ໃນວັນທີ 24 ສິງຫາ 2022, ທ່ານ ສິງຕັນ ໄຊລືຊົ່ງ ຄະນະປະຈຳພັກແຂວງ, ຮອງປະທານ ສະພາປະຊາຊົນແຂວງ, ເຊິ່ງໄດ້ຕາງໜ້າຄະນະປະຈຳສະພາປະຊາຊົນແຂວງຫຼວງພະບາງ ໄດ້ລົງພົບປະກັບຜູ້ມີສິດເລືອກຕັ້ງ ແລະ ມອບໂທລະໂຄ່ງ ຈຳນວນ 1 ຊຸດ ລວມມູນຄ່າ 6.500.000 ກີບ ໃຫ້ບ້ານກິ່ວຕະລຸນ ກຸ່ມບ້ານກິ່ວກະຈໍາ, ເມືອງຊຽງເງິນ, ແຂວງຫຼວງພະບາງ, ເຂົ້າຮ່ວມເປັນສັກຂີພະຍານມີ ສະມາຊິກສະພາປະຊາຊົນແຂວງ ປະຈຳເມືອງຊຽງເງິນ, ຕາງໜ້າຫ້ອງການຖະແຫຼງຂ່າວ, ວັດທະນະທຳ ແລະ ທ່ອງທ່ຽວເມືອງ, ອົງການຈັດຕັ້ງບ້ານ ແລະ ປະຊາຊົນພາຍໃນບ້ານກິ່ວຕະລຸນ ເພື່ອນໍາໃຊ້ເຂົ້າໃນວຽກງານສຳຄັນຕ່າງໆຂອງບ້ານ ໃຫ້ມີຄວາມສະດວກ, ວ່ອງໄວ ແລະ ທັນເວລາ, ພ້ອມກັນນັ້ນ ກໍ່ຍັງໄດ້ໂອ້ລົມກັບປະຊາຊົນພາຍໃນບ້ານ ໃຫ້ຍົກສູງສະຕິລະວັງຕົວຕໍ່ບັນຫາຢາເສບຕິດ, ເອົາໃຈໃສ່ພັດທະນາເສດຖະກິດຂອງບ້ານໃຫ້ຂະຫຍາຍຕົວ,

ສຸມໃສ່ທ່າແຮງທີ່ມີຢູ່ ໂດຍສະເພາະແມ່ນ ການປູກຝັງ-ລ້ຽງສັດ, ໃນຕອນທ້າຍ ນາຍບ້ານ ຕາງໜ້າໃຫ້ປະຊາຊົນທຸກຄົນພາຍໃນບ້ານ ໄດ້ສະແດງຄວາມຂອບໃຈ ຕໍ່ອົງການຈັດຕັ້ງພັກ-ລັດ ກໍ່ຄືສະພາປະຊາຊົນແຂວງ ທີ່ໄດ້ລະດົມທຶນຮອນຈັດຊື້ຊຸດໂທລະໂຄ່ງ ມາມອບໃຫ້ບ້ານໃນຄັ້ງນີ້, ທາງບ້ານເອງ ຈະປົກປັກຮັກສາເປັນຢ່າງດີ ເພື່ອໃຫ້ໄດ້ນໍາໃຊ້ຍາວນານ ແລະ ເກີດຜົນປະໂຫຍດສູງສຸດ.                                                                                                      ຂ່າວ ແລະ ພາບ ສຸດາກອນ ໂພສະຫວັດ