(ສພຊ) – ກອງປະຊຸມເຝິກອົບຮົມທັກສະໃນການບັນຊາກອງປະຊຸມໃຫ້ແກ່ພະນັກງານນຳພາ-ຄຸ້ມຄອງຂັ້ນສູງຂອງ 6 ກໍາມາທິການຂອງສະພາແຫ່ງຊາດ ແລະ ສະພາປະຊາຊົນຂັ້ນແຂວງ 8 ແຂວງ: ນະຄອນຫຼວງວຽງຈັນ, ຜົ້ງສາລີ, ຫຼວງນ້ຳທາ, ອຸດົມໄຊ, ບໍ່ແກ້ວ, ຫຼວງພະບາງ, ໄຊຍະບູລີ ແລະ ບໍລິຄຳໄຊ ໄດ້ຈັດຂຶ້ນໃນວັນທີ 26-27 ສິງຫາ 2024 ທີ່ແຂວງວຽງຈັນ ໂດຍການເປັນປະທານຂອງທ່ານ ປອ. ນາງ ສູນທອນ ໄຊຍະຈັກ ຮອງປະທານສະພາແຫ່ງຊາດ ເຊິ່ງທ່ານປະທານກອງປະຊຸມໄດ້ມີຄຳເຫັນເນັ້ນໜັກເຖິງຈຸດປະສົງຕົ້ນຕໍຂອງການເຝິກອົບຮົມຄັ້ງນີ້ ແມ່ນເພື່ອບຳລຸງຍົກລະດັບທັກສະການບັນຊາກອງປະຊຸມໃຫ້ແກ່ພະນັກງານນຳພາ-ຄຸ້ມຄອງຂັ້ນສູງຂອງສະພາແຫ່ງຊາດ ແລະ ສະພາປະຊາ ຊົນຂັ້ນແຂວງ ເຊິ່ງຈະເປັນໂອກາດດີທີ່ໄດ້ແລກປ່ຽນຄວາມເຫັນ, ຖອດຖອນບົດຮຽນ ແລະ ປະສົບການເຊິ່ງກັນແລະກັນ ເພື່ອສ້າງຄວາມເຂັ້ມແຂງໃຫ້ແກ່ການນໍາຂອງສະພາແຫ່ງຊາດ ແລະ ສະພາປະ ຊາຊົນຂັ້ນແຂວງໃນປັດຈຸບັນ ແລະ ຕໍ່ໜ້າ.
ບັນດາທ່ານການນໍາຂອງສະພາແຫ່ງຊາດ ແລະ ສະພາປະຊາຊົນຂັ້ນແຂວງ ໄດ້ຮັບຟັງການສະເໜີ 2 ຫົວຂໍ້ຄື: ທັກສະໃນການບັນຊາກອງປະຊຸມຕາມພາລະບົດບາດຂອງສະພາແຫ່ງຊາດ ກໍຄືສະພາປະຊາຊົນຂັ້ນແຂວງ ສະເໜີໂດຍທ່ານ ປອ. ນາງ ສູນທອນ ໄຊຍະຈັກ ແລະ ການບັນຊາກອງປະຊຸມທົ່ວໄປ ສະເໜີໂດຍ ທ່ານ ສີພຸກ ວົງພັກດີ ອະດີດຮອງລັດຖະມົນຕີກະຊວງພາຍໃນ. ຈາກນັ້ນ, ບັນດາຜູ້ເຂົ້າຮ່ວມໄດ້ມີການສົນທະນາແລກປ່ຽນຄໍາຄິດຄໍາເຫັນນໍາກັນຢ່າງກົງໄປກົງມາ, ຟົດຟື້ນ, ມີການຍົກເອົາບົດຮຽນໃນການບັນຊາກອງປະຊຸມຢູ່ໃນເຂດເລືອກຕັ້ງຕ່າງໆ ມາແລກປ່ຽນນໍາກັນ ອັນເຮັດໃຫ້ບັນ ດາທ່ານທີ່ເຂົ້າຮ່ວມກອງປະຊຸມ ສາມາດໄດ້ຮຽນຮູ້ຕໍ່ປະສົບການຕົວຈິງຫຼາຍຂຶ້ນ, ເປັນການສ້າງຄວາມເຂັ້ມແຂງແກ່ການນໍາຂອງສະພາແຫ່ງຊາດ ແລະ ສະພາປະຊາຊົນຂັ້ນແຂວງ.
(ນາງ ອານິຕາ ມ່ວນສະຫວັດ)