(ສພຊ) ເພື່ອສະເຫຼີມສະຫຼອງວັນສ້າງຕັ້ງວັນລັດຖະທຳມະ ນູນ ຄົບຮອບ 31 ປີ, ເພື່ອສ້າງຂະບວນການແຂ່ງ ຂັນກິລາດອກປີກໄກ່ພາຍໃນປະເທດໃຫ້ມີຄວາມຟົດຟື້ນ, ເພື່ອໃຫ້ນັກກິລາໄດ້ມີໂອກາດໃນການທົດສອບສີມືຂອງຕົນເອງ ແລະ ສາມາດເລືອກໄດ້ນັກກິລາດີເດັ່ນ ປະກອບເຂົ້າເປັນນັກກິລາທີມຊາດໃນລຸ້ນເຍົາວະຊົນ ແລະ ລຸ້ນທົ່ວໄປ. ໃນວັນທີ 1 ກັນຍາ 2022, ທ່ານ ຄໍາໃບ ດໍາລັດ ຮອງປະທານສະພາແຫ່ງຊາດ ພ້ອມດ້ວຍຄະນະ ໄດ້ເຂົ້າຮ່ວມພິທີເປີດການແຂ່ງຂັນກິລາດອກປີກໄກ່ຊິງແຊ໋ມທົ່ວປະເທດ ຄັ້ງທີ 21 ຊິງຂັນທ່ານປະທານສະພາແຫ່ງຊາດ ປະຈຳປີ 2022 ໃນວັນທີ 1-4 ກັນຍາ 2022 ທີ່ສະໂມສອນດອກປີກໄກ່ເສດຖາ (ບຶງຂະຫຍອງ), ມີທ່ານ ປອ. ບຸນເຫຼືອ ສິນໄຊວໍຣະວົງ ຜູ້ວ່າການທະນາຄານ ແຫ່ງ ສປປລາວ, ປະທານຄະນະບໍລິຫານງານສະຫະພັນກິລາດອກປີກໄກ່ແຫ່ງຊາດລາວ, ຫົວໜ້າກົມກິລາລະດັບສູງ, ກະຊວງສຶກສາທິການ ແລະ ກິລາ, ຮອງປະທານ ແລະ ເລຂາທິການ ຄະນະກຳມະການໂອແລມປິກແຫ່ງຊາດລາວ, ປະທານ ບໍລິສັດ ເບຍລາວ ຈຳກັດ, ເລຂາທິການ ສະຫະພັນກິລາດອກປີກໄກ່ແຫ່ງຊາດລາວ ພ້ອມດ້ວຍບັນດາຄະນະສະຫະພັນດອກປີກໄກ່, ຄະນະນໍາ, ຄູເຝິກ ແລະ ນັກກິລາ ໃນທົ່ວປະເທດເຂົ້າຮ່ວມ.

ທ່ານ ປອ. ໄຊບັນດິດ ຣາຊາພົນ ເລຂາທິການສະຫະ ພັນກິລາດອກປີກໄກ່ແຫ່ງຊາດລາວ ໄດ້ລາຍງານກ່ຽວກັບການກະກຽມຄວາມພ້ອມ ແລະ ກ່າວເປີດງານແຂ່ງຂັນກິລາດອກປີກໄກ່ ວ່າ: ການແຂ່ງຂັນໃນຄັ້ງນີ້ ໄດ້ປະກາດການຮັບສະໝັກມີທັງໝົດ 13 ລາຍການ ປະກອບມີ: ລຸ້ນເຍົາວະຊົນ 8 ລາຍການ ໄດ້ແກ່ ດ່ຽວເຍົາວະຊົນຊາຍ-ຍິງ ອາຍຸບໍ່ເກີນ 12 ປີ, ດ່ຽວເຍົາວະຊົນຊາຍອາຍຸບໍ່ເກີນ 15 ປີ, ດ່ຽວເຍົາວະຊົນຍິງອາຍຸບໍ່ເກີນ 15 ປີ, ຄູ່ເຍົາວະຊົນຊາຍອາຍຸບໍ່ເກີນ 15 ປີ, ດ່ຽວເຍົາວະຊົນຊາຍອາຍຸບໍ່ເກີນ 18 ປີ, ດ່ຽວເຍົາວະຊົນຍິງອາຍຸບໍ່ເກີນ 18 ປີ, ຄູ່ເຍົາວະຊົນຊາຍອາຍຸບໍ່ເກີນ 18 ປີ, ຄູ່ເຍົາວະຊົນປະສົມອາຍຸບໍ່ເກີນ 18 ປີ. ນອກຈາກນັ້ນ, ຍັງມີລຸ້ນຊາວໜຸ່ມທົ່ວໄປອີກ 5 ລາຍການດ່ຽວຊາຍທົ່ວໄປ, ຄູ່ຍິງທົ່ວໄປ, ຄູ່ຊາຍທົ່ວໄປ, ຄູ່ປະສົມທົ່ວໄປ, ຄູ່ສະໝັກຫຼິ້ນຊາຍທົ່ວໄປ. ການແຂ່ງຂັນຄັ້ງນີ້ ມີຜູ້ສະໝັກເຂົ້າຮ່ວມທັງໝົດ 354 ຄົນ ຍິງ 25 ຄົນ ເພີ່ມຂຶ້ນຈາກຄັ້ງກ່ອນປະມານ 10% ໂດຍມີ 33 ພາກສ່ວນ ທີ່ມາ ຈາກບັນດາແຂວງ (ສະຫວັນນະເຂດ, ຄຳມ່ວນ, ບໍລິຄຳໄຊ, ຫົວພັນ, ອຸດົມໄຊ, ຫຼວງພະບາງ, ບໍ່ແກ້ວ) ພາກສ່ວນທີ່ມາຈາກບັນດາສະໂມສອນ ແລະ ທີມພາຍໃນນະຄອນ ຫຼວງວຽງຈັນ. ພາຍຫຼັງສັງລວມລາຍຊື່ຜູ້ສະໝັກໃນລາຍການຕ່າງໆແລ້ວ ເຫັນວ່າມີ 2 ລາຍການທີ່ບໍ່ສາມາດຈັດແຂ່ງຂັນໄດ້ ເນື່ອງຈາກຈໍານວນຜູ້ສະໝັກບໍ່ໄດ້ຕາມລະບຽບການ. ດັ່ງນັ້ນ, ໃນການກຳນົດເບື້ອງຕົ້ນທີ່ຈະຈັດແຂ່ງ 13 ລາຍການ ຈຶ່ງເຫຼືອພຽງ 11 ລາຍການ. ລາຍການທີ່ບໍ່ສາມາດຈັດແຂ່ງໄດ້ ແມ່ນລາຍການດ່ຽວເຍົາວະຊົນຍິງ ອາຍຸບໍ່ເກີນ 15 ປີ ແລະ ດ່ຽວເຍົາວະຊົນຍິງ ອາຍຸບໍ່ເກີນ 18 ປີ. ສະຫະພັນກິລາດອກປີກໄກ່ແຫ່ງຊາດລາວ ຂໍຢັ້ງຢືນວ່າ ມີຄວາມພ້ອມ 100% ໃນການຈັດການແຂ່ງຂັນ ໄດ້ມີການຈັດແຂ່ງຂັນໄປແລ້ວຈຳນວນ 52 ນັດ ເຊິ່ງດຳເນີນໄປດ້ວຍດີ.

(ພາບ ແລະ ຂ່າວ: ອານຸສອນ ພູມມີທອນ)