(ສພຊ) ໃນວັນທີ 25 ສິງຫາ 2021 ທີ່ຫ້ອງປະຊຸມຄະນະປະຈຳສະພາແຫ່ງຊາດ ຫລັງໃໝ່, ທ່ານ ປອ. ໄຊສົມພອນ ພົມວິຫານ ປະທານສະພາແຫ່ງຊາດ ພ້ອມດ້ວຍຄະນະຜູ້ແທນຂັ້ນສູງຂອງສະພາແຫ່ງຊາດລາວ ໄດ້ສຳເລັດການເຂົ້າຮ່ວມກອງປະຊຸມສະມັດຊາລັດຖະສະພາລະຫວ່າງຊາດອາຊຽນ ຄັ້ງທີ 42 ແບບທາງໄກ ຈັດໂດຍສະພານິຕິບັນຍັດ ແຫ່ງ ບຣູໄນ ດາຣູຊາລາມ. ເຊິ່ງກອງປະຊຸມໄດ້ດຳເນີນມາແຕ່ວັນທີ 23-25 ສິງຫາ 2021 ພາຍໃຕ້ການເປັນປະທານຂອງທ່ານ ເປຮິນ ດາໂຕະ ຮາຈິ ອາດູນ ລາມັນ ຕາອິບ ປະທານສະພານິຕິບັນຍັດ ແຫ່ງ ບຣູໄນ ດາຣູຊາລາມ ມປະທານກອງປະຊຸມໃຫຍ່ໄອປາ ຄັ້ງທີ 42.

ກອງປະຊຸມໃຫຍ່ປະຈຳປີຄັ້ງນີ້, ໄດ້ສຸມໃສ່ຄົ້ນຄວ້າປຶກສາຫາລື ແລກປ່ຽນຄວາມຄິດຄວາມເຫັນ ໃນຫົວຂໍ້: “ເຊື່ອມສານການຮ່ວມມືລັດຖະສະພາ ໃນການນຳໃຊ້ລະບົບດິຈິຕອນຢ່າງເທົ່າທຽມກັນ ເພື່ອກ້າວສູ່ປະຊາຄົມອາຊຽນ 2025”. ໃນມື້ນີ້, ຜູ້ແທນກອງປະຊຸມໄດ້ລົງເລິກຄົ້ນຄວ້າ ແລະ ປະກອບຄຳເຫັນຕໍ່ບັນດາຮ່າງມະຕິທີ່ສະເໜີໃນກອງປະຊຸມຄະນະກຳມາທິການຕ່າງໆຂອງໄອປາຄື: ກອງປະຊຸມຄະນະສະມາຊິກລັດຖະສະພາເພດຍິງ, ກຳມາທິການການເມືອງ, ກຳມາທິການເສດຖະກິດ, ກຳມາທິການສັງຄົມ ແລະ ກຳມາທິການວຽກງານພາຍໃນຂອງໄອປາ ເຊິ່ງໄດ້ພິຈາລະນາ ແລະ ຮັບຮອງຮ່າງມະຕິທັງໝົດ ຈຳນວນ 28 ສະບັບ ທີ່ປີ່ນອ້ອມຫົວຂໍ້ຂອງກອງປະຊຸມ ໂດຍສະເພາະແມ່ນ ການສົ່ງເສີມຄວາມສາມາດທາງດ້ານເສດຖະກິດຂອງແມ່ຍິງ, ຄວາມໝັ້ນຄົງທາງໄຊເບີ ແລະ ການປົກປ້ອງຂໍ້ມູນຂ່າວສານ, ຄວາມໝັ້້ນຄົງຂອງມະນຸດ, ການທູດລັດຖະສະພາ, ການສົ່ງເສີມລະບົບເສດຖະກິດຂະໜາດນ້ອຍຂະໜາດກາງ, ການຟື້ນຟູເສດຖະກິດຫລັງໂຄວິດ-19, ການຫລຸດຜ່ອນຜົນກະທົບຈາກການປ່ຽນແປງດິນຟ້າອາກາດ, ການຫັນເປົ້າໝາຍການພັດທະນາແບບຍືນຍົງລົງສູ່ທ້ອງຖີ່ນ ແລະ ສົ່ງເສີມການມີສ່ວນຮ່ວມໃນການເລືອກຕັ້ງໃຫ້ຫລາຍຂຶ້ນດ້ວຍລະບົບດີຈິຕອນ. ພ້ອມກັນນີ້, ກອງປະຊຸມຍັງໄດ້ມີການປັບປຸງທໍາມະນູນໄອປາ, ມອບລາງວັນກຽດຕິຄຸນໃຫ້ແກ່ຜູ້ທີ່ມີຜົນງານດີເດັ່ນ 2 ທ່ານ ທີ່ໄດ້ປະກອບສ່ວນເຂົ້າໃນວຽກງານໄອປາ ຈາກລັດຖະສະພາກຳປູເຈຍ ແລະອິນໂດເນເຊຍ ແລະ ເຫັນດີຮັບຮອງເອົາ ປະເທດອູແກຣນ, ຈໍເຈຍ ແລະ ປາກິດສະຖານ ເຂົ້າເປັນປະເທດສັງເກດການໄອປາ.

ໃນຕອນທ້າຍຂອງກອງປະຊຸມຫົວໜ້າຄະນະຜູ້ແທນຂອງແຕ່ລະປະເທດສະມາຊິກໄອປາ ໄດ້ຮັບຮອງ ແລະ ລົງນາມໃນຖະແຫລງການຮ່ວມກອງປະຊຸມໄອປາ ຄັ້ງທີ 42 ພ້ອມທັງເຫັນດີຮັບຮອງເອົາສະພາແຫ່ງຊາດ ແຫ່ງລາຊະອານາຈັກກຳປູເຈຍ ເປັນປະທານໄອປາ ແລະ ເປັນເຈົ້າພາບຈັດກອງປະຊຸມໃຫຍ່ໄອປາ ຄັ້ງທີ 43 ໃນປີ 2022.