(ສພຊ) ເພື່ອເປັນການເຜີຍແຜ່ສົນທິສັນຍາ ກໍຄືກົດໝາຍສາກົນ ທີ່ ສປປລາວ ເຂົ້າເປັນພາຄີ ຕາມຂອບເຂດສິດ ແລະ ພາລະບົດບາດຂອງສະພາແຫ່ງຊາດ ໃຫ້ແກ່ສະມາຊິກສະພາແຫ່ງຊາດ ແລະ ສະມາຊິກສະພາປະຊາຊົນຂັ້ນແຂວງ ໄດ້ຮັບຊາບ ແລະ ມີສ່ວນຮ່ວມໃນການຊຸກຍູ້ ແລະ ຕິດຕາມວຽກງານດັ່ງກ່າວ ທັງເພື່ອໃຫ້ສະມາຊິກສະພາແຫ່ງຊາດ ແລະ ສະມາຊິກສະພາປະຊາຊົນແຂວງ ໄດ້ຮັບຮູ້ ແລະ ເຂົ້າໃຈກ່ຽວກັບການເຄື່ອນໄຫວວຽກງານສິດທິມະນຸດຂອງ ສປປລາວ ໃນເວທີພາກພື້ນ ແລະ ສາກົນ.
ກອງປະຊຸມສຳມະນາເຜີຍແຜ່ສົນທິສັນຍາສາກົນດ້ານສິດທິມະນຸດທີ່ ສປປລາວ ເຂົ້າເປັນພາຄີ ໃຫ້ແກ່ສະມາຊິກສະພາແຫ່ງຊາດ ແລະ ສະມາຊິກສະພາປະຊາຊົນແຂວງ 4 ແຂວງພາກເໜືອ ຄື: ຫຼວງພະບາງ, ໄຊຍະບູລີ, ຫົວພັນ ແລະ ຊຽງຂວາງ ໄດ້ຈັດຂຶ້ນໃນວັນທີ 26 ກັນຍາ 2022 ທີ່ແຂວງຫຼວງພະບາງ ໂດຍການເປັນປະທານຮ່ວມຂອງທ່ານ ນາງ ວັນດີ ບຸດທະສະວົງ ຮອງປະທານກໍາມາທິການການຕ່າງປະເທດ, ສະມາຊິກສະພາແຫ່ງຊາດປະຈຳເຂດເລືອກຕັ້ງທີ 6 ແຂວງຫຼວງພະບາງ ແລະ ທ່ານ ວົງສະຫວັນ ເທບພະຈັນ ປະທານຄະນະສະມາຊິກສະພາແຫ່ງຊາດປະຈຳເຂດເລືອກຕັ້ງທີ 6 ແຂວງຫຼວງພະບາງ, ປະທານສະພາປະຊາຊົນແຂວງຫຼວງພະບາງ; ເຂົ້າຮ່ວມມີບັນດາທ່ານສະມາຊິກສະພາແຫ່ງຊາດປະຈຳເຂດເລືອກຕັ້ງ 4 ແຂວງພາກເໜືອ, ບັນດາວິທະຍາກອນຈາກກຳມາທິການການຕ່າງປະເທດ, ກະຊວງການຕ່າງປະເທດ ແລະ ກະຊວງພາຍໃນ, ບັນດາທ່ານຄະນະກົມຂອງກຳມາທິການການຕ່າງປະເທດ ສະພາແຫ່ງຊາດ ພ້ອມດ້ວຍຄະນະພະແນກ, ວິຊາການກ່ຽວຂ້ອງຂອງສະພາປະຊາຊົນແຂວງ 4 ແຂວງ ແລະ ສະພາແຫ່ງຊາດ.
ກອງປະຊຸມໄດ້ຮັບຟັງ ແລະ ສຸມໃສ່ສົນທະນາແລກປ່ຽນບົດຮຽນ ຢ່າງກົງໄປກົງມາ ກ່ຽວກັບຄວາມຮູ້ພື້ນຖານວຽກງານສິດທິມະນຸດ ແລະ ການເຄື່ອນໄຫວວຽກງານສິດທິມະນຸດ ແລະ ການເຄື່ອນໄຫວວຽກງານສິດທິມະນຸດຂອງ ສປປລາວ ໃນເວທີພາກພື້ນ ແລະ ສາກົນ, ວຽກງານຄຸ້ມຄອງການເຄື່ອນໄຫວສາສະໜາ ຢູ່ ສປປລາວ, ກົດໝາຍວ່າດ້ວຍສົນທິສັນຍາ ແລະ ສັນຍາສາກົນ.
ກອງປະຊຸມຄັ້ງນີ້ ຈະໄດ້ດຳເນີນໄປເປັນເວລາ 2 ວັນເຕັມ ເຖິງວັນທີ 27 ກັນຍາ ຈຶ່ງຈະສຳເລັດ ເຊິ່ງຈະໄດ້ສືບຕໍ່ຮັບຟັງ ແລະ ສົນທະນາກ່ຽວກັບພາລະບົດບາດຂອງສະພາແຫ່ງຊາດ ຕໍ່ການພິຈາລະນາໃຫ້ສັດຕະຍາບັນແກ່ສົນທິສັນຍາສາກົນດ້ານສິດທິມະນຸດ, ການເຂົ້າຮ່ວມຂະບວນການທົບທວນປະຈຳໄລຍະດ້ານສິດທິມະນຸດ (UPR) ຮອບວຽນທີ 3 ແລະ ຫົວຂໍ້ອື່ນໆອີກຈຳນວນໜຶ່ງ.
ການສຳມະນາຄັ້ງນີ້ ແມ່ນໄດ້ຮັບການສະໜັບສະໜູນທຶນ ໂດຍແຜນງານການມີສ່ວນຮ່ວມຂອງປະຊາຊົນຕໍ່ວຽກງານການປົກຄອງທີ່ດີ ແລະ ການສ້າງລັດທີ່ປົກຄອງດ້ວຍກົດໝາຍ (ແຜນງານເຊກາ).
(ພາບ ແລະ ຂ່າວ: ນາງ ປາກາລັກ ພົມມີໄຊ)