ຕອນເຊົ້າ ວັນທີ 19 ກໍລະກົດ 2022 ນີ້, ສະຫະພັນແມ່ຍິງແຂວງຫົວພັນ ໄດ້ຈັດພິທີໂຮມຊຸມນຸມມິດຕິງສະເຫຼີມສະຫຼອງວັນສ້າງຕັ້ງສະຫະພັນແມ່ຍິງລາວຄົບຮອບ 67 ປີ ຂື້ນ ຢູ່ຫໍວັດທະນະທຳແຂວງ ພາຍໃຕ້ການເປັນປະທານ ແລະ ປາຖະກະຖາຂອງທ່ານ ນາງ ອຳໄພວອນ ລ້ອມບຸນແພງ ກຳມະການສຳຮອງສູນກາງພັກ, ຮອງເລຂາພັກແຂວງ, ປະທານສະພາປະຊາຊົນແຂວງຫົວພັນ, ມີບັນດາທ່ານການນຳແຂວງ, ອົງການຈັດຕັ້ງພາຄີ, ພະນັກງານບຳນານ ຕະຫຼອດຮອດເອື້ອຍນ້ອງແມ່ຍິງອ້ອມຂ້າງແຂວງ, ເມືອງຊຳເໜືອເຂົ້າຮ່ວມນຳ.

ໃນພິທີໂຮມຊຸມນຸມ, ທ່ານ ນາງ ອຳໄພວອນ ລ້ອມບຸນແພງ ກຳມະການສຳຮອງສູນກາງພັກ, ຮອງເລຂາພັກແຂວງ, ປະທານສະພາປະຊາຊົນ ແຂວງຫົວພັນ ໄດ້ເລົ່າຄືນມູນເຊື້ອຄືນປະຫວັດມູນເຊື້ອການກໍາເນີດ, ເຕີບໃຫຍ່ຂະຫຍາຍຕົວ ແລະ ຜົນງານການເຄື່ອນໄຫວຂອງອົງການຈັດຕັ້ງສະຫະພັນແມ່ຍິງລາວ ກໍ່ຄືແມ່ຍິງລາວບັນດາເຜົ່າ ທີ່ໄດ້ອຸທິດຕົນເພື່ອພາລະກິດຕໍ່ສູ້ປົດປ່ອຍຊາດ, ປົກປັກຮັກສາ ແລະ ສ້າງສາພັດທະນາປະເທດຊາດ ກໍ່ຄືພາລະກິດພັດທະນາແມ່ຍິງຕະຫລອດໄລຍະ 67 ປີ ທີ່ຜ່ານມາ. ເຊິ່ງຍົກໃຫ້ເຫັນຜົນງານຫຼາຍດ້ານທີ່ແມ່ຍິງລາວຍາດມາໄດ້ ເປັນຕົ້ນແມ່ນ: ນັບແຕ່ກອງປະຊຸມໃຫຍ່ຄັ້ງທີ I ຈົນເຖິງກອງປະຊຸມໃຫຍ່ຄັ້ງທີ VIII ຂອງຜູ້ແທນແມ່ຍິງລາວທົ່ວປະເທດ, ຄະນະບໍລິຫານງານສູນກາງສະຫະພັນແມ່ຍິງລາວແຕ່ລະສະໄໝ ໄດ້ສືບຕໍ່ປະຕິບັດພາລະບົດບາດເຕົ້າໂຮມຄວາມສາມັກຄີ, ປຸກລະດົມຊຸກຍູ້ແມ່ຍິງລາວເຂົ້າຮ່ວມປະຕິບັດ 2 ໜ້າທີ່ຍຸດທະສາດຄື: ປົກປັກຮັກສາ ແລະ ສ້າງສາພັດ ທະນາປະເທດຊາດ, ເປັນເຈົ້າການປະຕິບັດແຜນພັດທະນາແມ່ຍິງລາວ; ພ້ອມກັນນຳພາຂະບວນການແມ່ຍິງລາວບັນດາເຜົ່າປະຕິບັດຄຳຂັວນ, ຂໍ້ແຂ່ງຂັນຂອງສະຫະພັນແມ່ຍິງລາວ ຕິດພັນກັບການຈັດ​ຕັ້ງ​ປະຕິບັດ​ແນວທາງ​ນະ​ໂຍບາຍ​ຂອງ​ພັກ-​ລັດຖະບານ​ແຕ່ລະ​ໄລຍະ.

ແມ່ຍິງລາວໄດ້ເຕີບໃຫຍ່ຂະຫຍາຍຕົວ ແລະ ເຂັ້ມແຂງ ຄຽງບ່າຄຽງໄຫລ່ກັບເພດຊາຍ ໃນການຕໍ່ສູ້ຢ່າງເດັດດ່ຽວຕ້ານພວກສັກດີນາ ແລະ ພວກລ່າເມືອງຂື້ນແບບເກົ່າ. ພາຍຫຼັງ ພັກປະຊາຊົນປະຕິວັດລາວ ໄດ້ຮັບການສ້າງຕັ້ງຂຶ້ນ, ພັກເຮົາກໍໄດ້ເອົາໃຈໃສ່ປຸກລະດົມ, ຂົນຂວາຍກໍ່ສ້າງແມ່ຍິງໃຫ້ມີຄວາມຕື່ນຕົວປະກອບສ່ວນໃນພາລະກິດປະຕິວັດ ແລະ ຖືເອົາແມ່ຍິງເປັນສ່ວນໜຶ່ງໃນກຳລັງແຮງສຳຄັນຂອງພັກ, ມາຮອດວັນທີ 20 ກໍລະກົດ 1955 ພັກໄດ້ຈັດຕັ້ງຄົ້ນຄວ້າ ວຽກງານແມ່ຍິງເຊິ່ງຖືເປັນຕົ້ນກຳເນີດຂອງອົງການຈັດຕັ້ງສະຫະພັນແມ່ຍິງລາວ, ນັບແຕ່ມື້ສ້າງຕັ້ງ ເປັນຕົ້ນມາ ອົງການຈັດຕັ້ງແມ່ຍິງໄດ້ເຄື່ອນໄຫວຕາມພາລະບົດບາດ ສິດ ແລະ ໜ້າທີ່ຂອງຕົນຢ່າງແຂງແຮງ ເປັນຕົ້ນໄດ້ເອົາໃຈໃສ່ປະຕິບັດໂຄງການດຳເນີນງານ ໃນການພັດທະນາ ແລະ ຍົກສູງບົດບາດຂອງເອື້ອຍນ້ອງແມ່ຍິງ, ແມ່ຍິງລາວບັນດາເຜົ່າ ມີບົດບາດສູງເດັ່ນຂຶ້ນໃນສັງຄົມ ກໍ່ຄືໃນເວທີສາກົນ ແລະ ໄດ້ຮັບການພັດທະນາໃນທຸກດ້ານ.

ເພື່ຶອສືບຕໍ່ເສີມຂະຫຍາຍມູນເຊື້ອອັນດີງາມ, ຜົນງານການເຄື່ອນໄຫວ ຂອງສະຫະພັນແມ່ຍິງກໍ່ຄືແມ່ຍິງລາວບັນດາເຜົ່າໃຫ້ເລິກເຊິ່ງ, ກວ້າງຂວາງກວ່າເກົ່າ ຕ້ອງໄດ້ເອົາໃຈໃສ່ໃນການໂຄສະນາເຜີຍແຜ່ ແລະ ເສີມຂະຫຍາຍ 5 ຄຸນລັກສະນະທີ່ເປັນມູນເຊື້ອຂອງແມ່ຍິງລາວ ເປັນຕົ້ນແມ່ນແມ່ຍິງລາວມີຄວາມດຸໝັ້ນຂະຫຍັນພຽນໃນການອອກແຮງງານ, ມີນໍ້າໃຈປະຢັດສັດທ່ຽງ, ການໃຊ້ຈ່າຍມີການຄິດໄລ່ຈົ່ງຢອມ, ຮັກສາມູນມັງໄວ້ໃຫ້ລູກເຕົ້າ; ມີຄວາມບໍລິສຸດຜຸດຜ່ອງ, ແພງລູກ, ຮັກຜົວ, ຍອມທົນທຸກ, ທົນຍາກ, ຍອມເສຍສະຫລະ ເພື່ອຄວາມສຸກຂອງຄອບຄົວ, ລູກ, ຜົວ ສຶກສາອົບຮົມລູກເຕົ້າຢ່າງໃກ້ຊິດ ທັງໃຫ້ຄວາມອົບອຸ່ນ ເປັນກໍາລັງໃຈໃຫ້ລູກ, ຜົວ ແລະ ເປັນເຈົ້າການໃນການປັບປຸງຊີວິດການເປັນຢູ່ພາຍໃນຄອບຄົວໃຫ້ດີຂື້ນເລື້ອຍໆ; ມີນໍ້າໃຈເອື້ອເພື້ອເພື່ອແຜ່, ຮັກແພງຊ່ວຍເຫລືອຕຸ້ມຫໍ່ກັນ, ມີຄວາມສາມັກຄີເປັນຈິດໜຶ່ງໃນດຽວກັນ ເພື່ອສົ່ງເສີມກັນໃຫ້ມີການພັດທະນາໃນທຸກດ້ານ; ມີນໍ້າໃຈຮັກຊາດແພງເຊື້ອ, ຮັກບ້ານເກີດເມືອງນອນ, ປົກປັກຮັກສາ ແລະ ສືບທອດມູນເຊື້ອອັນດີງາມຂອງຊາດ ແລະ ຂອງແມ່ຍິງ, ເສີມຂະຫຍາຍຜົນງານ ແລະ ທ່າແຮງບົ່ມຊ້ອມຂອງຕົນ ເພື່ອເຮັດສໍາເລັດໜ້າທີ່ຕໍ່ການຈັດຕັ້ງ ແລະ ປະຊາຊົນມອບໝາຍໃຫ້; ມີກິລິຍາມາລະຍາດອ່ອນຫວານ, ຮັກສາມູນມໍລະດົກ ແລະ ອະນຸລັກຮັກສາວັດທະນະທຳອັນດີງາມຂອງຊາດເປັນ ຕົ້ນແມ່ນການນຸ່ງຖື, ການແຕ່ງກາຍ, ກາຍພົວພັນໃນຄອບຄົວ – ສັງຄົມ ແລະ ອື່ນໆ.

ພ້ອມນັ້ນ, ສືບຕໍ່ຖືສໍາຄັນ ຕໍ່ການສືບສາອົບຮົມການເມືອງ – ແນວຄິດໃຫ້ຖັນແຖວສະມາຊິກສະຫະພັນແມ່ຍິງລາວ ແລະ ແມ່ຍິງລາວບັນດາເຜົ່າ ໃຫ້ຮັບຮູ້ ແລະ ເຂົ້າໃຈ, ນໍາໃຊ້ຫລາຍຮູບການ,​ ຫລາຍເນື້ອໃນເພື່ອແນ່ໃສ່ຫັນປ່ຽນຈາກຈິນຕະນາການເກົ່າໄປສູ່ຈິນຕະນາການໃໝ່; ເອົາໃຈໃສ່ສຶກສາອົບຮົມການເມືອງ – ແນວຄິດແນວທາງນະໂຍບາຍຂອງພັກ, ກົດໝາຍຂອງລັດ, ມູນເຊື້ອຂອງຊາດ, ມີຄວາມເຊື່ອໝັ້ນຕໍ່ອຸດົມການຂອງພັກ, ມີຄຸນທາດການເມືອງໜັກແໜ້ນ ຄຸມສົມບັດສິນທໍາປະຕິວັດ, ມີຄວາມສີວິໄລທາງດ້ານຈິດໃຈ, ມີຄວາມສາມັກຄີເປັນປຶກແຜ່ນແໜ້ນໜາ, ປົກປັກຮັກສາວັດທະນະທໍາອັນດີງາມຂອງຊາດ ກໍ່ຄືຄຸນລັກສະນະທີ່ເປັນມູນເຊື້ອ ຂອງແມ່ຍິງລາວບັນດາເຜົ່າ, ຮັບປະກັນສະຖຽນລະພາບທາງດ້ານການເມືອງ, ສັງຄົມມີຄວາມປອດໄພ ແລະ ເປັນລະບຽບຮຽບຮ້ອຍ. ເອົາໃຈໃສ່ໃນການປຸກລະດົມຂະບວນການແມ່ຍິງ ໃນການຊອກຮູ້ຮໍ່າຮຽນ, ພັດທະນາຕົນເອງໃນທຸກດ້ານ, ເປັນເຈົ້າການຍົກລະດັບຄວາມຮູ້ຄວາມສາມາດສ້າງປະສົບການໃຫ້ກັບຕົນເອງ ເພື່ອສ້າງເງື່ອນໄຂຄວາມພ້ອມໃຫ້ຂັ້ນເທິງພິຈາລະນາໄປສູ່ຕຳແໜ່ງງານນຳພາຂັ້ນຕ່າງໆ ແລະ ແມ່ຍິງທີ່ນອນໃນສະມະຊິກເອື້ອຍນ້ອງແມ່ຍິງທຸກຄົນຢູ່ໃນຕຳແໜ່ງງານນຳພາແລ້ວ ກໍ່ໃຫ້ສືບຕໍ່ສ້າງຄວາມເຂັ້ມແຂງໃຫ້ກັບຕົນເອງ ເພື່ອໃຫ້ສົມຄູ່ກັບຕໍາແໜ່ງທີ່ຮັບຜິດຊອບ ແລະ ເປັນທີ່ຍອມຮັບຂອງເພື່ອນຮ່ວມງານ, ສືບຕໍ່ຊຸກຍູ້ຂະບວນການສ້າງເສດຖະກິດຄອບຄົວ ແລະ ລວມໝູ່ໃຫ້ເປັນຕົວແບບໃນຫຼາຍໆກິດຈະກຳຕາມທ່າແຮງ, ເປັນເຈົ້າການໃນການສຶກສາ ອົບຮົມລູກຫຼານ ໃຫ້ຫ່າງໄກຈາກບັນຫາຢາເສບຕິດ, ຄະນະພັກ-ຄະນະນໍາ ແຕ່ລະຂັ້ນ ຕ້ອງສືບຕໍ່ຕິດຕາມ, ຊີ້ນຳໃກ້ຊິດຕິດແທດ ຕໍ່ອົງການຈັດຕັ້ງສະຫະພັນແມ່ຍິງ ກໍ່ຄືສະມາຊິກແມ່ຍິງ ທີ່ຢູ່ໃນຄວາມຮັບຜິດຊອບຂອງຕົນ ສ້າງສິ່ງເອື້ອອຳນວຍຄວາມສະດວກ ແລະ ສ້າງເງື່ອນໄຂໃຫ້ແມ່ຍິງໄດ້ພັດທະນາຕົນເອງ, ເສີມສ້າງຄວາມຮູ້ຄວາມສາມາດໃຫ້ສູງຂຶ້ນ, ສ້າງຄ່ານິຍົມທີ່ກ້າວໜ້າ ແລະ ຖືກຕ້ອງ, ຮັກປະເທດຊາດ, ຮັກບ້ານເກີດເມືອງນອນ ເພື່ອພ້ອມກັນສຶກສາອົບຮົມບົ່ມເພາະ, ກໍ່ສ້າງແມ່ຍິງລາວບັນດາເຜົ່າ ຜູ້ສືບທອດໃຫ້ກາຍເປັນ ລູກສາວຜູ້ປະເສີດ ຂອງພັກ ແລະ ຂອງປະເທດຊາດ.

ໂອກາດດຽວກັນນີ້, ຍັງໄດ້ຈັດກິດຈະກຳບໍລິຈາກເລືອດ ເພື່ອຊ່ວຍເຫຼືອເພື່ອນມະນຸດ ຜູ້ທີ່ມີຄວາມຕ້ອງການເລືອດຢ່າງເລັ່ງດ່ວນຕື່ມອີກ.