ວັນທີ 24 ຕຸລາ 2024 ອານະກໍາມະການເນື້ອໃນຂັ້ນແຂວງ ໄດ້ຮ່ວມກອງປະຊຸມທາບ ທາມ ແລະ ສຳມະນາບົດລາຍງານການເມືອງ ເພື່ອກະກຽມກອງປະຊຸມໃຫຍ່ 3 ຂັ້ນຂອງພັກຂັ້ນແຂວງ ຢູ່ສະໂມສອນ ກອງບັນຊາການທະຫານແຂວງ ໂດຍການເປັນປະທານ ສະຫາຍ ສາຍທອງ ໄຊຍະວົງ ຮອງເລຂາພັກແຂວງ, ປະ ທານສະພາປະຊາຊົນແຂວງ, ຫົວໜ້າອະນຸກໍາມະການເນື້ອໃນຂັ້ນແຂວງ ມີບັນດາສະຫາຍ ອານຸກຳມະການເນື້ອໃນຂັ້ນແຂວງ, ເຂົ້າຮ່ວມມີ ທ່ານ ພົຈວ. ວິລະຕູ່ ວໍລະຈິດ ຮັກສາການເລຂາຄະນະພັກ, ຫົວໜ້າການເມືອງ ກອງບັນຊາ ການທະຫານແຂວງ, ມີບັນດາຄະນະພັກ, ຄະນະບັນຊາ, ສະມະຊິກພັກ ນາຍ ແລະ ພົນທະຫານເຂົ້າຮ່ວມຢ່າງພ້ອມພຽງ.

ກອງປະຊຸມໄດ້ຜ່ານຮ່າງບົດລາຍງານການເມືອງ ແລະ ຮ່າງບົດສຳຫຼວດການນໍາພາຂອງກອງບັນຊາການທະຫານແຂວງ ຈາກ ທ່ານ ພົຈວ. ວິລະຕູ່ ວໍລະຈິດ ຮັກສາການເລຂາຄະນະພັກ ແລະ ທ່ານ ພັອ ສິດປະເສີດ ນວນມະນີວົງສະຫວາດ ຄະນະພັກ ກອງບັນຊາການທະຫານແຂວງ ໃນກອງປະຊຸມກໍ່ໄດ້ມີການແລກປ່ຽນຄວາມຄິດເຫັນຈາກຜູ້ແທນກອງປະຊຸມ ເພື່ອໃຫ້ບົດມີຄວາມເປັນເອກະ ພາບ ແລະ ຮັບປະກັນດ້ານເນື້ອໃນ.

ຈາກນັ້ນ ປະທານກອງປະຊຸມຈຶ່ງໄດ້ເນັ້ນໜັກໃຫ້ບັນດາຜູ້ແທນກອງປະຊຸມຈົ່ງໄດ້ເອົາໃຈໃສ່ ໃນການກະກຽມຄວາມພ້ອມຮອບດ້ານ ແລະ ການໃຊ້ສິດປະຊາທິປະໄຕຂອງຜູ້ແທນສົມບູນ ເພື່ອເຮັດໃຫ້ກອງປະຊຸມມີຜົນສຳເລັດ ແລະ ສອດຄ່ອງກັບລະບຽບການ ຕາມຄາດໝາຍ.

(ພາບ-ຂ່າວ: ສຸລິຍາ ເພັງສະຫວັດ)