ລະຫວ່າງວັນທີ 3 – 4 ຕຸລາ 2023, ທ່ານ ຈັນທະວົງ ແສນອາມາດມົນຕີ ສະມາຊິກສະພາແຫ່ງຊາດ ປະຈໍາເຂດເລືອກຕັ້ງທີ 13, ຮອງປະທານສູນກາງແນວລາວສ້າງຊາດ ແລະ ຄະນະສະມາຊິກສະພາປະຊາຊົນແຂວງ ປະຈໍາເຂດເລືອກຕັ້ງ ເມືອງເຊໂປນ ໄດ້ລົງພົບປະກັບຜູ້ມີສິດເລືອກຕັ້ງ ແລະ ເຜີຍແຜ່ຜົນສໍາເລັດຂອງກອງປະຊຸມສະໄໝສາມັນ ເທື່ອທີ 5 ຂອງສະພາແຫ່ງຊາດ ຊຸດທີ IX ແລະ ສະພາປະຊາຊົນແຂວງ ຊຸດທີ II ຢູ່ບ້ານໂພນໄຮ, ບ້ານແດນສະຫວັນ ແລະ ສະໂມສອນຫ້ອງວ່າການ ເມືອງເຊໂປນ ໂດຍມີຜູ້ເຂົ້າຮ່ວມທັງໝົດ 655 ຄົນ, ຍິງ 290 ຄົນ.

ໃນໂອກາດການມາເຄື່ອນໄຫວດັ່ງກ່າວ ທ່ານ ພົງຄໍາຮັກ ບຸດທະວົງ ເຈົ້າເມືອງໆ ເຊໂປນ ກໍ່ໄດ້ກ່າວຕ້ອນຮັບ ພ້ອມທັງລາຍງານການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ ຂອງເມືອງ; ຈາກນັ້ນ ສະມາຊິກສະພາແຫ່ງຊາດສະມາຊິກສະພາປະຊາຊົນແຂວງ ກໍ່ໄດ້ເຜີຍແຜ່ຜົນສໍາເລັດຂອງກອງປະຊຸມສະໄໝສາມັນ ເທື່ອທີ 5 ພ້ອມທັງໄດ້ໂອ້ລົມຕໍ່ຜູ້ມີສິດເລືອກຕັ້ງວ່າ ຕ້ອງມີຄວາມສາມັກຄີປອງດອງຊ່ວຍກັນສ້າງສາພັດທະນາ ສາມາດສ້າງລາຍຮັບກຸ້ມຕົນເອງ, ຜະລິດຂາຍເປັນສິນຄ້າ ເພື່ອຫຼຸດຜ່ອນຄ່ານິຍົມການນໍາໃຊ້ຜະລິດຕະພັນຂອງຕ່າງປະເທດ ແລະ ເອົາໃຈໃສ່ນໍາພາສິດສອນລູກ-ຫຼານໃຫ້ໄດ້ເຂົ້າໂຮງຮຽນ; ຕໍ່ມາບັນດາຜູ້ມີສິດເລືອກຕັ້ງກໍ່ໄດ້ມີຄໍາສະເໜີເປັນຕົ້ນ: ກ່ຽວກັບໃຫ້ມີການຊົດເຊີຍຄ່າເນື້ອທີ່ທໍາການຜະລິດ ທີ່ໄດ້ຮັບຜົນກະທົບຈາກການຂຸດຄົ້ນບໍ່ແຮ່, ການອອກໃບຕາດິນຊັກຊ້າ, ການຍົກຍ້າຍຈັດສັນບ້ານປະຊາຊົນທີ່ຕັ້ງຢູ່ພື້ນທີ່ຕໍ່າ ຂຶ້ນພື້ນທີ່ສູງ ເພື່ອບໍ່ໃຫ້ນໍ້າຖ້ວມ, ປັບຂຶ້ນເງິນອູດໜູນນາຍບ້ານ ຄໍາສະເໜີເຫລົ່ານີ້ຄະນະຜູ້ແທນກໍ່ໄດ້ມອບໃຫ້ການນໍາເມືອງ ນໍາໄປຄົ້ນຄວ້າປະສານສົມທົບກັບພາກສ່ວນກ່ຽວຂ້ອງແກ້ໄຂ ແລະ ພ້ອມທັງຮັບເອົາເພື່ອຊຸກຍູ້ພາກສ່ວນທີ່ກ່ຽວຂ້ອງແກ້ໄຂ.

ເນື່ອງໃນໂອກາດການເຄື່ອນໄຫວດັ່ງກ່າວຄະນະຜູ້ແທນກໍ່ໄດ້ນໍາເອົາເຄື່ອງອຸປະກອນການຮຽນ, ອຸປະກອນກິລາ, ເຄື່ອງນຸ່ງຫົ່ມ ແລະ ເກີບແພ ລົງມອບໃຫ້ການນໍາເມືອງ ເພື່ອນໍາໄປມອບໃຫ້ນັກຮຽນ, ນອກຈາກນັ້ນກໍ່ໄດ້ໄປຢ້ຽມຢາມໂຄງການກໍ່ສ້າງ ອະນຸສອນສະຖານ ທ່ານ ມາ ໄຂຄໍາພິທູນ, ບໍລິສັດກວາຊາ ຢາງພາລາ, ບໍລິສັດໝາກເກົ້າ ອີກດ້ວຍ. (ຂ່າວໂດຍ: ສະຫວັດດີ ສີບຸນເຮືອງ)