ເພື່ອປະຕິບັດຄຳແນະນຳຂອງຄະນະປະຈຳສະພາແຫ່ງຊາດ ສະບັບເລກທີ 16/ຄປຈ, ລົງວັນທີ 26 ກໍລະກົດ 2024 ວ່າດ້ວຍ ການຕິດຕາມກວດກາ ການຈັດຕັ້ງປະຕິບັດ ຍຸດທະສາດການປະຕິຮູບລະບົບການສຶກສາ ແລະ ການພັດທະນາຊັບພະຍາກອນມະນຸດແຫ່ງຊາດ ໃນໄລຍະຜ່ານມາ ແລະ ການປະຕິບັດພາລະບົດບາດ, ສິດ ແລະ ໜ້າທີ່ ຂອງສະມາຊິກສະພາແຫ່ງຊາດ ແລະ ສະມາຊິກສະພາປະຊາຊົນແຂວງ; ໃນລະຫວ່າງວັນທີ 9-10 ກັນຍາ 2024 ທ່ານ ນ. ສົມພອນ ໂສພິລາວັນ ຮອງປະທານສະພາປະຊາຊົນແຂວງ, ຜູ້ຊີ້ນໍາວຽກງານວັດທະນະທຳ, ສັງຄົມ ແລະ ບັນດາເຜົ່າ ແລະ ທ່ານ ຄຳແພງ ທຳມະວອນ ປະທານຄະນະກຳມະການວັດທະນາທຳ, ສັງຄົມ ແລະ ບັນດາເຜົ່າ ພ້ອມດ້ວຍທີມງານ ລົງຊຸກຍູ້ ແລະ ຕິດຕາມກວດກາ  ວຽກງານການສຶກສາຢູເມືອງໜອງແຮດ ເປັນກຽດເຂົ້າຮ່ວມຂອງທ່ານ ນ. ດວງສີ ວື່ ຮອງເຈົ້າເມືອງໆໜອງແຮດ, ຜູ້ຊີ້ນຳວຽກງານວັດທະນາທຳ, ສັງຄົມ ແລະ ບັນດາ ເຜົ່າ; ມີບັນດາທ່ານຫົວໜ້າ-ຮອງຫົວໜ້າຫ້ອງການ ແລະ ພະນັກງານ ທີ່ກ່ຽວຂ້ອງເຂົ້າຮ່ວມ.

ໃນການລົງເຄື່ອນໄຫວ ໄດ້ຮັບຟັງການລາຍງານ ຂອງຕາງໝ້າບັນດາຫ້ອງການທີ່ກ່ຽວຂ້ອງ ໃນໄລຍະຜ່ານມາ ຕາມຄຳຖາມເຈາະຈີ້ມຂອງສະພາປະຊາຊົນແຂວງ ກ່ຽວກັບຍຸດທະສາດການປະຕິຮູບການສຶກສາ ແລະ ແຜນພັດທະນາຊັບພະຍາກອນມະນຸດແຫ່ງຊາດ, ການຈັດຕັ້ງປະຕິບັດນະໂນບາຍ ຕໍ່ກັບນັກຮຽນ ທີ່ຮຽນດີຮຽນເກັ່ງ ແຕ່ບໍ່ມີທຶນໃນການຮໍ່າຮຽນ, ການສ້າງ ແລະ ປັບປຸງໂຮງຮຽນລ້ຽງເດັກ-ອະນຸບານ ແລະ ໂຮງຮຽນມັດທະຍົມຕົ້ນ ໃຫ້ໄດ້ມາດຕະຖານ ພ້ອມທັງສະໜອງຄູ ແລະ ອຸປະກອນການຮຽນ-ການສອນໃຫ້ຄົບຊຸດ ແລະ ພຽງພໍ ເພື່ອໃຫ້ເດັກໃນເກນອາຍຸ 3-5 ປີ ໄດ້ກຽມຄວາມພ້ອມກ່ອນເຂົ້າຮຽນຊັ້ນປະຖົມ, ການລົງທຶນຂອງລັດໃສ່ການພັດທະນາໂຄງລ່າງພື້ນຖານ ການສ້າງສິ່ງອຳນວຍຄວາມສະດວກ, ພ້ອມທັງການສ້າງ ແລະ ພັດທະນາ ພະນັກງານ-ລັດຖະກອນ ແລະ ການສົ່ງເສີມສຸຂະພາບ ແລະ ພະລານາໄມສົມບູນ ກ່ຽວກັບການບັນລຸ 4 ຈຸດປະສົງ, 10 ຄາດໝາຍ ແລະ 5 ວຽກຈຸດສຸມ ໃນຂະແໜງການສຶກສາທິການ ແລະ ກິລາ.

ໃນໂອກາດດັ່ງກ່າວທີມງານຍັງລົງພົບປະຢູ່ໂຮງຮຽນປະຖົມຖ້ຳໄຊ ເພື່ອຮັບຟັງການລາຍງານ, ຄຳຄິດຄຳເຫັນຂອງບັນດາຄູ ໃນການສິດ-ສອນນັກຮຽນຕົວຈິງ ໃນໄລຍະຜ່ານມາທຽບໃສ່ປັດຈຸບັນ, ໃນການປະຕິບັດນະໂຍບາຍຂອງໂຮງຮຽນ ຕໍ່ກັບນັກຮຽນ ທີ່ຮຽນດີຮຽນເກັ່ງ ທີ່ບໍ່ມີທຶນຮຽນຕໍ່ ເພື່ອຊ່ວຍເຫຼືອ ແລະ ສ້າງເງື່ອນໄຂໃຫ້ນັກຮຽນໄດ້ຮຽນຈົບ.

ສະພາປະຊາຊົນແຂວງຊຽງຂວາງ

ຂ່າວໂດຍ: ບຸນສີ ສິດທິເດດ