(ສພຊ) ໃນວັນທີ 30 ສິງຫາ 2022, ຄະນະຜູ້ແທນສະພາແຫ່ງຊາດ ນໍາໂດຍທ່ານ ນາງ ທຸມມາລີ ວົງພະຈັນ ຄະນະປະຈໍາສະພາແຫ່ງຊາດ, ປະທານກຳມາທິການວັດທະນະທຳ-ສັງຄົມ ພ້ອມດ້ວຍ ສະມາຊິກສະພາແຫ່ງຊາດປະຈໍາເຂດເລືອກຕັ້ງທີ 1 ນະຄອນຫຼວງວຽງຈັນ, ຄະນະກົມ, ຄະນະພະແນກ ແລະ ພະນັກງານວິຊາການຈໍານວນໜຶ່ງຂອງສະພາແຫ່ງຊາດໄດ້ ເຂົ້າຮ່ວມກອງປະຊຸມຄະນະປະສານງານວຽກງານສະມາຊິກລັດຖະສະພາເພດຍິງ (WAIPA) ໃນຮູບແບບກອງປະຊຸມທາງໄກ ໂດຍການເປັນປະທານຂອງທ່ານ Hon. Kittisangahakbindit Khuon Sudary ຮອງປະທານສະພາແຫ່ງຊາດ ແຫ່ງຣາຊະອານາຈັກກໍາປູເຈຍ, ປະທານ ສະມາຊິກລັດຖະສະພາເພດຍິງ (WAIPA). ກອງປະຊຸມຄັ້ງນີ້ ມີ ທ່ານເລຂາທິການໃຫຍ່ໄອປາ, ບັນດາສະມາຊິກສະພາແຫ່ງຊາດຈາກບັນດາລັດຖະສະພາທີ່ເປັນສະມາຊິກໄອປາ, ຜູ້ຕາງໜ້າຈາກອົງການຜົນກະທົບຂອງສົງຄາມຕໍ່ຄວາມກ້າວໜ້າຂອງແມ່ຍິງ ໃນວາລະສັນຕິພາບ ແລະ ຄວາມປອດໄພ (AVI), ຜູ້ຕາງໜ້າຈາກສູນລັດຖະສະພາອາຊີ PCAsia ແລະ ກອງເລຂາໄອປາ.
ຈຸດປະສົງຂອງກອງປະຊຸມຄັ້ງນີ້ ແມ່ນເພື່ອຮັບຟັງການນໍາສະເໜີບົດກ່ຽວກັບຜົນກະທົບຂອງພະຍາດໂຄວິດ-19 ຕໍ່ສິດທິ ແລະ ສຸຂະພາບຂອງແມ່ຍິງ ແລະ ປືກສາຫາລືບົດບາດຂອງລັດຖະສະພາໃນການສົ່ງເສີມຄວາມສະເໝີພາບຍິງ-ຊາຍໃນການໂຕ້ຕອບ ແລະ ແກ້ໄຂການແຜ່ລະບາດຂອງພະຍາດໂຄວິດ-19; ຮັບຟັງການສະເໜີບົດກ່ຽວກັບຜົນກະທົບຈາກຂໍ້ຂັດແຍ່ງ ແລະ ສົງຄາມ ຕໍ່ວາລະການສົ່ງເສີມແມ່ຍິງ, ສັນຕິພາບ ແລະ ຄວາມໝັ້ນຄົງ, ພ້ອມທັງປືກສາຫາລືກ່ຽວກັບບົດບາດຂອງລັດຖະສະພາໃນວາລະສົ່ງເສີມແມ່ຍິງ, ສັນຕິພາບ ແລະ ຄວາມໝັ້ນຄົງ.

ພ້ອມກັນນັ້ນ, ຜູ້ແທນກອງປະຊຸມ ໄດ້ປຶກສາຫາລື ແລະ ແລກປຽນຂໍ້ມູນ-ຂ່າວສານ ເຊິ່ງກັນ ແລະ ກັນ ກ່ຽວກັບການພັດທະນາແນວທາງນະວັດຕະກໍາໄປສູ່ການຟື້ນຕົວແບບຍືນຍົງ ໂດຍຜ່ານການສ້າງຄວາມເຂັ້ມແຂງໃຫ້ແກ່ແມ່ຍິງ ແລະ ເດັກຍິງ, ຍົກໃຫ້ເຫັນເຖິງສິ່ງທ້າທາຍທີ່ເກີດຂຶ້ນຈາກ​ຜົນ​ກະທົບ​ຈາກ​ການ​ແຜ່​ລະບາດ​ຂອງ​ພະຍາດ​ໂຄ​ວິດ-19 ຕໍ່​ຊີວິດ​ການ​ເປັນ​ຢູ່​ຂອງ​ແມ່ຍິງ ​ແລະ ​ເດັກ​ຍິງ, ຕີ​ລາຄາມາດຕະ​ການ​ໂຕ້ຕອບ ​ແລະ ກົນ​ໄກ​ຂອງ​ພາກ​ພື້ນ, ແນວທາງສືບ​ຕໍ່​ຜັນ​ຂະຫຍາຍ​ວາລະການສົ່ງເສີມ​​ແມ່ຍິງ, ສັນຕິພາບ, ​ແລະ ຄວາມ​ໝັ້ນຄົງ ຕາມມະຕິ​ເລກທີ 1325 ເຊິ່ງ​ໄດ້​ມີການລິ​ເລີ່​ມ​ໂດຍສະພາ​ຄວາມ​ໝັ້ນຄົງ​ສະຫະ​ປະຊາ​ຊາດ ​ໃນ​ປີ 2000 ​​ແລະ ​ເລີ່​ມດຳ​ເນີນ​ບັນດາ​ນະ​ໂຍບາຍ​ເພື່ອ​ປະຕິບັດ​ຖະ​ແຫຼ​ງການ​ຮ່ວມ​ກ່ຽວ​ກັບວາລະ​ການ​ສົ່ງເສີມ​ແມ່ຍິງ, ສັນຕິພາບ, ຄວາມ​ໝັ້ນຄົງ​ໃນ​ອາ​ຊຽນ, ຄົ້ນ​ຄວ້າ​ວິທີ​​ການ​ມີສ່ວນຮ່ວມ​ຂອງ​ແມ່ຍິງ​ຢ່າງ​ສະ​ເໝີ​ພາບ​ໃນ​ດ້ານ​ການ​ເມືອງ ລວມທັງ​ການ​ເພີ່ມ​ຈຳນວນ​ສະມາຊິກ​ສະພາ​ເພດຍິງ​​ເຂົ້າ​ຮ່ວມ​ກອງ​ປະຊຸມສະມັດຊາ​ໃຫຍ່ AIPA, ເພື່ອຮັບປະກັນໃຫ້ແກ່ການດຳເນີນກອງປະຊຸມລັດຖະສະພາເພດຍິງ (WAIPA) ເຊິ່ງຈະຈັດຂຶ້ນໃນກອງປະຊຸມສະມັດຊາໃຫຍ່ໄອປາ ຄັ້ງທີ 43 ໃນເດືອນພະຈິກ 2022 ນີ້.