(ສພຊ) ໃນຕອນເຊົ້າວັນທິດທີ 27 ສິງຫາ 2023 ທ່ານ ພົນໂທ ສຸວອນ ເລືອງບຸນມີ ຮອງປະທານສະພາແຫ່ງຊາດ ຮ່ວມກັບທ່ານ ວົງສະຫວັນ ເທບພະຈັນ ປະທານສະພາປະຊາຊົນແຂວງຫຼວງພະບາງ ພ້ອມດ້ວຍຄະນະ ໄດ້ຢ້ຽມຢາມພົບປະເຮັດວຽກຮ່ວມກັບຄະນະໂຄງການກໍ່ສ້າງເຂື່ອນໄຟຟ້າພະລັງງານນ້ຳຫຼວງພະບາງ.

ໃນໂອກາດດັ່ງກ່າວ, ຄະນະ ໄດ້ຢ້ຽມຊົມໂຄງການ ແລະ ຮັບຟັງການລາຍງານຄວາມເປັນມາ ແລະ ຄວາມຄືບໜ້າການພັດທະນາໂຄງການໄຟຟ້າພະລັງງານນ້ຳຫຼວງພະບາງໂດຍຫຍໍ້ ແລະ ຂໍ້ສະດວກຂໍ້ຫຍຸ້ງຍາກໃນການພັດທະນາກໍ່ສ້າງ ຈາກທ່ານ ອະພິຣັກ ຕາງໜ້າວິຊາການໂຄງການກໍ່ສ້າງໂຄງການດັ່ງກ່າວ ພ້ອມທັງເປີດໂອກາດໃຫ້ຄະນະຕິດຕາມສອບຖາມຕາມບັນຫາທີ່ປະຊາຊົນສະເໜີຜ່ານ ສະພາປະຊາຊົນແຂວງຫຼວງພະບາງ ໃນໄລຍະຜ່ານມາ ແລະ ບັນຫາອື່ນໆ ທີ່ຄະນະຜູ້ແທນໃຫ້ຄວາມສົນໃຈ.

ຈາກນັ້ນ ທ່ານ ພົນໂທ ສຸວອນ ເລືອງບຸນມີ ກໍໄດ້ມີຄຳເຫັນຖາມເຖິງຂໍ້ສະດວກຂໍ້ຫຍຸ້ງຍາກໃນການພັດທະນາໂຄງການ ພ້ອມທັງມອບໃຫ້ປະສານກັບທ້ອງຖິ່ນໃນການປະຕິບັດຕາມຂໍ້ຕົກລົງຕ່າງໆ ເປັນຕົ້ນແມ່ນທ່ານຮອງປະທານສະພາແຫ່ງຊາດ ໄດ້ເນັ້ນໃຫ້ຄະນະຮັບຜິດຊອບໂຄງການປະສານສົມທົບກັບທ້ອງຖິ່ນໃຫ້ປະຕິບັດຕາມ 2 ມະຕິຂອງຄະນະປະຈໍາສະພາແຫ່ງຊາດ ທີ່ໄດ້ວາງອອກ ຄື: ມະຕິຂອງຄະນະປະຈຳສະພາແຫ່ງຊາດ ວ່າດ້ວຍການຮັບຮອງ ແລະ ຍົກເວັ້ນການປະຕິບັດບາງມາດຕາຂອງກົດໝາຍທີ່ພົວພັນກັບໂຄງການໄຟຟ້າພະລັງນ້ຳຢູ່ຫຼວງພະບາງ ສະບັບເລກທີ 14/ຄປຈ, ລົງວັນທີ 18/1/2023 ແລະ ມະຕິຂອງຄະນະປະຈຳສະພາແຫ່ງຊາດວ່າດ້ວຍການຮັບຮອງເອົາການຫັນປ່ຽນເນື້ອທີ່ດິນປ່າໄມ້ທຳມະຊາດໄປເປັນທີ່ດິນປະເພດອື່ນ ເພື່ອນຳໃຊ້ເຂົ້າໃນການພັດທະນາໂຄງການເຂື່ອນໄຟຟ້ານ້ຳຂອງຫຼວງພະບາງ, ແຂວງຫຼວງພະບາງ ສະບັບເລກທີ 65/ຄປຈ, ລົງວັນທີ 30/3/2023 ຢ່າງເຂັ້ມງວດ.

(ພາບ ແລະ ຂ່າວ: ສອນສັກ ວັນວິໄຊ)