(ສພຊ) ກອງທຶນຊ່ວຍເຫຼືອສັງຄົມຂອງສະພາແຫ່ງຊາດ ໄດ້ມອບເຂົ້າສານໜຽວ ຈຳນວນ 5 ໂຕນ ມູນຄ່າ 70 ລ້ານກີບ ແລະ ເງິນສົດ ຈຳນວນ 50 ລ້ານກີບ ເພື່ອຊ່ວຍເຫຼືອປະຊາຊົນ ຜູ້ທີ່ໄດ້ຮັບຜົນກະທົບຈາກອຸທົກກະໄພ ຢູ່ບັນດາເມືອງຂອງແຂວງສະຫວັນນະເຂດ ໂດຍການມອບຂອງທ່ານ ປອ. ນາງ ສູນທອນ ໄຊຍະຈັກ ຮອງປະທານສະພາແຫ່ງຊາດ ທັງເປັນສະມາຊິກສະພາແຫ່ງຊາດ ປະຈຳເຂດເລືອກຕັ້ງທີ 13 ແຂວງສະຫວັນນະເຂດ ແລະ ຕາງໜ້າຮັບໂດຍທ່ານ ບຸນໂຈມ ອຸບົນປະເສີດ ເຈົ້າແຂວງ ແຂວງສະຫວັນນະເຂດ ແລະ ມີບັນດາທ່ານສະມາຊິກສະພາແຫ່ງຊາດ, ສະພາປະຊາຊົນແຂວງ ແລະ ພາກສ່ວນກ່ຽວຂ້ອງ ເຂົ້າຮ່ວມເປັນສັກຂີພິຍານ.

ໂອກາດດຽວກັນນີ້, ທ່ານ ບຸນໂຈມ ອຸບົນປະເສີດ ກໍໄດ້ມອບໃບຍ້ອງຍໍໃຫ້ກອງທຶນຊ່ວຍເຫຼືອສັງຄົມຂອງສະພາແຫ່ງຊາດ ເພື່ອຍ້ອງຍໍຜົນງານໃນການປະກອບສ່ວນຊ່ວຍເຫຼືອສັງຄົມຂອງສະພາແຫ່ງຊາດ ໃຫ້ແກ່ປະຊາຊົນແຂວງສະຫວັນນະເຂດທີ່ໄດ້ຮັບຜົນກະທົບຈາກໄພທຳມະຊາດ ຕາມຂໍ້ຕົກລົງເລກທີ 1677/ຈຂ.ສຂ ທະບຽນເລກທີ 1414 ລົງວັນທີ 23/8/2023 ເຊິ່ງຕາງໜ້າຮັບໂດຍທ່ານ ປອ. ນາງ ສູນທອນ ໄຊຍະຈັກ ຮອງປະທານສະພາແຫ່ງຊາດ.