(ສພຊ) ກອງປະຊຸມສຳມະນາກ່ຽວກັບການເກັບກຳ ແລະ ສະໜອງຂໍ້ມູນກ່ຽວກັບວຽກງານຍຸຕິທຳ ແລະ ປ້ອງກັນຊາດ-ປ້ອງກັນຄວາມສະຫງົບ ໃຫ້ແກ່ພະນັກງານ, ວິຊາການພາຍໃນກຳມາທິການຍຸຕິທຳ ກັບກຳມາທິການທີ່ກ່ຽວຂ້ອງ ແລະ ຄະນະກຳມະການຍຸຕິທຳ ແລະ ປ້ອງກັນຊາດ-ປ້ອງກັນຄວາມສະຫງົບ ສະພາປະຊາຊົນຂັ້ນແຂວງ 18 ແຂວງທົ່ວປະເທດ ໄດ້ໄຂຂຶ້ນໃນລະຫວ່າງວັນທີ 15-16 ທັນວາ 2023 ທີ່ເມືອງວັງວຽງ ແຂວງວຽງຈັນ ໂດຍການເປັນປະທານຮ່ວມຂອງທ່ານ ຄຳແພງ ວິລະພັນ ປະທານກຳມາທິການຍຸຕິທຳ ແລະ ທ່ານ ພົຕ. ປອ. ວົງສັກ ພັນທະວົງ ປະທານກຳມາທິການປ້ອງກັນຊາດ-ປ້ອງກັນຄວາມສະຫງົບ; ມີທ່ານ ຮອງປະທານກໍາມາທິການປ້ອງກັນຊາດ-ປ້ອງກັນຄວາມສະຫງົບ, ຄະນະກົມ, ຄະນະພະແນກ, ວິຊາການຂອງ 2 ກຳມາທິການດັ່ງກ່າວ ພ້ອມດ້ວຍທ່ານ ປະທານ-ຮອງປະທານກຳມະການຍຸຕິທຳ ແລະ ປ້ອງກັນຊາດ-ປ້ອງກັນຄວາມສະຫງົບ, ຫົວໜ້າ-ຮອງຫົວໜ້າຂະແໜງ ແລະ ວິຊາການຂອງຄະນະກຳມະການດັ່ງກ່າວ ເຂົ້າຮ່ວມຢ່າງພ້ອມພຽງ.

ທ່ານ ຄຳແພງ ວິລະພັນ ໄດ້ມີຄໍາເຫັນກ່າວເປີດກອງປະຊຸມ ໂດຍທ່ານໄດ້ຮຽກຮ້ອງບັນດາທ່ານຜູ້ແທນກອງປະຊຸມ ຈົ່ງພ້ອມກັນສຸມໃສ່ຄົ້ນຄວ້າ ແລະ ແລກປ່ຽນຄຳຄິດຄຳເຫັນຢ່າງກົງໄປກົງມາ ດ້ວຍຄວາມຮັບຜິດຊອບສູງ ພ້ອມກັນຕີລາຄາການຈັດຕັ້ງປະຕິບັດວຽກງານຂອງແຕ່ລະພາກສ່ວນທີ່ກ່ຽວຂ້ອງໃນໄລຍະຜ່ານມາຖືກຕ້ອງ ແລະ ສອດຄ່ອງຕາມກົດໝາຍ ແລະ ນິຕິກຳໃຕ້ກົດໝາຍແລ້ວບໍ່ ພ້ອມກັນນັ້ນ, ຍັງຍົກໃຫ້ເຫັນບັນຫາສາເຫດທີ່ພາໃຫ້ຫຍຸ້ງຍາກ ແລະ ມາດຕະການແກ້ໄຂ ແນໃສ່ຫັນເອົາການຄຸ້ມຄອງລັດ, ຄຸ້ມຄອງເສດຖະກິດ-ສັງຄົມ ດ້ວຍກົດໝາຍ ໃຫ້ເຂົ້າສູ່ລວງເລິກ ແລະ ຊີວິດຕົວຈິງເທື່ອລະກ້າວ ທັງເປັນການຍົກສູງຄຸນນະພາບຕິດຕາມກວດກາຂອງສະພາແຫ່ງຊາດ ຕໍ່ກັບຄວາມຮັບຜິດຊອບການເມືອງຂອງບັນດາອົງການລັດທີ່ມີສິດ ແລະ ໜ້າທີ່ໃນການແກ້ໄຂຄໍາຮ້ອງທຸກ ເພື່ອຮັບປະກັນສິດສະເໝີພາບຕໍ່ໜ້າກົດໝາຍຂອງປະຊາຊົນ ເຮັດໃຫ້ສັງຄົມມີຄວາມສະຫງົບ, ເປັນລະບຽບຮຽບຮ້ອຍ, ເຮັດໃຫ້ການຄຸ້ມຄອງລັດ, ຄຸ້ມຄອງເສດຖະກິດ-ສັງຄົມ ມີຄວາມຍຸຕິທຳ ແລະ ໂປ່ງໃສ.

ຈາກນັ້ນ, ທ່ານ ພົຕ. ປອ. ວົງສັກ ພັນທະວົງ ໄດ້ມີບາງຄຳເຫັນເນັ້ນໃນທີ່ປະຊຸມ ແລະ ສືບຕໍ່ຄວບຄຸມການດຳເນີນກອງປະຊຸມຄັ້ງນີ້ ຕາມວາລະຂອງກອງປະຊຸມ ເຊິ່ງກອງປະຊຸມໄດ້ຮັບຟັງ ແລະ ໄດ້ທົບທວນຄືນການຈັດຕັ້ງປະຕິບັດພາລະບົດບາດ, ສິດ ແລະ ໜ້າທີ່ຕາມກົດໝາຍກຳນົດໄວ້ ເຊິ່ງມີເນື້ອໃນ ແລະ ບັນຫາສຳຄັນຄື: ພາລະບົດບາດ ສິດ ແລະ ໜ້າທີ່ ໃນການເຄື່ອນໄຫວວຽກງານຍຸຕິທຳ; ພາລະບົດບາດສິດ ແລະ ໜ້າທີ່ ໃນການເຄື່ອນໄຫວວຽກງານປ້ອງກັນຊາດ-ປ້ອງກັນຄວາມສະຫງົບ; ພາລະບົດບາດຕິດຕາມກວດກາວຽກງານຍຸຕິທຳ ແລະ ປ້ອງກັນຊາດ-ປ້ອງກັນຄວາມສະຫງົບ ແລະ ການຮ່າງບົດລາຍງານ, ການສະໜອງຂໍ້ມູນທີ່ຕິດພັນກັບຜົນການຕິດຕາມກວດກາ ຂອງສະພາແຫ່ງຊາດ. ພ້ອມດຽວກັນນີ້, ຍັງໄດ້ຮັບຟັງການລາຍງານການເຄື່ອນໄຫວວຽກງານວິຊາສະເພາະຂອງບັນດາກົມກອງວິຊາສະເພາະຂອງກະຊວງປ້ອງກັນປະເທດ, ກະຊວງປ້ອງກັນຄວາມສະຫງົບ ແລະ ສະຫະພັນນົກຮົບເກົ່າ ໃນໄລຍະຜ່ານມາຄື: ວຽກງານສອບສວນ-ສືບສວນໃນກອງທັບ, ຂັ້ນຕອນສັ່ງຟອງຜູ້ຕ້ອງຫາຂຶ້ນສານ, ທີ່ຕັ້ງ ພາລະບົດບາດ ສິດໜ້າທີ່ ແລະ ການເຄື່ອນໄຫວວຽກງານຂອງສານທະຫານ, ຍົກສູງປະສິດທິພາບວຽກງານສອບສວນ-ສືບສວນຕາມກົດໝາຍ, ບັນຫາທີ່ຄວນສຸມໃສ່ແກ້ໄຂວຽກງານຄຸ້ມຂັງ-ດັດສ້າງໃນປັດຈຸບັນ; ວິທີການ ແລະ ຂັ້ນຕອນໃນການສ້າງກົດໝາຍ ແລະ ນິຕິກຳໃຕ້ກົດໝາຍຂົງເຂດປ້ອງກັນຄວາມສະຫງົບ ແລະ ທີ່ຕັ້ງ ພາລະບົດບາດ ສິດ ໜ້າທີ່ ແລະ ການເຄື່ອນໄຫວວຽກງານຂອງສະຫະພັນນັກຮົບເກົ່າ ທັງໄດ້ຄົ້ນຄວ້າແລກປ່ຽນຄຳເຫັນຢ່າງກົງໄປກົງມາ ເພື່ອແລກປ່ຽນບົດຮຽນເຊິ່ງກັນແລະກັນ ແລະ ຖາມ-ຕອບບາງເນື້ອໃນທີ່ຍັງມີຄວາມສົນໃຈຕື່ມອີກ.

(ພາບ ແລະ ຂ່າວ: ນາງ ປາກາລັກ ພົມມີໄຊ)