ໃນວັນທີ 14 ມັງກອນ 2024 ນີ້. ທ່ານ ສົມມາດ ພົລເສນາ ຮອງປະທານສະພາແຫ່ງຊາດ ພ້ອມຄະນະ ລົງຢ້ຽມຢາມ ແລະ ເຮັດວຽກຢູ່ສະພາປະຊາຊົນແຂວງ ອັດຕະປື ໂດຍມີທ່ານ ນາງ ມີນາພອນ ໄຊສົມພູ ປະທານສະພາປະຊາຊົນແຂວງ, ບັນດາທ່ານຮອງປະທານສະພາປະຊາຊົນແຂວງ, ຄະນະກໍາມະການ ແລະ ຄະນະເລຂາທິການ ໃຫ້ການຕ້ອນຮັບຢ່າງອົບອຸ່ນ. ໂອກາດນີ້ ທ່ານປະທານສະພາປະຊາຊົນແຂວງ ໄດ້ລາຍງານສະພາບລວມໂດຍຫຍໍ້ໃນການຈັດຕັ້ງປະຕິບັດວຽກງານ ແລະ ທ່ານຮອງປະທານສະພາແຫ່ງຊາດ ໄດ້ມີຄໍາເຫັນໃຫ້ເອົາໃຈໃສ່ຕິດຕາມຊຸກຍູ້ເປັນຕົ້ນໃນຂົງເຂດວຽກງານສືກສາ, ສາທາ ໂດຍສະເພາະການປະລະການຮຽນ, ກອງທຶນປະກັນສຸຂະພາບ.

ຈາກນັ້ນ  ໄດ້ມີພິທີມອບ-ຮັບອຸປະກອນໄຟຟ້າແສງອາທິດ (ໂຊລາເຊວ) ໃຫ້ໂຮງຮຽນສາມັນກີນນອນ ຊົນເຜົ່າ ແຂວງອັດຕະປື ຈໍານວນ 10 ຊຸດ ມູນຄ່າ 67 ລ້ານກີບ ໂດຍການກ່າວມອບ ຂອງທ່ານ ສົມມາດ ພົລເສນາ ຮອງປະທານສະພາແຫ່ງຊາດ ແລະ ກ່າວຮັບໂດຍທ່ານ ນາງ ຫົງຄໍາ ຊາພັກດີ ຜູ້ອໍານວນການໂຮງຮຽນສາມັນກີນນອນ ຊົນເຜົ່າ ໂດຍມີທ່ານປະທານສະພາປະຊາຊົນແຂວງ, ຮອງປະທານສະພາປະຊາຊົນແຂວງ, ຄະນະກໍາມະການ,ຄະນະເລຂາທິການ ແລະ ຄະນະອໍານວຍການໂຮງຮຽນດັ່ງກ່າວເຂົ້າຮ່ວມ. ໂອກາດດັ່ງກ່າວ ທ່ານ ນາງ ຫົງຄໍາ ຊາພັກດີ ໂດຍກ່າວສະແດງຄວາມຂອບໃຈມາຍັງຮອງປະທານສະພາແຫ່ງຊາດ ແລະ ສະພາປະຊາຊົນແຂວງ ທີ່ໄດ້ໃຫ້ການຊ່ວຍເຫຼືອຊຸກຍູ້ດ້ານອຸປະກອນໄຟຟ້າ ໃຫ້ແກ່ໂຮງຮຽນໃນຄັ້ງນີ້ ແລະ ຈະນໍາໃຊ້ວັດຖຸອຸປະກອນດັ່ງກ່າວນີ້ໃຫ້ເກີດປະໂຫຍດສູງສຸດ.

(ວິນັດ)