(ສພຊ) ໃນວັນທີ 18 ມັງກອນ 2024 ທີ່ສະພາແຫ່ງຊາດ, ຄະນະຊີ້ນໍາໂຄງການສ້າງຄວາມເຂັ້ມແຂງໃຫ້ແກ່ສະພາແຫ່ງຊາດ ແລະ ສະພາປະຊາຊົນຂັ້ນແຂວງ ຫຼື ສະ​ເຕັບສ໌ (STEPS) ໄດ້ຈັດກອງປະຊຸມສະຫຼຸບວຽກງານປະຈໍາປີ 2023 ແລະ ວາງແຜນການປະຈໍາປີ 2024 ພາຍໃຕ້ການເປັນປະທານຮ່ວມຂອງທ່ານ ປອ. ບຸນທັນ ບຸນວິໄລ ຮອງເລຂາທິການສະພາແຫ່ງຊາດ, ຫົວ​ໜ້າ​ກອງ​ເລ​ຂາ​ຄຸ້ມ​ຄອງ​ແຫຼ່ງ​ທຶນ​ຊ່ວຍ​ເຫຼືອ​ລ້າ ແລະ ທ່ານ ນາງ ມາ​ຕິນ ແທ​ເຣີ ຜູ້​ຕາງ​ໜ້າ​ອົງ​ການ​ສະ​ຫະ​ປະ​ຊ​າ​ຊາດ​ເພື່ອ​ການ​ພັດ​ທະ​ນາ​ ປະ​ຈຳ​ ສ​ປ​ປລາວ ໂດຍການເຂົ້າຮ່ວມຂອງທ່ານ ໄມ​ເຄິນ ຣອນ​ນິງ ຜູ້​ຕາງ​ໜ້າ​ອົງ​ການ​ພັດ​ທະ​ນາ​ສາ​ກົນ​ປະ​ເທດສະ​ຫະ​ລັດ​ອາ​ເມ​ລິ​ກາ ປະຈຳ ສປປລາວ, ບັນດາທ່ານຜູ້ຕາງ​ໜ້າ​ຈາກກົມພົວ​ພັນ​ສາ​ກົນ ກະ​ຊວງ​ແຜນ​ການ​ ແລະ ການ​ລົງ​ທຶນ, ກົມອົງ​ການ​ຈັດ​ຕັ້ງ​ສາ​ກົນ ກະ​ຊວງ​ການ​ຕ່າງ​ປະ​ເທດ ແລະ ແຂກທີ່ຖືກເຊີນຈາກຄະນະເລຂາທິການ, ກໍາມາທິການພາຍໃນສະພາແຫ່ງຊາດ.
ທັງນີ້ ເພື່ອເປັນການທົບ​ທວນ​ຄືນ​ການຈັດຕັ້ງປະຕິບັດບັນ​ດາ​ແຜນ​ກິດ​ຈະ​ກຳ ແລະ ຜົນ​ສຳ​ເລັດ​ໃນປີ 2023 ຂອງ​ໂຄງ​ການສ້າງຄວາມເຂັ້ມແຂງໃຫ້ແກ່ສະພາແຫ່ງຊາດ ແລະ ສະພາປະຊາຊົນຂັ້ນແຂວງ; ຮັບ​ຮອງ​ເອົາ​ດ້ານ​ເອ​ກະ​ສານ​ທີ່​ກ່ຽວຂ້ອງ​ກັບ​ໂຄງ​ການ ເປັນ​ຕົ້ນພາ​ລະ​ບົດ​ບາດ​ຂອງ​ຄະ​ນະ​ຊີ້​ນຳ​ໂຄງ​ການ, ແຜນ​ວຽກ​ປະ​ຈຳ​ປີ 2024 ແລະ ຕົວຊີ້ວັດຂອງຄາດຄະເນຜົນໄດ້ຮັບຈາກການຈັດຕັ້ງປະຕິບັດບັນດາແຜນກິດຈະກໍາ ທັງເປັນການປຶກ​ສາ​ຫາ​ລື ແລະ ແລກ​ປ່ຽນ​ກ່ຽວ​ກັບ​ວຽກ​ງານ​ປິ່ນ​ອ້ອມ​ຂອງ​ໂຄງ​ການ ເພື່ອອໍາ​ນວຍ​ຄວາມ​ສ​ະ​ດວກ​ໃຫ້​ແກ່​ການ​ຈັ​ດ​ຕັ້ງ​ປະ​ຕິ​ບັດ​ໂຄງ​ການ​ໃຫ້​ໄປ​ຕາມ​ແຜນ​ທີ່​ວາງ​ໄວ້.
ທ່ານ ປອ. ບຸນທັນ ບຸນວິໄລ ໄດ້ກ່າວໃນບາງຕອນວ່າ: ກອງ​ປະ​ຊຸມ​ຄັ້ງ​ນີ້ ເປັນ​ວາ​ລະ​ທີ່​ສຳ​ຄັນ​ທີ່​ພວກ​ເຮົາຈະ​ໄດ້​ທົບ​ທວນ​ຄືນ​ການ​ຈັດ​ຕັ້ງ​ປະ​ຕິ​ບັດ​ບັນ​ດາ​ກິດ​ຈະ​ກຳ ແລະ ຜົນ​ງານ​ຂອງ​ກາ​ນ​ຈັດ​ຕັ້ງ​ປະ​ຕິ​ບັດ​ແຜນ​ວຽກ​ປະ​ຈຳປີ 2023, ພິ​ຈາ​ລະ​ນາຮັບ​ຮອງ​ເອົາ​ແຜນ​ວຽກ​ປະ​ຈໍາ​​ປີ 2024 ຂອງ​ໂຄງ​ການ ພ້ອມທັງໃຫ້ຄຳແນະນຳ ແລະ ຮ່ວມກັນວາງແຜນໂຄງການໃນໄລຍະຕໍ່ໜ້າ ແລະ ​ປຶກ​ສາ​ຫາ​ລື, ແລກ​ປ່ຽນ​ກັບ​ບັນ​ດາ​ທ່ານສະ​ມາ​ຊິກ​ຄະ​ນະ​ຊີ້​ນຳ ແລະ ຜູ້​ໃຫ້​ທຶນ ເພື່ອເຮັດ​ໃຫ້​ສາ​ມາດບັນ​ລຸ​ຕາມ​ແຜນ​ການ​ຂອງ​ໂຄງ​ການ​. ໂດຍ​ສະ​ເພາະປີ 2024 ທີ່​ ສ​ປ​ປລາວ ​ໄດ້​ຮັບ​ກຽດ​ເປັນ​ປະ​ທານ​ອາ​ຊຽນ ແລະ ສະ​ພາ​ແຫ່ງ​ຊາດລາວ ຈະ​ເປັນ​ເຈົ້າ​ພາບ​ຈັດ​ກອງ​ປະ​ຊຸມໃຫຍ່ສະ​ມັດ​ຊາ​​ລັດ​ຖະ​ສະ​ພາ​ລະ​ຫວ່າງ​ຊາດ​ອາ​ຊຽນ ຫຼື ໄອ​ປາ ຄັ້ງທີ 45 ເຊິ່ງ​ເປັນ​ພັນ​ທະ​ ແລະ ບົດ​ບາດ​ທີ່​ສຳ​ຄັນ​ໃນ​ການ​ປະ​ຕິ​ບັດ​ບົດ​ບາດ​ການ​ທູດ​ລັດ​ຖະ​ສ​ະ​ພາ​ໃນ​ລະ​ດັບພາ​ກ​ພື້ນ; ສະ​ນັ້ນ, ວຽກບຸ​ລິ​ມະ​ສິດຂອງ​ສະ​ພາ​ແຫ່ງ​ຊາດ ແລະ ສະ​ພາ​ປະ​ຊາ​ຊົນ​ຂັ້ນ​ແຂວງ ກໍ​ແມ່ນ​ການ​ກະ​ກຽມ​ຄວາມ​ພ້ອມ​ຮອບ​ດ້ານ​ໃຫ້​ແກ່​ການດໍາ​ເນີນກອງ​ປະ​ຊຸມໄອ​ປາ ທີ່​ມີຫຼາຍ​ດ້ານ​ທີ່​ຕ້ອງ​ໄດ້​ຂຸ້ນ​ຂ້ຽວ ກະ​ກຽມ ແລະ ຈັດ​ຕັ້ງ​ປະ​ຕິ​ບັດ. ແຕ່​ສິ່ງ​ທີ່​ດີ ແມ່ນ​ພວກ​ເຮົາມີ​ໂຄງ​ການສະ​ເຕັບສ໌ ເຊິ່ງ​ເປັນ​ໜຶ່ງ​ໂຄງ​ການ​ຍຸ​ດ​ທະ​ສາດ ທີ່​ພ້ອມ​ຈະ​ໃຫ້​ການ​ສະ​ໜັບ​ສະ​ໜູນ​ທ​າງ​ດ້ານ​ງົບ​ປະ​ມານ ແລະ ດ້ານວິ​ຊາ​ການ ໃນ​ການ​ປະ​ຕິ​ບັດ​ພາ​ລະ​ບົດ​ບາດ ແລະ ແຜນ​ວຽກ​ບຸ​ລິ​ມະ​ສິດ​ຂອງ​ສະ​ພາ​ແຫ່ງ​ຊາດ ໃຫ້​ມີ​ຜົນ​ສຳ​ເລັດ​ສູງ.
ເພື່ອເຮັດໃຫ້ກອງປະຊຸມຄັ້ງນີ້ ໄດ້ຮັບຜົນສຳເລັດຕາມຈຸດປະສົງ ແລະ ລະດັບຄາດໝາຍທີ່ວາງໄວ້, ທ່ານຮອງເລຂາທິການສະພາແຫ່ງຊາດ ຍັງໄດ້ສະເໜີໃຫ້ບັນດາທ່ານຜູ້ເຂົ້າຮ່ວມ ຈົ່ງເອົາໃຈໃສ່ໃນການຕິດຕາມການລາຍງານ, ປະກອບຄໍາເຫັນ ແລະ ຖອດຖອນບົດຮຽນກ່ຽວກັບຜົນການຈັດຕັ້ງປະຕິບັດໂຄງການໃນໄລຍະຜ່ານມາ ພ້ອມທັງສົນທະນາແລກປ່ຽນກ່ຽວກັບການວາງແຜນໂຄງການໃນຕໍ່ໜ້າ ເພື່ອຮັບປະກັນປະສິດທິພາບ ແລະ ປະສິດທິຜົນຂອງການຈັດຕັ້ງປະຕິບັດ ເວົ້າລວມ, ເວົ້າສະເພາະແມ່ນການ​ສະ​ໜັບ​ສະ​ໜູນການປະ​ຕິ​ບັດ​ພາ​ລະ​ບົດ​ບາດ​​ຂອງ​ສະ​ມາ​ຊິກ​ສະ​ພາ​ແຫ່ງ​ຊາດ ແລະ ສະ​ພາ​ປະ​ຊາ​ຊົນ​ຂັ້ນ​ແຂວງ ເພື່ອ​ນຳ​ຜົນ​ປະ​ໂຫຍດ​ອັນ​ສູງ​ສຸດ​ມາ​ໃຫ້​ແກ່​ປະ​ຊາ​ຊົນ ໂດຍ​ຜ່ານ ​3 ພາ​ລະ​ບົດ​ບາດ ກໍຄືພາລະບົດບາດດ້ານນິ​ຕິ​ບັນ​ຍັດ, ການ​ຕົກ​ລົງ​ບັນ​ຫາ​ສຳ​ຄັນພື້ນ​ຖານ​ຂອງ​ປະ​ເທດ​ຊາດ ແລະ ການ​ຕິດ​ຕາມກວດ​ກາ.
ກອງປະຊຸມໄດ້ຮັບຟັງການສະເໜີໂຄງ​ຮ່າງ​ການ​ຈັດ​ຕັ້ງ ແລະ ພາ​ລະ​ບົດ​ບາດຂອງ​ຄະ​ນະ​ຊີ້​ນຳ​​ໂຄງ​ການ; ຜົນ​ສຳ​ເລັດ​ການ​ຈັດ​ຕັ້ງ​ປະ​ຕິ​ບັດ​ແຜນ​ວຽກ​ປະ​ຈຳ​ປີ 2023; ລາຍ​ງານ​ວຽກ​ງານ​ປິ່ນ​ອ້ອມ ເປັນຕົ້ນລາຍງານການເງິນ, ແຜນບຸກຄະລາກອນ ແລະ ບໍ​ລິ​ສັດ​ດ້ານ​ການ​ຈັດ​ການ; ຮ່າງ​ແຜນ​ວຽກ​ປະ​ຈຳ​ປີ 2024 ແລະ ແຜນຕົວຊີ້ວັດໃນແຜນ​ວຽກ​ປະ​ຈຳ​ປີ 2024. ຈາກນັ້ນຜູ້ເຂົ້າຮ່ວມໄດ້ຜັດປ່ຽນກັນປະກອບຄໍາຄິດຄໍາເຫັນ, ສົນທະນາແລກປ່ຽນ ແລະ ຖອດຖອນບົດຮຽນເຊິ່ງກັນ ແລະກັນ ຕໍ່ບົດຕ່າງໆທີ່ນໍາມາສະເໜີໃນກອງປະຊຸມຄັ້ງນີ້.
(ຂ່າວ ແລະ ພາບ: ສອນສັກ ວັນວິໄຊ)