(ສພຊ) ໃນວັນທີ 23 ມັງກອນ 2023 ທີ່ຫ້ອງປະຊຸມສະພາແຫ່ງຊາດ, ໄດ້ມີການທາບທາມບຸກຄະລາກອນເຂົ້າໃນແຜນກຳນົດພະນັກງານນຳພາ-ຄຸ້ມຄອງ ປະເພດທີ I ທີ່ຂຶ້ນກັບສິດຄຸ້ມຄອງຂອງກົມການເມືອງ ແລະ ຄະນະເລຂາທິການສູນກາງພັກ ໂດຍການເປັນປະທານຂອງສະຫາຍ ປອ. ໄຊສົມພອນ ພົມວິຫານ ກຳມະການກົມການເມືອງສູນກາງພັກ, ປະທານສະພາແຫ່ງຊາດ; ມີສະຫາຍ ປອ. ນາງ ສູນທອນ ໄຊຍະຈັກ ເລຂາທິການສູນກາງພັກ, ຮອງປະທານສະພາແຫ່ງຊາດ; ສະຫາຍ ນາງ ປິ່ງຄຳ ລາຊະສິມມາ ກຳມະການສູນກາງພັກ, ເລຂາທິການສະພາແຫ່ງຊາດ; ບັນດາປະທານ-ຮອງປະທານກຳມາທິການ, ຄະນະເລຂາທິການ, ສະຖາບັນຄົ້ນຄວ້ານິຕິກຳສະພາແຫ່ງຊາດ, ໜ່ວຍງານຈາກຄະນະຈັດຕັ້ງສູນກາງພັກ, ຄະນະກົມ ແລະ ອົງການຈັດຕັ້ງລັດທຽບເທົ່າກົມ (ສູນ, ຫ້ອງການຄຸ້ມຄອງຫໍສະພາແຫ່ງຊາດ) ເຂົ້າຮ່ວມຢ່າງພ້ອມພຽງ.

ທັງນີ້, ເພື່ອເປັນການສ້າງແຜນກຳນົດພະນັກງານນໍາພາຄຸ້ມຄອງ ປະເພດທີ I (1.2; 1.3; 1.4 ) ພາຍໃນສະພາແຫ່ງຊາດ ແມ່ນການຄາດຄະເນ, ການເລືອກເຟັ້ນພະນັກງານນໍາພາ-ຄຸ້ມຄອງ ເພື່ອຈັດວາງເຂົ້າໃນແຜນ ເຊິ່ງປະກອບມີ ເລຂາ, ຫົວໜ້າສໍານັກງານ, ຮອງເລຂາ, ຮອງຫົວໜ້າສໍານັກງານ, ຄະນະບໍລິຫານງານພັກສະພາແຫ່ງຊາດ, ບັນດາຄະນະກຳມາທິການ, ຄະນະເລຂາທິການ, ສະຖາບັນຄົ້ນຄວ້ານິຕິກຳສະພາແຫ່ງຊາດ, ຫົວໜ້າກົມ, ຫົວໜ້າອົງການຈັດຕັ້ງລັດທຽບເທົ່າກົມ ແນໃສ່ຮັບປະກັນທາງດ້ານຈຳນວນ ແລະ ຄຸນນະພາບ, ໂຄງປະກອບບຸກຄະລາກອນໃຫ້ຄົບຊຸດ, ຮັບປະກັນລັກສະນະສືບທອດ, ປ່ຽນແທນ ຕໍ່ເນື່ອງໃນສະເພາະໜ້າ ແລະ ຍາວນານ; ເພື່ອເປັນການກະກຽມດ້ານບຸກຄະລາກອນ ໃຫ້ສາມາດຕອບສະໜອງຕາມຄວາມຮຽກຮ້ອງຕ້ອງການຂອງບັນດາຕຳແໜ່ງພະນັກງານນຳພາ-ຄຸ້ມຄອງ ແຕ່ລະຂັ້ນ ພາຍໃນສະພາແຫ່ງຊາດ ທັງຮັບປະກັນລັກສະນະເປີດກວ້າງ, ມີຄວາມໂປ່ງໃສ, ພາວະວິໄສ, ຮອບດ້ານ.

ໃນພິທີ, ໄດ້ຮັບຟັງການຜ່ານບົດສະຫຼຸບຕີລາຄາການຈັດຕັ້ງປະຕິບັດແຜນການສ້າງພະນັກງານນຳພາ-ຄຸ້ມຄອງ ພາຍໃນສະພາແຫ່ງຊາດ (ຊຸດທີ VII); ມະຕິຂອງກົມການເມືອງສູນກາງພັກ ສະບັບເລກທີ 032/ກມສພ, ລົງວັນທີ 03/01/2018 ວ່າດ້ວຍວຽກງານການສ້າງແຜນກຳນົດພະນັກງານນຳພາ-ຄຸ້ມຄອງ-ນຳພາ; ມະຕິຂອງກົມການເມືອງສູນກາງພັກ ສະບັບເລກທີ 030/ກມສພ, ລົງວັນທີ 03/01/2018 ວ່າດ້ວຍມາດຕະຖານຂອງພະນັກງານນຳພາ-ຄຸ້ມຄອງ; ຄຳແນະນຳຂອງຄະນະຈັດຕັ້ງສູນກາງພັກ ສະບັບເລກທີ 292/ຄຈສພ, ລົງວັນທີ 26/04/2018 ແລະ ແນະນຳວິທີການທາບທາມ ແລະ ດຳເນີນການທາບທາມ ຮອບທີ I ຂັ້ນສູນກາງຄຸ້ມຄອງ; ຈາກນັ້ນ, ກອງປະຊຸມກໍໄດ້ຢາຍບັດທາບທາມ ຮອບທີ I.
ການທາບທາມດັ່ງກ່າວ ແມ່ນຈະໄດ້ສືບຕໍ່ທາບທາມຕື່ມອີກຮອບທີ II ແລະ III ຈົນຮອດວັນທີ 27 ມັງກອນ 2023 ຈຶ່ງຈະສຳເລັດ.
(ຂ່າວ: ນາງ ສຸພາວັນ ຫອມສະນິດ; ພາບ ນາງ ກຸກກິກ ບຸດດາໄຊ)