ກອງປະຊຸມຝຶກອົບຮົມກ່ຽວກັບການບໍາລຸງຮັກສາອຸປະກອນໄອທີ, ການຄຸ້ມຄອງເຄື່ອງໃຊ້ຫ້ອງການ, ການຄຸ້ມຄອງເອກະສານຜ່ານປະຕູດຽວ, ການຮ່າງເອກະສານທາງການ, ວີທີນໍາໃຊ້ລະບົບເຄືອຂ່າຍພາຍໃນ ສພຊ ແລະ ການກະກຽມວຽກງານບໍລິຫານ-ພິທີການໃຫ້ສະມາຊິກສະພາປະຊາຊົນແຂວງ (ສສຂ) ແລະ ພະນັກງານ-ລັດຖະກອນຂອງສະພາປະຊາຊົນແຂວງ (ສພຂ) ໄດ້ສຳເລັດລົງຕາມລະດັບຄາດໝາຍທີ່ວາງໄວ້ ເມື່ອວັນທີ 10 ພຶດສະພາ 2024 ພາຍຫຼັງໄດ້ດຳເນີນມາເປັນເວລາ 2 ວັນ. ທີ່ຫ້ອງປະຊຸມ ສພຂ ພາຍໃຕການເປັນປະທານກອງປະຊຸມຂອງທ່ານ ສຸກສໍາລານ ໄຊຍະແສງ ຮອງປະທານ ສພຂ. ມີບັນດາທ່ານຄະນະກໍາມະການ, ຄະນະເລຂາທິການ, ວິທະຍາກອນທີ່ມາຈາກສູນກາງ ແລະ ທ້ອງຖີ່ນ, ສໍາມະນາກອນທີ່ເປັນ ສສຂ ແລະ ພະນັກງານ-ລັດຖະກອນພາຍໃນ ສພຂ ພ້ອມດ້ວຍແຂກທີ່ຖືກເຊີນເຂົ້າຮ່ວມ.
ຕະຫຼອດໄລຍະກອງປະຊຸມ, ຜູ້ເຂົ້າຮ່ວມໄດ້ເອົາໃຈໃສ່ຮັບຟັງ, ຄົ້ນຄວ້າສົນທະນາແລກປ່ຽນບົດຮຽນເຊິ່ງກັນແລະກັນຢ່າງກົງໄປກົງມາ ເປັນຕົ້ນແມ່ນບົດຮຽນການຄຸ້ມຄອງເອກະສານ ແລະ ການຈໍລະຈອນເອກະສານຜ່ານປະຕູດຽວ, ການກະກຽມດ້ານວຽກງານບໍລິຫານ-ພິທີການ, ການຄຸ້ມຄອງເຄື່ອງໃຊ້ຫ້ອງການ ແລະ ອຸປະກອນໄອທີ, ການສ້າງເອກະສານທາງການ; ການນໍາໃຊ້ເຄືອຂ່າຍພາຍໃນສະພາແຫ່ງຊາດ. ກອງປະຊຸມຝຶກອົບຮົມໃນຄັ້ງນີ້ ເຫັນໄດ້ວ່ານັກສໍາມະນາກອນ ແມ່ນໄດ້ມີຄວາມຮັບຮູ້ ແລະ ເຂົ້າໃຈ, ເຊີ່ງມັນສະແດງອອກດ້ວຍການເອົາໃຈໃສ່ ແລກປ່ຽນສົນທະນາ ຕໍ່ເນື້ອໃນບົດຮຽນທີ່ໄດ້ສະເໜີມານັ້ນ ດ້ວຍຄວາມເປັນເອກະພາບສູງ, ສາມາດກໍາແໜ້ນດ້ານເນື້ອໃນ ບັນດາບົດຮຽນຕ່າງໆ ທີ່ໄດ້ຮ່ຳຮຽນ ແລະ ສາມາດນຳໄປໝູນໃຊ້ ເຂົ້າໃນການປະຕິບັດໜ້າທີ່ວຽກງານຕົວຈິງຂອງຕົນ, ສາມາດຮັບປະກັນໄດ້ໃນການເປັນເສນາທິການໃຫ້ແກ່ສະພາປະຊາຊົນແຂວງ ໃຫ້ນັບມື້ນັບເຂັ້ມແຂງ ແລະ ເປັນມືອາຊີບຂື້ນໄປເລື້ອຍ. ກອງປະຊຸມຄັ້ງນີ້, ໄດ້ຮັບການສະໜັບສະໜູນໂດຍໂຄງການສ້າງຄວາມເຂັ້ມແຂງໃຫ້ແກ່ສະພາແຫ່ງຊາດ ແລະ ສະພາປະຊາຊົນຂັ້ນແຂວງ (STEPS).
(ຂ່າວ:ວິນັດ ສີສຸລາດ ພາບ: ຈັນທະຈອນ ໂກພິຈິດ)