(ສພຊ) – ກອງປະຊຸມຮຽບຮຽງເນື້ອໃນຮ່າງກົດໝາຍວ່າດ້ວຍອາກອນມູນຄ່າເພີ່ມ (ສະບັບປັບປຸງ) ໄດ້ຈັດຂຶ້ນໃນວັນທີ 03 ກໍລະກົດ 2024 ທີ່ຫ້ອງປະຊຸມກົມສ່ວຍສາອາກອນ, ກະຊວງການເງິນ ໂດຍການເປັນປະທານຂອງທ່ານ ສົມມາດ ພົລເສນາ ຮອງປະທານສະພາແຫ່ງຊາດ; ເຂົ້າຮ່ວມມີທ່ານປະທານກຳມາທິການແຜນການ,​ ການເງິນ ແລະ ການກວດສອບ, ບັນດາທ່ານຮອງປະທານກຳມາທິການກົດໝາຍ ແລະ ກໍາມາທິການແຜນການ, ການເງິນ ແລະ ການກວດສອບ, ທ່ານຮອງລັດຖະມົນຕີກະຊວງການເງິນ ແລະ ກະຊວງຍຸຕິທຳ, ຮອງຫົວໜ້າຫ້ອງວ່າການສຳນັກງານປະ ທານປະເທດ, ທ່ານຮອງຫົວໜ້າຫ້ອງວ່າການສຳນັກງານນາຍົກລັດຖະມົນຕີ, ບັນດາປະທານຄະນະສະມາຊິກສະພາແຫ່ງຊາດ (ສສຊ) ປະຈຳເຂດເລືອກຕັ້ງທີ 7, 11, 12, 14, 15 ແລະ ຄະນະທີ່ປຶກສາທາງດ້ານກົດໝາຍຂອງຄະນະປະຈຳສະພາແຫ່ງຊາດ (ສພຊ) ພ້ອມດ້ວຍພາກສ່ວນທີ່ກ່ຽວຂ້ອງ.

ກອງປະຊຸມມີຈຸດປະສົງເພື່ອຮັບປະກັນໃຫ້ບັນດາຄໍາຄິດຄໍາເຫັນຂອງບັນດາທ່ານ ສສຊ ທີ່ໄດ້ປະກອບຄໍາເຫັນໃສ່ຮ່າງກົດໝາຍວ່າດ້ວຍອາກອນມູນຄ່າເພີ່ມ ທີ່ຜ່ານການພິຈາລະນາຮັບຮອງໃນກອງປະຊຸມສະໄໝສາມັນເທື່ອທີ 7 ຂອງ ສພຊ ຊຸດທີ IX ໄດ້ຮັບການຄົ້ນຄວ້າເລືອກເຟັ້ນປັບປຸງໃສ່ຮ່າງກົດໝາຍດັ່ງກ່າວ ໃຫ້ມີຄວາມຮັດກຸມ, ຈະແຈ້ງ, ສອດຄ່ອງກັບແນວທາງນະໂຍບາຍຂອງລັດ, ລັດຖະທໍາມະນູນ ແລະ ກົດໝາຍອື່ນ, ສົນທິສັນຍາສາກົນ ທີ່ ສປປລາວ ເປັນພາຄີ, ແທດເໝາະກັບສະພາບການຂະຫຍາຍຕົວທາງດ້ານເສດຖະກິດ-ສັງຄົມ ແລະ ສາມາດຈັດຕັ້ງປະຕິບັດໄດ້ຢ່າງຍາວນານ; ທັງເປັນການລະດົມສະຕິປັນຍາຈາກທຸກພາກສ່ວນທີ່ກ່ຽວຂ້ອງກັບຮ່າງກົດໝາຍສະບັບນີ້ ເພື່ອປັບປຸງຮ່າງກົດໝາຍຢ່າງຮອບດ້ານ ຈາກນັ້ນນໍາສະເໜີກອງປະຊຸມຄະນະປະຈໍາສະພາແຫ່ງຊາດ ພິຈາລະນາກ່ອນນໍາສະເໜີປະທານສະ ພາແຫ່ງຊາດພິຈາລະນາລົງລາຍເຊັນ ເພື່ອສະເໜີຕໍ່ປະທານປະເທດພິຈາລະນາອອກດໍາລັດປະກາດໃຊ້.
​ບັນດາທ່ານທີ່ເຂົ້າຮ່ວມ ໄດ້ພ້ອມກັນຄົ້ນຄວ້າ ແລະ ຮຽບຮຽງເນື້ອໃນຮ່າງກົດໝາຍວ່າດ້ວຍອາກອນມູນຄ່າເພີ່ມ ຕາມການປະກອບຄໍາເຫັນຂອງ ສສຊ ໃນຄັ້ງວັນທີ 25 ມິຖຸນາ 2024 ຈຳນວນ 20 ທ່ານ ກວມເອົາ 14 ມາດຕາ ເຊິ່ງຄະນະຮັບຜິດຊອບປັບປຸງກົດໝາຍ ກໍໄດ້ຄົ້ນຄວ້າພິຈາລະນາປັບປຸງສຳເລັດໂດຍພື້ນຖານແລ້ວ ໃນນີ້ສາມາດປັບປຸງ 5 ມາດຕາ ແລະ ສະເໜີຮັກສາໄວ້ຄືເກົ່າ 9 ມາດຕາ ແລະ ໃນວັນທີ 28 ມິຖຸນາ 2024 ເປັນວັນພິຈາລະນາຮັບຮອງເອົາ ກໍມີ ສສຊ 6 ທ່ານ ໄດ້ປະກອບຄຳເຫັນຕື່ມ ກ່ອນລົງຄະແນນສຽງພິຈາລະນາຮັບຮອງເອົາດ້ວຍຄະແນນເຫັນດີ 131 ທ່ານ ເທົ່າກັບ 92.25%, ບໍ່ເຫັນດີ 10 ທ່ານ ເທົ່າກັບ 7.04%, ບໍ່ອອກສຽງ 1 ທ່ານ ເທົ່າກັບ 0.7% ຖືວ່າກົດໝາຍສະ ບັບນີ້ ຜ່ານການຮັບຮອງຈາກສະພາແຫ່ງຊາດ.
​ (ຂ່າວ-ພາບ: ສອນສັກ ວັນວິໄຊ)