(ສພຊ) ໃນວັນທີ 30 ກັນຍາ 2022, ທ່ານ ສົມມາດ ພົລເສນາ ຮອງປະທານສະພາແຫ່ງຊາດ ຮ່ວມກັບທ່ານ ອ່ອນຈັນ ຄຳພາວົງ ຮອງເຈົ້າແຂວງໆຫຼວງນ້ຳທາ ພ້ອມດ້ວຍຄະນະ ໄດ້ເຄື່ອນໄຫວຕິດຕາມກວດກາ, ຊຸກຍູ້ກການຈັດຕັ້ງປະຕິບັດວຽກງານການຄຸ້ມຄອງຄົນເຂົ້າ-ອອກເມືອງ, ການຂົນສົ່ງສິນຄ້າຜ່ານແດນ ແລະ ບໍລິການຢູ່ດ່ານພາສີສາກົນບໍ່ເຕັນ ແຂວງຫຼວງນ້ຳທາ.

ໂອກາດດັ່ງກ່າວ ຄະນະ ຍັງໄດ້ຮັບຟັງການລາຍງານໂດຍສັງເຂບຈາກທ່ານ ຄຳຕຸ່ນ ບຸນລຽນຂັນ ຫົວໜ້າຄະນະຄຸ້ມຄອງດ່ານສາກົນບໍ່ເຕັນ ເຊິ່ງທ່ານໃຫ້ຮູ້ວ່າ: ຜ່ານການເຄື່ອນໄຫວປະຕິບັດໜ້າທີ່ວຽກງານແຕ່ຕົ້ນປີ 2022 ຫາທ້າຍເດືອນສິງຫາ 2022 ແມ່ນມີຄົນເຂົ້າເມືອງທັງໝົດ 1.119 ຄົນ ໃນນັ້ນ, ຄົນລາວ 187 ຄົນ; ຄົນອອກເມືອງທັງໝົດ 10.237 ຄົນ ໃນນັ້ນ, ຄົນລາວ 42 ຄົນ; ພາຫະນະເຂົ້າເມືອງທັງໝົດ 36.685 ຄັນ; ພາຫະນະອອກເມືອງທັງໝົດ 44.973 ຄັນ (ພາຫະນະສ່ວນຫຼາຍແມ່ນລົດບັນທຸກສິນຄ້າ); ຈາກນັ້ນ, ທ່ານ ວິລະກອນ ເກດຕະວົງ ຫົວໜ້າດ່ານພາສີສາກົນ ໄດ້ລາຍງານໃຫ້ຮູ້ວ່າ: ດ່ານພາສີສາກົນບໍ່ເຕັນ ແມ່ນເປີດທຸກວັນ ເລີ່ມແຕ່ເວລາ 6:00 ໂມງ ຫາ 22:00 ໂມງ, ສຳລັບການບໍລິການສິນຄ້າເຂົ້າ-ອອກຜ່ານດ່ານ ແລະ ສະຖານີລົດໄຟບໍ່ເຕັນ ເລີ່ມແຕ່ເວລາ 8:00 ໂມງ ຫາ 16:30 ໂມງ ແລະ ການນຳໃຊ້ເຄື່ອງທີ່ທັນສະໄໝໃນການອຳນວຍຄວາມສະດວກທາງດ້ານການຄ້າຄື ລະບົບການແຈ້ງພາສີແບບເອເລັກໂຕຣນິກ (ASYCUDA); ລະບົບ AMART TAXS; ລະບົບ EASY PASSS; ລະບົບຄຸ້ມຄອງ D53; ລະບົບຊິງຊັ່ງທັນສະໄໝ; ເຄື່ອງກວດກາສິນຄ້າດ້ວຍລະບົບສາຍແສງສະແກນເນີ (SCANNER) ແລະ ນໍາໃຊ້ລະບົບແຈ້ງພາສີປະຕູດຽວແຫ່ງຊາດ LNSW ເຂົ້າສູ່ການຄຸ້ມຄອງການນຳເຂົ້າ-ສົ່ງອອກ ສິນຄ້າ ຢູ່ດ່ານພາສີສາກົນບໍ່ເຕັນ.

(ພາບ ແລະ ຂ່າວ: ນາງ ກຸກກິກ ບຸດດາໄຊ)