ໃນລະຫວ່າງວັນທີ 26-27 ພຶດສະພາ 2022 ທ່ານ ນ. ສົມພອນ ໂສພິລາວັນ ຮອງປະທານສະພາປະຊາຊົນແຂວງຊຽງຂວາງ ພ້ອມດ້ວຍທີມງານ ລົງຊຸກຍູ້ວຽກງານຂົງເຂດວັດທະນະທຳ-ສັງຄົມຢູ່ເມືອງຄຳ, ເມືອງໜອງແຮດ ແລະ ດ່ານສາກົນນ້ຳກັ່ນ ເປັນກຽດເຂົ້າຮ່ວມຂອງທ່ານ ຮອງເຈົ້າເມືອງຜູ້ຊີ້ນຳຂົງເຂດວັດທະນະທຳ-ສັງຄົມຂອງສອງເມືອງ, ທ່ານ ແພງວັນ ເພັດວົງກົດ ຫົວໜ້າດ່ານສາກົນນ້ຳ ກັ່ນ, ຫົວໜ້າ-ຮອງຫົວໜ້າຫ້ອງການອ້ອມຂ້າງເມືອງ ແລະ ພະນັກງານຂອງພາກສ່ວນກ່ຽວຂ້ອງເຂົ້າຮ່ວມ.

ໃນໂອກາດດັ່ງກ່າວໄດ້ຮັບຟັງການລາຍງານຂອງຫົວໜ້າດ່ານສາກົນນ້ຳກັ່ນ, ບັນດາຫ້ອງການກ່ຽວຂ້ອງຂອງເມືອງມີ ຫ້ອງການສຶກສາທິການ ແລະ ກິລາ, ຫ້ອງການສາທາລະນະສຸກ, ຫ້ອງການແຮງງານ ແລະ ສະຫວັດດີການສັງຄົມ ແລະ ຫ້ອງການອຸດສາຫະກຳ ແລະ ການຄ້າ; ກ່ຽວກັບການເຄື່ອນ ໄຫວວຽກງານໃນໄລຍະຜ່ານມາ ໃນການຈັດຕັ້ງຜັນຂະຫຍາຍມະຕິກອງປະຊຸມໃຫຍ່ຄັ້ງທີ XI ຂອງພັກ ວາລະແຫ່ງຊາດ, ມະຕິກອງປະຊຸມສະພາແຫ່ງຊາດ, ສະພາບການຮຽນ ການສອນ, ອັດຕາສ່ວນຂອງຄູກັບນັກຮຽນ, ຄູສອນບໍ່ຖືກຊັ້ນຖືກສາຍ, ການຈັດຕັ້ງປະຕິບັດແຜນການທ່ອງທ່ຽວສີຂຽວ ແລະ ການເປີດປະເທດຕິດພັນກັບການປ້ອງກັນ ແລະ ຮັບມືກັບການລະບາດຂອງພະຍາດໂຄວິດ-19, ສະພາບຄົນເຂົ້າ-ອອກປະເທດຢູ່ດ່ານສາກົນນ້ຳກັນພາຍຫຼັງເປີດປະເທດ, ຈາກນັ້ນຜູ້ເຂົ້າຮ່ວມພ້ອມກັນມີຄຳຄິດເຫັນ, ຄຳສະເໜີບັນຫາທີ່ຍັງຄ້າງຄາບໍ່ສາມາດປະຕິບັດໄດ້ນັ້ນ ເພື່ອເປັນຂໍ້ມູນນຳໄປສະເໜີຂັ້ນເທິງ ແລະ ເປັນຄຳສະເໜີເພື່ອໃຫ້ສະມາຊິກສະພາແຫ່ງຊາດ ປະຈຳເຂດເລືອກຕັ້ງທີ 9 ເພື່ອນຳສະເໜີຢູ່ໃນກອງປະຊຸມສະໄໝສາມັນ ເທື່ອທີ 3 ຂອງສະພາແຫ່ງຊາດ ຊຸດທີ IX ທີຈະເປີດຂຶ້ນຢູ່ໃນລະຫວ່າງເດືອນມິຖຸນາຫາເດືອນກໍລະກົດນີ້.

            ໃນຕ້ອນທ້າຍທ່ານປະທານກອງປະຊຸມຍັງໄດ້ສັງລວມເອົາເນື້ອໃນ, ບັນດາຄຳຄິດເຫັນ, ຄຳສະ  ເໜີ ແລະ ໂອລົມຕໍ່ກອງປະຊຸມ, ມີທິດຊີ້ນຳບາງດ້ານ, ເພື່ອເປັນບ່ອນອີງໃຫ້ແກ່ພາກສ່ວນທີ່ກ່ຽວຂ້ອງເຂົ້າໃນການຈັດຕັ້ງປະຕິບັດໜ້າທີ່ວຽກງານຂອງຂະແໜງການທີ່ກ່ຽວຂ້ອງໃນຕໍ່ໜ້າ.

ສະພາປະຊາຊົນແຂວາງຊຽງຂວາງ

ຂ່າວໂດຍ: ທ. ບຸນສີ ສິດທິເດດ

ໂທ: 020 9977 7890