(ສພຊ) – ຄະນະຜູ້ແທນສະພາແຫ່ງຊາດ ນຳໂດຍທ່ານ ດຣ. ບຸນລ້ອມ ແກ້ວບົວໂຮມ ຮອງປະທານກຳມາທິການວັດທະນະທຳ-ສັງຄົມ ໄດ້ເຂົ້າຮ່ວມກອງປະຊຸມເວທີປຶກສາຫາລືສະມາຊິກລັດຖະສະພາອາຊີ-ປາຊີຟິກ ກ່ຽວກັບສຸຂະພາບໂລກ ຄັ້ງທີ 8 (Eighth Meeting of the Asia-Pacific Parliamentarian Forum on Global Health) ໃນລະຫວ່າງວັນທີ 31 ສິງຫາ-12 ກັນຍາ 2024 ທີ່ນະຄອນຫຼວງປອກວິລາ (Port Vila) ສາທາລະນະລັດວານູອາຕູ (Vanuatu) ໂດຍການເປັນເຈົ້າພາບຂອງຄະນະກໍາມາທິການສາທາລະນະສຸກ ປະເທດວານູອາຕູ, ພາຍໃຕ້ການສະໜັບສະໜູນຂອງອົງການອະນາໄມໂລກ ປະຈໍາພາກພື້ນອາຊີ-ປາຊີຟິກຕາເວັນຕົກ ແລະ ລະຫວ່າງວັນທີ 4-6 ກັນຍາ ພາຍໃຕ້ຫົວຂໍ້ “ການເສີມສ້າງບຸກຄະລາກອນສາທາລະນະສຸກໃນລະດັບພາກພື້ນ ແລະ ສາກົນ”; ກອງປະຊຸມຄັ້ງນີ້ ມີສະມະຊິກລັດຖະສະພາ 32 ທ່ານ ທີ່ມາຈາກ 13 ປະເທດເຂົ້າຮ່ວມຄື: ລາຊະອານາຈັກກໍາປູເຈຍ, ໝູ່ເກາະກຸກ (Cook Islands), ສ.ເກົາຫຼີ, ສປປລາວ, ມາເລເຊຍ, ນີອູ (Niue), ຟີລິບປິນ, ຊາມົວ, ໝູ່ເກາະຊາໂລມົງ, ລາຊະອານາຈັກໄທ, ຕົງກາ, ວານູອາຕູ ແລະ ສສ.ຫວຽດນາມ.
ຈຸດປະສົງຂອງກອງປະຊຸມແມ່ນເພື່ອສະເໜີ ແລະ ຮັບເອົາຫຼັກການໃໝ່ກ່ຽວກັບຈຸດເລີ່ມຕົ້ນ ແລະ ແນວທາງທີ່ຈະເພີ່ມຄວາມເຂັ້ມແຂງໃຫ້ແກ່ນະໂຍບາຍສ້າງບຸກຄະລາກອນສາທາລະນະສຸກສໍາລັບອະນາຄົດ ໃຫ້ສອດຄ່ອງກັບພາກພື້ນອາຊີ -ປາຊີຟິກ; ແລກປ່ຽນປະສົບການຂອງບັນດາປະເທດສະມາຊິກເພື່ອສະໜັບສະໜູນນະໂຍບາຍສ້າງບຸກຄະລາກອນຜ່ານຫຼາຍຈຸດເລີ່ມຕົ້ນຂອງລະບົບເຊັ່ນ: ການອະນຸມັດງົບປະມານ, ການດຳເນີນໂດຍລັດຖະບານ, ພາກເອກະຊົນ ແລະ ການປັບ ປຸງກົດໝາຍ; ສະເໜີ ແລະ ແບ່ງປັນສິ່ງໃໝ່ໆເຂົ້າໃນການພັດທະນາວຽກງານສາທາລະນະສຸກ, ການສົ່ງເສີມພະນັກງານແພດທີ່ມີປະສິດທິພາບໃນການສົມທົບການປິ່ນປົວແບບພື້ນເມືອງກັບການແພດທີ່ທັນສະໄໝ ລວມທັງເຕັກໂນໂລຊີ, ແບບ ຢ່າງການເງິນສາທາລະນະສຸກ ແລະ ການເປັນຫຸ້ນສ່ວນ; ສ້າງຄວາມສາມັກຄີຄວາມຜູກພັນລະຫວ່າງສະມາຊິກລັດຖະສະພາພາກພື້ນ ແລະ ສ້າງຄວາມເປັນຫຸ້ນສ່ວນໃນລະດັບໂລກ, ພາກພື້ນ, ລະດັບຊາດ ແລະ ທ້ອງຖິ່ນ ເພື່ອສົ່ງເສີມຄວາມເຂັ້ມ ແຂງຂອງກອງປະຊຸມໂດຍທົ່ວໄປ, ຄວາມສາມາດໃນການມີສ່ວນຮ່ວມ ແລະ ມີອິດທິພົນຕໍ່ສະມາຊິກລັດຖະສະພາໃນລະ ດັບຄວາມສໍາຄັນຂອງລະບົບສາທາລະນະສຸກ ແລະ ຂະແໜງການອື່ນ.
ໃນກອງປະຊຸມ, ຄະນະຜູ້ແທນສະພາແຫ່ງຊາດລາວ ໄດ້ມີໂອກາດປຶກສາຫາລືບົດຮຽນ ແລະ ປະສົບການກ່ຽວກັບ ວິທີເພີ່ມບົດບາດຂອງຕົນໃນການໃຫ້ຄໍາໝັ້ນສັນຍາທາງການເມືອງ ແລະ ການຈັດຕັ້ງປະຕິບັດໃນຂົງເຂດສາທາລະນະສຸກ; ໃນຖານະເປັນເຈົ້າພາບຂອງກອງປະຊຸມ, ວານູອາຕູ ຍັງມີຈຸດປະສົງທີ່ຈະສະແດງຄວາມພະຍາຍາມໃນການແກ້ໄຂບັນຫາພະ ນັກງານ ແລະ ວິໄສທັດໃນອະນາຄົດ ເຊິ່ງປະກອບດ້ວຍ 5 ພາກດັ່ງນີ້:
ພາກທີ 1: ການສ້າງບຸກຄະລາກອນດ້ານສາທາລະນະສຸກຢູ່ພາກພື້ນອາຊີ-ປາຊີຟິກຕາເວັນຕົກໃນອະນາຄົດ ເຊິ່ງໄດ້ກ່າວເຖິງບຸກຄະລາກອນດ້ານສາທາລະນະສຸກທີ່ມີປະສິດທິພາບດີ ເປັນໃຈກາງຂອງລະບົບສາທາລະນະສຸກເປັນສິ່ງສຳຄັນສຳ ລັບການຈັດການດູແລສຸຂະພາບຢ່າງເປັນລະບົບຕໍ່ເນື່ອງ, ສາມາດຮັບມືກັບສິ່ງທ້າທາຍທີ່ອົງການອະນາໄມໂລກໃນພາກພື້ນກຳລັງປະເຊີນຢູ່ ລວມເຖິງພະຍາດບໍ່ຕິດຕໍ່, ບັນຫາຜູ້ອາຍຸສູງ, ປະຊາກອນທີ່ບໍ່ສາມາດເຂົ້າເຖິງການບໍລິການສຸກເສີນ ແລະ ເຫດການທີ່ເກີດຂຶ້ນໃໝ່, ການປ່ຽນແປງສະພາບດິນຟ້າອາກາດ, ການແຜ່ລະບາດຂອງໂຄວິດ-19 ຊີ້ໃຫ້ເຫັນຊ່ອງວ່າງຂອງລະບົບສຸຂະພາບຂອງພາກພື້ນ ໂດຍສະເພາະການຂາດແຄນບຸກຄະລາກອນສາທາລະນະສຸກ ທີ່ຍັງບໍ່ສາມາດຕອບສະໜອງໄດ້ກັບຄວາມຕ້ອງການ; ໃນພາກນີ້, ທ່ານ ຮສຈ. Martin Fletcher ຈາກອົງການອະນາໄມໂລກ ໄດ້ຂຶ້ນນຳສະເໜີຮູບແບບການໃຫ້ບໍລິການດ້ານສຸຂະພາບໃນຊຸມຊົນເຂດຫ່າງໄກສອກຫຼີກຂອງປະເທດອົດສະຕຣາລີ, ທ່ານ ດຣ. Lucas de Toca ຈາກອົງ ການອະນາໄມໂລກ ຂຶ້ນລາຍງານຕໍ່ກັບຫົວຂໍ້: ການຮັກສາສຸຂະພາບແບບພື້ນເມືອງຂອງປະຊາຊົນທີ່ຢູ່ຫ່າງໄກສອກຫຼີກຂອງປະເທດອົດສະຕຣາລີ, ທ່ານ ນາງ Yi Ling Chow ຈາກວິທະຍາໄລເຕັກນິກຂອງປະເທດ ສ.ເກົາຫຼີ ຂຶ້ນນຳສະເໜີວ່າດ້ວຍການນຳໃຊ້ລະ ບົບດິຈິຕອນເພື່ອການຕິດຕາມການຮັກສາສຸຂະພາບຂອງປະຊາຊົນໃນຊົນນະບົດ ແລະ ທ່ານ ດຣ. Zhao Hailei ຈາກອົງການອະ ນາໄມໂລກຂອງປະເທດຈີນ ຂຶ້ນລາຍງານກ່ຽວກັບການປິ່ນປົວໂດຍການປະສົມປະສານລະຫວ່າງການແພດພື້ນເມືອງ ແລະ ແພດສະ ໄໝໃໝ່.
ພາກທີ 2: ບຸກຄະລາກອນທີ່ມີປະສົບການສາທາລະນະສຸກ ແລະ ປະເດັນທີ່ເປັນບັນຫາ ໃນພາກນີ້ ໄດ້ນຳເອົາປະ ສົບການລະດັບພາກພື້ນຂອງຄວາມທ້າທາຍດ້ານບຸກຄະລາກອນສາທາລະນະສຸກໃນປັດຈຸບັນ ແລະ ສິ່ງທີ່ອາດຈະເກີດຂຶ້ນໃນອະນາຄົດ ນັບແຕ່ການສັບຊ້ອນບຸກຄະລາກອນ ໄປຈົນເຖິງຄວາມປອດໄພ ແລະ ຄວາມຫຼາກຫຼາຍຈາກການວິເຄາະພື້ນ ຖານບາງປະການຊີ້ໃຫ້ເຫັນວ່າ ການໃຫ້ການບໍລິການຢູ່ສະຖານທີ່ບໍລິການສຸຂະພາບ ລວມທັງຜູ້ຊ່ຽວຊານທີ່ເປັນສູນກາງນັ້ນ ຍັງມີຄວາມສາມາດບໍ່ທັນຕອບສະໜອງໄດ້ກັບຄວາມຕ້ອງການ ລວມໄປເຖິງຍຸດທະສາດການພັດທະນາຊັບພະຍາກອນມະ ນຸດເພື່ອຮັກສາ, ການປິ່ນປົວສຸຂະພາບ; ການດຳເນີນການຂອງພາກເອກະຊົນ ຍັງບໍ່ມີການຄວບຄຸມ ແລະ ມີນະໂຍບາຍທີ່ພຽງພໍເໝາະສົມສຳລັບການກະຈາຍທີ່ເທົ່າທຽມກັນໃນການໃຫ້ການບໍລິການ.
ພາກທີ 3: ການພັດທະນາ ແລະ ການວາງແຜນສໍາລັບອະນາຄົດ ໄດ້ນຳສະເໜີການກວດກາການດຳເນີນການຮູບແບບນະວັດຕະກຳ ແລະ ຍຸດທະສາດທີ່ອອກແບບມາເພື່ອຫຼຸດຜ່ອນກຳລັງບຸກຄະລາກອນ ກຽມພ້ອມສຳລັບອະນາຄົດ ເຊິ່ງ ລວມເຖິງການດູແລການສ້າງບຸກຄະລາກອນສາທາລະນະສຸກ, ສ້າງຄວາມໝັ້ນໃຈ ແລະ ການສະໜັບສະໜູນການແພດພື້ນ ເມືອງ ແລະ ແນະນຳການບໍລິການສຸຂະພາບດິຈິຕອນເພື່ອໃຫ້ບຸກຄະລາກອນສາທາລະນະສຸກ ມີການປະຕິບັດໃໝ່, ການບໍ ລິການນຳສົ່ງ, ການເຂົ້າເຖິງການບໍລິການສາທາລະນະສຸກເຂດຫ່າງໄກສອກຫຼີກ; ໃນພາກນີ້ ໄດ້ເປີດເວລາສົນທະນາປະສົບການຂອງແຕ່ລະປະເທດ ເຊິ່ງທ່ານ ດຣ. ບຸນລ້ອມ ແກ້ວບົວໂຮມ ໄດ້ມີການສະເໜີແລກປ່ຽນກ່ຽວກັບ 2 ​ຫົວຂໍ້: 1. ບັນຫາສິ່ງທ້າທາຍຢ່າງຕໍ່ເນື່ອງ ແລະ ບັນຫາທີ່ພົ້ນເດັ່ນໃນລະບົບຊັບພະຍາກອນມະນຸດຂອງສາທາລະນະສຸກພາຍໃນປະເທດລາວ ແລະ 2. ການປະດິດສ້າງ ແລະ ການວາງແຜນໃນອະນາຄົດລະບົບສາທາລະນະສຸກຂອງປະເທດລາວ.
ພາກທີ 4: ເສດຖະສາດການເມືອງ ແລະ ການນໍາໃຊ້ໜ້າທີ່ພິເສດຂອງສະມາຊິກລັດຖະສະພາ ໃນພາກນີ້ຄົ້ນຄວ້າ ເພື່ອລົງເລິກແນວຄວາມຄິດດ້ານເສດຖະສາດການເມືອງ, ລົງເລິກປະສົບການຂອງອຳນາດນິຕິບັນຍັດ, ການບໍລິຫານພາກລັດມີການປະສານງານກັນແນວໃດ ເພື່ອຮັກສາສະພາບທີ່ເປັນໃນນາມສະມາຊິກລັດຖະສະພາ ຈະປະຕິບັດພັນທະໜ້າທີ່ ແລະ ສ້າງປະສົບການຂອງຕົນໃນການກຳກັບດູແລການພັດທະນາຊັບພະຍາກອນມະນຸດດ້ານສຸຂະພາບຄືແນວໃດ ແລະ ໄດ້ມີການແລກປ່ຽນສົນທະນາ, ມີຫຼາກຫຼາຍແນວຄວາມຄິດຂອງບັນດາສະມາຊິກຂອງແຕ່ລະປະເທດ ນຳສະເໜີບົດຮຽນ, ປະ ສົບການກ່ຽວກັບຜົນໄດ້ຮັບ, ສິ່ງທ້າທາຍທີ່ໄດ້ເຮັດຜ່ານມາ ແລະ ການຮຽນຮູ້ຈາກປະສົບການຈາກພາກສ່ວນອື່ນ.
ພາກທີ 5: ຄະນະກໍາມະການລັດຖະສະພາວ່າດ້ວຍການຮັກສາ ແລະ ສັບຊ້ອນບຸກຄະລາກອນສາທາລະນະສຸກ ເຂດຫ່າງໄກສອກຫຼີກ ເປັນການລົງຢ້ຽມຢາມຖອດຖອນບົດຮຽນໃນພາກສະໜາມຕົວຈິງ, ໄດ້ໄປຢ້ຽມຢາມສະຖານທີ່ບໍລິການສາທາລະນະສຸກໃນຊຸມຊົນ ເປັນຕົ້ນສຸກສາລາ, ການໃຫ້ການບໍລິການເຄື່ອນທີ່ໃນແຂວງເຊຟາ (Shefa) ເປັນເວລາ 1 ວັນ; ການລົງຢ້ຽມຢາມຄັ້ງນີ້ ສະແດງໃຫ້ເຫັນເຖິງຄວາມພະຍາຍາມຂອງປະເທດວານູອາຕູ ເພື່ອສ້າງຄວາມເຂັ້ມແຂງໃນການໃຫ້ບໍລິການສຸ ຂະພາບຂອງລະບົບສາທາລະນະສຸກຂັ້ນພື້ນຖານ ແລະ ສົ່ງເສີມການເຂົ້າເຖິງການດູແລສຸຂະພາບ, ການຄຸ້ມຄອງ ແລະ ການສະໜອງວຽກງານທາງການແພດໃຫ້ແກ່ປະຊາຊົນໃນເຂດຫ່າງໄກສອກຫຼີກ. ຜູ້ແທນກອງປະຊຸມໄດ້ມີໂອກາດໄປຢ້ຽມຢາມ 3 ຈຸດເຊັ່ນ: 1) ສຸກສາລາຂອງເມືອງ Saupia ຕັ້ງຢູ່ບ້ານ Paunagisu ພາກເໜືອຂອງປະເທດ; 2) ເຮືອ HELPR-1 ສ້າງເປັນເຮືອໃຫ້ການບໍລິການສາທາລະນະສຸກຂັ້ນເພື່ອຖານ ເປັນຕົ້ນການໂຄສະນາສຸຂະສຶກສາ, ການໃຫ້ວັກຊິນ, ການແນະນຳອື່ນ ເຊິ່ງເຄື່ອນທີ່ໄປໃຫ້ບໍລິການບັນດາໝູ່ເກາະຕ່າງໆໃນກໍລະນີປົກກະຕິ, ເຫດການສຸກເສີນ; 3) ສຸກສາລາຂອງເກາະເລເລປາ (Lelepa Island Dispensary) ທາງທິດຕາເວັນຕົກສ່ຽງເໜືອຂອງປະເທດ.
ກອງປະຊຸມເວທີປຶກສາຫາລືສະມາຊິກລັດຖະສະພາອາຊີ-ປາຊີຟິກ ກ່ຽວກັບສຸຂະພາບໂລກ ຄັ້ງທີ 8 ໄດ້ຕົກລົງເປັນເອ ກະພາບອອກຖະແຫຼງການ 12 ຂໍ້ ເພື່ອຮຽກຮ້ອງໃຫ້ລັດຖະສະພາແຕ່ລະປະເທດ ຈົ່ງປະກອບສ່ວນຢ່າງຕັ້ງໜ້າເຂົ້າໃນປະເດັນຕ່າງໆດັ່ງນີ້:
1) ເຫັນດີຮັບເອົາການພົບປະຫາລືຂອງສະມາຊິກລັດຖະສະພາ ການມີສ່ວນຮ່ວມໃນນາມບຸກຄົນ ແລະ ສ່ວນລວມໃນການເສີມສ້າງກຳລັງແຮງງານດ້ານສຸຂະພາບ ແລະ ສົ່ງເສີມການມີວຽກເຮັດງານທຳຂອງບຸກຄະລາກອນສາທາ ໃຫ້ມີຄຸນນະພາບສູງຂຶ້ນຈາກການນຳສະເໜີຂອງປະເທດເຈົ້າພາບ;
2) ໃຫ້ບັນດາສະມາຊິກລັດຖະສະພາແຕ່ລະປະເທດ ຮັບຮູ້ໃນການປຶກສາຫາລື ແລະ ເສີມສ້າງການເປັນໜຶ່ງດຽວຂອງລັດຖະສະພາອາຊີ-ປາຊີຟິກ;
3) ສົ່ງເສີມນະວັດຕະກຳໃໝ່, ແນວຄວາມຄິດທີ່ເປັນປະໂຫຍດ ແລະ ໃຫ້ເຫັນຄວາມສຳຄັນຂອງນະໂຍບາຍແຜນງານ-ແຜນການ ໂດຍຫຼັກການທາງດ້ານວິທະຍາສາດສຳລັບລະບົບສຸຂະພາບ;
4) ການທຳຄວາມເຂົ້າໃຈວ່າດ້ວຍການບໍລິການທາງດ້ານສຸຂະພາບຂອງແຕ່ລະປະເທດ ລ້ວນແຕ່ໄດ້ຮັບການທ້າທາຍຂອງບຸກຄະລາກອນທາງການແພດ ເຖິງແມ່ນວ່າປະສົບການຂອງແຕ່ລະປະເທດທີ່ເໝືອນກັນກໍຕາມ;
5) ເອົາໃຈໃສ່ຕໍ່ຄວາມສຳຄັນຂອງບຸກຄະລາກອນດ້ານສາທາລະນະສຸກ ໃນຖານະທີ່ເປັນອົງປະກອບສຳຄັນຂອງລະບົບຮັກສາສຸຂະ ພາບ;
6) ເອົາໃຈໃສ່ໃຫ້ຄວາມສຳຄັນຕໍ່ການປະກັນສຸຂະພາບໃນທົ່ວໜ້າ ແລະ ຄວາມໝັ້ນຄົງດ້ານສຸຂະພາບ ເພື່ອໃຫ້ບັນລຸເປົ້າ ໝາຍຂອງອົງການອະນາໄມໂລກ;
7) ເອົາໃຈໃສ່ຕໍ່ຊຸມຊົນທີ່ມີຄວາມສ່ຽງ ແລະ ກຸ່ມເປົ້າໝາຍທີ່ເປາະບາງ ທີ່ໄດ້ຮັບຜົນກະທົບຈາກໄພທຳມະຊາດ, ຜູ້ທີ່ທຸກຍາກ, ແມ່ ຍິງ, ເດັກນ້ອຍ, ຄົນພິການ ແລະ ຜູ້ອາຍຸສູງ ຕະຫຼອດເຖິງຜູ້ອົບພະຍົບ;
8.) ໃຫ້ຄວາມສຳຄັນຕໍ່ລະບົບສຸຂະພາບທີ່ຊັບຊ້ອນ ແລະ ການອ່ອນແອທາງດ້ານສຸຂະພາບຂອງປະຊາຊົນ;
9) ໃຫ້ຄວາມສຳຄັນຕໍ່ກັບການສ້າງບຸກຄະລາກອນດ້ານວຽກງານສາທາ ຖືວ່າເປັນການລົງທຶນໃສ່ການພັດທະນາປະເທດຊາດ;
10) ເນັ້ນຢ້ຳເຖິງຄວາມຈຳເປັນໃນການເປັນຫຸ້ນສ່ວນພາຍໃນພາກພື້ນ ແລະ ສາກົນ ຕະຫຼອດເຖິງພາຍໃນປະເທດ ແລະ ທ້ອງຖິ່ນ ເພື່ອສ້າງຂີດຄວາມສາມາດຂອງພາກລັດ ແລະ ພາກເອກະຊົນ;
11) ສະແດງຄວາມຂອບໃຈລັດຖະບານວານູອາຕູ ໂດຍສະເພາະກະຊວງສາທາລະນະສຸກ ທີ່ໄດ້ເປັນເຈົ້າພາບຈັດກອງປະຊຸມ ຄັ້ງທີ 8 ເຊິ່ງໄດ້ສະແດງໃຫ້ເຫັນເຖິງຄວາມເປັນຜູ້ນຳລະດັບຊາດ ແລະ ລະດັບພູມມີພາກ ໃນວຽກງານບຸກຄະລາກອນດ້ານສຸຂະ ພາບ ທີ່ໄດ້ຈັດຄວາມສຳຄັນຂອງລະບົບສຸຂະພາບທີ່ກ້າວໜ້າ;
12) ຮັບຮູ້ເຖິງຄວາມເປັນຜູ້ນຳທາງດ້ານເຕັກນິກຂອງອົງການຮັກສາສຸຂະພາບທີ່ໄດ້ເຮັດໜ້າທີ່ໆດີໃນລະດັບພາກພື້ນ.
​ ການເຂົ້າຮ່ວມກອງປະຊຸມຂອງຄະນະຜູ້ແທນສະພາແຫ່ງຊາດຄັ້ງນີ້ ຍັງໄດ້ຮຽນຮູ້, ແລກປ່ຽນ ແລະ ຖອດຖອນບົດຮຽນກ່ຽວກັບວຽກງານການເສີມສ້າງຄວາມເຂັ້ມແຂງໃຫ້ແກ່ການກຽມຄວາມພ້ອມ ແລະ ຄວາມໝັ້ນຄົງຂອງລະບົບສາທາລະນະສຸກໃນອະນາຄົດ ເພື່ອຮັບມືກັບການແຜ່ລະບາດຂອງພະຍາດຕ່າງໆໃນອະນາຄົດ ລວມທັງວຽກງານປະກັນສຸຂະພາບແຫ່ງຊາດ ແນໃສ່ຮັບປະກັນໃຫ້ປະຊາ ຊົນສາມາດເຂົ້າເຖິງການຮັກສາສຸຂະພາບໄດ້ຢ່າງທົ່ວເຖິງ ແລະ ໄດ້ສ້າງສາຍສໍາພັນ, ຄວາມສາມັກຄີ, ມິດຕະພາບອັນດີ ກັບບັນດາສະມາຊິກລັດຖະສະພາຈາກປະເທດຕ່າງໆ; ພ້ອມກັນນີ້, ຍັງເຮັດໃຫ້ຖານະບົດບາດຂອງສະພາແຫ່ງຊາດ ແຫ່ງ ສປປລາວ ຖືກຍົກສູງພົ້ນເດັ່ນຂຶ້ນໃນພາກພື້ນອາຊີ-ປາຊີຟິກ ເນື່ອງຈາກຄະນະຜູ້ແທນລາວໄດ້ມີການປະກອບຄໍາຄິດເຫັນ, ສົນທະນາແລກປ່ຽນໃນກອງປະຊຸມຢ່າງຫ້າວຫັນ. ສັງລວມແລ້ວ, ການເຂົ້າຮ່ວມກອງປະຊຸມສຸຂະພາບໂລກໃນຄັ້ງນີ້ ໄດ້ບັນລຸຕາມຈຸດປະສົງ ແລະ ລະດັບຄາດໝາຍ ອັນເປັນການປະກອບສ່ວນຢ່າງຕັ້ງໜ້າຂອງສະພາແຫ່ງຊາດລາວ ໃນການສົ່ງເສີມການຮ່ວມມືກັບບັນດາປະເທດທີ່ເປັນພາຄີຂອງອົງ ການອະນາໄມໂລກໃນພາກພື້ນອາຊີ-ປາຊີຟິກຕາເວັນຕົກ ກ່ຽວກັບບັນຫາສາທາລະນະສຸກ ທັງແລກປ່ຽນບົດຮຽນປະສົບການຂອງແຕ່ລະປະເທດໄດ້ເປັນຢ່າງດີ.
​(ກຳມາທິການວັດທະນະທຳ-ສັງຄົມ)