(ສພຊ) ໃນໂອກາດເດີນທາງໄປຢ້ຽມຢາມ ແລະ ເຮັດວຽກ ຢູ່ ສສ.ຫວຽດນາມ ລະຫວ່າງວັນທີ 02-07 ມັງກອນ 2024 ສະຫາຍ ສຈ. ປອ. ຈະເລີນ ເຍຍປາວເຮີ ກຳມະການສູນກາງພັກ, ຮອງປະທານສະພາແຫ່ງຊາດ, ປະທານກຳມາທິການກົດໝາຍ, ຫົວໜ້າຄະນະຮັບຜິດຊອບຄົ້ນຄວ້າ ແລະ ຮຽບຮຽງປະຫວັດຄວາມເປັນມາຂອງສະ ພາແຫ່ງຊາດ ແຫ່ງ ສປປລາວ ພ້ອມດ້ວຍຄະນະ ໄດ້ພົບປະ ແລະ ເຮັດວຽກກັບຄະນະຜູ້ແທນຫວຽດນາມ ນໍາໂດຍສະຫາຍ ຫງວຽນ ຄັກ ດິ້ງ (Nguyễn Khắc Định) ກໍາມະການສູນກາງພັກ, ຮອງປະທານສະພາແຫ່ງຊາດ ໃນຕອນບາຍວັນພະຫັດທີ 04 ມັງກອນ ທີ່ຫໍສະພາແຫ່ງຊາດ, ນະຄອນຫຼວງຮ່າໂນ້ຍ.
ໃນການພົບປະ, ສະຫາຍ ຫງວຽນ ຄັກ ດິ້ງ ສະແດງຄວາມຍິນດີທີ່ໄດ້ຕ້ອນຮັບສະຫາຍຮອງປະທານສະພາແຫ່ງຊາດລາວ ເຊິ່ງເປັນຜູ້ແທນຕ່າງປະເທດຄະນະທຳອິດຂອງສະພາແຫ່ງຊາດຫວຽດນາມໃນປີ 2024 ທີ່ມາຢ້ຽມ ຢາມ ແລະ ເຮັດວຽກຢູ່ຫວຽດນາມ. ຮອງປະທານສະພາແຫ່ງຊາດ ເນັ້ນໜັກເຖິງການພົບປະແລກປ່ຽນຄະນະຜູ້ແທນຂັ້ນສູງ ແລະ ບັນດາຄະນະຜູ້ແທນ ເພື່ອແລກປ່ຽນປະສົບການໃນການປະຕິບັດໜ້າທີ່ວຽກງານ, ຈັດກອງປະ ຊຸມສຳມະນາຫົວຂໍ້ຕ່າງໆ, ການພົບປະເຮັດວຽກໂດຍກົງລະຫວ່າງບັນດາກຳມາທິການ ແລະ ອົງການຈັດຕັ້ງຂອງສະ ພາແຫ່ງຊາດສອງປະເທດຢ່າງປົກກະຕິ ຈະເປັນປະກອບສ່ວນນຳເອົາໝາກຜົນແຫ່ງການຮ່ວມມືລະຫວ່າງສະພາແຫ່ງຊາດສອງປະເທດໃຫ້ເຂົ້າສູ່ລວງເລິກ ແລະ ແທດຕົວຈິງທີ່ສຸດ, ສະແດງໃຫ້ເຫັນຄວາມໄວ້ເນື້ອເຊື່ອໃຈ ແລະ ຄວາມໃກ້ຊິດລະຫວ່າງສອງສະພາແຫ່ງຊາດ.
ສະຫາຍ ສຈ. ປອ. ຈະເລີນ ເຍຍປາວເຮີ ໄດ້ສະແດງຄວາມຂອບໃຈທ່ານຮອງປະທານສະພາແຫ່ງຊາດ ຫງວຽນ ຄັກ ດິ້ງ ທີ່ໃຫ້ການຕ້ອນຮັບຢ່າງອົບອຸ່ນ. ພ້ອມກັນນັ້ນ, ກໍແຈ້ງຈຸດປະສົງຂອງການຢ້ຽມຢາມແມ່ນເພື່ອແລກປ່ຽນ, ແບ່ງປັນ, ຮັບເອົາບັນດາບົດຮຽນທີ່ດີ ແລະ ປະສົບການອັນລ້ຳຄ່າ ໃນວຽກງານການຄົ້ນຄວ້ານິຕິບັນຍັດ, ປັບປຸງລັດຖະທຳມະນູນ ແລະ ລະບົບກົດໝາຍ ກໍຄືການສັງລວມຂໍ້ມູນຮັບໃຊ້ໃຫ້ແກ່ການສ້າງ, ຮຽບຮຽງເອກະ ສານປະຫວັດ 50 ປີ ແຫ່ງການເຕີບໃຫຍ່ ແລະ ການພັດທະນາຂອງສະພາແຫ່ງຊາດລາວ; ປະກອບສ່ວນເພີ່ມທະວີສາຍພົວພັນມິດຕະພາບອັນຍິ່ງໃຫຍ່, ຄວາມສາມັກຄີແບບພິເສດ ແລະ ການຮ່ວມມືຮອບດ້ານ ລະຫວ່າງພັກ, ລັດ ແລະ ປະຊາຊົນ ລາວ-ຫວຽດນາມ.
ສະຫາຍ ຫງວຽນ ຄັກ ດິ້ງ ກ່າວເຖິງວຽກງານສ້າງກົດໝາຍວ່າ: ບັນດາອົງການຈັດຕັ້ງຂອງສະພາແຫ່ງຊາດຫວຽດນາມ ລ້ວນແຕ່ມີພາລະບົດບາດ, ໜ້າທີ່ ສ້າງ ແລະ ປັບປຸງກົດໝາຍ ໂດຍມີກຳມາທິການກົດໝາຍເປັນຈຸດໃຈ ກາງ. ໃນອາຍຸການຂອງສະພາແຫ່ງຊາດຊຸດທີ XV, ພາຍໃຕ້ການຊີ້ນຳຂອງສະຫາຍປະທານສະພາແຫ່ງຊາດ ເວືອງ ດິ່ງ ເຫວະ (Vương Đình Huệ), ສະພາແຫ່ງຊາດຫວຽດນາມ ໄດ້ເສີມຂະຫຍາຍບົດບາດຂອງສະຖາບັນຄົ້ນຄວ້ານິຕິບັນຍັດ – ອົງການຄົ້ນຄວ້າວິທະຍາສາດວຽກງານນິຕິບັນຍັດ; ສະຖາບັນຄົ້ນຄວ້ານິຕິບັນຍັດ ແລະ ຫໍສະໝຸດຂອງສະພາແຫ່ງຊາດ ກໍໄດ້ສະໜອງເອກະສານຄົ້ນຄວ້າໃຫ້ແກ່ບັນດາສະມາຊິກສະພາແຫ່ງຊາດ (ສສຊ) ເປັນປະຈຳ, ຊ່ວຍໃຫ້ ສສຊ ມີການປະກອບຄຳຄິດຄຳເຫັນ ແລະ ອະພິປາຍທີ່ມີຄຸນນະພາບສູງ. ສະຫາຍຍັງໄດ້ມີຄຳເຫັນກ່ຽວກັບບາງປະສົບການໃນການໂຄສະນາເຜີຍແຜ່ຂໍ້ມູນ ແລະ ສັງລວມເອກະສານເພື່ອຮັບໃຊ້ການຮຽບຮຽງປະຫວັດຂອງສະພາແຫ່ງຊາດ ວ່າ: ສະພາແຫ່ງຊາດຫວຽດນາມ ກໍພວມດຳເນີນບັນດາວຽກງານກະກຽມສະເຫຼີມສະຫຼອງ 80 ປີແຫ່ງການເລືອກຕັ້ງສະພາແຫ່ງຊາດຄັ້ງທຳອິດ ໃນເດືອນມັງກອນ 2026, ໃນນັ້ນມີວຽກງານຮຽບຮຽງປະຫວັດ 80 ປີຂອງສະພາແຫ່ງຊາດຫວຽດນາມ; ໂດຍເນັ້ນໜັກວ່າ, ນີ້ແມ່ນວຽກງານສຳຄັນທີ່ສຸດ, ມີຄວາມໝາຍທາງດ້ານການເມືອງອັນໃຫຍ່ຫຼວງ, ຮຽກຮ້ອງໃຫ້ມີຄວາມຕັ້ງໃຈສູງ.
ສະຫາຍ ສຈ. ປອ. ຈະເລີນ ເຍຍປາວເຮີ ສະແດງຄວາມຂອບໃຈສະຫາຍຮອງປະທານສະພາແຫ່ງຊາດ ຫວຽດນາມ ທີ່ໄດ້ແບ່ງປັນປະສົບການດ້ວຍນ້ຳໃຈ, ພ້ອມໃຫ້ການຮ່ວມມືສະເໝີ ແລະ ຄຽງຂ້າງສະພາແຫ່ງຊາດລາວ; ຜ່ານການໂອ້ລົມສົນທະນາ, ຄະນະຜູ້ແທນໄດ້ຖອດຖອນເອົາບົດຮຽນ ແລະ ປະສົບການອັນລ້ຳຄ່າຫຼາຍຢ່າງ, ໂດຍສະເພາະແມ່ນເນື້ອໃນສຳຄັນທີ່ສຸດກ່ຽວກັບການຄົ້ນຄວ້າສ້າງ, ປັບປຸງລະບົບກົດໝາຍ ແລະ ຮຽບຮຽງປະຫວັດຂອງສະພາແຫ່ງຊາດ. ສະຫາຍ ສຈ. ປອ. ຈະເລີນ ເຍຍປາວເຮີ ໄດ້ແຈ້ງໃຫ້ຮູ້ວ່າ: ປີ 2024 ສະພາແຫ່ງຊາດລາວ ຈະດຳລົງຕຳແໜ່ງເປັນປະທານໄອປາ (AIPA) ແລະ ຈັດກອງປະຊຸມໃຫຍ່ໄອປາຄັ້ງທີ 45, ຫວັງວ່າສະພາແຫ່ງຊາດຫວຽດນາມ ຈະສືບຕໍ່ສະໜັບສະໜູນ ແລະ ແບ່ງປັນປະສົບການໃຫ້ແກ່ສະພາແຫ່ງຊາດລາວ ຈັດຕັ້ງກິດຈະກໍາທີ່ສໍາຄັນນີ້ປະສົບຜົນສໍາເລັດ.
ຮອງປະທານສະພາແຫ່ງຊາດ ລາວ-ຫວຽດນາມ ພົບປະສອງຝ່າຍ
