(ສພຊ) – ກອງປະຊຸມທາບທາມຮ່າງກົດໝາຍ 3 ສະບັບ ໄດ້ຈັດຂຶ້ນລະຫວ່າງວັນທີ 04-05 ເມສາ 2024 ທີ່ ແຂວງອຸດົມໄຊ ໂດຍການເປັນປະທານຮ່ວມຂອງທ່ານ ຮສ. ປອ. ລິນຄໍາ ດວງສະຫວັນ ກໍາມະການສໍາຮອງສູນກາງພັກ, ກຳມະການຄະນະປະຈໍາ, ເລຂາທິການສະພາແຫ່ງຊາດ ແລະ ທ່ານ ຄໍາດີ ວົງລ້ອມ ຮອງເລຂາພັກແຂວງ, ປະທານຄະນະສະມາຊິກສະພາແຫ່ງຊາດ (ສສຊ) ປະຈຳເຂດເລືອກຕັ້ງທີ 4, ປະທານສະພາປະຊາຊົນແຂວງ (ສພຂ) ອຸດົມໄຊ; ມີທ່ານຮອງເລຂາທິການສະພາແຫ່ງຊາດ, ທ່ານຮອງເຈົ້າແຂວງ, ທ່ານຮອງປະທານ ສພຂ, ບັນດາທ່ານ ສສຊ ປະຈຳເຂດ ເລືອກ ຕັ້ງທີ 4, ທ່ານເຈົ້າເມືອງໆໄຊ, ບັນດາທ່ານປະທານຄະນະກໍາມະການ ແລະ ເລຂາທິການ ສພຂ, ບັນດາທ່ານຫົວໜ້າ-ຮອງຫົວໜ້າພະແນກການ ແລະ ອົງການອ້ອມຂ້າງແຂວງ, ອະດີດການນໍາອາວຸໂສບໍານານ, ກອງເລຂາຊ່ວຍວຽກຈາກສູນກາງ ແລະ ທ້ອງຖິ່ນ ເຂົ້າຮ່ວມລວມທັງໝົດ 86 ທ່ານ, ຍິງ 28 ທ່ານ.

ບັນດາທ່ານຜູ້ແທນກອງປະຊຸມ ໄດ້ເປັນເຈົ້າການຄົ້ນຄວ້າ ແລະ ປະກອບຄໍາເຫັນໃສ່ແຕ່ລະຮ່າງກົດໝາຍຢ່າງມີຈຸດສຸມ, ກົງໄປກົງມາ ຕາມຄໍາຖາມເຈາະຈີ້ມ ແລະ ບາງບັນຫາປິ່ນອ້ອມ ໂດຍໄດ້ຍົກໃຫ້ເຫັນການຈັດຕັ້ງປະຕິບັດຕົວຈິງ; ພ້ອມກັນນັ້ນ, ກໍມີຂໍ້ສະເໜີໃຫ້ຄະນະຮັບຜິດຊອບ ນໍາໄປຄົ້ນຄວ້າ, ພິຈາລະນາ ແລະ ປັບປຸງກົດໝາຍ 3 ສະບັບດັ່ງກ່າວໃຫ້ສອດຄ່ອງກັບເງື່ອນໄຂການຂະຫຍາຍຕົວຂອງເສດຖະກິດ-ສັງຄົມ ແລະ ສະພາບຕົວຈິງຂອງປະເທດເຮົາ ເຊິ່ງຜູ້ເຂົ້າຮ່ວມໄດ້ປະກອບຄໍາເຫັນໃສ່ 3 ຮ່າງກົດໝາຍ ທັງໝົດ 47 ເທື່ອທ່ານ ຍິງ 17 ເທື່ອທ່ານ ໃນນັ້ນ, ຮ່າງກົດໝາຍວ່າດ້ວຍສະພາແຫ່ງຊາດ 14 ເທື່ອທ່ານ ຍິງ 4 ເທື່ອທ່ານ ຕໍ່ 12 ມາດຕາ, ຮ່າງກົດໝາຍວ່າດ້ວຍສະພາປະຊາຊົນຂັ້ນແຂວງ 21 ເທື່ອທ່ານ ຍິງ 9 ເທື່ອທ່ານ ຕໍ່ 17 ມາດຕາ ແລະ ຮ່າງກົດໝາຍວ່າດ້ວຍການເລືອກຕັ້ງສະມາຊິກສະພາແຫ່ງຊາດ ແລະ ສະພາປະຊາຊົນຂັ້ນແຂວງ 12 ເທື່ອທ່ານ ຍິງ 4 ເທື່ອທ່ານ ຕໍ່ 13 ມາດຕາ. ຕອນທ້າຍກອງປະຊຸມ, ທ່ານ ຮສ. ປອ. ລິນ ຄໍາ ດວງສະ ຫວັນ ໄດ້ມອບຄອມພິວເຕີຕັ້ງໂຕະ 2 ຊຸດ ໃຫ້ສະພາປະຊາຊົນແຂວງອຸດົມໄຊ ເພື່ອໝູນໃຊ້ເຂົ້າໃນວຽກງານ ໃຫ້ມີປະສິດທິຜົນຍິ່ງໆຂຶ້ນໄປ.

ໃນໂອກາດດຽວກັນນີ້, ທ່ານ ຮສ. ປອ. ລິນຄໍາ ດວງສະຫວັນ ພ້ອມດ້ວຍຄະນະ ໄດ້ເຂົ້າພົບທ່ານ ປອ. ບຸນຄົງ ຫຼ້າຈຽມພອນ ກໍາມະການສໍາຮອງສູນກາງພັກ, ເລຂາຄະນະບໍລິຫານງານພັກແຂວງ, ເຈົ້າແຂວງໆອຸດົມໄຊ ເພື່ອແຈ້ງຈຸດ ປະສົງຂອງການລົງມາເຄື່ອນໄຫວວຽກງານໃນຄັ້ງນີ້ ແລະ ໄດ້ຮັບຟັງການລາຍງານໂດຍຫຍໍ້ສະພາບການພັດທະນາເສດ ຖະກິດ-ສັງຄົມຂອງແຂວງ.