປະມານແຫ່ງລັດ ປະຈຳປີ 2023 ຕາມການລາຍງານຂອງອົງການກວດສອບແຫ່ງລັດ, ຮັບຮອງເອົາວິໄສທັດ ຮອດປີ 2040 ແລະ ຍຸດທະສາດ ການຄຸ້ມຄອງ ແລະ ການພັດທະນາທີ່ດິນກະສິກຳ ຮອດປີ 2030 ປະກອບມີ 5 ຍຸດທະສາດ 5 ເປົ້າໝາຍ 12 ຄາດໝາຍ 30 ວຽກຈຸດສຸມ ແລະ ຮັບຮອງເອົາບົດລາຍງານຂອງລັດຖະບານກ່ຽວກັບການຈັດຕັ້ງປະຕິບັດວຽກງານ 3 ສ້າງ.
ທ່ານ ທຳມະວົງ ບຸນຖາວອນ ສະມາຊິກສະພາປະຊາຊົນແຂວງ ປະຈຳເຂດເລືອກຕັ້ງເມືອງນາແລ ໄດ້ເຜີຍແຜ່ເນື້ອໃນຜົນສຳເລັດຂອງກອງປະຊຸມສະໄໝສາມັນເທື່ອທີ 8 ຂອງສະພາປະຊາຊົນແຂວງຊຸດທີ2 ກອງປະຊຸມໄດ້ພິຈາລະນາ ແລະ ຮັບຮອງເອົາບັນຫາສໍາຄັນຂອງແຂວງຫລາຍບັນຫາເປັນຕົ້ນ: ພິຈາລະນາ, ຮັບຮອງເອົາວຽກງານອົງການປົກຄອງແຂວງປະຈຳປີ 2024 ແລະ ທິດທາງແຜນການປີ 2025; ວຽກງານໄອຍະການ ແລະ ສານປະຊາຊົນແຂວງ ປະຈຳປີ 2024; ວຽກງານສະພາປະຊາຊົນແຂວງ ປະຈຳປີ 2024 ແລະ ທິດທາງແຜນການປີ 2025, ຮັບຮອງເອົາຂໍ້ຕົກລົງຂອງເຈົ້າແຂວງວ່າດ້ວຍ ກອງທຶນສົ່ງເສີມ ແລະ ພັດທະນາກິລາກາຍຍະກໍາຂອງແຂວງ (ສະບັບປັບປຸງ) ແລະ ຮັບຮອງຂໍ້ຕົກລົງຂອງເຈົ້າແຂວງວ່າດ້ວຍ ກອງທຶນຄວບຄຸມ, ສະກັດກັ້ນ ແລະ ຕ້ານຢາເສບຕິດ (ສະບັບປັບປຸງ); ຮັບຮອງເອົາບົດລາຍງານກ່ຽວກັບ ການຈັດຕັ້ງປະຕິບັດແຜນຟື້ນຟູ-ປັບປຸງຊີວິດການເປັນຢູ່ ຂອງປະຊາຊົນທີ່ຖືກຜົນກະທົບຈາກໂຄງການກໍ່ສ້າງເຂື່ອນໄຟຟ້ານໍ້າທາ 1 ເມືອງນາແລ ໄລຍະທີ 1 (2020-2023) ແລະ ແຜນ ການໄລຍະທີ 2 (2025-2028),
ພ້ອມດຽວກັນ ຜູ້ເຂົ້າຮ່ວມຮັບຟັງ ຍັງໄດ້ສະເໜີບັນຫາທີ່ພົບຄວາມຫຍຸ້ງຍາກຢູ່ພາຍໃນບ້ານ, ເມືອງ ເພື່ອໃຫ້ສະພາປະຊາຊົນແຂວງ ຊຸກຍູ້ສະເໜີຫາພາກສ່ວນທີ່ກ່ຽວຂ້ອງ ຫາວິທີທາງແກ້ໄຂ ຕາມຄວາມເປັນຈິງ. ; ໂອກາດນີ້ ສະພາປະຊາຊົນແຂວງຍັງໄດ້ນໍາເອົາຄອມພິວເຕີໂນດບຸກ ຈຳນວນ 1 ເຄື່ອງ, ລົດຖີບຈໍານວນ 6 ຄັນ, ມອບໃຫ້ຫ້ອງການປົກຄອງເມືອງນາແລ ເພື່ອມອບໃຫ້ນ້ອງນ້ອຍນັກຮຽນທີ່ທຸກຍາກຂາດເຂີນ ເມືອງນາແລ ແລະ ມີເຄື່ອງນຸ່ງຫົ່ມເສື້ອກັນໜາວ, ປື້ມຂຽນ, ບິກ ໃຫ້ນ້ອງນັກຮຽນ ບ້ານຜາວີ ແລະ ບ້ານສະແກນ ເມືອງນາແລ. 
ພາບຂ່າວ ວັນນີ ແຝງບົວວັນ