(ສພຊ) ເພື່ອເປັນການຕິດຕາມກວດກາການຈັດຕັ້ງປະຕິບັດກົດໝາຍຂອງພະແນກຂັ້ນແຂວງ ພາຍຫຼັງກົດໝາຍໄດ້ຮັບການປະກາດໃຊ້ແລ້ວ ແລະ ການເຜີຍແຜ່ກົດໝາຍ ແລະ ນິຕິກໍາໃຕ້ກົດໝາຍ ຂອງສະພາແຫ່ງຊາດ ແນໃສ່ສ້າງສະຕິເຄົາລົບ, ປະຕິບັດ ລັດຖະທຳມະນູນ ແລະ ກົດໝາຍ ໃນສັງຄົມໃຫ້ນັບມື້ສູງຂຶ້ນ, ປະກອບສ່ວນເຮັດໃຫ້ສັງຄົມມີຄວາມສະຫງົບ, ເປັນລະບຽບຮຽບຮ້ອຍ ແລະ ສັງລວມເປັນຂໍ້ມູນລາຍງານໃຫ້ຄະນະປະຈຳສະພາແຫ່ງຊາດ; ໃນລະຫວ່າງວັນທີ 27-28 ກຸມພາ 2023, ທ່ານ ສຈ. ປອ. ຈະເລີນ ເຍຍປາວເຮີ ຮອງປະທານສະພາແຫ່ງຊາດ ທັງເປັນປະທານກຳມາທິການກົດໝາຍ ພ້ອມດ້ວຍຄະນະ ໄດ້ເຄື່ອນໄຫວຕິດຕາມກວດກາການຈັດຕັ້ງປະຕິບັດກົດໝາຍ ແລະ ເຜີຍແຜ່ກົດ
ໝາຍ ແລະ ນິຕິກຳ ຢູ່ແຂວງຫົວພັນ ໂດຍມີທ່ານ ອຳໄພ ຈິດມານົນ ຮອງປະທານກຳມາທິການກົດໝາຍ, ທ່ານ ນາງ ອຳໄພວອນ ລ້ອມບຸນແພງ ປະທານສະພາປະຊາຊົນແຂວງຫົວພັນ; ບັນດາທ່ານຫົວໜ້າ-ຮອງຫົວໜ້າພະແນກການອ້ອມຂ້າງແຂວງ ພ້ອມດ້ວຍພະນັກງານວິຊາການຈຳນວນໜຶ່ງ.
ການເຄື່ອນໄຫວເຮັດວຽກຄັ້ງນີ້, ທ່ານຮອງປະທານສະພາແຫ່ງຊາດ ພ້ອມດ້ວຍຄະນະ ໄດ້ຮັບຟັງການລາຍງານກ່ຽວກັບການຈັດຕັ້ງປະຕິບັດກົດໝາຍວ່າດ້ວຍປ່າໄມ້, ການຈັດຕັ້ງປະຕິບັດກົດໝາຍວ່າດ້ວຍການຈັດສັນພູມລຳເນົາ ແລະ ອາຊີບ ຈາກພະແນກກະສິກຳ ແລະ ປ່າໄມ້ແຂວງ; ການຈັດຕັ້ງປະຕິບັດກົດໝາຍວ່າດ້ວຍແຮ່ທາດ ຈາກພະແນກພະ ລັງງານ ແລະ ບໍ່ແຮ່ແຂວງ; ລາຍງານການຈັດຕັ້ງປະຕິບັດກົດໝາຍວ່າດ້ວຍການລົງທຶນຂອງລັດຈາກພະແນກແຜນການ ແລະ ການລົງທຶນແຂວງ; ລາຍງານການໂຄສະນາເຜີຍແຜ່ກົດໝາຍ ແລະ ນິຕິກຳໃຕ້ກົດໝາຍ ຈາກພະແນກຍຸທຳແຂວງ; ຈາກນັ້ນ, ປະທານກອງປະຊຸມ ໄດ້ເຈາະຈີ້ມບາງບັນຫາໃນການຈັດຕັ້ງປະຕິບັດກົດໝາຍ ແລະ ບັນດາຜູ້ເຂົ້າຮ່ວມໄດ້ມີການສົນທະນາແລກປ່ຽນຄຳຄິດຄຳເຫັນເຊິ່ງກັນ ແລະ ກັນ ຢ່າງມີຈຸດສຸມ ແລະ ກົງໄປກົງມາ.
ຈາກນັ້ນ, ທ່ານ ອຳໄພ ຈິດມານົນ ຮອງປະທານກຳມາທິການກົດໝາຍ ໄດ້ເຜີຍແຜ່ກົດໝາຍວ່າດ້ວຍສະພາແຫ່ງຊາດ, ກົດໝາຍວ່າດ້ວຍການຕິດຕາມກວດກາຂອງສະພາແຫ່ງຊາດ ແລະ ສະພາປະຊາຊົນແຂວງ ແລະ ມະຕິຂອງຄະນະປະຈຳສະພາແຫ່ງຊາດ ວ່າດ້ວຍການຕີຄວາມໝາຍ ແລະ ອະທິບາຍກົດໝາຍ; ຫຼັງຈາກນັ້ນ, ກອງປະຊຸມ ກໍໄດ້ມີການສົນ ທະນາແລກປ່ຽນຄຳຄິດຄຳເຫັນກັບບັນດາຜູ້ເຂົ້າຮ່ວມຕື່ມອີກ.
ໂອກາດດັ່ງກ່າວ, ທ່ານ ສຈ. ປອ. ຈະເລີນ ເຍຍປາວເຮີ ໄດ້ມີຄໍາເຫັນຕໍ່ກອງປະຊຸມວ່າ: ກອງປະຊຸມຄັ້ງນີ້ ໄດ້ດຳເນີນດ້ວຍບັນຍາກາດທີ່ຟົດຟື້ນ, ສ້າງສັນ ແລະ ເຕັມໄປດ້ວຍເນື້ອໃນສຳຄັນ, ເລິກເຊິ່ງຫຼາຍດ້ານ ເຮັດໃຫ້ກອງປະຊຸມໄດ້ບັນລຸຜົນສຳເລັດຕາມຈຸດປະສົງທີ່ໄດ້ວາງໄວ້ຢ່າງຈົບງາມ; ການຄົ້ນຄວ້າ, ປະກອບຄຳເຫັນ ແລະ ແລກປ່ຽນບົດຮຽນເຊິ່ງກັນ ແລະ ກັນຢ່າກົງໄປກົງມາ ຂອງບັນດາທ່ານທີ່ເຂົ້າຮ່ວມກອງປະຊຸມໃນຄັ້ງນີ້ ເຫັນວ່າມີເຫດມີຜົນ, ພາວະວິໄສ ແລະ ແທດເໝາະກັບສະພາບການຕົວຈິງໃນການຂະຫຍາຍຕົວຂອງສະພາບເສດຖະກິດ-ສັງຄົມໃນປັດຈຸບັນ ສັງລວມແລ້ວເຫັນວ່າບັນດາທ່ານເຫັນໄດ້ເຖິງຄວາມສໍາຄັນ ຂອງວຽກງານຕິດຕາມກວດກາ ແລະ ໂຄສະນາເຜີຍແຜ່ກົດໝາຍ ເຊິ່ງຕ້ອງໄດ້ພ້ອມກັນຕັ້ງໜ້າຈັດຕັ້ງປະຕິບັດວຽກງານດັ່ງກ່າວ ໃຫ້ມີປະສິດທິພາບ ແລະ ປະສິດທິຜົນດີຂຶ້ນກວ່າເກົ່າ ເພື່ອຮັບປະກັນໃຫ້ບັນດາຂະແໜງການຕ່າງໆ ຈັດຕັ້ງປະຕິບັດລັດຖະທຳມະນູນ, ກົດໝາຍ ແລະ ນິຕິກໍາໃຕ້ກົດໝາຍ ໃຫ້ມີຄວາມເຂັ້ມງວດສັກສິດ; ກອງປະຊຸມ ໄດ້ຮັບຟັງຜູ້ຕາງໜ້າກຳມາທິການກົດໝາຍ ແລະ ຕາງໜ້າຈາກ 4 ພະແນກການ ຂຶ້ນລາຍງານເນື້ອໃນທີ່ຕິດພັນກັບວຽກງານຕິດຕາມກວດກາການຈັດຕັ້ງປະຕິບັດກົດໝາຍ, ເຜີຍແຜ່ກົດໝາຍ ແລະ ນິຕິກໍາໃຕ້ກົດໝາຍ ຂອງສະພາແຫ່ງຊາດໃນຄັ້ງນີ້ ເຊິ່ງໄດ້ຍົກໃຫ້ເຫັນເຖິງຜົນສຳເລັດ ແລະ ທິດທາງຂອງວຽກງານດັ່ງກ່າວໃນຕໍ່ໜ້າ ເພື່ອເຮັດໃຫ້ການຄຸ້ມຄອງລັດ, ຄຸ້ມຄອງເສດຖະກິດ-ສັງຄົມດ້ວຍກົດໝາຍ ມີຄວາມເຂັ້ມງວດ, ສັກສິດກວ່າເກົ່າ, ພ້ອມກັນນີ້, ກອງປະຊຸມ ໄດ້ຮັບຟັງການປະກອບຄຳເຫັນທີ່ເປັນປະໂຫຍດຫຼາຍໃຫ້ແກ່ກອງປະຊຸມຄັ້ງນີ້.
ໃນໂອກາດມາເຄື່ອນໄຫວຄັ້ງນີ້, ຄະນະ ຍັງໄດ້ຢ້ຽມຊົມສະໜາມບິນໜອງຄ້າງ (ສະໜາມບິນໃໝ່) ຢູ່ເມືອງຊຳເໜືອ, ຢ້ຽມຊົມການຜະລິດແຮ່ມັງການ ຂອງບໍລິສັດ ລາວພັດທະນາເສດຖະກິດສາກົນບໍ່ແຮ່ ຈຳກັດຜູ້ດຽວ; ພ້ອມນັ້ນ, ຍັງໄດ້ທ່ຽວຊົມຖໍ້າປະຫວັດສາດທ່ານຜູ້ນຳເມືອງວຽງໄຊ ແລະ ຢ້ຽມຢາມໂຮງຮຽນການເມືອງການປົກຄອງແຂວງຫົວພັນ ຕື່ມອີກ.
(ພາບ ແລະ ຂ່າວ: ນາງ ສຸພາວັນ ຫອມສະນິດ)