ໃນຕອນບ່າຍຂອງວັນທີ 18 ກັນຍາ 2024 ທີ່ ອົງການໄອຍະການປະຊາຊົນແຂວງຄໍາມ່ວນ ທ່ານ ນາງ ບັງອອນ ໄຊຍະສິດ ກຳມະການປະຈໍາພັກແຂວງ ຮອງປະທານສະພາປະຊາຊົນ ແຂວງຄໍາມ່ວນ ພ້ອມຄະນະ ໄດ້ເຄື່ອນໄຫວຕິດຕາມ, ກວດກາ ແລະ ຊຸກຍູ້ວຽກງານ ຢູ່ ອົງການໄອຍະການປະຊາຊົນແຂວງຄໍາມ່ວນ ໂດຍການຕ້ອນຮັບ ແລະ ເຂົ້າຮ່ວມເຮັດວຽກຂອງ ທ່ານ ຄໍາແດງ ສີບຸນເຮືອງ ຫົວໜ້າອົງການໄອຍະການປະຊາຊົນແຂວງຄໍາມ່ວນ, ມີບັນດາຄະນະອົງການໄອຍະການປະຊາຊົນແຂວງ, ອົງການໄອຍະການປະຊາຊົນເຂດ ແລະ ພະນັກງານອົງການໄອຍະການປະຊາຊົນແຂວງເຂົ້າຮ່ວມ.

   ໃນວາລະກອງປະຊຸມ ທ່ານ ຄໍາແດງ ສີບຸນເຮືອງ ໄດ້ລາຍງານໂດຍສັງເຂບກ່ຽວກັບການຈັດຕັ້ງປະຕິບັດວຽກງານໃນປີ 2024 ແລະ ທິດທາງການແຜນໃນຕໍ່ໜ້າຂອງອົງການໄອຍະການປະຊາຊົນແຂວງຄໍາມ່ວນເປັນຕົ້ນ: ວຽກງານຕິດຕາມກວດກາການເຄົາລົບ, ປະຕິບັດກົດໝາຍ ແລະ ການສັ່ງຟ້ອງຜູ້ຖືກຫາຂຶ້ນສານຕາມກົດໝາຍ; ຕິດຕາມກວດກາການປະຕິບັດກົດໝາຍ ຂອງອົງການສືບສວນ-ສອບສວນ; ຕິດຕາມກວດກາການປະຕິບັດກົດໝາຍໃນການດຳເນີນຄະດີຢູ່ສານ; ຕິດຕາມກວດກາການປະຕິບັດສະຖານທີ່ກັກຂັງ, ຄ້າຍຄຸມຂັງ-ດັດສ້າງ; ແລະ ການຕິດຕາມກວດກາການປະຕິບັດຄໍາຕັດສິນຂອງສານ, ຈາກນັ້ນ, ປະທານກອງປະຊຸມ ໄດ້ມີຄຳຖາມເຈາະຈີ້ມ ເພື່ອໃຫ້ຜູ້ເຂົ້າຮ່ວມກອງປະຊຸມໄດ້ປະກອບຄຳ-ຄິດຄຳເຫັນເພື່ອເປັນຂໍ້ມູນຮອບດ້ານນຳໄປຄົ້ນຄວ້າຊຸກຍູ້ການຈັດຕັ້ງປະຕິບັດວຽກງານດັ່ງກ່າວໃຫ້ໄດ້ຮັບຜົນສຳເລັດເປັນຢ່າງດີ.

  ຕອນທ້າຍກອງປະຊຸມ ທ່ານ ນາງ ບັງອອນ ໄຊຍະສິດ ໄດ້ໃຫ້ກຽດມີຄຳເຫັນໂອ້ລົມກ່ອນອື່ນທ່ານໄດ້ສະແດງຄວາມຍ້ອງຍໍຊົມເຊີຍຕໍ່ການຊີ້ນໍາ-ນຳພາ ການຈັດຕັ້ງປະຕິບັດວຽກງານໃນໄລຍະຜ່ານມາ ສາມາດຍາດໄດ້ຜົນສໍາເລັດຫຼາຍດ້ານທີ່ພົ້ນເດັ່ນ. ຄຽງຄູ່ກັບຜົນສໍາເລັດນັ້ນ ມີບາງປັດໃຈສໍາຄັນທີ່ຕ້ອງໄດ້ເອົາໃຈໃສ່ຕື່ມເປັນຕົ້ນ: ວຽກງານການສຶກສາອົບຮົມການເມືອງ-ແນວຄິດ, ຈັນຍາບັນ, ຈັນຍາທໍາ ຂອງພະນັກງານໄອຍະການປະຊາຊົນ, ແບບແຜນວິທີການເຮັດວຽກ, ການກໍ່ສ້າງໜ່ວຍພັກປອດໃສ່ ເຂັ້ມແຂງ ໜັກແໜ້ນ ລວມໄປເຖິງການປັບປຸງກົງຈັກການຈັດຕັ້ງ, ການປະຕິບັດໜ້າທີວິຊາສະເພາະ ເຊັ່ນ: ການຕິດຕາມກວດກາທົ່ວໄປ, ການຂຶ້ນຖະແຫຼ່ງໃນທີ່ປະຊຸມສານ, ການແຈ້ງຕອບປະຊາຊົນ, ການຕ້ອນຮັບປະຊາຊົນ, ການໃຫ້ຄຳປຶກສາ, ການຕິດຕາມກວດກາຄ້າຍຄຸມຂັງ-ດັດສ້າງ, ໃນຄວາມຮັບຜິດຊອບ, ການສ້າງກົນໄກຄົ້ນຄວ້າແກ້ໄຂຄະດີ ແລະ ຄໍາຮ້ອງໃຫ້ໄດ້ ຄຸນນະພາບໂດຍຮັບປະກັນຄວາມຖືກຕ້ອງຕາມກົດໝາຍ, ຍຸຕິທໍາ ແລະໂປ່ງໃສ.

ໂດຍ: ເອື້ອ ມະໂນສິງ