(ສພຊ) ໃນວັນທີ 27 ທັນວາ 2023 ທ່ານ ພົທ. ສຸວອນ ເລືອງບຸນມີ ຮອງປະທານສະພາແຫ່ງຊາດ ໄດ້ຢ້ຽມຢາມພົບປະ, ໂອ້ລົມພະນັກງານຫຼັກແຫຼ່ງກອງບັນຊາການທະຫານນະຄອນຫຼວງວຽງຈັນ ເນື່ອງໃນໂອກາດ ວັນສ້າງຕັ້ງກອງທັບປະຊາຊົນລາວ ຄົບຮອບ 75 ປີ (20 ມັງກອນ 1949-20 ມັງກອນ 2024) ທີ່ໃກ້ຈະມາເຖິງ ຕິດພັນກັບການເຜີຍແຜ່ຜົນສຳເລັດຂອງກອງປະຊຸມສະໄໝສາມັນເທື່ອທີ 6 ຂອງສະພາແຫ່ງຊາດຊຸດທີ IX ແລະ ສະພາປະຊາຊົນນະຄອນຫຼວງວຽງຈັນ ຊຸດທີ II ໂດຍມີທ່ານ ບຸນທາມ ພຸດທະວົງ ຮອງປະທານສະພາປະຊາຊົນນະ ຄອນຫຼວງວຽງຈັນ ພ້ອມດ້ວຍຄະນະ ເຂົ້າຮ່ວມຕິດຕາມ.
ທ່ານ ພັອ. ໂສພາວັນ ທຳມະເທວາ ເລຂາຄະນະພັກກອງບັນຊາການ, ຫົວໜ້າການເມືອງກອງບັນຊາການ ທະຫານນະຄອນຫຼວງວຽງຈັນ ໄດ້ລາຍງານຫຍໍ້ກ່ຽວກັບການເຕີບໃຫຍ່ຂະຫຍາຍຕົວຂອງກອງພັນໃຫຍ່ດັ່ງກ່າວ ແລະ ຜົນງານການເຄື່ອນໄຫວເຮັດໜ້າທີ່ການເມືອງຂອງກົມກອງໃນໄລຍະຜ່ານມາ ເຊິ່ງທ່ານໃຫ້ຮູ້ວ່າ: ກອງບັນຊາ ການທະຫານນະຄອນຫຼວງວຽງຈັນ ສ້າງຕັ້ງຂຶ້ນໃນວັນທີ 06 ເມສາ 1976 ເປັນກຳລັງປະກອບອາວຸດທ້ອງຖິ່ນ, ສາຍຕັ້ງຂຶ້ນກັບກະຊວງປ້ອງກັນປະເທດ, ສາຍຂວາງຂຶ້ນກັບຄະນະພັກນະຄອນຫຼວງ ແລະ ຄະນະກໍາມະການ ປກຊ-ປກສ ນະຄອນຫຼວງວຽງຈັນ; ມີໜ້າທີ່ເຮັດໃຫ້ນະຄອນຫຼວງວຽງຈັນ ມີສະຖຽນລະພາບທາງດ້ານການເມືອງ ມີ ຄວາມສະຫງົບ, ຄວາມເປັນລະບຽບຮຽບຮ້ອຍທາງສັງຄົມ, ເຮັດວຽກງານກໍ່ສ້າງຮາກຖານການເມືອງ, ກຽມພ້ອມ ສູ້ຮົບ ແລະ ກູ້ໄພພິບັດ; ເອົາໃຈໃສ່ປັບປຸງກໍ່ສ້າງກຳລັງໃຫ້ໜັກແໜ້ນທາງດ້ານການເມືອງ-ແນວຄິດ, ເຂັ້ມແຂງດ້ານ ການຈັດຕັ້ງ, ກໍ່ສ້າງພັກ-ພະນັກງານ, ຕັ້ງໜ້າເຝິກແອບຮໍ່າຮຽນ, ເຮັດວຽກງານແກ້ໄຂຊີວິດການເປັນຢູ່ບົນຈິດໃຈ “ ເພິ່ງຕົນເອງ, ກຸ້ມຕົນເອງ ແລະ ສ້າງຄວາມເຂັ້ມແຂງດ້ວຍຕົນເອງ” ປະຕິບັດຕາມທິດ 4 ປູກ 4 ລ້ຽງ, ກໍ່ສ້າງຄ້າຍຄູ, ທີ່ຢູ່ອາໄສໃຫ້ແໜ້ນໜາຖາວອນ, ເຮັດວຽກງານພົວພັນກັບຕ່າງປະເທດ ຕາມແນວທາງຂອງພັກ ແລະ ການຊີ້ນຳ ຂອງຂັ້ນເທິງ. ການເຄື່ອນໄຫວປະຕິບັດໜ້າທີ່ໃນຊຸມປີຜ່ານມາ ໄດ້ຫັນເອົາພະນັກງານລົງກໍ່ສ້າງຮາກຖານການ ເມືອງ ຕາມ 4 ເນື້ອໃນ 4 ຄາດໝາຍ ຕິດພັນກັບວຽກງານ 3 ສ້າງ ແລະ ສ້າງທ່າສະໜາມສົງຄາມປະຊາຊົນ 3 ຂັ້ນ; ໄດ້ສຸມໃສ່ສ້າງຄອບຄົວ ແລະ ບ້ານປ້ອງກັນຊາດເຂັ້ມແຂງ ມາຮອດປັດຈຸບັນໄດ້ 80 ບ້ານ ມີ 24.737 ຄອບຄົວ ແລະ ລົງຮາກຖານແບບມູນເຊື້ອ 56 ບ້ານ ມີ 29 ກົມກອງ; ວຽກງານກຽມພ້ອມສູ້ຮົບ ແລະ ກອບກູ້ໄພພິບັດ: ຈັດ ຕັ້ງກຳລັງປະຈຳການກຽມພ້ອມສູ້ຮົບຕະຫຼອດ 24 ຊົ່ວໂມງ, ຈັດຕັ້ງປ້ອງກັນການນຳພັກ-ລັດ, ປ້ອງກັນກອງປະຊຸມ ພາຍໃນ ແລະ ສາກົນ, ປ້ອງກັນວັນສຳຄັນຂອງຊາດຂອງພັກ, ປ້ອງກັນຈຸດສໍາຄັນ ເສັ້ນທາງຄົມມະນາຄົມ, ປ້ອງກັນ ບຸນປະເພນີຕ່າງໆ 1 ປີຜ່ານມາ ໄດ້ທັງໝົດ 22 ຄັ້ງ, ນຳໃຊ້ກຳລັງ 2.115 ເທື່ອຄົນ; ເອົາໃຈໃສ່ປ້ອງກັນຊາຍແດນ ແຕ່ເມືອງສັງທອງ ຫາເມືອງປາກງື່ມ ມີຄວາມຍາວ 187 ກມ, ປ້ອງກັນແລວຂຶ້ນ-ລົງຂອງຍົນ, ປ້ອງກັນເສັ້ນທາງ ລົດໄຟລາວ-ຈີນ ຂອບເຂດນະຄອນຫຼວງວຽງຈັນຮັບຜິດຊອບ ໃຫ້ມີຄວາມສະຫງົບປອດໄພ; ເຂົ້າຮ່ວມການເຝິກ ອົບຮົມ-ຫັດແອບວຽກງານກອບກູ້ໄພພິບັດທີ່ກະຊວງປ້ອງກັນປະເທດຈັດຂຶ້ນ 01 ຄັ້ງ ມີ 20 ຄົນ; ຊ່ວຍເຫຼືອປະ ຊາຊົນທີ່ຖືກຜົນກະທົບຈາກໄພທຳມະຊາດ ນໍ້າຖ້ວມ, ໄຟໄໝ້, ພະຍຸພັດ ແລະ ອື່ນໆ ລວມ 94 ຄັ້ງ 2.904 ເທື່ອ ຄົນ; ເອົາໃຈໃສ່ສຶກສາອົບຮົມການເມືອງ-ນຳພາແນວຄິດໃຫ້ພະນັກງານ-ນັກຮົບຢ່າງເນື່ອງນິດລຽນຕິດ ແລະ ທົ່ວ ເຖິງທຸກເປົ້າໝາຍ ໂດຍເຊື່ອມຊຶມ-ກຳແໜ້ນແນວທາງນະໂຍບາຍ, ມະຕິຕ່າງໆສະໄໝທີ XI ຂອງພັກ, ມະຕິກອງ ປະຊຸມໃຫຍ່ຄັ້ງທີ VII ອົງຄະນະພັກນະຄອນຫຼວງວຽງຈັນ, ມະຕິກອງປະຊຸມໃຫຍ່ຄັ້ງທີ V ອົງຄະນະພັກກະຊວງປ້ອງ ກັນປະເທດ, ກົດໝາຍຂອງລັດ, ມະຕິຄຳສັ່ງ ແລະ ຂໍ້ກຳນົດກົດລະບຽບຕ່າງໆ, ຮຽນມູນເຊື້ອຂອງຊາດຂອງພັກຂອງ ກອງທັບ ແລະ ໜ້າທີ່ການເມືອງຂອງກົມກອງ. ພ້ອມນີ້ ໄດ້ຈັດຕັ້ງສ້າງຂະບວນການຕ່າງໆເພື່ອຕ້ອນຮັບວັນສຳຄັນ ຂອງຊາດ-ຂອງພັກ, ພິເສດແມ່ນວັນສ້າງຕັ້ງກອງທັບປະຊາຊົນລາວ ຄົບຮອບ 75 ປີ ແລະ ວັນສ້າງຕັ້ງກອງບັນຊາ ການທະຫານນະຄອນຫຼວງວຽງຈັນ ຄົບຮອບ 48 ປີ.
​ຈາກນັ້ນ, ທ່ານ ບຸນທາມ ພຸດທະວົງ ໄດ້ຂຶ້ນເຜີຍແຜ່ຜົນສຳເລັດຂອງກອງປະຊຸມສະໄໝສາມັນເທື່ອທີ 6 ຂອງສະພາປະຊາຊົນນະຄອນຫຼວງວຽງຈັນ ຊຸດທີ II ເຊິ່ງໄດ້ຍົກໃຫ້ເຫັນເນື້ອໃນຜົນສຳເລັດຂອງກອງປະຊຸມໃນ ການຕົກລົງບັນຫາສຳຄັນຕ່າງໆພາຍໃນນະຄອນຫຼວງວຽງຈັນ.
ໃນໂອກາດນີ້, ທ່ານ ພົທ. ສຸວອນ ເລືອງບຸນມີ ໄດ້ສະແດງຄວາມຊົມເຊີຍຕໍ່ຜົນງານການເຄື່ອນໄຫວຂອງ ກອງບັນຊາການທະຫານນະຄອນຫຼວງວຽງຈັນທີ່ສາມາດຍາດມາໄດ້ໃນໄລຍະຜ່ານມາ ທັງມີຄຳເຫັນໂອ້ລົມຕໍ່ພະ ນັກງານຫຼັກແຫຼ່ງກອງບັນຊາການທະຫານນະຄອນຫຼວງວຽງຈັນ ເຊິ່ງໄດ້ເນັ້ນໜັກຫຼາຍບັນຫາທີ່ສຳຄັນ ໂດຍສະ ເພາະແມ່ນການຮັກສາມູນເຊື້ອອັນດີງາມ ແລະ ສືບຕໍ່ນຳພາ-ຊີ້ນຳພະນັກງານ, ນາຍ ແລະ ພົນທະຫານ ສ້າງຜົນງານ ນັບມື້ດີຂຶ້ນເລື້ອຍໆ; ປະຕິບັດໜ້າທີ່ວຽກງານວິຊາສະເພາະທີ່ພັກ-ລັດມອບໝາຍໃຫ້ດ້ວຍຄວາມຮັບຜິດຊອບສູງ ແລະ ອື່ນໆ. ພ້ອມດຽວກັນນີ້, ທ່ານຍັງໄດ້ຍົກໃຫ້ເຫັນຜົນສຳເລັດຂອງກອງປະຊຸມສະໄໝສາມັນເທື່ອທີ 6 ຂອງສະ ພາແຫ່ງຊາດຊຸດທີ IX ແລະ ເປີດໂອກາດໃຫ້ຜູ້ເຂົ້າຮ່ວມ ແລະ ສະມາຊິກສະພາແຫ່ງຊາດ ໄດ້ຖາມ-ຕອບຂໍ້ຂ້ອງໃຈ ແລະ ຂໍ້ສະເໜີຕ່າງໆຢ່າງກົງໄປກົງມາອີກດ້ວຍ.