(ສພຊ) – ກອງປະຊຸມສຳມະນາການມີສ່ວນຮ່ວມຂອງແມ່ຍິງຕໍ່ວຽກງານການປົກຄອງທ້ອງຖິ່ນ ແລະ ວຽກງານພັດທະນາຊົນນະບົດແກ້ໄຂຄວາມທຸກຍາກ ໄດ້ຈັດຂຶ້ນໃນວັນທີ 12-13 ສິງຫາ 2024 ທີ່ນະຄອນຫຼວງພະບາງ ແຂວງຫຼວງພະບາງ ໂດຍການເປັນປະທານຂອງທ່ານ ຄຳຈັນ ໂສຕາປະເສີດ ຄະນະປະຈຳສະພາແຫ່ງຊາດ, ປະທານກຳມາທິການບັນດາເຜົ່າ (ກບຜ); ມີຮອງປະທານກຳມາທິການບັນດາເຜົ່າ, ບັນດາປະທານ ແລະ ຮອງປະທານຄະນະກຳມະການວັດທະນະທຳ-ສັງຄົມ ແລະ ບັນດາເຜົ່າ ສະພາປະຊາຊົນຂັ້ນແຂວງ ແລະ ສະມາຊິກສະພາແຫ່ງຊາດທີ່ເປັນກຳມະການຂອງ ກບຜ ປະຈຳເຂດເລືອກຕັ້ງທີ 1-10, ຜູ້ຕາງໜ້າຈາກບັນດາກົມທີ່ກ່ຽວຂ້ອງຂອງກະຊວງພາຍໃນ, ກະຊວງກະສິກຳ ແລະ ປ່າໄມ້, ກະຊວງປ້ອງກັນປະເທດ, ກະຊວງແຜນການ ແລະ ການລົງທຶນ, ສູນກາງສະຫະພັນແມ່ ຍິງລາວ ພ້ອມດ້ວຍຄະນະກົມ, ຄະນະພະແນກ ແລະ ວິຊາການທີ່ກ່ຽວຂ້ອງຂອງສະພາແຫ່ງຊາດ ແລະ ເຂດເລືອກຕັ້ງຕ່າງໆ ເຂົ້າຮ່ວມຫຼາຍກວ່າ 70 ທ່ານ.
ໃນການກ່າວເປີດກອງປະຊຸມຢ່າງເປັນທາງການ, ທ່ານ ຄຳຈັນ ໂສຕາປະເສີດ ໃຫ້ຮູ້ວ່າ: ກອງປະຊຸມສໍາມະນາຄັ້ງນີ້ ຈຸດປະສົງແມ່ນເພື່ອໃຫ້ຜູ້ເຂົ້າຮ່ວມໄດ້ຮັບຮູ້ບົດບາດທີ່ສໍາຄັນຂອງແມ່ຍິງ ທີ່ໄດ້ຮັບການພັດທະນາຈາກແນວທາງຄວາມສະເໝີພາບຍິງ-ຊາຍຂອງພັກ-ລັດ. ໃນໄລຍະບໍ່ພໍເທົ່າໃດປີ ພາຍຫຼັງປະເທດຊາດໄດ້ຮັບການປົດປ່ອຍ ຈະເຫັນໄດ້ການພັດທະນາຕົນເອງຂອງເອື້ອຍນ້ອງແມ່ຍິງໃນຖັນແຖວຂອງອົງການບໍລິຫານລັດ, ການພັດທະນາເສດຖະກິດ, ວັດທະນະທໍາ-ສັງຄົມ ເວົ້າລວມ, ເວົ້າສະເພາະໃນຂົງເຂດວຽກງານການປົກຄອງທ້ອງຖິ່ນ ກໍຄືສະພາແຫ່ງຊາດ ແລະ ສະພາປະຊາຊົນຂັ້ນແຂວງ ເພື່ອຍົກລະດັບຄວາມຮັບຮູ້, ຄວາມເຂົ້າໃຈເປັນເອກະພາບຕໍ່ບັນດານິຕິກໍາທີ່ກ່ຽວຂ້ອງກັບວຽກງານການປົກຄອງທ້ອງຖິ່ນ; ພ້ອມພຽງຮຽງໜ້າກັບເພດຊາຍ ເປັນກໍາລັງແຮງ, ຊຸກຍູ້, ຍົກສູງພາລະບົດບາດຂອງແມ່ຍິງລາວບັນດາເຜົ່າ ປະກອບສ່ວນເຂົ້າໃນວຽກງານການປົກຄອງທ້ອງ ຖິ່ນ, ວຽກງານພັດທະນາຊົນນະບົດແກ້ໄຂຄວາມທຸກຍາກ, ເສີມຂະຫຍາຍຄວາມສາມາດການປະຕິບັດໜ້າທີ່ເຂົ້າໃນວຽກງານການ ເມືອງຂອງຕົນສູງຂຶ້ນ. ທ່ານປະທານກອງປະຊຸມ ຍັງຮຽກຮ້ອງບັນດາທ່ານທີ່ເຂົ້າຮ່ວມ ຈົ່ງຍົກສູງຄວາມຮັບຜິດຊອບໃນການແບ່ງ ປັນຄວາມຮູ້ປະສົບການຂອງຕົນ ເພື່ອເພີ່ມຄວາມຮັບຮູ້ທີ່ເລິກເຊິ່ງ ແລະ ເປັນເອກະພາບກັນວ່າແມ່ຍິງມີບົດບາດທີ່ສຳຄັນຫຼາຍຕໍ່ວຽກງານການປົກຄອງທ້ອງຖິ່ນ, ວຽກງານພັດທະນາຊົນນະບົດ ແລະ ແກ້ໄຂຄວາມທຸກຍາກ ກໍຄືວຽກງານອື່ນໆຂອງພັກ-ລັດ ທັງສູນກາງ ແລະ ທ້ອງຖິ່ນ.
ຜູ້ເຂົ້າຮ່ວມໄດ້ຮັບຟັງ ແລະ ຄົ້ນຄວ້າ, ແລກປ່ຽນບົດຮຽນ ແລະ ຄໍາຄິດເຫັນ ຕໍ່ບັນດາຫົວຂໍ້ທີ່ວິທະຍາກອນໄດ້ສະເໜີໃນກອງປະຊຸມຄື: ບົດບາດຂອງແມ່ຍິງຕໍ່ວຽກງານສະພາແຫ່ງຊາດ ແລະ ສະພາປະຊາຊົນຂັ້ນແຂວງ; ພາລະບົດ ບາດ, ໜ້າທີ່, ສິດຂອງກົມການປົກຄອງທ້ອງຖິ່ນ (ກະຊວງພາຍໃນ) ແລະ ການຈັດຕັ້ງປະຕິບັດວຽກງານການປົກຄອງທ້ອງຖິ່ນໃນໄລຍະຜ່ານມາ; ບົດບາດຂອງແມ່ຍິງລາວບັນດາເຜົ່າ ໃນການມີສ່ວນຮ່ວມຕໍ່ວຽກງານການປົກຄອງທ້ອງຖິ່ນ; ບົດບາດຂອງແມ່ຍິງລາວບັນດາເຜົ່າ ຕໍ່ວຽກງານພັດທະນາຊົນນະບົດ ແລະ ການແກ້ໄຂຄວາມທຸກຍາກ; ການເຂົ້າເຖິງແຫຼ່ງທຶນທະນາຄານນະໂຍບາຍຂອງແມ່ຍິງລາວບັນດາເຜົ່າໃນໄລຍະຜ່ານມາ; ບົດບາດຂອງແມ່ຍິງໃນຂົງເຂດປ້ອງກັນ ຊາດ ຕໍ່ວຽກງານພັດທະນາຊົນນະບົດ ແລະ ແກ້ໄຂຄວາມທຸກຍາກ.
ກອງປະຊຸມຄັ້ງນີ້ ເຮັດໃຫ້ຜູ້ເຂົ້າຮ່ວມໄດ້ເຂົ້າໃຈເຖິງບົດບາດຄວາມສໍາຄັນຂອງພະນັກງານຂັ້ນສູງ ແລະ ເສນາທິການ ກໍຄືພະນັກງານເພດຍິງແຕ່ລະອົງການ ຕໍ່ຫຼາຍຂົງເຂດວຽກງານ ລະອຽດຈະແຈ້ງຂຶ້ນ; ນອກນັ້ນ, ຍັງໄດ້ເພີ່ມຄວາມຮັບຮູ້ ແລະ ເຂົ້າໃຈບັນດານິຕິກໍາ, ແນວທາງນະໂຍບາຍທາງດ້ານທິດສະດີ ແລະ ພຶດຕິກໍາຕົວຈິງໃນການຈັດຕັ້ງປະຕິບັດວຽກງານ ດ້ານດີ, ດ້ານອ່ອນ ແລະ ຂໍ້ຄົງຄາງ ເຊິ່ງຈະເປັນບົດຮຽນທີ່ດີໃນຕໍ່ໜ້າໃນການຍົກສູງບົດບາດການຕິດຕາມກວດ ກາຂອງສະພາແຫ່ງຊາດ ກໍຄືກໍາມາທິການບັນດາເຜົ່າ ຕໍ່ກັບວຽກງານການມີສ່ວນຮ່ວມຂອງແມ່ຍິງ ຕໍ່ວຽກງານປົກຄອງທ້ອງຖິ່ນ ແລະ ວຽກງານພັດທະນາຊົນນະບົດແກ້ໄຂຄວາມທຸກຍາກ.
ກອງປະຊຸມຄັ້ງນີ້ ໄດ້ຮັບການສະໜັບສະໜູນຊ່ວຍເຫຼືອທາງດ້ານງົບປະມານຈາກໂຄງການສ້າງຄວາມເຂັ້ມແຂງໃຫ້ແກ່ສະພາແຫ່ງຊາດ ແລະ ສະພາປະຊາຊົນຂັ້ນແຂວງ ຫຼື ສະເຕັບສ໌ (STEPs) ໂດຍຜ່ານກອງເລຂາຄຸ້ມຄອງແຫຼ່ງທຶນຊ່ວຍເຫຼືອລ້າໃຫ້ແກ່ສະພາແຫ່ງຊາດ ສົມທົບກັບງົບປະມານຂອງຄະນະເລຂາທິການສະພາແຫ່ງຊາດ.
(ນາງ ປາກາລັກ ພົມມີໄຊ)