(ສພຊ) – ໃນວັນທີ 13 ແລະ 15 ກໍລະກົດ 2024 ທ່ານ ປອ. ນາງ ສູນທອນ ໄຊຍະຈັກ ເລຂາທິການສູນກາງພັກ, ຮອງປະທານສະພາແຫ່ງຊາດ ພ້ອມດ້ວຍຄະນະ ໄດ້ເຄື່ອນໄຫວວຽກງານຢູ່ແຂວງຫຼວງນ້ຳທາ ແລະ ແຂວງຜົ້ງສາລີ ໂດຍໄດ້ດຳເນີນກອງປະຊຸມຕິດຕາມກວດກາການຈັດຕັ້ງປະຕິບັດໂຄງ ການລົງທຶນຂອງລັດຂອງສະພາແຫ່ງຊາດ ແລະ ການຈັດຕັ້ງປະຕິບັດວຽກງານຂົງເຂດຍຸຕິທຳ; ໃນການຢ້ຽມຢາມຄັ້ງນີ້, ທ່ານຮອງປະທານສະພາແຫ່ງຊາດ ໄດ້ເຂົ້າຮ່ວມກອງປະຊຸມລາຍງານສະພາບການ ເຄື່ອນໄຫວຂອງສະພາປະຊາຊົນແຂວງ, ນັບທັງສະພາບການລົງທຶນກໍ່ສ້າງຫ້ອງການສະພາຂອງແຂວງ ໂດຍມີບັນດາທ່ານປະທານ ແລະ ຮອງປະທານສະພາປະຊາຊົນແຂວງ, ສະມາຊິກສະພາແຫ່ງຊາດ, ສະພາປະຊາຊົນແຂວງ ປະຈຳເຂດເລືອກຕັ້ງ, ບັນດາພະແນກການ, ອົງການ ແລະ ຜູ້ປະກອບການທີ່ກ່ຽວຂ້ອງຂອງ 2 ແຂວງດັ່ງກ່າວ ເຂົ້າຮ່ວມຢ່າງພ້ອມພຽງ.
ຈຸດປະສົງຂອງກອງປະຊຸມຄັ້ງນີ້ ແມ່ນເພື່ອຕິດຕາມກວດກາ, ຊຸກຍູ້ການຈັດຕັ້ງປະຕິບັດໂຄງ ການລົງທຶນຂອງລັດຂອງສະພາແຫ່ງຊາດ ໃຫ້ດໍາເນີນໄປຕາມກົດໝາຍວ່າດ້ວຍການລົງທຶນຂອງລັດ ໂດຍສະເພາະຄວາມຄືບໜ້າຂອງການຈັດຕັ້ງປະຕິບັດໂຄງການກໍ່ສ້າງຕຶກສະພາປະຊາຊົນແຂວງຢູ່ແຂວງຫຼວງນ້ຳທາ ແລະ ຜົ້ງສາລີ ແນໃສ່ຮັບປະກັນມາດຕະຖານດ້ານເຕັກນິກ ແລະ ການຄຸ້ມຄອງຮ່ວມກັນລະຫວ່າງສູນກາງກັບທ້ອງຖິ່ນ ທັງເປັນການເກັບກຳຂໍ້ມູນຕົວຈິງກ່ຽວກັບຂໍ້ສະດວກ ແລະ ຂໍ້ຫຍຸ້ງຍາກໃນການຈັດຕັ້ງປະຕິບັດໂຄງການດັ່ງກ່າວ; ນອກນັ້ນ, ຄະນະຍັງໄດ້ລົງຕິດຕາມກວດກາການຈັດຕັ້ງປະ ຕິບັດກົດໝາຍວ່າດ້ວຍການປະຕິບັດຄໍາຕັດສິນຂອງສານ (ສະບັບປັບປຸງປີ 2021) ແນໃສ່ຮັບປະກັນເຮັດໃຫ້ການປະຕິບັດຄໍາຕັດສິນຂອງສານທີ່ໃຊ້ໄດ້ຢ່າງເດັດຂາດ ໄດ້ຮັບການປະຕິບັດຢ່າງເຂັ້ມງວດ, ຄົບຖ້ວນ, ຖືກຕ້ອງຕາມກົດໝາຍ ແລະ ຄວາມເປັນຈິງ. ຄະນະຍັງໄດ້ຕິດຕາມຄວາມຄືບໜ້າຂອງໂຄງ ການພັດທະນາຈໍານວນໜຶ່ງຂອງລັດຖະບານ ທີ່ພວມຈັດຕັ້ງປະຕິບັດຢູ່ພາຍໃນແຂວງເປົ້າໝາຍທີ່ເຫັນວ່າຍັງມີສິ່ງທ້າທາຍຫຼາຍຢ່າງໃນການລົງທຶນຂອງຕ່າງປະເທດຢູ່ເຂດດັ່ງກ່າວ.
ທ່ານຮອງປະທານສະພາແຫ່ງຊາດ ພ້ອມດ້ວຍຄະນະ ຍັງໄດ້ໄປຢ້ຽມຢາມໂຮງງານປຸງແຕ່ງຢາ ສູບ ຢູ່ແຂວງຜົ້ງສາລີ, ໂຮງງານປຸງແຕ່ງຢາງພາລາ ຢູ່ແຂວງຫຼວງນໍ້າທາ ແລະ ພື້ນຖານການຜະລິດຈຳ ນວນໜຶ່ງໃນ 2 ແຂວງດັ່ງກ່າວ.                     (ຂ່າວ-ພາບ: ນາງ ກຸກກິກ ບຸດດາໄຊ)