(ສພຊ) ລະຫວ່າງວັນທີ 24-25 ກັນຍາ 2018, ທ່ານ ບຸນປອນ ບຸດຕະນະວົງ ຮອງປະທານສະພາແຫ່ງຊາດ(ສພຊ) ພ້ອມດ້ວຍຄະນະ ໄດ້ເຄື່ອນໄຫວຕິດຕາມກວດກາ ແລະ ຊຸກຍູ້ການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ, ແຜນງົບປະມານແຫ່ງລັດ ຂອງຄະນະປະຈຳສະພາແຫ່ງຊາດ (ຄປຈສພຊ) ຢູ່ບ້ານໃຫຍ່ນາຈະເລີນ ເມືອງສັງທອງ ນະຄອນຫລວງວຽງຈັນ (ນວ) ພ້ອມດຽວກັນນັ້ນ, ກໍໄດ້ເຮັດວຽກຮ່ວມກັບການນຳ ແລະ ບັນດາພະແນກການກ່ຽວຂ້ອງຂອງ ນວ.

ທັງນີ້, ເພື່ອເປັນການທົບທວນຄືນການສະຫລຸບກາງສະໄຫມ ກ່ຽວກັບການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ ແລະ ແຜນງົບປະມານແຫ່ງລັດ 5 ປີ ຄັ້ງທີ VIII ຂອງ ນວ; ຕິດຕາມກວດກາ ແລະ ຊຸກຍູ້ການຈັດຕັ້ງປະຕິບັດມະຕິຂອງ ສພຊ ກ່ຽວກັບແຜນພັດທະນາເສດຖະກິດ-ສັງຄົມ ແລະ ແຜນງົບປະມານແຫ່ງລັດ ປະຈຳປີ 2018, ການກະກຽມສ້າງແຜນປີ 2019 ແລະ ວຽກງານກວດສອບ ໂດຍສຸມໃສ່ການຈັດຕັ້ງປະຕິບັດວຽກງານການພັດທະນາຊົນນະບົດ ແລະ ລຶບລ້າງຄວາມທຸກຍາກ, ວຽກງານພັດທະນາຊາຍແດນ, ການແກ້ໄຂໄພພິບັດ ແລະ ວຽກງານອື່ນໆ ທີ່ຈະນຳເຂົ້າໃນວາລະຂອງກອງປະຊຸມສະໄຫມສາມັນເທື່ອທີ 6 ເພື່ອເປັນຂໍ້ມູນພື້ນຖານໃຫ້ແກ່ ຄປຈສພຊ ທີ່ຈະກຽມປະຊຸມຮ່ວມກັບຄະນະລັດຖະບານ ແລະ ທັງຈະເປັນຂໍ້ມູນພື້ນຖານໃນການພິຈາລະນາ ຮັບຮອງເອົາບົດລາຍງານຂອງລັດຖະບານ ທີ່ຈະລາຍງານໃນກອງປະຊຸມສະໄຫມສາມັນ ເທື່ອທີ 6 ຂອງ ສພຊ ຊຸດທີ VIII.

ໃນການເຄື່ອນໄຫວຕິດຕາມກວດກາຄັ້ງນີ້, ຄະນະໄດ້ຮັບຟັງການລາຍງານຈາກຄະນະນຳຂອງບ້ານ, ເມືອງ ແລະ ນະຄອນຫລວງວຽງຈັນ ກ່ຽວກັບການທົບທວນຄືນການສະຫລຸບກາງສະໄຫມ ກ່ຽວກັບການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ ແລະ ແຜນງົບປະມານແຫ່ງລັດ ປີ 2018 ແລະ ການກະກຽມສ້າງແຜນປີ 2019 ແລະ ວຽກງານກວດສອບ ໂດຍສຸມໃສ່ການຈັດຕັ້ງປະຕິບັດວຽກງານພັດທະນາຊົນນະບົດ ແລະ ລຶບລ້າງຄວາມທຸກຍາກ, ວຽກງານພັດທະນາຊາຍແດນ ແລະ ການແກ້ໄຂໄພພິບັດ. ພ້ອມນັ້ນ,ຍັງມີການສົນທະນາແລກປ່ຽນຄຳຄິດຄຳເຫັນຕາມຄຳຖາມເຈາະຈີ້ມທີ່ບັນດາກຳມາທິການທີ່ກ່ຽວຂ້ອງໃຫ້ຄວາມສົນໃຈ ຕໍ່ກັບບັນດາພະແນກການທີ່ກ່ຽວຂ້ອງຈາກນັ້ນ, ຄະນະ ໄດ້ລົງຕິດຕາມກວດກາຕົວຈິງ ບາງໂຄງການທີ່ເຫັນວ່າມີຄວາມຈຳເປັນ ແລະ ບາງເປົົ້າໝາຍທີ່ຈະຕ້ອງໄດ້ລົງທຶນການພັດທະນາຊົນນະບົດ ແລະ ແກ້ໄຂຄວາມທຸກຍາກ

ທ່ານ ບຸນປອນ ບຸດຕະນະວົງໄດ້ມີຄຳເຫັນໂອ້ລົມວ່າ: ການລົງຕິດຕາມກວດກາວຽກງານໃນຄັ້ງນີ້ ເປັນການເກັບກໍາຂໍ້ມູນຕ່າງໆກ່ຽວກັບການພັດທະນາ ແລະ ການສ້າງສາປະເທດຊາດ ເຊິ່ງກໍມີຫລາຍບັນຫາທີ່ພົວພັນກັບຫລາຍຂົງເຂດວຽກງານ ທີ່ຕິດພັນກັບຊີວິດຕົວຈິງຂອງພໍ່ແມ່ປະຊາຊົນ; ເພື່ອກະກຽມເນື້ອໃນໃຫ້ແກ່ກອງປະຊຸມສະໄຫມສາມັນເທື່ອທີ 6 ຂອງສະພາແຫ່ງຊາດຊຸດທີ VIII  ເຊິ່ງຈະດຳເນີນຢູ່ໃນເດືອນພະຈິກທີ່ຈະມາເຖິງນີ້ ທັງເປັນການກວດກາຄືນບັນດາມະຕິຕ່າງໆກ່ຽວກັບການພັດທະນາຊົນນະບົດ ແລະ ແກ້ໄຂຄວາມທຸກຍາກ; ພ້ອມນັ້ນ, ທ່ານຍັງໄດ້ສະເໜີໃຫ້ພາກສ່ວນທີ່ກ່ຽວຂ້ອງນຳເອົາບັນດາກົດໝາຍຕ່າງໆທີ່ ສພຊ ຮັບຮອງແລ້ວນັ້ນ ນຳໄປເຜີຍແຜ່ພໍ່ແມ່ປະຊາຊົນໃຫ້ມີຄວາມເຂົ້າໃຈ ແລະ ປະກອບສ່ວນປະຕິບັດລັດຖະທຳມະນູນ ແລະ ກົດໝາຍຢ່າງຖືກຕ້ອງ.