ໃນລະຫວ່າງວັນທີ 20-21 ມິຖຸນາ 2024 ທ່ານ ນ. ສົມພອນ ໂສພິລາວັນ ຮອງປະທານສະພາປະຊາຊົນແຂວງຊຽງຂວາງ ພ້ອມດ້ວຍທີມງານ ລົງຊຸກຍູ້ ແລະ ຕິດຕາມກວດກາ ການຈັດຕັ້ງປະຕິບັດເຄື່ອນໄຫວວຽງານຂອງເມືອງ ແລະ ບັນດາຫ້ອງການໃນຂົງເຂດເສດຖະກິດ ເປັນກຽດເຂົ້າຮ່ວມຂອງ ທ່ານ ວຽງໄຊ ວິໄລສັກ ຮອງເຈົ້າເມືອງໆຄູນ, ຜູ້ຊີ້ນຳວຽກງານຂົງເຂດເສດຖະກິດ ມີບັນດາທ່ານ ຄະນະປະທານຄະນະກຳມະການ, ຄະນະເລຂາທິການ, ສະມາຊິກສະພາປະຊາຊົນແຂວງ ປະຈໍາເຂດເລືອກຕັ້ງ, ການນໍາຂອງເມືອງ, ບັນດາທ່ານຫົວໜ້າ-ຮອງຫົວໜ້າຫ້ອງການ ແລະ ພະນັກງານໃນຂົງເຂດເສດຖະກິດ ເຂົ້າຮ່ວມ.

ປະຕິບັດພາລະບົດບາດ, ສິດ ແລະ ໜ້າທີ່ຂອງສະພາປະຊາຊົນແຂວງ ໂດຍສະເພາະແມ່ນຄະນະກຳມະການເສດຖະກິດ, ແຜນການ ແລະ ການເງິນ ໃນການຈັດຕັ້ງປະຕິບັດ, ເຄື່ອນໄຫວວຽກງານ ການປະຕິບັດລັດຖະທຳມະນູນ, ກົດໝາຍ ແລະ ນິຕິກຳຕ່າງໆ ຂອງບັນດາອົງການລັດໃນຂົງເຂດເສດຖະກິດ ແນ່ໃສ່ເກັບກຳຂໍ້ມູນ ແລະ ທົບທວນຄືນດ້ານຄວາມຮູ້, ຄວາມເຂົ້າໃຈຂອງພາກສ່ວນຕ່າງໆໃນການເຄື່ອນໄຫວວຽກງານ ຕິດພັນກັບການຈັດຕັ້ງປະຕິບັດວາລະແຫ່ງຊາດ ວ່າດ້ວຍການແກ້ໄຂຄວາມຫຍຸ້ງຍາກທາງດ້ານເສດຖະກິດ ແລະ ການເງິນ ເພື່ອລາຍງານຢູ່ໃນກອງປະຊຸມສະໄໝສາມັນ ເທື່ອທີ 7 ຂອງສະພາປະຊາຊົນແຂວງ ຊຸດທີ II; ໃນວາລະດໍາເນີນກອງປະຊຸມໄດ້ຮັບຟັງການລາຍງານຫຍໍ້ ຂອງອົງການປົກຄອງເມືອງ ໃນໄລຍະຜ່ານມາຂອງຂົງເຂດເສດຖະກິດ ແລະ ພາກສ່ວນທີ່ກ່ຽວຂ້ອງເປັນຕົ້ນແມ່ນ ການຄຸ້ມຄອງບັນດາໂຄງການຂຸດຄົ້ນບໍ່ແຮ່ລະຫວ່າງແຂວງ, ເມືອງ ແລະ ບ້ານ, ການຄຸ້ມຄອງຊັບພະຍາກອນທີ່ດິນ, ວັດແທກ ແລະ ຂຶ້ນທະບຽນທີ່ດິນໃຫ້ບັນດາຄົວເຮືອນ ການສະກັດກັ້ນການຈັບຈ່ອງທີ່ດິນຊະຊາຍ ຕິດພັນກັບການຄຸ້ມຄອງຜົນກະທົບທາງດ້ານສິ່ງແວດລ້ອມ-ສັງຄົມ ທີ່ເກີດຈາກການຂຸດຄົ້ນແຮ່ຕ່າງໆ ການເກັບກໍາລາຍຮັບ ແລະ ຄຸ້ມຄອງລາຍຈ່າຍຂອງຫ້ອງການການເງິນ, ການຄຸ້ມຄອງຫ້າມໃຊ້ສານເຄມີຕ່າງໆເຂົ້າໃນຂົງເຂດກະສິກຳ ແລະ ການຖາງປ່າຊະຊາຍ ຊຶ່ງສາມາດຈັດຕັ້ງປະຕິບັດໄດ້ດີ ມີຜົນສຳເລັດຕາມແຜນການທີ່ວາງໄວ້ໃນຫຼາຍດ້ານ ແຕ່ຍັງມີຂໍ້ຫຍຸ້ງຍາກບາງດ້ານທີ່ຈະຕ້ອງໄດ້ຮັບປຸງແກ້ໄຂ ກອງປະຊຸມໄດ້ມີຄຳຄິດຄຳເຫັນ, ສະເໜີບັນຫາ ແລະ ປຶກສາຫາລືແລກປ່ຽນ ຢ່າງກົງໄປກົງມາ ຊອກຫາວິທີທາງແກ້ໄຂ ບັນຫາທີ່ຄົງຄ້າງ ແລະ ການເຄື່ອນໄຫວວຽກງານຂອງຂົງເຂດເສດຖະກິດໃນຕໍ່ໜ້າໃຫ້ໄດ້ຮັບຜົນສຳເລັດຕາມແຜນການທີ່ວ່າງໄວ້.

ໃນວາລະດຳເດີນກອງປະຊຸມ ທ່ານ ນ. ສົມພອນ ໂສພິລາວັນ ຍັງໄດ້ມີຄຳເຫັນໂອ້ລົມ ສະຫຼຸບຕີລາຄາ ການປະເມີນຜົນ ການຈັດຕັ້ງປະຕິບັດວຽກງານໃນຂົງເຂດເສດຖະກິດ ເຫັນວ່າມີຫຼາຍວຽກງານທີ່ປະຕິບັດໄດ້ດີ ແລະ ມີຜົນສຳເລັດ; ແຕ່ຍັງມີບາງດ້ານທີ່ຕ້ອງປັບປຸງແກ້ໄຂ ໃຫ້ທຸກພາກສ່ວນທີ່ກ່ຽວຂ້ອງຈົ່ງເອົາໃຈໃສ່ຈັດຕັ້ງປະຕິບັດ ໜ້າທີ່ສຳຄັນຂອງຕົນ ທີ່ພັກລັດມອບໝາຍໃຫ້ໄດ້ຮັບຜົນສຳເລັດຕາມຄາດໝາຍທີ່ວາງໄວ້.

ໃນການລົງເຄື່ອນໄຫວໃນຄັ້ງນີ້ ທີມງານຍັງໄດ້ລົງສະຫນາມ ເພື່ອຕິດຕາມການປະຕິບັດວຽກງານຕົວຈິງຂອງໂຄງການຂຸດຄົ້ນແຮ່ເຫຼັກ ຂອງບໍລິສັດ ອາວີ ພູຍວນ ມາຍນີ້ງ ຈຳກັດຜູ້ດຽວ, ຊຶ່ງເປັນກຽດຕ້ອນຮັບຂອງທ່ານ ຄຳພູ ວັນນະຈັກ ປະທານທີ່ປຶກສາຂອງບໍລິສັດ ແລະ ໄດ້ຮັບຟັງການລາຍງານການເຄື່ອນໄຫວວຽກງານໃນໄລຍະຜ່ານມາ ພ້ອມທັງຮັບຟັງຄຳຄິດຄຳເຫັນຂອງຄະນະພັກບ້ານ-ນາຍບ້ານໃກ້ຄຽງ ເຫັນວ່າມີວຽກງານໃນຫຼາຍດ້ານເຮັດໄດ້ດີ ແລະ ຍັງມີບາງວຽກງານເປັນຕົ້ນແມ່ນ ການສົ່ງຜົນກະທົບຕໍ່ພື້ນທີ່ທຳການຜະລິດຂອງປະຊາຊົນຈະຕ້ອງໄດ້ແກ້ໄຂ ໃຫ້ທຸກພາກສ່ວນຮ່ວມມື ພ້ອມກັນປຶກສາຫາລື ເພື່ອຫາວິທີປ້ອງກັນ ແລະ ແກ້ໄຂໃຫ້ຖືກຕ້ອງຕາມລະບຽບກົດໝາຍ ແລະ ເເທດເໝາະກັບສະພາບຄວາມເປັນຈິງ. ການລົງຕິດຕາມກວດກາໃນຄັ້ງນີ້ ແມ່ນໄດ້ຮັບທຶນສະໜັບສະໜູນຊ່ວຍເຫຼືອ ຈາກໂຄງການສ້າງຄວາມເຂັ້ມແຂງໃຫ້ແກ່ສະພາແຫ່ງຊາດ ແລະ ສະພາປະຊາຊົນຂັ້ນແຂວງ ຫຼື ສະເຕັບສ໌ (STEPs).

ສະພາປະຊາຊົນແຂວງຊຽງຂວາງ

ຂ່າວໂດຍ: ບຸນສີ ສິດທິເດດ