(ສພຊ) – ວັນອາທິດທີ 20 ຕຸລາຜ່ານມາ ທີ່ຫໍປະຊຸມແຫ່ງຊາດ, ທ່ານ ປອ. ເກດແກ້ວ ສີຫາລາດ ຮອງປະທານກຳມາທິການເສດຖະກິດ, ເຕັກໂນໂລຊີ ແລະ ສິ່ງແວດລ້ອມ (ກສຕສ), ປະທານຄະນະມິດຕະພາບລັດຖະສະພາ ລາວ-ໂອເຊອານີ ໄດ້ພົບປະທ່ານ ສະຕີຟ ຈໍການາສ (Steve Georganas) ຫົວໜ້າຄະນະຜູ້ແທນ, ສະມາຊິກລັດ ຖະສະພາອົດສະຕຣາລີ ໃນໂອກາດທີ່ເດີນທາງມາເຂົ້າຮ່ວມກອງປະຊຸມສະມັດຊາໃຫຍ່ລັດຖະສະພາລະຫວ່າງຊາດອາ ຊຽນ ຫຼື ໄອປາ (AIPA) ຄັ້ງທີ 45 ທີ່ ສປປລາວ ເປັນເຈົ້າພາບ.

ໃນການພົບປະ, ສອງຝ່າຍໄດ້ພ້ອມກັນຕີລາຄາສູງຕໍ່ການພົວພັນຮ່ວມມືລະຫວ່າງສະພາແຫ່ງຊາດລາວ ແລະ ລັດຖະສະພາອົດສະຕຣາລີ ທີ່ໄດ້ມີການພົວພັນ ແລະ ຮ່ວມມືນຳກັນເປັນຢ່າງດີ ແລະ ຕໍ່ເນື່ອງ ເຊິ່ງສະແດງອອກມີການແລກປ່ຽນຄະນະຜູ້ແທນຂັ້ນສູງ, ຂັ້ນກຳມາທິການ, ຄະນະມິດຕະພາບລັດຖະສະພາ; ມີການຈັດເຝິກອົບຮົມ, ທັດສະນະສຶກສາກ່ຽວກັບວຽກງານລັດຖະສະພາ, ການປົກຄອງ, ການພັດທະນາ ແລະ ຫົວຂໍ້ອື່ນໆ. ນອກນີ້, ຍັງໄດ້ມີການແລກປ່ຽນສານຊົມເຊີຍໃນໂອກາດວັນສຳຄັນຂອງຊາດ, ຮ່ວມມື ແລະ ສະໜັບສະໜູນເຊິ່ງກັນແລະກັນໃນເວທີລັດຖະສະພາພາກພື້ນ ແລະ ສາກົນ ເຊັ່ນ: AIPA, IPU, APPF ເຊິ່ງເປັນການປະກອບສ່ວນສົ່ງເສີມສັນຕິພາບ, ສະຖຽນລະພາບ ແລະ ການຮ່ວມມືເພື່ອການພັດທະນາຢູ່ໃນພາກພື້ນ ແລະ ສາກົນ.

ສອງຝ່າຍຍັງໄດ້ສະເໜີແລກປ່ຽນບາງຄຳຄິດຄຳເຫັນຕໍ່ກັບທິດທາງການພົວພັນຮ່ວມມືລະຫວ່າງສອງອົງການນິ ຕິບັນຍັດໃນຕໍ່ໜ້າ ຄື: ສືບຕໍ່ແລກປ່ຽນຄະນະຜູ້ແທນຂັ້ນຕ່າງໆນຳກັນຢ່າງປົກກະຕິ ແລະ ຕໍ່ເນື່ອງ; ຊ່ວຍສ້າງຊັບພະຍາກອນມະນຸດ ເປັນຕົ້ນແມ່ນການເຝິກອົບຮົມ, ທັດສະນະສຶກສາ ແລະ ແລກປ່ຽນບົດຮຽນນຳກັນ ເພື່ອຍົກສູງຂີດຄວາມສາມາດແກ່ສະພາແຫ່ງຊາດ ແລະ ສະພາປະຊາຊົນຂັ້ນແຂວງ ຂອງ ສປປລາວ; ຊຸກຍູ້ ແລະ ສົ່ງເສີມໃຫ້ລັດຖະບານຂອງສອງປະເທດ ສືບຕໍ່ຈັດຕັ້ງປະຕິບັດບັນດາສັນຍາ, ສົນທິສັນຍາ, ຂໍ້ຕົກລົງ ແລະ ໂຄງການຮ່ວມມືທີ່ໄດ້ລົງນາມຮ່ວມກັນໃຫ້ເປັນຮູບປະທຳ ແລະ ນຳເອົາຜົນປະໂຫຍດມາສູ່ປະຊາຊົນຢ່າງແທ້ຈິງ; ສືບຕໍ່ແລກປ່ຽນຄຳເຫັນ ແລະ ສະໜັບສະໜູນເຊິ່ງກັນແລະກັນໃນເວທີລັດຖະສະພາພາກພື້ນ ແລະ ສາກົນ.

(ກົງທະນູຄຳ ພິພັດເສລີ)