ໃນລະຫວ່າງວັນທີ 19 ຫາ 21 ກັນຍາ 2023 ທີຜ່ານມານີ້ ນໍາໂດຍ ທ່ານ ລໍາໄມ ກູດລາວົງ ຮອງປະທານສະພາປະຊາຊົນແຂວງ, ສະມາຊິກສະພາແຫ່ງຊາດ ປະຈໍາເຂດເລືອກຕັ້ງທີ 10 ແຂວງວຽງຈັນ ພ້ອມດ້ວຍຄະນະສະມາຊິກສະພາປະຊາຊົນແຂວງປະຈໍາເຂດເລືອກຕັ້ງເມືອງຊະນະຄາມ ໄດ້ລົງເຄື່ອນໄຫວພົບປະຜູ້ມີສິດເລືອກຕັ້ງ ເພື່ອໂຄສະນາເຜີຍແຜ່ເນື້ອໃນຜົນສໍາເລັດກອງປະຊຸມສະໄໝສາມັນເທື່ອທີ 5 ຂອງສະພາແຫ່ງຊາດ ຊຸດທີ IX ແລະ ກອງປະຊຸມສະໄໝສາມັນເທື່ອທີ 5 ຂອງສະພາປະຊາຊົນແຂວງວຽງຈັນ ຊຸດທີ II ໄດ້ລົງເຄື່ອນໄຫວຢູ່ ຫ້ອງວ່າການປົກຄອງເມືອງ, ບ້ານສີພູມ, ບ້ານຕາກແດດ, ບ້ານປາກມີ, ບ້ານນາປາຝາ, ບ້ານນາພຽງ, ເຂົ້າຮ່ວມມີບັນດາສະມາຊິກພັກ, ພະນັກງານ-ລັດຖະກອນ, ທະຫານ, ຕໍາຫຼວດ, ພໍ່ຄ້າຊາວຂາຍ ແລະ ປະຊາຊົນບັນດາເຜົ່າຢູ່ ເມືອງຊະນະຄາມແຂວງວຽງຈັນ

ບັນດາເນື້ອໃນເອກະສານທີ່ນໍາໄປເຜີຍແຜ່ ປະກອບມີມະຕິສໍາຄັນຕ່າງໆ ທີ່ໄດ້ຮັບຮອງໃນກອງປະຊຸມສະໄໝສາມັນເທື່ອທີ 5 ຂອງສະພາແຫ່ງຊາດ ຊຸດທີ IX ແລະ ກອງປະຊຸມສະໄໝສາມັນເທື່ອທີ 5 ຂອງສະພາປະຊາຊົນແຂວງວຽງຈັນ ຊຸດທີ II ໂດຍຕິດພັນກັບການເຜີຍແຜ່ພາລະບົດບາດ, ສິດ ແລະ ໜ້າທີຂອງ ສສຊ ແລະ ສສຂ ໃຫ້ສະມາຊິກພັກ, ພະນັກງານ-ລັດຖະກອນ ແລະ ພໍ່ແມ່ປະຊາຊົນໄດ້ຮັບຮູ້, ເຊື່ອມຊຶມເນື້ອໃນກອງປະຊຸມ ແລະ ແນວທາງນະໂຍບາຍຂອງພັກ-ລັດ; ຈາກນັ້ນ, ຍັງໄດ້ຮັບຟັງຄໍາຄິດຄໍາເຫັນ, ຄໍາສະເໜີຄວາມຂັດຂ້ອງໝອງໃຈ, ຄວາມຫຍຸ້ງຍາກລໍາບາກໃນການດໍາລົງຊິວິດຂອງພໍ່ແມ່ປະຊາຊົນ ເຊິ່ງກໍ່ໄດ້ມີຫຼາຍບັນຫາທີ່ສະເໜີຕໍ່ ສສຊ ແລະ ສສຂ ພ້ອມທັງໄດ້ຊີ້ແຈງອະທິບາຍ ແລະ ໃຫ້ຄວາມກະຈ່າງແຈ້ງ ຕໍ່ພໍ່ແມ່ປະຊາຊົນໄດ້ຮັບຊາບ ແລະ ນໍາເອົາທຸກຄໍາສະເໜີຂອງປະຊາຊົນໄປສົມທົບກັບຂະແໜງການ, ເມືອງ, ແຂວງ ແລະ ພາກສ່ວນທີ່ກ່ຽວຂ້ອງ ເພື່ອຄົ້ນຄ້ວາພິຈາລະນາແກ້ໄຂຕາມຂັ້ນຕອນແລະ ລະບຽບການວາງອອກ.