ໃນລະຫວ່າງວັນທີ 19-20 ທັນວາ 2024 ຢູ່ທີ່ຫ້ອງປະຊຸມໃຫຍ່ຂອງພະແນກແຜນການ ແລະ ການລົງທຶນແຂວງ ໄດ້ເປີດກອງປະຊຸມຍົກສູງຂີດຄວາມສາມາດໃນການຄົ້ນຄວ້ານິຕິກຳ ໃຫ້ແກ່ພະນັກງານ-ລັດຖະ ກອນສະພາປະຊາຊົນແຂວງ ຮ່ວມກັບພະແນກການທີ່ກ່ຽວຂ້ອງຂອງແຂວງ ແລະ ຂະແໜງການຊ່ວຍວຽກຂອງສະພາປະຊາຊົນແຂວງຂຶ້ນ, ພາຍໃຕ້ການເປັນປະທານ ຂອງທ່ານ ວຽງໄຊ ສີວິໄລ ຮອງປະທານສະພາປະຊາຊົນແຂວງ, ມີບັນດາທ່ານຄະນະປະຈຳສະພາປະຊາຊົນແຂວງ, ສະມາຊິກສະພາປະຊາຊົນແຂວງ ປະຈຳເຂດເລືອກຕັ້ງເມືອງ, ບັນດາທ່ານຫົວໜ້າ-ຮອງຫົວໜ້າພະແນກການ, ວິທະຍາກອນ ມາຈາກສະພາແຫ່ງຊາດ ແລະ ບັນດາພະແນກການທີ່ກ່ຽວຂ້ອງ ແລະ ພະນັກງານຈາກສະພາປະຊາຊົນແຂວງ ແລະ ບັນດາຂະແໜງການທີ່ກ່ຽວຂ້ອງເຂົ້າຮ່ວມ.

  ຈຸດປະສົງໃນການດຳເນີນກອງປະຊຸມໃນຄັ້ງນີ້ ເພື່ອເປັນການສ້າງຄວາມເຂັ້ມແຂງ ໃຫ້ແກ່ສະມາຊິກສະພາແຫ່ງຊາດ, ສະມາຊິກສະພາປະຊົນແຂວງ, ພະນັກງານ-ລັດທະກອນ ພາຍໃນສະພາປະຊາຊົນແຂວງ, ພະນັກງານຊ່ວຍວຽກ ສສຂ ປະຈຳເມືອງ, ບັນດາພະແນກການທີ່ກ່ຽວຂ້ອງ ໄດ້ຮັບຮູ້ ແລະ ເຂົ້າໃຈກ່ຽວກັບຂັ້ນຕອນ ແລະ ຫຼັກການໃນການຂຽນແຜນພັດທະນາເສດຖະກິດ-ສັງຄົມຂອງແຂວງ, ແຜນການລົງທຶນແຫ່ງລັດຂອງແຂວງ, ແຜນງົບປະມານ ແລະ ການຈັດສັນງົບປະມານຂອງແຂວງ, ຂັ້ນຕອນໃນການຄົ້ນຄ້ວາ ແລະ ຮັບຮອງເອົາແຜນພັດທະນາເສດຖະກິດ-ສັງຄົມ , ແຜນການລົງທຶນຂອງລັດ ແລະ ແຜນງົບປະມານ ໃນການຄົ້ນຄ້ວາ, ວິເຄາະ ວິໃຈບັນຫາ ເພື່ອຮັບປະກັນດ້ານປະສິດທິພາບ, ປະສິດທິຜົນ, ທັນຕາມກຳນົດເວລາ ແລະ ສອດຄ່ອງຕາມກົດໝາຍ.

ໃນຕອນທ້າຍ ປະທານກອງປະຊຸມຍັງໄດ້ ເນັ້ນໜັກໃຫ້ ສະມາຊິກສະພາແຫ່ງຊາດປະຈຳເຂດເລືອກຕັ້ງທີ່9, ສະມາຊິກສະພາປະຊາຊົນແຂວງ, ພະນັກງານ-ລັດຖະກອນພາຍໃນສະພາປະຊາຊົນແຂວງ ແລະ ບັນດາພະແນກການທີ່ກ່ຽວຂ້ອງ ສືບຕໍ່ສຶກສາຄົ້ນຄ້ວາ ຕໍ່ເນື້ອໃນທີ່ນຳມາສຳມະນາໃນຄັ້ງນີ້ ໄປໝູນໃຊ້ເຂົ້າໃນການປະຕິບັດໜ້າທີວຽກງານຂອງບັນດາຂະແໜງການຂອງຕົນເຮັດໃຫ້ວຽກງານໃນທຸກຂົງເຂດມີຄວາມເປັນເອກະພາບ ຖືກຕ້ອງ, ສອດຄອງກັບລະບຽບ, ກົດໝາຍທີ່ວ່າງໄວ້.

ສະພາປະຊາຊົນແຂວງຊຽງຂວາງ

ຂ່າວໂດຍ: ບຸນສີ ສິດທິເດດ