ເພື່ອຕິດຕາມ-ກວດກາ ແລະ ຊຸກຍູ້ ການຈັດຕັ້ງປະຕິບັດວຽກງານ ການທົດລອງຂຸດຄົ້ນແຮ່ທາດ, ເພື່ອຊອກໃຫ້ເຫັນດ້ານດີ ທີ່ຄວນເສີມຂະຫຍາຍ ແລະ ດ້ານອອນ ທີ່ຈະຕ້ອງຊອກຫາວິທີການແກ້ໄຂ ໃນການຈັດຕັ້ງປະຕິບັດບັນດານິຕິກໍາ ທີ່ພົວພັນກັບວຽກງານຂຶ້ນທະບຽນ ທົດລອງຂຸດຄົ້ນແຮ່ທາດ; ເປັນຂໍ້ມູນພື້ນຖານ ແລະ ບ່ອນອີງລວມລາຍງານ ຕໍ່ຄະນະປະຈໍາສະພາແຫ່ງຊາດ ພິຈາລະນາມີທິດຊີ້ນໍາ ໃຫ້ມີຄວາມຖືກຕ້ອງ, ວ່ອງໄວ, ທັນການ ແລະ ມີຜົນສໍາເລັດຕາມຄາດໝາຍ.

ໃນລະຫວ່າງວັນທີ 26-27 ຕຸລາ 2022 ຜ່ານມານີ້, ທ່ານ ຄໍາມ່ວນ ຊົມສີຫາປັນຍາ ສສຊ, ຮອງປະທານກໍາມາທິການເສດຖະກິດ, ເຕັກໂນໂລຊີ ແລະສິ່ງແວດລ້ອມ, ທ່ານ ບີ ເຮີ່ ຮອງເລຂາທິການ ສພຂ-ຊບ ແລະ ທ່ານ ນາງ ຄໍາຫຼ້າ ທອງສີວອນ ສສຂ ປະເຂດເລືອກຕັ້ງ ເມືອງລ້ອງຊານ, ຮອງປະທານຄະນະກໍາມະການເສດຖະກິດ, ແຜນການ ແລະການເງິນ ພ້ອມດ້ວຍ ພະນັກງານຊ່ວຍວຽກ ສະພາແຫ່ງຊາດ-ສະພາປະຊາຊົນແຂວງໄຊສົມບູນ ໄດ້ລົງເຄື່ອນໄຫວຕິດຕາມ-ກວດກາ ແລະ ຊຸກຍູ້ ການທົດລອງຂຸດຄົ້ນແຮ່ທາດ ຂອງ ບໍລິສັດຮ່ວມທຸລະກິດ ບໍ່ຄໍາທີທີ ໄຊສົມບູນ ຈໍາກັດ ແລະ ບໍລິສັດ ໂຊກມະນີ ມາຍນິ້ງ ຈໍາກັດ ທີ່ເມືອງລ້ອງແຈ້ງ.

ເພື່ອຈັດຕັ້ງປະຕິບັດພາລະໜ້າທີ່ຂອງສະພາປະຊາຊົນແຂວງ ໃນຖານະທີ່ເປັນເສນາທິການ ໃຫ້ແກ່ສະພາແຫ່ງຊາດ ແລະ ເປັນອົງການຕົວແທນແຫ່ງສິດ ແລະ ຜົນປະໂຫຍດຂອງປະຊາຊົນບັນດາເຜົ່າ ທັງສອງພາກສ່ວນ ຈຶ່ງໄດ້ລົງ ຕິດຕາມ-ກວດກາ ແລະ ຊຸກຍູ້ ການເຄື່ອນໄຫວຈັດຕັ້ງປະຕິບັດ ບັນດາໂຄການຈັດຕັ້ງຕ່າງ ທີ່ກໍານົດໃນແຜນພັດທະນາເສດຖະກິດ-ສັງຄົມ ແຜນງົບປະມານແຫ່ງຊາດລັດ 06 ເດືອນທ້າຍປີ 2022  ແລະ ວາລະແຫ່ງຊາດ ວ່າດ້ວຍການແກ້ໄຂຄວາມທຸກຍາກ ດ້ານເສດຖະກິດ-ການເງິນ ຕາມມະຕິກອງປະຊຸມສະພາແຫ່ງຊາດ ໂດຍລົງເລິກຕິດຕາມ-ກວດກາ ແລະ ຊຸກຍູ້ການເຮັດທົດລອງຂຸດຄົ້ນແຮ່ຄໍາ ແລະ ແຮ່ເຫຼັກ.

ການລົງເຄື່ອນໄຫວ ໃນຄັ້ງນີ້, ທາງຄະນະທີມງານ ໄດ້ເຮັດວຽກຮ່ວມກັບ ທ່ານ ໄຊຍະສິດ ລີຊັງດວງພະຈັນ ຄະນະປະຈໍາພັກເມືອງ, ປະທານກວດກາລັດ, ສສຂ-ຊບ ປະຈໍາເຂດເລືອກຕັ້ງ ເມືອງລ້ອງແຈ້ງ ແລະ ໄດ້ຮັບການລາຍງານຫຍໍ້ ຈາກທ່ານ ເອກທອງ ຄໍາບານໄຊ ຮອງປະທານບໍລິສັດ ກ່ຽວກັບການຈັດຕັ້ງປະຕິບັດວຽກງານ ໃນການທົດລອງຊອກຂຸດຄົ້ນ ສໍາຫຼວດແຮ່ຄໍາ ແລະ ແຮ່ເຫຼັກ ຂອງບໍລິສັດ ຮ່ວມທຸລະກິດ ບໍ່ຄໍາທີທີ ໄຊສົມບູນ ຈໍາກັດ (ບໍລິສັດ ລູກຢ້າວ) ໂດຍບໍລິສັດດັ່ງກ່າວ ໄດ້ຮັບສໍາປະທານ ທົດລອງຂຸດຄົ້ນສໍາຫລວດ ໃນເນື້ອທີ 1,77 ກິໂລຕາແມັດ, ຢູ່ເຂດບ້ານນໍ້າຊານ ໃນປັດຈຸບັນແມ່ນຍັງຢູ່ໃນຊ່ວງສຶກສາສໍາຫລວດ, ຂຸດເຈາະ ເກັບຕົວຢ່າງ ແຜນວຽກໃນຕໍ່ໜ້າ ໃນບໍລິສັດຍັງຈະໄດ້ສືບຕໍ່ ສໍາຫລວດອຸມົງ, ວາງແຜນເຈາະສໍາຫລວດ 5 ຈຸດ, ຂຸດຂຸມສ້າງ 17 ຂຸມ, ຂຸດຄຸມຄອງ 10 ຄອງ, ເດີນສໍາຫລວດໜ້າດິນ ຖ້າສໍາຫລວດເຫັນສາຍແຮ່ ຄິດໄລ່ປະລິມານສະສົມ ເປັນເສດຖະກິດ ຈະສະເໜີພາກສ່ວນກ່ຽວຂ້ອງຂຸດຄົ້ນ ແລະຜະລິດແຮ່, ສືບຕໍ່ສ້າງແຜນຄຸ້ມຄອງສິ່ງແວດລ້ອມ ແລະ ສະຫວັດດີການສັງຄົມ.

ມາໃນວັນທີ 27 ຕຸລາ 2002 ໄດ້ຮັບຟັງການລາຍງາຍຫຍໍ້ ຂອງບໍລິສັດ ໂຊກມະນີ ມາຍນິ້ງ ຈໍາກັດ ໂດຍທ່ານ ເພັດສີລາພອນ ອໍານວຍການບໍລິສັດ ໃນການຊອກຄົ້ນ ແລະ ສໍາຫລວດແຮ່ເຫຼັກ ຢູ່ເຂດບ້ານນໍ້າຊານ ເນື້ອທີ່ຂອງການສໍາປະທານ 30,32 ກິໂລຕາແມັດ ພາຍຫຼັງເຊັນສັນຍາແລ້ວ ທາງບໍລິສັດໄດ້ເລີ່ມລົງມື ຈັດຕັ້ງປະຕິບັດແຜນການທີ່ວາງໄວ້ ແລະ ສາມາດປະເມີນບໍລິມາດໄດ້ ຈໍານວນໜຶ່ງ ຄາດຄະເນວ່າເປັນເສດຖະກິດ ຕາມການຄາດຄະເນຂອງວິຊາການ ແລະ ຊ່ຽວຊານ ຂອງບໍລິສັດ ຢູ່ໃນເນື້ອທີ່ເຂດສໍາປະທານ ມີບໍລິມາດແຮ່ສະສົມ ປະມານ ໜຶ່ງລ້ານກວ່າໂຕນ ມາຮອດປີ 2022 ລັດຖະບານໄດ້ມີນະໂຍບາຍໃໝ່ ໃນການຂຸດຄົ້ນແຮ່ທາດ ໂດຍສະເພາະແມ່ນແຮ່ເຫຼັກ ໂດຍອີງຕາມ ດໍາລັດ 61 ຂອງລັດຖະບານ ທາງບໍລິສັດຈຶ່ງໄດ້ຂຸດຄົ້ນທົດລອງ 3,2 ກິໂລຕາແມັດ, ຢູ່ໃນເຂດສໍາປະທານ ແລະ ບໍລິສັດໄດ້ຮັບການເຫັນດີ ຈາກລັດຖະບານ ໃຫ້ຂຸດຄົ້ນທົດລອງ ແລະ ໄດ້ເຊັນສັນຍາກັບ ອົງການປົກຄອງແຂວງໄຊສົມບູນ ໃນວັນ 24 ພຶດສະພາ 2022 ຜ່ານມາ ແລະ ມາຮອດໃນປັດຈຸບັນນີ້, ບໍລິສັດໄດ້ຂາຍແຮ່ອອກຕ່າງປະເທດແລ້ວ ຈໍານວນ 7000 ກວ່າໂຕນ ແລະ ແຜນການໃນປີ 2023 ຄາດຄະເນວ່າ: ຈະສົ່ງແຮ່ຂາຍອອກຕ່າງປະເທດ ບໍ່ໃຫ້ຫຼຸດ 50,000 ກວ່າໂຕນ, ສໍາລັບໜ້າວຽກອອກຈາກເຂດຂຸດຄົ້ນທົດລອງແລ້ວ ບໍລິສັດຍັງສືບຕໍ່ສໍາຫລວດ ເນື້ອທີທີ່ເຫຼືອ ໃນປັດຈຸບັນນີ້ ກໍາລັງກະກຽມລົງມືເຈາະ ເຮັດທໍລະນີຟີຊິກ ຕາມມາດຖານສາກົນ ໃນການສໍາຫລວດຄາດຈະໃຫ້ສໍາເລັດ ພາຍໃນ 02 ປີ ຂ້າງໜ້າ.

ພາຍຫຼັງຮັບຟັງການລາຍງານ ບັນດາທ່ານ ສສຊ-ສສຂ ຕະລອດທີມງານ ກໍໄດ້ພາກັນລົງເບິ່ງພາກສະໜາມ ບໍລິສັດ ມາຍນິ້ງ ຈໍາກັດ ຢູ່ເຂດບ້ານນໍ້າຊານ

ພາບ ແລະ ຂ່າວ (ນາງ ອໍາໄພພອນ ແກ້ວວິໄລ)