(ສພຊ) ໃນລະຫວ່າງວັນທີ 13-14 ມີນາ 2023 ທີ່ເມືອງວັງວຽງ ແຂວງວຽງຈັນ, ກຳມາທິການການຕ່າງປະເທດ ສະພາແຫ່ງຊາດ ຮ່ວມກັບ ສະຖານເອກອັກຄະລັດຖະທູດອົດສະຕຼາລີ ປະຈຳ ສປປລາວ ແລະ ສະຖາບັນ ລາວ-ອົດສະຕຼາລີ ໄດ້ຈັດກອງປະຊຸມເຝິກອົບຮົມພາຍໃຕ້ຫົວຂໍ້ “ປະສິດທິພາບຄວາມເປັນພາວະຜູ້ນຳ ສຳລັບຜູ້ນຳຮຸ່ນສືບທອດ (Effective Leadership Training)” ໃຫ້ແກ່ພະນັກງານການນຳຂັ້ນກົມ ແລະ ຂັ້ນພະແນກ ຂອງສະພາແຫ່ງຊາດ ແຫ່ງ ສປປລາວ ໂດຍການເປັນປະທານຮ່ວມຂອງທ່ານ ນາງ ວັນດີ ບຸດທະສະວົງ ຮອງປະທານກຳມາທິການການຕ່າງປະເທດ ສະພາແຫ່ງ¬ຊາດ ແລະ ທ່ານ ແມັດທິວ ແບງສ໌ ເລຂາເອກ ສະຖານເອກອັກຄະລັດຖະທູດອົດສະຕຼາລີ ປະຈຳ ສປປລາວ, ມີບັນດາຫົວ-ຮອງຫົວໜ້າກົມ ແລະ ຄະນະພະແນກຈາກບັນດາກຳມາທິການ, ເລຂາທິການສະພາແຫ່ງຊາດ ແລະ ເລຂາທິການສະພາປະຊາຊົນແຂວງວຽງຈັນ ເຂົ້າຮ່ວມ ຈໍານວນທັງໝົດ 32 ທ່ານ ຍິງ 17 ທ່ານ.

ຈຸດປະສົງຂອງກອງປະຊຸມຄັ້ງນີ້ ເພື່ອສ້າງຄວາມເຂັ້ມແຂງໃຫ້ແກ່ພະນັກງານການນຳຂັ້ນກົມພາຍໃນສະພາແຫ່ງຊາດ ໃນການຍົກສູງຄວາມຮູູູ້ຄວາມສາມາດ ໃນການບໍລິຫານຄຸ້ມຄອງນຳພາການປະຕິບັດໜ້າທີ່ວຽກງານ ໃຫ້ມີປະສິດທິພາບ ແລະ ປະສິດທິຜົນຍິ່ງຂຶ້ນ, ພ້ອມທັງເປັນການເສີມຂະຫຍາຍສາຍພົວພັນມິດຕະພາບ ແລະ ການຮ່ວມມື ທີ່ມີມາແຕ່ດົນນານ ລະຫວ່າງ ສປປລາວ ແລະ ປະເທດອົດສະຕຼາລີ ໃຫ້ນັບມື້ນັບຂະຫຍາຍຕົົວຍິ່ງຂຶ້ນ. ນອກຈາກນັ້ນ, ບັນດາຜູ້ເຂົ້າຮ່ວມກອງປະຊຸມ ຍັງໄດ້ຮັບຮູ້ ແລະ ຮຽນຮູ້ ຄວາມຮູ້ໃໝ່ໆທີ່ນັກວິທະຍາກອນໄດ້ນຳມາຖ່າຍທອດໃນກອງປະຊຸມ ເຊັ່ນ: ຄວາມແຕກຕ່າງລະຫວ່າງພາວະຄວາມເປັນຜູ້ນຳ ແລະ ການບໍລິຫານຈັດການ, ຄວາມສະຫຼາດທາງອາລົມຈິດ (Emotional Intelligence or EQ), ທິດສະດີຄວາມຕ້ອງການຂອງມະນຸດ, ຄວາມແຕກຕ່າງລະຫວ່າງປະສິດທິພາບ ແລະ ປະສິດທິຜົນ ແລະ ພຶດຕິກຳທີ່ເປັນແບບຢ່າງ ຂອງພາວະຄວາມເປັນຜູ້ນຳ.

ພາຍຫຼັງໄດ້ຮັບຟັງການນຳສະເໜີບົດຮຽນ ຈາກວິທະຍາກອນທີ່ມີຄວາມຮູ້ຄວາມສາມາດ ແລະ ມີປະສົບການ ແລ້ວ ຜູ້ເຂົ້າຮ່ວມກອງປະຊຸມ ຍັງໄດ້ມີການແບ່ງກຸ່ມເຮັດກິດຈະກຳຕ່າງໆ ຕາມຫົວຂໍ້ທີ່ກຳນົດ ແລະ ໄດ້ລົງເລິກສົນທະນາ, ປຶກສາຫາລື, ແລກປ່ຽນບົດຮຽນ ແລະ ເຝິກຫັດເຮັດຕົວຈິງຮ່ວມກັນ ເພື່ອນຳເອົາບົດຮຽນຂອງກອງປະຊຸມຄັ້ງນີ້ໄປໝູນໃຊ້ເຂົ້າໃນການເຄື່ອນໄຫວວຽກງານຂັ້ນນຳພາຂອງຕົນ ໃຫ້ມີປະສິດທິພາບ ແລະ ປະສິດທິຜົນດີຂຶ້ນກວ່າເກົ່າ, ສາມາດຕອບສະໜອງໄດ້ກັບຄວາມຮຽກຮ້ອງຕ້ອງການ ຂອງໜ້າທີ່ວຽກງານຕົວຈິງ ໃນໄລຍະໃໝ່ ຂອງບັນດາກຳມາທິການພາຍໃນສະພາແຫ່ງຊາດ. ໃນຕອນທ້າຍ ຂອງກອງປະຊຸມ, ບັນດານັກສຳມະນາກອນ ຍັງໄດ້ຮັບໃບຢັ້ງຢືນ ການເຂົ້າຮ່ວມກອງປະຊຸມເຝິກອົບຮົມດັ່ງກ່າວອີກດ້ວຍ.