ໃນລະຫວ່າງວັນທີ 30 ກັນຍາ ຫາ 01 ຕຸລາ 2024 ທ່ານສົມມາດ ພົລເສນາ ກຳມະການສູນກາງພັກ ຮອງປະທານສະພາແຫ່ງຊາດ ພ້ອມຄະນະ ໄດ້ເຄື່ອນໄຫວເຮັດວຽກ ຕິດຕາມກວດກາການຈັດຕັ້ງປະຕິບັດວຽກງານ 03 ສ້າງ ຢູ່ທີ່ແຂວງສະຫວັນນະເຂດ ໂດຍການຕ້ອນຮັບ ແລະ ຮ່ວມເຄື່ອນໄຫວ ຂອງທ່ານ ກົງແກ້ວ ມີວໍລະຈັກ ຮອງເລຂາພັກແຂວງ ປະທານສະພາປະຊາຊົນແຂວງ ພ້ອມຄະນະ. ຈຸດປະສົງໃນການເຄື່ອນໄຫວ ກໍເພື່ອເປັນການຕິດຕາມກວດກາ ຄວາມຄືບໜ້າຂອງການຈັດຕັ້ງປະຕິບັດມະຕິກອງປະຊຸມສະໄໝສາມັນເທື່ອທີ 10 ຂອງສະພາແຫ່ງຊາດ ຊຸດທີ VII ວ່າດ້ວຍການຮັບຮອງເອົາບົດລາຍງານຂອງລັດຖະບານ ກ່ຽວກັບການຈັດຕັ້ງປະຕິບັດເຮັດທົດລອງວຽກງານ ສ້າງແຂວງເປັນຫົວໜ່ວຍຍຸດທະສາດ, ສ້າງເມືອງເປັນຫົວໜ່ວຍເຂັ້ມແຂງຮອບດ້ານ ແລະ ສ້າງບ້ານເປັນຫົວໜ່ວຍພັດທະນາ ສະບັບເລກທີ 02/ສພຊ, ລົງວັນທີ 28 ມັງກອນ 2016 ເພື່ອຊອກໃຫ້ເຫັນຜົນງານ, ຂໍ້ສະດວກ, ຂໍ້ຫຸ້ຍງຍາກ ແລະ ບົດຮຽນທີ່ຖອດຖອນໄດ້ຜ່ານການຈັດຕັ້ງປະຕິບັດຕົວຈິງ ຂອງສູນກາງ ແລະ ທ້ອງຖິ່ນໃນໄລຍະຜ່ານມາ, ເພື່ອເກັບກຳຂໍ້ມູນການຈັດຕັ້ງປະຕິບັດການແບ່ງຂັ້ນຄຸ້ມຄອງລະຫວ່າງສູນກາງກັບແຂວງ, ແຂວງກັບເມືອງ ແລະ ເມືອງກັບບ້ານ. ພ້ອມທັງເປັນການສະເໜີຜົນຂອງການຕິດຕາມກວດກາຂອງຄະນະປະຈຳສະພາແຫ່ງຊາດ ກ່ຽວກັບການຈັດຕັ້ງປະຕິບັດມະຕິຂອງກອງປະຊຸມດັ່ງກ່າວ ຕໍ່ກອງປະຊຸມສະໄໝສາມັນເທື່ອທີ 08 ຂອງສະພາແຫ່ງຊາດ ຊຸດທີ IX ແລະ ສະພາແຫ່ງຊາດອອກມະຕິຮັບຮອງເອົາບົດລາຍງານຂອງລັດຖະບານກ່ຽວກັບການຈັດຕັ້ງປະຕິບັດວຽກງານ 03 ເພື່ອເປັນບ່ອນອີງໃນການສືບຕໍ່ຈັດຕັ້ງປະຕິບັດວຽກງານດັ່ງກ່າວໃນຕໍ່ໜ້າອີກດ້ວຍ.

 

ຊຶ່ງໃນວັນທີ 30 ກັນຍາ 2024 ຄະນະໄດ້ລົງເຄື່ອນໄຫວຕິດຕາມກວດກາ ແລະ ເກັບກໍາຂໍ້ມູນ ຢູ່ກຸ່ມບ້ານມັນຈີ ເມືອງເຊໂປນ ແລະ ກຸ່ມບ້ານພັດທະນາອາສິງ ເມືອງນອງ ໂດຍການຕ້ອນຮັບຂອງຄະນະນຳຂອງເມືອງ, ສສຂ ປະຈຳເຂດເລືອກຕັ້ງເມືອງ ຕະຫຼອດຮອດອຳນາດການປົກຄອງຂອງທັງ02 ເມືອງ ທັງນີ້ກໍເພື່ອຮັບຟັງການລາຍງານສະພາບລວມໂດຍຫໍ້ຍ ໃນການຈັດຕັ້ງປະຕິບັດການເຄື່ອນໄຫວວຽກງານໃນໄລຍະຜ່ານມາ ຕໍ່ກັບຂໍ້ສະດວກ ແລະ ຂໍ້ຫຸ້ຍງຍາກ ຊຶ່ງທີ່ປະຊຸມໄດ້ມີການປຶກສາຫາລື ພ້ອມທັງປະກອບຄໍາຄິດ-ຄໍາເຫັນຢ່າງກົງໄປກົງມາ ໃນແຕ່ລະບັນຫາ ຊຶ່ງເປັນຂໍ້ມູນອັນສຳຄັນໃຫ້ແກ່ການລົງຕິດຕາມກວດກາໃນຄັ້ງນີ້ ແລະ ໃນຕອນທ້າຍ ທ່ານ ສົມມາດ ພົລເສນາ ແລະ ທ່ານ ກົງແກ້ວ ມີວໍລະຈັກ ກໍ່ໄດ້ມີເຄື່ອງນຸ່ງຮົ່ມ, ອຸປະກອນການຮຽນ ມອບໃຫ້ ກຸ່ມບ້ານມັນຈີ ແລະ ກຸ່ມບ້ານພັດທະນາ ອາສີງຕື່ມອີກ ແລະ ໃນຕອນເຊົ້າ ວັນທີ 1 ຕຸລາ 2024, ສະພາແຫ່ງຊາດ ຮ່ວມກັບ ສະພາປະຊາຊົນແຂວງສະຫວັນນະເຂດ ຈັດກອງປະຊຸມຕິດຕາມກວດກາການຈັດຕັ້ງປະຕິບັດວຽກງານ 03 ສ້າງ ຂອງຄະນະປະຈໍາສະພາແຫ່ງຊາດ ປະຈໍາປີ 2024 ຢູ່ທີ່ຫ້ອງປະຊຸມສະພາປະຊາຊົນແຂວງ ໂດຍພາຍໃຕ້ການເປັນປະທານຮ່ວມໂດຍ ທ່ານ ສົມມາດ ພົລເສນາ ກໍາມະການສູນກາງພັກ ຮອງປະທານສະພາແຫ່ງຊາດ ແລະ ທ່ານ ກົງແກ້ວ ມີວໍລະຈັກ ຮອງເລຂາພັກແຂວງ ປະທານສະພາປະຊາຊົນແຂວງ, ເຂົ້າຮ່ວມມີທ່ານ ນາງ ຫຼິງທອງ ແສງຕາວັນ ກໍາມະການປະຈໍາພັກແຂວງ ຮອງເຈົ້າແຂວງສະຫວັນນະເຂດ, ບັນດາທ່ານການນໍາຈາກສູນກາງ, ຫົວໜ້າ-ຮອງຫົວໜ້າພະແນກການຂອງແຂວງສະຫວັນນະເຂດ ເຂົ້າຮ່ວມ.

ໃນກອງປະຊຸມ ທ່ານ ສົມສະໜຸກ ເພັດສົມພູ ຮອງຫົວໜ້າພະແນກພາຍໃນແຂວງສະຫວັນນະເຂດ ໄດ້ລາຍງານກ່ຽວກັບການຈັດຕັ້ງປະຕິບັດການແບ່ງຂັ້ນຄຸມຄອງ ແລະ ການຈັດຕັ້ງປະຕິບັດວຽກງານ 03 ສ້າງໃນໄລຍະຜ່ານມາໂດຍສັງເຂບ ວ່າ: ຄະນະພັກ, ອົງການປົກຄອງແຂວງໄດ້ເອົາໃຈໃສ່ຄວາມຮັບຜິດຊອບເພີ່ມຂຶ້ນຕິດພັນກັບການໄດ້ຮັບຜົນປະໂຫຍດຢ່າງເໝາະສົມໃນການແບ່ງຂັ້ນຄຸ້ມຄອງໃຫ້ທ້ອງຖິ່ນຮາກຖານເມືອງ ແລະ ບ້ານ ຢ່າງຈະແຈ້ງຂາດຕົວພ້ອມທັງຮຽກຮ້ອງໃຫ້ມີການປັບປຸງ, ດັດແກ້ລະບຽບການ, ກົນໄກ ແລະ ນິຕິກຳຈຳນວນໜຶ່ງທີ່ຍັງອັດຕັນ. ພ້ອມດຽວກັນນີ້, ກໍ່ໄດ້ຄົ້ນຄວ້າຄວາມອາດສາມາດ ແລະ ທ່າແຮງ ຂອງຕົນວ່າສິດ ແລະ ຄວາມຮັບຜິດຊອບໃນດ້ານໃດທີ່ຕົນສາມາດຮັບໄດ້ ແລະ ປະຕິບັດໄດ້, ຕ້ອງເຂົ້າໃຈວ່າການເສີມຂະຫຍາຍສິດເປັນເຈົ້າໃຫ້ແກ່ຕົນເອງ ແມ່ນແນໃສ່ການຫຼຸດຜ່ອນການເອື້ອຍອີງໃສ່ບັນດາກະຊວງ-ອົງການຂັ້ນສູນກາງທັງເປັນການສ້າງຄວາມເຂັ້ມແຂງໃຫ້ແກ່ຕົນເອງ ຊຶ່ງ, ປັດຈຸບັນໃນທົ່ວແຂວງ ມີ 33 ພະແນກການ ແລະ ທຽບເທົ່າ, ຂັ້ນເມືອງ ມີ 324 ຫ້ອງການ ແລະ ທຽບເທົ່າ; ໃນນີ້ຂັ້ນແຂວງໄດ້ສໍາເລັດການປັບປຸງພາລະບົດບາດ 100%, ໄດ້ກຳນົດຕຳແໜ່ງງານສໍາເລັດ ແລະ ຮັບຮອງແລ້ວ 21 ພາກສ່ວນ, ຂັ້ນເມືອງ 118 ຫ້ອງການ ແລະ ທຽບເທົ່າ; ໄດ້ລົງຊຸກຍູ້ວຽກງານບໍລິການຜ່ານປະຕູດຽວຢູ່ເມືອງເປົ້າໝາຍໄດ້ 4 ເມືອງ ຄື: ໄຊບູລີ, ອາດສະພອນ, ສອງຄອນ ແລະ ນະຄອນໄກສອນພົມວິຫານ.

ແຕ່ປີ 2011 ເປັນຕົ້ນມາ, ໃນຕະຫຼອດໄລຍະຈັດຕັ້ງປະຕິບັດ ການເຮັດທົດລອງວຽກງານ 3 ສ້າງ, ແຂວງສະຫວັນນະເຂດພວກເຮົາກໍ່ໄດ້ກຳນົດເອົາເປົ້າໝາຍ 9 ບ້ານທີ່ນອນໃນ 3 ເມືອງເປັນເປົ້າໝາຍໃນການເຮັດທົດລອງ 3 ສ້າງ. ດ້ວຍທິດທາງເປົ້າໝາຍສ້າງແຂວງເປັນຫົວໜ່ວຍຍຸດທະສາດ, ສ້າງເມືອງເປັນຫົວໜ່ວຍເຂັ້ມແຂງຮອບດ້ານ, ສ້າງບ້ານເປັນຫົວໜ່ວຍພັດທະນາ ແລະ ຄໍາສັ່ງ 34/ນຍ, ລົງວັນທີ 23 ສິງຫາ 2016 ໃຫ້ເຂົ້າສູ່ລວງເລິກຕິດພັນກັບວຽກງານກໍ່ສ້າງຮາກຖານການເມືອງ ແລະ ພັດທະນາຊົນນະບົດຮອບດ້ານຕາມ 4 ເນື້ອໃນ 4 ຄາດໝາຍ. ໃນ ປີ 2020 ແຂວງໄດ້ຈັດຕັ້ງປະຕິບັດດໍາເນີນການປະເມີນໃຫຍ່ເປັນຄັ້ງທໍາອິດ 5 ປີ ແຕ່ປີ 2016 ຫາ 2020, ຊຶ່ງຜົນການປະເມີນໄດ້ສະແດງໃຫ້ພວກເຮົາເຫັນວ່າ ສາມາດບັນລຸມາດຕະຖານສ້າງແຂວງເປັນຫົວໜ່ວຍຍຸດທະສາດ ໃນ 7 ດ້ານ; ບັນລູການສ້າງເມືອງເປັນຫົວໜ່ວຍເຂັ້ມແຂງຮອບດ້ານ ໃນ 5 ດ້ານ ມີ ນະຄອນໄກສອນພົມວິຫານ ແລະ ເມືອງສອງຄອນ ໃນຈໍານວນ 14 ເມືອງ 1 ນະຄອນ ແລະ ບັນລຸການສ້າງບ້ານເປັນຫົວໜ່ວຍພັດທະນາໄດ້ 291 ບ້ານຂອງຈໍານວນ 1,0 24 ບ້ານໃນທົ່ວແຂວງ. ປີ 2023 ສາມາດຕີລາຄາຜົນການປະເມີນແຂວງເປັນຫົວໜ່ວຍຍຸດທະສາດ, ການສ້າງເມືອງເປັນຫົວໜ່ວຍເຂັ້ມແຂງຮອບດ້ານ ແລະ ການສ້າງບ້ານເປັນຫົວໜ່ວຍພັດທະນາ. ຜົນການປະເມີນແຂວງເປັນຫົວໜ່ວຍຍຸດທະສາດໃນ 7 ດ້ານ 66 ຕົວຊີ້ບອກ ຈາກນັ້ນ ໃນກອງປະຊຸມ ກໍໄດ້ມີການປະກອບຄໍາຄິດເຫັນ ໃສ່ໝາກຜົນຂອງການຈັດຕັ້ງປະຕິບັດວຽກງານ 3 ສ້າງໄລຍະຜ່ານມາຂອງແຂວງສະຫວັນນະເຂດ ແລະ ທິດທາງແຜນການສູ້ຊົນ, ບັນດາຂໍ້ຄົງຄ້າງຕ່າງໆໃນການຈັດຕັ້ງປະຕິບັດ ຊຶ່ງເປັນຂໍ້ມູນອັນສຳຄັນໃຫ້ແກ່ການລົງເຄື່ອນໄຫວເຮັດວຽກໃນຄັ້ງນີ້ອີກດ້ວຍ