(ສພຊ) ວັນທີ 31 ພຶດສະພາ 2019, ທີ່ຫໍປະຊຸມແຫ່ງຊາດ ນະຄອນຫລວງວຽງຈັນ, ໄດ້ມີການພົບປະສອງຝ່າຍຂອງຄະນະນໍາຂັ້ນສູງສອງປະເທດ ສປປລາວ-ລາຊະອານາຈັກກໍາປູເຈຍ ເຊິ່ງຝ່າຍລາວ ນໍາໂດຍທ່ານ ນາງ ປານີ ຢາທໍ່ຕູ້ ປະທານສະພາແຫ່ງຊາດ ແຫ່ງ ສາທາລະນະລັດ ປະຊາທິປະໄຕ ປະຊາຊົນລາວແລະ ຝ່າຍກໍາປູເຈຍນໍາໂດຍ ສົມເດັດ ອັກຄະມະຫາ ໂປເຢຍ ຈັກກຣີ ເຮັງ ຊໍາຣິນ ປະທານສະພາແຫ່ງຊາດ ແຫ່ງ ຣາຊະອານາຈັກກໍາປູເຈຍ ໃນໂອກາດທີ່ເດີນທາງມາຢ້ຽມຢາມສັນຖະວະໄມຕີ ສປປລາວ ຢ່າງເປັນທາງການ ລະຫວ່າງວັນທີ 30 ພຶດສະພາ-1 ມິຖຸນາ 2019.
ໃນການພົບປະ, ທັງສອງຝ່າຍໄດ້ແຈ້ງສະພາບການເຄື່ອນໄຫວຂອງອົງການນິຕິບັນຍັດຂອງຕົນ ໃຫ້ກັນ ແລະ ກັນຊາບໂດຍສັງເຂບ; ທ່ານ ນາງ ປານີ ຢາທໍ່ຕູ້ ໄດ້ສະແດງຄວາມຍິນດີຕ້ອນຮັບ ແລະ ຕີລາຄາສູງຕໍ່ການມາຢ້ຽມຢາມສັນຖະວະໄມຕີ ຂອງສົມເດັດ ອັກຄະມະຫາ ໂປເຢຍ ຈັກກຣີ ເຮັງ ຊໍາຣິນ ພ້ອມດ້ວຍຄະນະ ຖືວ່າມີຄວາມໝາຍສຳຄັນເປັນຢ່າງຍິ່ງ ເພາະເປັນການຢ້ຽມຢາມ ສປປລາວ ຄັ້ງທຳອິດ ພາຍຫລັງທີ່ ສົມເດັດ ອັກຄະມະຫາ ໂປເຢຍ ຈັກກຣີ ເຮັງ ຊໍາຣິນ ໄດ້ຮັບການເລືອກຕັ້ງເປັນປະທານສະພາແຫ່ງຊາດ ຊຸດທີ VI ໃນກອງປະຊຸມສະພາແຫ່ງຊາດຄັ້ງປະຖົມມະລືກ ໃນເດືອນກັນຍາ 2018 ຜ່ານມາ, ທັງເປັນການປະກອບສ່ວນເຂົ້າໃນການສືບຕໍ່ຮັດແໜ້ນ ແລະ ເສີມຂະຫຍາຍສາຍພົວພັນມິດຕະພາບ, ການຮ່ວມມື ແລະ ຄວາມສາມັກຄີຮັກແພງ ແລະ ຊ່ວຍເຫລືອ ເຊິ່ງກັນ ແລະ ກັນ ທີ່ເປັນມູນເຊື້ອມາແຕ່ບູຮານນະການ ລະຫວ່າງສອງປະເທດ ລາວ-ກໍາປູເຈຍ ເວົ້າລວມ, ເວົ້າສະເພາະ ລະຫວ່າງສອງສະພາແຫ່ງຊາດລາວ-ກຳປູເຈຍ ໃຫ້ກ້າວເຂົ້າສູ່ຄຸນນະພາບໃໝ່. ພ້ອມກັນນັ້ນ, ກໍໄດ້ສະແດງຄວາມຍ້ອງຍໍຊົມເຊີຍ ຕໍ່ໄຊຊະນະຢ່າງຈົບງາມຂອງພັກປະຊາຊົນກຳປູເຈຍ ໃນການເລືອກຕັ້ງສະພານະຄອນຫລວງ, ແຂວງ, ນະຄອນ ແລະ ເມືອງ (ສະພາທ້ອງຖິ່ນ) ເຊິ່ງໄດ້ຈັດໃນວັນທີ 26 ພຶດສະພາ ຜ່ານມານັ້ນ ກໍຍ້ອນມີການນຳພາອັນປີຊາສາມາດຂອງ ສົມເດັດ ອັກຄະມະຫາເສນາ ບໍດີ ເຕໂຊ ຮຸນເເຊນ, ປະທານພັກປະຊາຊົນກຳປູເຈຍ, ທັງເປັນນາຍົກລັດຖະມົນຕີ ແລະ ສົມເດັດ ເຮັງ ຊໍາຣິນ, ປະທານກິດຕິມະສັກພັກປະຊາຊົນກຳປູເຈຍ.
ໃນໄລຍະຜ່ານມາ, ການພົວພັນລາວ-ກໍາປູເຈຍ ເຫັນວ່າເປັນການພົວພັນທີ່ມີມູນເຊື້ອອັນດີງາມ ມາແຕ່ ບູຮານນະການ, ສອງປະເທດເປັນບ້ານໃກ້ເຮືອນຄຽງທີ່ດີ, ບ້ານແກ່ວເມືອງດອງ, ມີຄວາມສາມັກຄີຮັກ ແພງ ຊ່ວຍເຫລື່ອເຊິ່ງກັນ ແລະ ກັນມາແຕ່ດົນນານແລ້ວ, ປະຊາຊົນໄປມາຫາສູ່, ຄ້າຂາຍນຳກັນຕະຫລອດມາ, ມີຮີດຄອງປະເພນີຄ້າຍຄືກັນ ແລະ ມີຄວາມເຂົ້າອົກເຂົ້າໃຈກັນດີ, ເຄີຍໄດ້ຕໍ່ສູ້ຄຽງບ່າຄຽງໄຫລ່ກັນຕ້ານພວກຈັກກະພັດລ່າເມືອງຂຶ້ນແບບເກົ່າ ແລະ ໃໝ່ ຈົນທັງສອງປະເທດສາມາດປົດປ່ອຍປະເທດຊາດ ແລະ ໄດ້ຮັບເອກະລາດຂອງໃຜລາວ. ການພົວພັນລາວ-ກຳປູເຈຍ ຖືວ່າຢູ່ໃນລະດັບປົກກະຕິ ມີການຮ່ວມມືກັນເກືອບທຸກຂະແໜງການ ເປັນຕົ້ນດ້ານການເມືອງ, ປ້ອງກັນຊາດ-ປ້ອງກັນຄວາມສະຫງົບ ຖືວ່າເຮັດໄດ້ດີຕະຫລອດມາ ເຊິ່ງສະແດງອອກ ໂດຍຜ່ານການແລກປ່ຽນການຢ້ຽມຢາມຂອງຄະນະຜູ້ແທນໃນທຸກລະດັບຕໍ່ເນື່ອງ ເປັນຕົ້ນແມ່ນຄະນະຜູ້ແທນຂັ້ນສູງຂອງລັດຖະບານ, ບັນດາຂະແໜງການໃນລະດັບສູນກາງ ແລະ ທ້ອງຖິ່ນ. ສຳລັບການພົວພັນຮ່ວມມືດ້ານເສດຖະກິດຂອງສອງປະເທດ ກໍໄດ້ຮັບການຊຸກຍູ້ ສົ່ງເສີມໃຫ້ມີການຂະຫຍາຍຕົວ ແຕ່ກໍຍັງບໍ່ທັນຂະຫຍາຍຕົວເທົ່າທີ່ຄວນ ຍ້ອນວ່າສິນຄ້າຂອງສອງປະເທດ ມີສິ່ງທີ່ຄ້າຍຄືກັນເປັນສ່ວນໃຫຍ່, ອີກດ້ານໜຶ່ງທັງສອງປະເທດ ກໍລ້ວນແຕ່ເປັນປະເທດກໍາລັງພັດທະນາ ກໍຍັງພົບເຫັນຄວາມຫຍຸ້ງຍາກ, ສິ່ງກີດຂວາງຈໍານວນໜຶ່ງ ທີ່ຍັງເປັນອຸປະສັກຕໍ່ການຄ້າ ແລະ ຂົນສົ່ງຜ່ານແດນ ລະຫວ່າງສອງປະເທດ.
ພ້ອມນັ້ນ, ທ່ານປະທານສະພາແຫ່ງຊາດລາວ ຍັງໄດ້ມີບາງຄໍາເຫັນ ເພື່ອເຮັດໃຫ້ການພົວພັນຮ່ວມມື ຂອງສອງປະເທດກ້າວສູ່ຄຸນນະພາບ, ເພື່ອໃຫ້ລັດຖະບານຂອງສອງປະເທດສືບຕໍ່ເອົາໃຈໃສ່ໃນການຈັດຕັ້ງ ປະຕິບັດບັນດາສົນທິສັນຍາ, ສັນຍາ ແລະ ນິຕິກຳອື່ນໆ ທີ່ສອງຝ່າຍໄດ້ເຊັນກັນແລ້ວ ໃຫ້ມີປະສິດທິຜົນ ແລະ ເປັນຮູບປະທຳຫລາຍຂຶ້ນເຊັ່ນ:
ການຮ່ວມມືດ້ານການຄ້າ: ສັງເກດເຫັນວ່າ ການຄ້າສອງຝ່າຍໃນປັດຈຸບັນນີ້ ມີທ່າອ່ຽງຫລຸດລົງ ຄື: ໃນປີ 2018 ມູນຄ່າການຄ້າສອງຝ່າຍ ມີ 17,8 ລ້ານໂດລາສະຫະລັດ ຖ້າທຽບໃສ່ມູນຄ່າການຄ້າ ໃນປີ 2012 ແມ່ນຫລຸດລົງ 3 ລ້ານກວ່າໂດລາສະຫະລັດ ຍ້ອນມີຫລາຍປັດໄຈ ເຊິ່ງໃນນັ້ນແມ່ນຝ່າຍກຳປູເຈຍ ບໍ່ອະນຸຍາດໃຫ້ລົດຂົນສົ່ງສິນຄ້າຂອງລາວຂົນສົ່ງເຂົ້າໄປກຳປູເຈຍໄດ້, ຖ້າຈະຂົນສົ່ງສິນຄ້າເຂົ້າໄປ ແມ່ນຕ້ອງໄດ້ຂໍອະນຸຍາດຢູ່ກົມພາສີຂອງກຳປູເຈຍ ແລະ ສິນຄ້າ ຕ້ອງໄດ້ມີການຄ່ຽນຖ່າຍໃສ່ລົດຂອງກໍາປູເຈຍ ເສຍກ່ອນ. ສະເໜີໃຫ້ສອງສະພາແຫ່ງຊາດ ຊຸກຍູ້ໃຫ້ຂະແໜງການກ່ຽວຂ້ອງຂອງສອງປະເທດ ຊອກຫາວິທີທາງແກ້ໄຂ ໂດຍຖືເອົາການຈັດຕັ້ງປະຕິບັດສັນຍາສອງຝ່າຍວ່າດ້ວຍການຂົນສົ່ງທາງບົກ (ປີ 1999), ສັນຍາວ່າດ້ວຍການຄ້າສອງຝ່າຍ (ປີ 1998), ຂອບສັນຍາອາຊຽນວ່າດ້ວຍການອໍານວຍຄວາມສະດວກ ສິນຄ້າທາງຜ່ານໃຫ້ມີປະສິດທິພາບສູງຂຶ້ນ ແນໃສ່ສ້າງສິ່ງອໍານວຍຄວາມສະດວກທາງດ້ານການຄ້າ ແລະ ເຮັດໃຫ້ມູນຄ່າການຄ້າສອງຝ່າຍເພີ່ມຂຶ້ນ.
ການຮ່ວມມືດ້ານການສຶກສາ: ເຫັນວ່າການຮ່ວມມືດ້ານການສຶກສາ ແມ່ນຢູ່ໃນທ່ວງທ່າທີ່ດີ ໂດຍມີ ການແລກປ່ຽນທຶນການສຶກສາຂອງສອງລັດຖະບານ ໄດ້ເພີ່ມຂຶ້ນມາເປັນ 15 ທຶນຕໍ່ປີ ເລີ່ມແຕ່ເດືອນຕຸລາ 2019 ເປັນຕົ້ນໄປ, ພ້ອມທັງໄດ້ເພີ່ມເບ້ຍລ້ຽງໃຫ້ແກ່ນັກສຶກສາທັງສອງຝ່າຍ ນັບແຕ່ປີ 2016 ຈາກ 150 ໂດລາ ມາເປັນ 180 ໂດລາຕໍ່ເດືອນ; ສະເໜີໃຫ້ສອງສະພາແຫ່ງຊາດ ຊຸກຍູ້ໃຫ້ຂະແໜງການທີ່ກ່ຽວຂ້ອງ ສືບຕໍ່ເອົາໃຈໃສ່ຮ່ວມມືກັນໃຫ້ດີກວ່າເກົ່າ ເປັນຕົ້ນແມ່ນສະເໜີໃຫ້ຝ່າຍກຳປູເຈຍເບີກຈ່າຍເງິນເບ້ຍລ້ຽງໃຫ້ນັກສຶກສາລາວຖືກຕາມເວລາໃນແຕ່ລະເດືອນ ເພື່ອຮັບປະກັນການສຶກສາຮ່ຳຮຽນຂອງເຂົາເຈົ້າ ແລະ ການມອບໃບປະກາດສະນີຍາບັດແກ່ນັກສຶກສາລາວ ກໍໃຫ້ໄວຂຶ້ນກວ່າເກົ່າ ພາຍຫລັງທີ່ຮຽນຈົບມະຫາວິທະຍາໄລຂອງກຳປູເຈຍໃນປີນັ້ນເລີຍ ເພາະວ່າໃນໄລຍະຜ່ານມາ ນັກສຶກສາລາວ ໄດ້ລໍຖ້າຮັບໃບປະກາດແທ້ ໃຊ້ເວລາປະມານ 2-3 ປີ ຈຶ່ງໄດ້ຮັບ ແລະ ມີຄວາມຫຍຸ້ງຍາກໃນການໄປສະໝັກເຂົ້າເຮັດວຽກຢູ່ລາວ.
ຕໍ່ກັບການໂອນໂຕນັກໂທດ: ເຫັນວ່າສອງຝ່າຍໄດ້ມີການປຶກສາຫາລືນຳກັນ ກ່ຽວກັບການໂອນຕົວ ນັກໂທດ ລະຫວ່າງສອງປະເທດນຳກັນ ເຊິ່ງປັດຈຸບັນມີນັກໂທດລາວຢູ່ກຳປູເຈຍ ຈຳນວນ 98 ຄົນ ແລະ ນັກໂທດກຳປູເຈຍຢູ່ລາວ ຈຳນວນ 14 ຄົນ. ແຕ່ການແກ້ໄຂ ແລະ ນໍາສົ່ງນັກໂທດຕົວຈິງຍັງພົບກັບຄວາມ ຫຍຸ້ງຍາກຫລາຍຢ່າງ ຍ້ອນແຕ່ລະຝ່າຍ ກໍຕ້ອງອີງໃສ່ກົດໝາຍ ແລະ ນິຕິກຳພາຍໃນຂອງຕົນ. ດັ່ງນັ້ນ, ໃນນາມອົງການນິຕິບັນຍັດ, ສອງສະພາແຫ່ງຊາດ ຄວນສືບຕໍ່ຊຸກຍູ້ໃຫ້ລັດຖະບານຂອງສອງປະເທດ ຮ່ວມ ກັນສ້າງສັນຍາວ່າດ້ວຍການໂອນຕົວນັກໂທດນຳກັນ ເພື່ອເປັນບ່ອນອີງໃຫ້ລັດຖະບານຂອງສອງປະເທດ ຈັດຕັ້ງປະຕິບັດນຳກັນ ພ້ອມທັງປົກປ້ອງສິດທິ ແລະ ຜົນປະໂຫຍດ ຂອງພົນລະເມືອງຂອງສອງປະເທດ.
ຕໍ່ກັບການແກ້ໄຂບັນຫາຊາຍແດນ ຂອງສອງປະເທດ ເຫັນວ່າສອງລັດຖະບານ ໄດ້ຖືເອົາການແກ້ໄຂບັນ ຫາຊາຍແດນລະຫວ່າງສອງປະເທດພວກເຮົາ ເປັນວຽກໜຶ່ງທີ່ມີຄວາມສຳຄັນ ໂດຍມີຄວາມພະຍາຍາມ ຊອກຫາວິທີແກ້ໄຂຮ່ວມກັນໂດຍສັນຕິວິທີ ໄປພ້ອມໆກັບການສືບຕໍ່ຮັກສາສະພາບບໍລິເວນຊາຍແດນ ໃຫ້ ມີຄວາມສະຫງົບ. ສອງສະພາແຫ່ງຊາດລາວ-ກໍາປູເຈຍ ຄວນສືບຕໍ່ຊຸກຍູ້ໃຫ້ລັດຖະບານຂອງສອງປະເທດ ແກ້ໄຂບັນຫາການປັກຫລັກໝາຍຊາຍແດນ ເຊິ່ງມີບາງຈຸດທີ່ຍັງຄ້າງຄານຳກັນໃຫ້ສຳເລັດໂດຍໄວ ຕາມຂໍ້ ຕົກລົງຂອງສອງນາຍົກລັດຖະມົນຕີຄັ້ງວັນທີ 13 ກັນຍາ 2018 ທີ່ນະຄອນຫລວງຮ່າໂນ້ຍ ແລະ ຄັ້ງວັນທີ 5 ທັນວາ 2018 ທີ່ນະຄອນຫລວງວຽງຈັນ ບົນຈິດໃຈແຫ່ງປະເທດບ້ານໃກ້ເຮືອນຄຽງ ບ້ານແກ່ວເມືອງ ດອງ ແລະ ມູນເຊື້ອແຫ່ງຄວາມສາມັກຄີຊ່ວຍເຫລືອ ເຊິ່ງກັນ ແລະ ກັນ ທີ່ມີມາແຕ່ບູຮານນະການ ເພື່ອ ສ້າງໃຫ້ຊາຍແດນລາວ-ກຳປູເຈຍກາຍເປັນຊາຍແດນແຫ່ງສັນຕິພາບ, ມິດຕະພາບ ແລະ ການພັດທະນາ ໂດຍບໍ່ປ່ອຍໃຫ້ບັນຫາຄ້າງຄາຕົກທອດໄປຮອດຮຸ່ນລູກຫລານໃນອະນາຄົດ.
ພ້ອມດຽວກັນນັ້ນ, ທ່ານ ນາງ ປານີ ຢາທໍ່ຕູ້ ໄດ້ຕີລາຄາສູງຕໍ່ໝາກຜົນໃນການຈັດຕັ້ງປະຕິບັດບົດບັນທຶກຄວາມເຂົ້າໃຈວ່າດ້ວຍການຮ່ວມມື (MOU) ລະຫວ່າງສະພາແຫ່ງຊາດລາວ ແລະ ສະພາແຫ່ງຊາດ ກໍາປູເຈຍ ທີ່ໄດ້ເຊັນກັນໃນວັນທີ 14 ມັງກອນ 2019, ເປັນຕົ້ນແມ່ນສອງສະພາແຫ່ງຊາດລາວ-ກໍາປູເຈຍ ໄດ້ແລກປ່ຽນຄະນະຜູ້ແທນລະດັບປະທານສະພາແຫ່ງຊາດ ເຊິ່ງຂ້າພະເຈົ້າເອງ ກໍໄດ້ນຳພາຄະນະຜູ້ແທນຂັ້ນສູງຂອງສະພາແຫ່ງຊາດລາວ ເຂົ້າຮ່ວມກອງປະຊຸມ APPF ແລະ ໄດ້ພົບປະສອງຝ່າຍກັບສົມເດັດ ແລະ ໃນຄັ້ງນີ້ ສົມເດັດ ເອງ ກໍໄດ້ເດີນທາງມາຢ້ຽມຢາມສັນຖະວະໄມຕີ ສປປລາວ ຢ່າງເປັນທາງການ. ນອກຈາກນີ້, ກໍມີການຢ້ຽມຢາມແລກປ່ຽນບົດຮຽນ ເຊິ່ງກັນ ແລະ ກັນ ລະດັບປະທານກໍາມາທິການເຊັ່ນ: ໃນເດືອນ ມີນາ 2019 ຜ່ານມາ, ປະທານກຳມາທິການກົດໝາຍຂອງສະພາແຫ່ງ ຊາດລາວ ພ້ອມດ້ວຍຄະນະ ໄດ້ຢ້ຽມຢາມແລກປ່ຽນບົດຮຽນຢູ່ກຳປູເຈຍ ແລະ ປະທານກຳມາທິການໂຍທາທິການ-ການຂົນສົ່ງ, ໄປສະນີ ແລະ ໂທລະຄົມມະນາຄົມ, ອຸດສາຫະກຳ-ບໍ່ແຮ່, ພະລັງງານ, ການຄ້າ, ຈັດສັນທີ່ດິນ, ຜັງເມືອງ ແລະ ການກໍ່ສ້າງຂອງສະພາແຫ່ງຊາດກຳປູເຈຍ ພ້ອມດ້ວຍຄະນະ ກໍໄດ້ມາຢ້ຽມຢາມ ສປປລາວ. ໃນຂອບຫລາຍຝ່າຍ, ສະຖາບັນລັດຖະສະພາກຳປູເຈຍ ຍັງໄດ້ຮັບເອົາພະນັກງານວິຊາການຈຳນວນໜຶ່ງຂອງສະພາແຫ່ງຊາດລາວ ໄປເຝິກອົບຮົມວຽກງານລັດຖະສະພາ ແລະ ພາສາອັງກິດຢູ່ກຳປູເຈຍ. ພ້ອມນີ້, ສອງສະພາແຫ່ງຊາດ ຍັງໄດ້ມີການຮ່ວມມື ແລະ ໃຫ້ການສະໜັບສະໜູນເຊິ່ງກັນ ແລະ ກັນເປັນຢ່າງດີ ໃນໂອກາດເຂົ້າຮ່ວມກອງປະຊຸມລັດຖະສະພາ ພາກພື້ນ ແລະ ສາກົນ.
ສຳລັບທິດທາງການຮ່ວມມືໃນຕໍ່ໜ້າລະຫວ່າງສອງສະພາແຫ່ງຊາດ, ປະທານສະພາແຫ່ງຊາດລາວ ສະເໜີໃຫ້ສອງສະພາແຫ່ງຊາດ ສືບຕໍ່ຈັດຕັ້ງປະຕິບັດເນື້ອໃນຈິດໃຈຂອງບົດບັນທຶກຄວາມເຂົ້າໃຈ ວ່າດ້ວຍການຮ່ວມມືຂອງສອງສະພາແຫ່ງຊາດ ສະບັບປີ 2019 ໃຫ້ຕໍ່ເນື່ອງ ແລະ ມີຄຸນນະພາບ. ພ້ອມນັ້ນ, ສະເໜີໃຫ້ມີການພົວພັນຮ່ວມມື ລະຫວ່າງສະພາປະຊາຊົນຂັ້ນແຂວງທີ່ມີຊາຍແດນຕິດຈອດກັນ ເພື່ອແລກປ່ຽນບົດຮຽນກ່ຽວກັບການຈັດຕັ້ງປະຕິບັດພາລະບົດບາດດ້ານນິຕິບັນຍັດນໍາກັນ.
ໃນໂອກາດທີ່ມາຢ້ຽມຢາມ ແລະ ເຮັດວຽກຢູ່ ສປປລາວ ຢ່າງເປັນທາງການໃນຄັ້ງນີ້, ສົມເດັດ ອັກຄະມະຫາ ໂປເຢຍ ຈັກກຣີ ເຮັງ ຊໍາຣິນ ພ້ອມດ້ວຍຄະນະຜູ້ແທນຂັ້ນສູງ ຍັງໄດ້ເຂົ້າຢ້ຽມຂໍ່ານັບທ່ານ ບຸນຍັງ ວໍລະຈິດ ປະທານປະເທດ ແຫ່ງ ສປປລາວ ແລະ ທ່ຽວຊົມພື້ນຖານເສດຖະກິດວັດທະນະທໍາຂອງ ສປປລາວ ຈໍານວນໜຶ່ງ.
(ສົມນຶກ ແກ້ວໄຊຍະຈັກ)