(ສພຊ) – ທ່ານ ກົງແກ້ວ ມີວໍລະຈັກ ສະມາຊິກສະພາແຫ່ງຊາດ (ສສຊ) ປະຈຳເຂດເລືອກຕັ້ງທີ 13 ແຂວງສະຫວັນນະເຂດ ໄດ້ປະກອບຄຳເຫັນຕໍ່ບົດລາຍງານຂອງທ່ານນາຍົກລັດຖະມົນຕີ ໃນວັນທີ 18 ພະຈິກ 2024 ວ່າ: ວຽກງານຈຸດສຸມທີ່ໄດ້ກໍານົດຢູ່ໃນແຜນພັດທະນາເສດຖະກິດສັງຄົມ ວຽກງານຈຸດສຸມທີໜຶ່ງຢູ່ໃນຂະແໜງກະສິກໍາ ໃນນັ້ນໄດ້ມີແຜນສຸມໃສ່ຊຸກຍູ້ການຜະລິດເຂົ້າໃນ 10 ແຂວງເປົ້າໝາຍ ເຊິ່ງສະຫວັນນະເຂດ ກໍແມ່ນໜຶ່ງແຂວງທີ່ນອນໃນເປົ້າໝາຍຂອງໂຄງການຄໍ້າປະກັນສະບຽງອາຫານ, ສະເພາະປີ 2024 ທົ່ວແຂວງສາມາດຜະລິດເຂົ້າ ແລະ ເກັບກູ້ໄດ້ແລ້ວເຈັດແສນກວ່າໂຕນ ສະເລ່ຍໃສ່ພົນລະເມືອງແມ່ນຖືກຜູ້ໜຶ່ງ 6-7 ຮ້ອຍກິໂລຕໍ່ຄົນ ຖືວ່າກຸ້ມກິນ ແລະ ກໍສົ່ງຂາຍ ຈໍານວນຫຼາຍໝື່ນໂຕນ, ແຕ່ວ່າປີນີ້ ກໍເປັນປີທີ່ໂຊກດີນໍ້າບໍ່ຖ້ວມ ຖ້າຫາກວ່າປີໃດທີ່ນໍ້າຖ້ວມນັ້ນ ໃນສາມເມືອງເປົ້າໝາຍຂອງແຂວງ ເປັນຕົ້ນແມ່ນຈໍາພອນ, ສອງຄອນ ແລະ ຊົນນະບູລີ ກໍຈະມີຄວາມຫຍຸ້ງຍາກ ຫຼື ບາງປີກໍອາດຈະກວມໄປຮອດໄຊບູລີ ຈະເຮັດໃຫ້ຈໍານວນເຂົ້າເປືອກຫຼູດລົງ; ເພື່ອຮອງຮັບໃຫ້ແກ່ການຜະລິດເຂົ້າໃຫ້ໄດ້ໃນແຕ່ລະປີ ແມ່ນມີຄວາມຈໍາເປັນຈະຕ້ອງສຸມໃສ່ຈັດຕັ້ງປະຕິບັດໂຄງການຊົນລະປະທານ ຄືຢູ່ເມືອງຈໍາພອນ ແລະ ເມືອງສອງຄອນ ທີ່ໄດ້ຈັດຕັ້ງປະຕິບັດໃນໄລຍະຜ່ານມາໃຫ້ສໍາເລັດ ແລະ ກໍໃຫ້ສາມາດຜະລິດໃນສົກປີ 2025, ແຕ່ຜ່ານການຕິດຕາມກວດກາຕົວຈິງ ເຫັນວ່າມີບາງໂຄງການທີ່ຍັງມີລັກສະນະຊັກຊ້າ ເປັນຕົ້ນແມ່ນໂຄງການຊົນລະປະທານຢູ່ເມືອງສອງຄອນ ໃນເຂດລະຫານໍ້າ ຕາມທີ່ປະເມີນເບິ່ງແລ້ວຄາດວ່າຈະບໍ່ບັນລຸ, ປີກາຍນີ້ແກ້ໄຂໄດ້ແຕ່ 300 ເຮັກຕາ ກໍຍັງບໍ່ໄດ້ໝົດເນື້ອທີ່. ສະນັ້ນ, ຖ້າວ່າບໍ່ກະຕຸກແຕ່ຫົວທີ ຈະເຮັດໃຫ້ໂຄງການນີ້ລ່າຊ້າ ແລະ ກໍຈະບໍ່ທັນລະດູການຜະລິດນາແຊງ, ຈຶ່ງຢາກສະ ເໜີກະຊວງທີ່ກ່ຽວຂ້ອງລົງໄປຊຸກຍູ້ຕື່ມອີກ; ນອກຈາກນັ້ນ, ຍັງມີໂຄງການທີ່ໄດ້ເວົ້າແລ້ວໃນກອງປະຊຸມສະໄໝສາມັນເທື່ອທີ 7 ກະຊວງກ່ຽວຂ້ອງກໍຕົກລົງວ່າຈະຈັດຕັ້ງປະຕິບັດໂຄງການຫ້ວຍອາໄກ້ ຫ້ວຍທ່າຮາວ ເຊິ່ງເປັນໂຄງການໃຫຍ່ຂອງແຂວງ ຖ້າວ່າຈັດຕັ້ງປະຕິບັດທັນໃນປີ 2025 ຈະເຮັດໃຫ້ໃບໜ້າຂອງແຂວງສະຫວັນນະເຂດດີຂຶ້ນ, ຈະເຮັດໃຫ້ ການຜະລິດເຂົ້ານາແຊງໄດ້ຫຼາຍຂຶ້ນຕື່ມ ແລະ ຖ້າຫາກມີເງື່ອນໄຂ ສະເໜີໃຫ້ກະຊວງກະສິກໍາ ແລະ ປ່າໄມ້ ລົງໄປຊຸກຍູ້ຕື່ມ ໂດຍສະເພາະແມ່ນໂຄງການຊົນລະປະທານຫ້ວຍພາແລງຢູ່ເມືອງຈໍາພອນ ເຊິ່ງປະລະມາຫຼາຍປີແລ້ວ ບໍ່ມີຄວາມຄືບໜ້າ, ຈະເຮັດແນວໃດກໍບໍ່ເຮັດ ສະເໜີໃຫ້ພາກສ່ວນກ່ຽວຂ້ອງລົງໄປເບິ່ງນໍາຕື່ມ ຖ້າວ່າຈະໂຈະຈະຍົກເລີກ ກໍໃຫ້ແຈ້ງລະອຽດ ປະຊາຊົນເຂົາເຈົ້າກໍຢາກໄດ້ດິນເຂົາເຈົ້າຄືນເພື່ອທໍາການຜະລິດ, ຖ້າຍັງຈະສືບຕໍ່ ເຂົາເຈົ້າກໍຄອງຄອຍ.
ອັນທີສອງ: ຢູ່ໃນຄາດໝາຍຂອງຂະແໜງອຸດສາຫະກໍາການຜະລິດແຮ່ທາດ ໄດ້ກໍານົດຈະເພີ່ມຂຶ້ນ 28.20% ຈາກປີ 2024 ແຕ່ຜ່ານການຕິດຕາມກວດກາຕົວຈິງຂອງ ສສຊ ປະຈໍາເຂດເລືອກຕັ້ງທີ 13 ກໍຍັງເຫັນວ່າມີບາງໂຄງການ ການອະນຸຍາດໃຫ້ບໍລິສັດເຂົ້າໄປຂຸດຄົ້ນເຂົ້າໄປສໍາປະທານແຮ່ທາດ ຍັງບໍ່ທັນຮັດກຸມ, ລວມທັງນິຕິກໍາ ບາງຄັ້ງເປັນຄໍາເຫັນຂອງຮອງຫົວໜ້າກົມ ແຈ້ງລົງໄປຫາພະແນກ ພະແນກກໍແຈ້ງຫາເມືອງ ເມືອງກໍແຈ້ງຫາບໍລິສັດຫາບ້ານຫາກຸ່ມ ໃຫ້ຄວາມຮ່ວມມືແກ່ບໍລິສັດນັ້ນໂລດ; ສະນັ້ນ, ສະເໜີໃຫ້ທາງພາກສ່ວນກ່ຽວຂ້ອງ ເຮັດໃຫ້ມັນຮັດກຸມຄັກແນ່, ໂຄງການໃດທີ່ສະເໜີຢູ່ຂັ້ນສູນກາງ ຂໍໃຫ້ທາງສູນກາງສົມທົບກັບແຂວງສາກ່ອນ ເພາະຢູ່ແຂວງກໍມີຄະນະກຳມະການຄຸ້ມຄອງການລົງທຶນຂັ້ນແຂວງ, ບາງບ່ອນທີ່ເຂົາເຈົ້າສະເໜີຂຸດຄົ້ນຂໍສໍາປະທານນັ້ນ ມັນຕິດພັນກັບດິນປ້ອງກັນຊາດ-ປ້ອງກັນຄວາມສະຫງົບ ເຫັນວ່າກໍລະນີນີ້ມີຄວາມຫຍຸ້ງຍາກຫຼາຍ, ບາງບໍລິສັດທີ່ໄດ້ຮັບອະນຸຍາດໃນປີ 2023-2024 ຖ້າວ່າຈະເພີ່ມຂຶ້ນອີກ 28% ຄິດວ່າໃນປີ 2025 ຈະເພີ່ມຫຼາຍຂຶ້ນ ທັງໆມີຄໍາສັ່ງໃຫ້ຢຸດໃຫ້ໂຈະແລ້ວ. ໃນຈຸດນີ້ບໍ່ທັນເຂົ້າໃຈວ່າເພິ່ນຄົ້ນຄວ້າກັນຄືແນວໃດ ຈຶ່ງຈະເພີ່ມຂຶ້ນອີກ 28% ຫຼືວ່າສະເພາະແຕ່ໂຄງການບໍ່ແຮ່ອັນໃດອັນໜຶ່ງເທົ່ານັ້ນບໍ່? ສະນັ້ນ, ຄວນກໍານົດວ່າໂຕໃດຢຸດຖາວອນໂຕໃດໃຫ້ຢຸດຕິໄປເລີຍ ຂໍໃຫ້ເປັນອັນລະອຽດແດ່.
ຈຸດທີສາມ: ຕໍ່ແຜນການລົງທຶນຂອງລັດປະຈໍາປີ 2025 ສະເໜີໃຫ້ທາງລັດຖະບານຄົ້ນຄວ້າຕື່ມການຈັດສັນງົບ ປະມານການລົງທຶນຂອງລັດ, ຜ່ານມາແມ່ນແບ່ງໃຫ້ແຕ່ລະກະຊວງກະແຈກກະຈາຍແຫຼ່ງທຶນເກືອບວ່າທຸກກະຊວງ, ບາງກະຊວງແບ່ງໃຫ້ແຂວງ ບາງວຽກກໍໄດ້ຫຼາຍ ບາງວຽກກໍໄດ້ໜ້ອຍ ບາງວຽກມີຄວາມຈໍາເປັນທີ່ຈະຕ້ອງພັດທະນາຊໍ້າພັດໄດ້ໜ້ອຍ ເຮັດໃຫ້ທາງແຂວງເຮົາຈັດສັນໄດ້ຍາກ, ສະເໜີໃຫ້ລັດຖະບານເອົາງົບຈໍານວນດັ່ງກ່າວ ມອບໃຫ້ແຂວງຈັດສັນໂລດໄດ້ບໍ່ ມັນຈຶ່ງຈະຕິດຕາມກວດກາກັນງ່າຍ; ສໍາລັບໂຄງການສູນກາງຄຸ້ມຄອງ ເຫັນວ່າມີຫຼາຍໂຄງການບໍ່ໄດ້ຈັດຕັ້ງປະຕິບັດ ຕົວຢ່າງເສັ້ນທາງໜຶ່ງຈີ (1G) ກໍບໍ່ຮູ້ວ່າອະນາຄົດຈະເປັນຈັ່ງໃດ ເພາະມິດງຽບໄປດົນແລ້ວ, ຂົວຕາດໄຮ ທາງເລກ 10 ກໍບໍ່ມີຄວາມຄືບໜ້າ. ສະນັ້ນ, ໂຄງການທີ່ສູນກາງຄຸ້ມຄອງອວ່າຍໄປໃຫ້ແຂວງຄຸ້ມຄອງໄດ້ບໍ່ ລວມທັງງົບປະມານ ໃຫ້ແຂວງຈັດຕັ້ງປະຕິບັດເລຍ ເພາະວ່າ 34 ຂົວ ນັບແຕ່ທາງເລກ 10 ໄປຫາເມືອງວິລະບູລີ ບາງທີແຂວງກໍອາດຈະມີຄວາມສາມາດທີ່ຈະນຳເອົາເງິນເກີນແຜນ ປະກອບສ່ວນເຮັດໃຫ້ປະຊາຊົນໄດ້ນໍາໃຊ້ທຽວໄປມາ, ເຂົາເຈົ້າກໍຈະຍ້ອງວ່າເຮົາມີການພັດທະນາ, ອັນນີ້ປະໄປເລີຍ ບໍ່ຮູ້ວ່າເມື່ອໃດຈະເຮັດສຳເລັດ.
ປີນີ້ໄດ້ຕັດສິນໃຈສຸມໃສ່ຂົວເຊປອງເອັສໄອເອັມ ກໍຖືວ່າກາຍເຄິ່ງແລ້ວ ຄາດວ່າປີ 2025 ຈະສາມາດນຳໃຊ້ໄດ້, ປະຊາຊົນກໍຍ້ອງຍໍຊົມເຊີຍ ແລະ ພິເສດພວກເຮົາໃຊ້ເງິນເກີນແຜນໄປສ້າງຂົວຂ້າມເຊຈໍາພອນ ຢູ່ເມືອງອາດສະພອນ ຢູ່ນັ້ນມີ 2 ກຸ່ມບ້ານ ລວມ 20 ກວ່າບ້ານ ເຂົາເຈົ້າດີໃຈທີ່ໄດ້ນຳໃຊ້ຂົວທຽວທາງ ແລະ ບໍ່ມີຄວາມສ່ຽງຕໍ່ການຂີ່ເຮືອນ້ອຍຂ້າມເຊຈໍາພອນ. ສະເໜີໃຫ້ກະຊວງກ່ຽວຂ້ອງຄົ້ນຄວ້າຕື່ມສໍາລັບເມືອງນອງ ກໍຢູ່ໃນບັນຊີເມືອງທຸກຍາກ, ຖ້າຫາກຈະຈັດສັນຄືປີຜ່ານມາກໍຄືຈະຍາກ; ສະນັ້ນ, ສະເໜີໃຫ້ທາງລັດຖະບານແບ່ງເປັນທຶນສະເພາະໄປພັດທະນາໃນເມືອງນັ້ນເລີຍຈະເປັນການດີ, ດີກວ່າຈະໄປຈັດສັນກະແຈກກະຈາຍ ເຮັດໃຫ້ການພັດທະນາຊ້າ.
ບັນຫາສຸດທ້າຍ ແມ່ນການສະເໜີຂໍດັດແກ້ແຜນງົບປະມານແຫ່ງລັດປີ 2024 ສຸດທີ່ເຫັນດີ ແຕ່ວ່າໃນນີ້ສະເໜີໃຫ້ມີນິຕິກໍາແນະນໍາລະອຽດ ເພາະປີຜ່ານມາສັງເກດເຫັນວ່າການໃຊ້ເງິນເກີນແຜນ ຫຼືວ່າເງິນບາງຮ່ວງ ມັນບໍ່ໄປຕາມທິດ, ມີບາງອັນມີຄວາມຈໍາເປັນຮີບດ່ວນທີ່ຢາກຈັດຕັ້ງປະຕິບັດກ່ອນ ຖ້າເຮັດກ່ອນຄືແນວນັ້ນ ມູນຄ່າມັນກໍຈະສູງ ແຕ່ເງິນເກີນແຜນກໍບໍ່ຫຼາຍ ອັນນີ້ຈະເປັນການສ້າງໜີ້ສິນໄວ້, ຝາກໃຫ້ລັດຖະບານໄດ້ຄົ້ນຄວ້າຕື່ມ.