ວັນທີ 12 ທັນວາ 2023 ຢູ່ທີ່ຫ້ອງປະຊຸມ ຂອງສະພາປະຊາຊົນແຂວງໄຊຍະບູລີ ໄດ້ຈັດຕັ້ງການປະເມີນຜົນງານ ຂອງຄະນະນໍາພາຍໃນສະພາປະຊາຊົນແຂວງ ປະຈໍາປີ 2023 ຂຶ້ນຢ່າງເປັນທາງການ ໂດຍການເປັນປະທານຂອງທ່ານ ບຸນລ້ວນ ຊົມສີຫາປັນຍາ ກຳມະການພັກແຂວງ, ຮອງປະທານສະພາປະຊາຊົນແຂວງ, ມີບັນດາຄະນະປະຈໍາສະພາປະຊາຊົນແຂວງ, ປະທານ-ຮອງປະທານຄະນະກໍາມະການ, ຄະນະເລຂາທິການ, ຮອງຫົວໜ້າພະແນກພາຍໃນແຂວງ, ຫົວໜ້າ-ຮອງຫົວໜ້າຂະແໜງການພາຍໃນສະພາປະຊາຊົນແຂວງ ແລະ ຄະນະຮັບຜິດຊອບຈາກພະແນກພາຍໃນແຂວງ, ກອງເລຂາກອງປະຊຸມ ເຂົ້າຮ່ວມຢ່າງພ້ອມພຽງ.

ກ່ອນດໍາເນີນການປະເມີນຜົນງານ ຄະນະຮັບຜິດຊອບການປະເມີນໄດ້ກ່າວຈຸດປະສົງລະດັບຄາດໝາຍ, ຮັບຟັງຄໍາເຫັນຈາກປະທານກອງປະຊຸມຕໍ່ກັບບັ້ນປະເມີນຜົນງານຂອງຄະນະນໍາ, ການສະເໜີຜ່ານຜົນງານຕົນເອງຂອງຄະນະນໍາ ແລະ ຮັບຟັງການປະກອບຄໍາຄິດຄໍາເຫັນຈາກໝູ່ຄະນະ ໂດຍຜ່ານການດໍາເນີນການປະເມີນຕົວຈິງ ເຫັນໄດ້ວ່າ ບັນດາຄະນະນໍາ ກໍຄືການນໍາພາຍໃນສະພາປະຊາຊົນແຂວງ ຍັງຮັກສາໄດ້ຄຸນທາດການເມືອງ, ຄຸນສົມບັດສິນທໍາປະຕິວັດ ເຮັດສໍາເລັດໜ້າທີ່ວຽກງານຕາມຂອບເຂດຄວາມຮັບຜິດຊອບຂອງຕົນເປັນຢ່າງດີ ແລະ ບໍ່ມີຜົນເສຍຫາຍ ຫຼື ມີຄວາມຜິດພາດຕໍ່ການຈັດຕັ້ງປະຕິບັດວຽກງານຂອງຕົນແຕ່ຢ່າງໃດ ເຊິ່ງສ່ອງແສງໃຫ້ເຫັນຜົນງານຂອງບຸກຄົນ ແລະ ກົມກອງ-ການຈັດຕັ້ງ ໃນການກຳແໜ້ນລັດຖະທໍາມະນູນ, ກົດໝາຍ, ລະບຽບຫຼັກການ, ຮັກສາຄວາມສາມັກຄີ ແລະ ມີຄວາມເປັນເອກະພາບສູງ ເຊິ່ງແມ່ນຜົນງານຕົວຈິງທີ່ສາມາດກວດກາວັດແທກໄດ້ຜ່ານການປະເມີນໃນຄັ້ງນີ້.