ລະຫວ່າງວັນທີ 13-14 ກໍລະກົດ 2024 ທ່ານ ປອ ນາງ ສູນທອນ ໄຊຍະຈັກ ເລຂາທິການສູນກາງພັກ, ຮອງປະທານສະພາແຫ່ງຊາດ ພ້ອມດ້ວຍຄະນະ ໄດ້ລົງເຄື່ອນໄຫວຢ້ຽມຢາມ, ຕິດຕາມກວດກາ ແລະ ຊູກຍູ້ ການຈັດຕັ້ງປະຕິບັດໂຄງການກໍ່ສ້າງຕຶກສະພາປະຊາຊົນແຂວງ ແລະ ວຽກງານຂົງເຂດຍຸຕິທໍາ(ການຈັດຕັ້ງປະຕິບັດກົດໝາຍ ແລະ ນິຕິກຳທີ່ຕິດພັນກັບການຄຸ້ມຄອງ ແລະ ປະຕິບັດວຽກງານຄ້າຍຄຸມຂັງ) ຢູ່ແຂວງຫລວງນ້ຳທາ ໂດຍໃຫ້ກຽດຕ້ອນຮັບຂອງທ່ານ ຄຳຟອງ ອີນມານີ ຮອງເລຂາພັກແຂວງ ປະທານສະພາປະຊາຊົນແຂວງ ພ້ອມດ້ວຍຄະນະ.

ໂອກາດລົງເຄື່ອນໄຫວຢ້ຽມຢາມ, ຕິດຕາມກວດກາ ແລະ ຊູກຍູ້ ການຈັດຕັ້ງປະຕິບັດໂຄງການກໍ່ສ້າງຕຶກສະພາປະຊາຊົນແຂວງ ແລະ ວຽກງານຂົງເຂດຍຸຕິທໍາ ນີ້ໄດ້ເປີດກອງປະຊຸມຮ່ວມສະພາປະຊາຊົນແຂວງ ຢູ່ທີ່ຫ້ອງປະຊຸມສະພາປະຊາຊົນແຂວງ ພາຍໃຕ້ການເປັນປະທານຂອງທ່ານ ປອ ນາງ ສູນທອນ ໄຊຍະຈັກ ເລຂາທິການສູນກາງພັກ, ຮອງປະທານສະພາແຫ່ງຊາດ ໃຫ້ກຽດເຂົ້າຮ່ວມຂອງທ່ານ ຄຳຟອງ ອີນມານີ ຮອງເລຂາພັກແຂວງ ປະທານສະພາປະຊາຊົນແຂວງ, ມີສະມາຊິກສະພາແຫ່ງຊາດປະຈຳເຂດເລືອກຕັ້ງ, ສະມາຊິກສະພາປະຊາຊົນແຂວງ ແລະ ພາກສ່ວນທີ່ກ່ຽວຂ້ອງເຂົ້າຮ່ວມ.

ວາລະກອງປະຊຸມໄດ້ຮັບຟັງການລາຍງານສະພາບລວມໂດຍຫຍໍ້ຂອງສະພາປະຊາຊົນແຂວງເປັນຕົ້ນ; ດ້ານກົງຈັກການຈັດຕັ້ງ ແລະ ບຸກຄະລາກອນ, ອາຄານຫ້ອງການສະພາປະຊາຊົນແຂວງຫລັງປັດຈຸບັນ, ການສະເໜີສິດນໍາໃຊ້ທີ່ດິນຕັ້ງອາຄານຫ້ອງການສະພາປະຊາຊົນແຂວງຫລັງໃໝ່ ພ້ອມທັງສະເໜີໃຫ້ຄະນະປະຈຳສະພາແຫ່ງຊາດຊ່ວຍຄົ້ນ ຄວ້າ, ພິຈາລະນາ ແລະ ອານຸມັດງົບປະມານໃນການກໍ່ສ້າງອາຄານສະພາປະຊາຊົນແຂວງຫລວງນ້ຳທາ ຫລັງໃໝ່; ໃນວັນດຽວກັນ ຍັງໄດ້ຢ້ຽມຢາມຄ້າຍຄຸມຂັງດັດສ້າງຂອງແຂວງຫລວງນ້ຳທາ ເພື່ອຮັບຟັງການລາຍງານສະພາບການຈັດຕັ້ງປະຕິບັດວຽກງານພາຍໃນຄ້າຍຄຸມຂັງດັດສ້າງ ແລະ ຢ້ຽມຢາມໂຄງການພັດທະນາຂອງແຂວງຄື ບໍລິສັດຢູນນ່ານ,​ ຢ້ຽມຢາມສະຖານທີ່ປູກສ້າງອາຄານສະພາປະຊາຊົນແຂວງຫລັງໃໝ່; ນອກນັ້ນ ຍັງໄດ້ຢ້ຽມຢາມໂຄງການພັດທະນາຂອງບໍລິສັດອຳມະຕະ ເຂດນາເຕີຍ ເມືອງຫລວງນ້ຳທາ.