(ສພຊ) ໃນຕອນບ່າຍຂອງວັນທີ 5 ພຶດສະພາ 2023 ທີ່ສະພາແຫ່ງຊາດ ໄດ້ມີພິທີມອບ-ຮັບ ຊຸດກິລາ ຈາກຫ້ອງການທະນາຄານ ແຫ່ງ ສປປລາວ ໃຫ້ແກ່ສະຫະພັນກຳມະບານສະພາແຫ່ງຊາດ ຈຳນວນ 100 ຊຸດ ແລະ ເງິນສົດ ຈຳນວນ 20 ລ້ານກວ່າກີບ ລວມເປັນມູນຄ່າທັງໝົດ 32 ລ້ານກວ່າກີບ ໂດຍການກ່າວມອບຂອງທ່ານ ສຸກັນ ຈັນທະວົງ ຮອງຫົວໜ້າຫ້ອງການທະນາຄານ ແຫ່ງ ສປປລາວ ແລະ ກ່າວຮັບໂດຍທ່ານ ອຳໄພ ຈິດມານົນ ປະທານຄະນະບໍລິຫານງານສະຫະພັນກຳມະບານສະພາແຫ່ງຊາດ ທັງເປັນຮອງປະທານກຳມາທິການກົດໝາຍ; ເຂົ້າຮ່ວມມີບັນດາທ່ານຈາກຄະນະບໍລິຫານງານສະຫະພັນກຳມະບານສະພາແຫ່ງຊາດ ແລະ ຫ້ອງການທະນາຄານ ແຫ່ງ ສປປລາວ ເຂົ້າຮ່ວມເປັນສັກຂີພິຍານ.
ໂອກາດດັ່ງກ່າວ, ທ່ານ ອໍາໄພ ຈິດມານົນ ໄດ້ກ່າວສະແດງຄວາມຂອບໃຈ ທີ່ຫ້ອງການທະນາຄານ ແຫ່ງ ສປປລາວ ໄດ້ປະກອບສ່ວນໃຫ້ການສະໜັບສະໜູນໃນຄັ້ງນີ້ ເຊິ່ງຊຸດກິລາ ແລະ ເງິນຈຳນວນດັ່ງກ່າວ ແມ່ນຈະໄດ້ນຳໃຊ້ເຂົ້າໃນການສ້າງຂະບວນການແຂ່ງຂັນກິລາບານເຕະ ລະຫວ່າງບັນດາອົງການຈັດຕັ້ງມະຫາຊົນຂອງ 4 ກະຊວງ ທີ່ຈະຈັດຂຶ້ນໃນມໍ່ໆນີ້.
(ພາບ ແລະ ຂ່າວ: ນາງ ສຸພາວັນ ຫອມສະນິດ)