(ສພຊ) – ກອງປະຊຸມສຳມະນາວິທະຍາສາດກ່ຽວກັບວຽກງານນະໂຍບາຍການອະນຸ ລັກ ແລະ ການຫຼຸດ ຜ່ອນຜົນກະທົບຕໍ່ຊີວະນາໆພັນ ຢູ່ ສປປລາວ ໄດ້ຈັດຂຶ້ນເມື່ອວັນທີ 24 ຕຸລາຜ່ານມາ ທີ່ສະພາແຫ່ງຊາດ (ສພຊ) ໂດຍການເປັນປະທານຮ່ວມຂອງທ່ານ ນາງ ປິ່ງຄຳ ລາຊະສິມມາ ຄະນະປະຈຳສະພາແຫ່ງຊາດ, ປະທານກຳມາທິການເສດຖະກິດ, ເຕັກໂນໂລຊີ ແລະ ສິ່ງແວດລ້ອມ (ກສຕສ) ແລະ ທ່ານ ສັນຕິ ໄຊປັນຍາ ຫົວໜ້າອົງການອະນຸ ລັກສັດປ່າ ປະຈຳ ສປປລາວ; ເຂົ້າຮ່ວມມີບັນດາທ່ານຮອງປະທານກຳມາທິການຂອງ ສພຊ, ຮອງລັດຖະມົນຕີຈາກກະຊວງທີ່ກ່ຽວຂ້ອງ, ປະທານສະພາປະຊາຊົນຂັ້ນແຂວງ, ສະມາຊິກສະພາແຫ່ງຊາດທີ່ເປັນກຳມະການຂອງ ກສຕສ ແລະ ແຂກຖືກເຊີນຈາກພາກສ່ວນຕ່າງໆ ພ້ອມດ້ວຍບັນດາທ່ານວິທະຍາກອນຈາກກະຊວງກະສິກຳ ແລະ ປ່າ ໄມ້, ກະຊວງຊັບພະ ຍາກອນທຳມະຊາດ ແລະ ສິ່ງແວດລ້ອມ, ອົງການຈັດຕັ້ງສາກົນທີ່ກ່ຽວຂ້ອງກັບວຽກງານດັ່ງກ່າວ.

ກອງປະຊຸມຄັ້ງນີ້ ມີຈຸດປະສົງເພື່ອສ້າງຄວາມຮັບຮູ້ ແລະ ເຂົ້າໃຈ ແນໃສ່ຍົກສູງບົດ ບາດຂອງສະພາແຫ່ງຊາດ ແລະ ສະພາປະຊາຊົນຂັ້ນແຂວງ ເພື່ອຮັບປະກັນໃນການພິຈາ ລະນາອະນຸມັດໂຄງການລົງທຶນທີ່ກ່ຽວພັນກັບທີ່ດິນ ແລະ ຊັບພະຍາກອນທຳມະຊາດ ໄດ້ຮັບການພິຈາລະນາຢ່າງມີປະສິດທິພາບ, ປະສິດທິຜົນ ແລະ ຮັບປະກັນພື້ນທີ່ທີ່ມີຄວາມອຸດົມສົມບູນທາງດ້ານຊີວະນາໆພັນ ເຊັ່ນ: ເຂດປ່າສະຫງວນ, ເຂດຊີວະນາໆພັນທີ່ສຳຄັນ, ເຂດທີ່ດິນບໍລິເວນນໍ້າ ລວມທັງຊະນິດພັນພືດ ແລະ ສັດ ທີ່ໄດ້ຮັບການຄຸ້ມຄອງພາຍໃຕ້ກົດໝາຍ ສປປລາວ, ສົນທິສັນຍາ ແລະ ສັນຍາສາກົນ ຖືກນຳມາພິຈາລະນາໃນຂະບວນການວາງແຜນ ແລະ ຕັດສິນໃຈລົງທຶນ ເພື່ອສາມາດບັນລຸເປົ້າໝາຍການພັດທະນາແບບຍືນຍົງ, ການພັດທະນາເສດຖະກິດທີ່ສອດຄ່ອງກັບການອະນຸລັກຊີວະນາໆພັນ ແລະ ການບໍລິການລະບົບນິເວດຂອງ ສປປລາວ.

ທ່ານ ນາງ ປິ່ງຄຳ ລາຊະສິມມາ ໄດ້ກ່າວວ່າ: ໃນໄລຍະຜ່ານມາ ສປປລາວ ໄດ້ມີການຂະຫຍາຍຕົວທາງດ້ານເສດຖະກິດຢ່າງໄວວາ ປະກອບກັບການລົງທຶນທີ່ເພີ່ມຂຶ້ນໃນດ້ານການພັດທະນາພື້ນຖານໂຄງລ່າງຂະໜາດໃຫຍ່ ເຊັ່ນ: ທາງລົດໄຟ, ຖະໜົນຫົນທາງ ແລະ ບັນດາອຸດສາຫະກຳການຂຸດຄົ້ນ ແລະ ນຳໃຊ້ຊັບພະຍາກອນທຳມະຊາດ ເຊັ່ນ: ພະລັງງານໄຟຟ້ານໍ້າຕົກ, ບໍ່ແຮ່, ກະສິກຳ ແລະ ປ່າໄມ້ ເຊິ່ງໄດ້ມີການນຳເນື້ອທີ່ດິນ ແລະ ບຸກ ລຸກເນື້ອທີ່ປ່າໄມ້ ແລະ ຫັນປ່ຽນທີ່ດິນປ່າໄມ້ຫຼາຍພໍສົມຄວນ; ໃນຂະນະດຽວກັນ, ສປປລາວ ກໍໄດ້ຢຶດໝັ້ນການຈັດຕັ້ງປະຕິບັດວາລະການເຕີບໂຕສີຂຽວ ແລະ ໄດ້ມີການສ້າງແຜນຍຸດທະສາດການເຕີບໂຕສີຂຽວແຫ່ງຊາດ, ກົດໝາຍວ່າດ້ວຍທີ່ດິນ, ກົດໝາຍວ່າດ້ວຍປ່າໄມ້, ກົດໝາຍວ່າດ້ວຍສັດປ່າ, ກົດໝາຍວ່າດ້ວຍສັດນໍ້າ ແລະ ການປະມົງ, ດຳລັດວ່າດ້ວຍການປະເມີນຜົນກະທົບຕໍ່ສິ່ງແວດລ້ອມ, ຄູ່ມືແນະນຳວ່າດ້ວຍການປະເມີນສິ່ງແວດລ້ອມຍຸດທະສາດ ແລະ ອື່ນໆ ເພື່ອເປັນເຄື່ອງມືໃນການຊ່ວຍຄຸ້ມຄອງຊັບພະຍາ ກອນທຳມະຊາດ ແລະ ສິ່ງແວດລ້ອມ ແລະ ເອື້ອອຳນວຍກັບການອະນຸລັກຊີວະນາໆພັນ ແລະ ການບໍລິການຂອງລະບົບນິເວດ.

ທີ່ປະຊຸມໄດ້ຮັບຟັງການນຳສະເໜີກ່ຽວກັບລະບົບປ່າໄມ້ ແລະ ປ່າສະຫງວນແຫ່ງຊາດ ຢູ່ ສປປລາວ ແລະ ບັນຊີສັດປ່າຢູ່ ສປປລາວ; ເຜີຍແຜ່ສົນທິສັນຍາສາກົນກ່ຽວກັບສິ່ງ ແວດລ້ອມເຊັ່ນ: CITES, CBD, Ramsar; ການຄຸ້ມຄອງປ່າໄມ້ ແລະ ມາດຕະການຫຼຸດຜ່ອນຜົນກະທົບເຊັ່ນ: ການຄຸ້ມຄອງພູມີທັດປະສົມປະສານ ແລະ ເຂດທີ່ມີຄວາມສຳຄັນທາງດ້ານຊີວະນາໆພັນ, ລຳດັບມາດຕະການຫຼຸດຜ່ອນຜົນກະທົບ ແລະ ການຫຼຸດຜ່ອນຊີວະນາໆພັນເທົ່າເດີມ, ບັນຊີແດງຂອງ IUCN. ຈາກນັ້ນ, ຜູ້ເຂົ້າຮ່ວມ ໄດ້ປຶກສາຫາລື, ປະກອບຄຳເຫັນຕໍ່ພາລະບົດບາດຂອງສະພາແຫ່ງຊາດ ໃນການຄຸ້ມຄອງປົກປັກຮັກສາຊີວະນາໆພັນ ໄປຄຽງຄູ່ກັບການພັດທະນາ ສປປລາວ ໃນຕໍ່ໜ້າ.

(ສອນສັກ ວັນວິໄຊ)