(ສພຊ) ທ່ານ ປອ. ໄຊສົມພອນ ພົມວິຫານ ປະທານສະພາແຫ່ງຊາດ ແຫ່ງ ສປປ ລາວ ໄດ້ຕ້ອນຮັບ ທ່ານ ປັກ ບ່ຽງຊອກ ສະມາຊິກສະພາແຫ່ງຊາດ, ອະດີດປະທານສະພາແຫ່ງຊາດ ສ. ເກົາຫຼີ ແລະ ຄະນະ ໃນໂອກາດມາເຄື່ອນໄຫວຢ້ຽມຢາມ ແລະເຮັດວຽກ ຢູ່ ສປປລາວ ລະຫວ່າງວັນທີ 26-28 ກໍລະກົດ 2023.
ທ່ານ ປອ. ໄຊສົມພອນ ພົມວິຫານ ປະທານສະພາແຫ່ງຊາດລາວ ໄດ້ສະແດງຄວາມຍິນດີຕ້ອນຮັບຢ່າງອົບອຸ່ນ ທ່ານ ປັກ ບ່ຽງຊອກ ພ້ອມດ້ວຍຄະນະ ໃນໂອກາດມາຢ້ຽມຢາມ ແລະ ເຮັດວຽກຢູ່ ສປປ ລາວ ຄັ້ງນີ້ ເຊິ່ງເປັນການພົບປະຄັ້ງທີ 2 ພາຍຫຼັງທີ່ໄດ້ພົບປະທາງໄກ ໃນເດືອນມີນາ 2022 ທີ່ຜ່ານມາ; ສະແດງຄວາມເຫັນໃຈຕໍ່ລັດຖະບານ ແລະ ປະຊາຊົນ ສ. ເກົາຫຼີ ໃນເຫດການໄພທຳມະຊາດນ້ຳຖ້ວມກະທັນຫັນ ໃນຕົ້ນເດືອນກໍລະກົດຜ່ານມາ ອັນໄດ້ກໍ່ໃຫ້ເກີດຄວາມເສຍຫາຍ ທັງຊີວິດ ແລະ ຊັບສິນ ຢ່າງຫຼວງຫຼາຍ ແລະ ໄດ້ຕີລາຄາສູງຕໍ່ການຢ້ຽມຢາມ ເປັນການປະກອບສ່ວນອັນສໍາຄັນເຂົ້າໃນການຊູກຍູ້ ແລະ ເສີມຂະຫຍາຍສາຍພົວພັນມິດຕະພາບ ແລະ ການພົວພັນຮ່ວມມືອັນດີງາມ ລະຫວ່າງ ສອງປະເທດລາວ ແລະ ສ. ເກົາຫຼີ ເວົ້າລວມ ເວົ້າສະເພາະ ລະຫວ່າງ ສອງອົງການນິຕິບັນຍັດ ໃຫ້ນັບມື້ນັບຂະຫຍາຍຕົວຍິ່ງໆຂຶ້ນ.
ໂອກາດດັ່ງກ່າວ, ທັງສອງຝ່າຍໄດ້ແຈ້ງກ່ຽວກັບສະພາບລວມຂອງເສດຖະກິດ-ສັງຄົມ ໃຫ້ກັນແລະກັນຊາບໂດຍຫຍໍ້ ທັງຕີລາຄາສູງຕໍ່ສາຍພົວພັນ ແລະ ການຮ່ວມມື ລະຫວ່າງສອງປະເທດ ລາວ ແລະ ສ. ເກົາຫຼີ ທີ່ມີມູນເຊື້ອດີງາມມາແຕ່ດົນນານ ແລະ ໄດ້ຮັບການເສີມຂະຫຍາຍຢ່າງຕໍ່ເນື່ອງ ສະແດງອອກໃນການແລກປ່ຽນການຢ້ຽມຢາມຂອງຄະນະຜູ້ແທນຂັ້ນສູງ ແລະ ຂັ້ນຕ່າງໆ ລະຫວ່າງສອງປະເທດ, ມີການຮ່ວມມືທີ່ດີທາງດ້ານເສດຖະກິດ, ການຄ້າ, ການລົງທຶນ, ສຶກສາ, ສາທາລະນະສຸກ, ທ່ອງທ່ຽວ, ກິລາ ແລະອື່ນໆ ເຊິ່ງ ສ. ເກົາຫຼີ ເປັນປະເທດທີ່ມີການລົງທຶນໃນອັນດັບ 5 ຢູ່ ສປປ ລາວ ໂດຍມີຂະແໜງພະລັງງານໄຟຟ້າ, ການກໍ່ສ້າງ, ການບໍລິການ, ກະສິກຳ, ອຸດສາຫະກໍາ ແລະ ຫັດຖະກໍາ, ການທ່ອງທ່ຽວ, ໂຮງແຮມ ແລະ ຮ້ານອາຫານ, ທະນາຄານ ແລະ ອື່ນໆ; ພ້ອມນີ້, ທັງສອງຝ່າຍຍັງໄດ້ສົນທະນາແລກປ່ຽນກ່ຽວກັບຮ່ວມມືຂອງສອງອົງການນິຕິບັນຍັດລາວ-ສ. ເກົາຫຼີ ໃນໄລຍະຜ່ານມາ ແລະ ແຜນການຮ່ວມມືໃນຕໍ່ໜ້າ ທັງຫາລືກັນໃນວຽກງານອື່ນໆ ທີ່ຕ່າງຝ່າຍຕ່າງໃຫ້ຄວາມສົນໃຈຕື່ມອີກ.
ສອງຝ່າຍ ເປັນເອກະພາບກັນຫຼາຍບັນຫາ ເປັນຕົ້ນ ການສະໜັບສະໜູນ ສປປ ລາວ ເປັນປະທານອາຊຽນ ໃນປີ 2024 ໃນນັ້ນກໍ່ຈະເປັນເຈົ້າພາບກອງປະຊຸມສຸດຍອດອາຊຽນ ຄັ້ງທີ 43 ແລະ ຄັ້ງທີ 44 . ສ່ວນ ສະພາແຫ່ງຊາດລາວ ກໍ່ຈະເປັນເຈົ້າພາບຈັດກອງປະຊຸມໃຫຍ່ ສະມັດຊາລັດຖະສະພາລະຫວ່າງຊາດອາຊຽນ (AIPA) ຄັ້ງທີ 45, ຂົນຂວາຍເອົາບັນດາໂຄງການລົງທຶນຂະໜາດໃຫຍ່, ນັກທ່ອງທ່ຽວ, ເປີດສາຍການບິນ ລະຫວ່າງ ແຂວງຫຼວງພະບາງ ແລະ ເມືອງທ່ອງທ່ຽວ ຂອງ ສ. ເກົາຫຼີ, ຊຸກຍູ້ເອົາແຮງງານລາວ ໄປອອກແຮງງານຢູ່ ສ. ເກົາຫຼີ ແລະ ອື່ນໆ.
ການຢ້ຽມຢາມ ສປປລາວ ຄັ້ງນີ້, ທ່ານ ປັກ ບ່ຽງຊອກ ພ້ອມດ້ວຍຄະນະ ຍັງໄດ້ເຂົ້າຢ້ຽມຂ່ຳນັບທ່ານ ນາງ ປານີ ຢາທໍ່ຕູ້ ຮອງປະທານປະເທດ ແຫ່ງ ສປປ ລາວ, ອະດີດປະທານສະພາແຫ່ງຊາດລາວ ແລະ ຢ້ຽມຢາມສະຖານທີ່ຕ່າງໆພາຍໃນນະຄອນຫຼວງວຽງຈັນຈຳນວນໜຶ່ງ ເຊັ່ນ ຢ້ຽມຢາມໂຄງການກໍ່ສ້າງກັນຕາຝັ່ງເຈື່ອນແຄມຂອງ (ສວນເຈົ້າອານຸວົງ), ຢ້ຽມຢາມໂຮງໝໍເດັກ ລາວ-ເກົາຫຼີ (ໂຮງໝໍ 150 ຕຽງ) ແລະ ຢ້ຽມຢາມຫໍພິພິດຕະພັນສິລະປະລວດລາຍໄມ້ ບ້ານຊ້າງຄູ້ ເມືອງໄຊທານີ ພ້ອມທັງໄດ້ເຂົ້າຮ່ວມງານລ້ຽງອາຫານຄ່ຳຮ່ວມກັບປະຊາຊົນ ສ. ເກົາຫຼີ ຢູ່ ສປປ ລາວ ອີກດ້ວຍ.